3 Boe ma Yesus nataa nae, “Au o 'ae 'utane dala' esa boe, dei fo Au 'utaa nggi. 4 Ta'o ia: hei mihine Yohanis mana sarani' a, to? Seka fee e koasa fo sarani atahori? Lamatualain do, atahori?”

5 Boe ma esa-esa' fee dud'u'at ma 'ola-'ola' rae, “Awee! Da'i hita ena ma. Mete ma tae, ‘Lamatualain mana denu’, dei fo Ana nataa nae, ‘Mete ma ta'o naa, na, ta'o bee de hei nda mimihere Yohanis sa?’ 6 Te hita o nda bisa tae, ‘atahori denu’ sa, te hoko', na, atahori ha'i fatu fo mbia risa nggita. Huu ara ramahere rae, Yohanis naa, Lamatualain mana 'ola-'ola na.”

7 Boe ma rataa Yesus rae, “Hai nda mihine sa.”

8 Ma Yesus nafad'e nae, “Mete ma ta'o naa, na, Au o nda nau 'ufad'e seka mana denu Au sa boe.”

9 Basa ma, Yesus dui atahori hetar naa ra, nekendandaa' esa fai nae, “Hambu atahori esa mana sela osi anggor. Ana fee osin neu atahori ue-tao e, fo basa naa ara banggi buna-b'oa na. Boe ma ana lali nusa dea' neu de leo doo' sia naa.^a 10 Losa fula-fai 'etu anggor boan ma tenu osi' a denu atahori mana tao ues na esa neu simbo bab'anggin mia mana tao osi naa ra. Te mana tao osi ra popoko atahori mana tao ues naa, de 'oi e bali' noo lima rou'. 11 Basa ma, tenu osi' a haitua selu' atahori mana tao ues na esa neu fai. Te mana tao osi ra popoko ma tao ra'amamae' e. Basa ma ara 'oi bali' e noo lima rou'. 12 Boe ma tenu osi' a haitua selu' atahori mana tao ues katelun neu fai, te ara popoko ra'ahina' e ma nggari e dea neu.

13 Boe ma tenu osi' a dud'u'a nae, ‘Au musi tao ta'o bee fai? Malole lena' au haitua ana susue ngga. Ne'o ara simbo e ma fee had'a-hormat neu e.’ De ana haitua ana bonggin neu.

14 Te lele' mana tao osi ra rita e, ma ara 'ola-'ola' rae, ‘Woi, mete dei! Te lasi' a haitua ana bonggin nema ena. Ana mana simbo basa aman hata-heto na ra. Dad'i 'ima fo ata tao tisa e leo.’ Hela fo ata soa osi a. 15 Lele' ana' losa ma, ara lea dud'ui e dea neu mia osi a, basa de ara tao risa e.

Naa! Au 'ae 'utane, ta'o ia: hei du'an tenu osi' a nae tao mana tao osi ra ta'o bee? 16 Tungga Au, na, ana nema tao nisa basa se, basa ma, ana fee atahori laen ra tao osi a.”

Lele' atahori naa ra rena Yesus 'ola' ta'o naa ma, ara rataa rae, “Mete ma bisa, na, Lamatualain 'afi' huku-d'oki hai ta'o naa!”

17 Basa ma Yesus mete na'atetee' se, de natane nae, “Mete ma nda dad'i fee huku-d'oki' ta'o naa sa, na, saa de Lamatualain mana 'ola-'ola na ra sura' ta'o ia:

18 Atahori mana na'atunu sia fatu naa, tantu nambalutu, huu hambu huku-d'oki'. Ma mete ma fatu a tud'a dai atahori, ana o nambalutu 'eto-'eto' boe, huu hambu huku-d'oki' a.”

19 Lele' meser agama ra roo malangga agama Yahud'i ra malangga na ra rena dud'uit naa, ara bub'ulu' rae, Yesus 'ola' nekendandaa' naa neu se. Sira 'ona' mana tao osi ra. De ara ramanasa rala seli. Boe ma ara sangga dala' fo rae humu E. Te ara ramahia atahori hetar mana hii rena Yesus nenori na. De ara lao hela E neu naa.

20 Basa naa ma, Yesus musu na ra maku-ma'u E. Ara sangga mana maku' mana bisa tao ao na ra 'ona' atahori malole', fo reu ra'ahehengge Yesus. Ara rae' a do bee fo Yesus 'ola' lab'an mana parenda Roma ra, fo reu kalaak neu hofernor, naa fo ara denu atahori reu humu Yesus. 21 Boe ma ara haitua mana maku-ma'u' ra reu raselu-b'ale roo Yesus rae, “Ama Meser! Hai bub'ulu' Ama' rala ndoos. Ama' nda mana peko-leleko' sa, ma nda mana mete mata' sa. Ama' munori' a Lamatualain Ded'ea-'o'olan noