Lamatua' Yesus fee nekendandaa' so'al atahori nda mana nau reu sia fefeta kakab'i' sa
22
Basa ma Yesus 'ola' noo se fai nendi' nekendandaa' nae, 2 “Lamatualain to'u parendan naa, 'ona' mane' esa tao fefeta kakab'i' fee ana tou na. 3 Lele' ara sad'ia rala fefetas ma, ana denu ate na ra reu rafad'e atahori nenenerolo' ra 'oi, ‘'Ima, te fefetas sangga nae mulai ena.’ Te atahori naa ra nda nau rema sa.4 Basa ma, ate ra bali' reu rafad'e mane' a. Mane' a rena nala ma ana denu aten laen fai nae, ‘Hei mii mifad'e atahori naa ra, fo rema leo, te fefetas nenesad'ia' ena. Au tati sapi a ena, ma tunu-nasu 'ala e malad'an seli. Denu se rema raa fefetas leo, huu basa' e nenesad'ia' ena.’ 5 Ate naa ra reu rafad'e ra'o naa. Te atahori nenenerolo' ra nda nau taoafi' sa. Ruma osi rala reu, ruma reu sia mamana tao ue-osa na ra, 6 ma ruma to'u rala mane' a ate na ra, de poko-paru se losa ara mate.
7 Mane' a rena 'ona' naa ma, ana namanasa nala seli. Basa ma, ana denu sold'ad'u na ra reu tati risa atahori mana tati risa ate na ra. Basa de, sold'ad'u ra hotu-lalangge hendi nusa' naa losa taa noo rae a.
8 Basa ma, mane' a no'e nala ate laen na ra de nafad'e se nae, ‘Fefeta kakab'i' a nenesad'ia' ena, te atahori fo au 'urolo' ra, nda randaa tungga au fefeta ngga sa. 9 Ia naa, ama mii sia dala rarame' fo mindaa moo sud'i 'a see, na, mo'e mendi se.’ 10 Basa de, ate naa ra lao reu sia dala rarame' ra. Ara randaa roo atahori hetar mia naa, de roo se risi' fefeta kakab'i' a. Hambu atahori malole' ma atahori nda malole' ra sa rema tao rasofe mamana fefetas a.
11 Basa ma, mane' a nisi' mamana fefetas rala neu de mete rereo' fui' ra. Ma ana nita atahori esa nda pake bu'a-b'a'u fefetas sa.a 12 Boe ma mane' a natane nae, ‘Hee, toronoo'! Saa de misi' mamana' ia, na, nda pake bua-b'a'u fefetas sa?’ Te atahori naa titindindii 'ona' nggoa' e. 13 Boe ma mane' a parenda ana mana tungga na ra nae, ‘Pa'a atahori ia ei-lima na ra, fo to'u nggari e dea neu. Hela e nggae ma doid'oso sia mamana ma'ahatu' naa.’b
14 'Ona' naa boe, Lamatualain narolo atahori hetar, te pili nala 'aka' hid'a 'a dad'i neu Eni atahori na.”
Lamatua' Yesus 'ola' so'al bae bea neu mana parenda ra
15 Atahori Farisi ra rena rala Yesus 'ola' na'o naa, ma ara rala hara' fo rae te'e-sii ma fua sala' neu E. 16 Basa ma ara denu ana mana tungga na ra reu roo atahori mia Herod'es partei politik na, fo reu raselu-b'ale roo Yesus. Ara koa-b'o'u Yesus rae, “Ama Meser! Hai mihine Ama' ralan ndoos. Ama' nda mana peko-leleko' ma nda pili-tad'a sa. Ama' nanori 'a Lamatualain Ded'ea-'o'olan noo matetu'. 17 De ia naa, hai mae mitane dala' esa. Tungga hita atoran agama Yahud'in, ata musi bae bea neu mana parenda Roma manen, do 'afi'?”
18 Te Yesus nahine ara rae te'e-sii Eni, fo Ana 'ola' lab'an mana parenda Roma. Boe ma Ana nataa nae, “Mema' hei atahori mana dea-rala'! Ta'o bee de hei mae te'e-sii Au mendi' so'al naa? 19 Mitud'u sob'a neu Au doi fula' esa fo atahori bae rendi' neu bea!” Boe ma ara ratud'u doi fula' neu E.
20 Basa ma, Ana natane se nae, “Ia seka mata-aon ia? Ma ia seka naran ia?”
21 Ara rataa rae, “Naa keser, mana parenda Roma mane monae na.”
Boe ma Yesus nafad'e se nae, “Naa! Mete ma ta'o naa, hei fee neu mana parenda, saa fo mana parenda hak na. Ma fee neu Lamatualain saa fo Lamatualain hak na.”
22 Rena Ana nataa na'o naa, ma basa se heran-heran, huu Ana 'ola' naa ndaa. Naa de ara nda te'e-sii rala E sa. Boe ma ara lao hela E.
Lamatua' Yesus nanori so'al atahori mates nasod'a bali', noo atahori sao sia sorga do hoko'?
23 Sia naa hambu atahori mia partei Saduki boe. Atahori mia partei Saduki ia, nanori nae, atahori mates ra nda rasod'a bali' sa. Fai' naa, ara rae sangga dala' fo te'e-sii Yesus. Naeni de ara rema raselu-b'ale roo E rae,c 24 “Ama Meser! Ba'i Musa sura' hela fee hai 'ad'at ia nae: mete ma tou' esa mate hela saon, te nda maana' sa, na, tou' naa 'od'in musi sao nala ina falu naa, naa fo ana bonggi fee 'a'an mana mate' a tititi-nonosi'.d 25 Mema', fe'esa'an ba'i Musa nanori ta'o naa, te ia naa hai mae mitane ta'o ia: hambu tou' hitu 'od'i-'a'a bonggi'. Uluk a sao, te mate, nda maana' sa. Boe ma 'od'in mana tungga e, sao nala ina falu naa. 26 Nda doo' sa ma ana mate fai, ma nda maana' sa boe. 'Ona' naa boe 'od'in katelun, ana sao nala ina falu naa, te basa ma mate fai, te nda maana' sa boe. 'Ona' naa rakandondoo 'a losa 'od'in muri' a mate, nda lao hela ana' sa. 27 Basa ma, ina falu a mate.
28 Naa! Hai mae mitane ta'o ia: Ina' naa sao nala tou' hitu ena. Mete ma neu matete'en, Lamatualain nafefela bali' atahori mana mate' ra, na, ina' ia dad'i tou' bee ka saon?”
29 Basa ma, Yesus nataa nae, “Mete ma hei mitane ta'o naa, na, hei sala nae' ena ma! Huu hei nda mihine Lamatualain Susuran liin sa. Ma nda mihine koasa manaselin sa! 30 Matetun, ta'o ia. Dei fo, mete ma Lamatualain nafefela bali' atahori mana mate' ra, na, ara esa nda sao esa sa ena, 'ona' ate na ra mana sia sorga ra boe.
31 Boe ma Au 'ae 'ola' so'al atahori mana mate' ra rasod'a bali', do hoko'. Sia ba'i Musa susura na ra nened'ui' 'oi hau huu ana' nenetunu-hotu' te nda kad'e hendi e sa. Mia dud'uit naa, hita tahine tae, atahori mana mate' ra bisa rasod'a bali' boe. Huu Lamatualain nafad'e ba'i Musa mia naa nae,
32 ‘Au ia, bei-ba'i ma ra Lamatualain na.
Naeni ba'i Abraham, ba'i Isak, ma ba'i Yakob.
Basa se be'utee neu Au rakandoo losa ia nema.’
Naa! Hita tahine tae, lele' Lamatualain 'ola' na'o naa, te basa ba'i' naa ra mate doo' ena. Huu Lamatualain nae, Eni fe'e dad'i nakandoo sira Lamatua na. Naeni de ata tahine tae, mae ara mate doo' ena o, ao samana na ra rasod'a rakandoo. De mae atahori mate o, ana nasod'a bali'. Huu 'aka' atahori masod'a' be'utee neu Lamatualain, nda atahori mates ra sa, to?!”e
33 Atahori Saduki ra rena Yesus nanori na'o naa, ma ara nda rita' rae bale rae saa sa ena boe. Te atahori hetar naa ra heran de 'ola' rae, “Awii! Atahori ia nenorin manaseli' teb'e, o!”
Lamatua' Yesus nanori so'al parenda' pantiin manaseli' a
34 Lele' atahori Farisi ra rena rae, Yesus nasenggi' atahori Saduki ra, ma ara ra'ab'ue reu esa de rae ratane rasafafali E. 35 Sira mana mahine agaman esa nae te'e-sii sob'a Yesus nae, 36 “Ama Meser! Au 'ae 'utane ta'o ia: hita 'ad'at na hohoro-lalanen, noo agama parenda na ra, hetar. Mia basa parenda' fo mana mia ba'i Musa naa, bee ka manaseli' lena'?”
37 Boe ma Ana nataa nae, “Parenda' fo manaseli' sia Lamatualain Susura Meumaren nae, ta'o ia:
‘Lamatualain naa, hei Lamatua ma.
De ama musi sue E lena' mia basa' e.
Huu naa, hei musi hii E mikindoo 'a,
mihine E,
ma manggate tao ues tungga Hihii-nanau na.’f
‘Musi sue atahori laen ra, 'ona' ho sue aom boe.’g
40 Parenda' rua ra ia ra, naeni huu' mia basa ba'i Musa hohoro-lalanen noo Lamatualain mana 'ola-'ola na ra nenori na. Ne'o atahori nda tungga parenda' laen ra sa, mete ma ana nda fe'e tungga na'ahulu' parenda karua' ia ra sa.”h
Kristus naa, mema' mane Daud tititi-nonosin, te Eni o mane Daud Lamatuan boe
41 Lele' atahori Farisi ra fe'e ra'ab'ue sia naa, ma Yesus natane bali' se nae, 42 “Mia lele ulu' a Lamatualain helu haitua Kristus fo fee masoi-masod'a' neu atahori na ra. De tungga hei dud'u'a ma ra, Kristus naa, seka tititi-nonosi na?”
Boe ma ara rataa rae, “Eni, mane Daud tititi-nonosi na.”
43 Yesus 'ola' fai nae, “Mete ma ta'o naa, na, ta'o bee de Lamatualain Dula-d'ale Meumaren nafad'e neu mane Daud fo no'e Kristus nae, ‘Lamatua’? Te Daud sura' ena nae,
44 ‘Lamatualain nafad'e au lamatua ngga ena nae,
“'Uma fo 'endo' sia bob'oa 'ona ngga, sia mamana nenefee had'a-hormat ia.
Huu dei fo Au tao musu ma ra, losa ara raloe ao na ra neu nggo.’”i
45 Naa! Mia susura naa, hita tahine tae, mane Daud o no'e Kristus nae, ‘Lamatua'’ boe. Dad'i mete ma atahori rae Kristus naa, 'aka' mane Daud tititi-nonosin, naa fe'e nda dai sa! Huu Eni o Mane Daud Lamatuan, mana hak parenda e boe!”
46 Atahori Farisi ra rena Yesus 'ola' na'o naa ma, ara hie-hie reu' ena, nda hambu atahori esa saa sa boe bisa nataa nasafali Yesus sa ena. Naa de eni' a mia fai' naa ma, ara ramatau ratane, ma nda rambarani sob'a te'e-sii E sa ena.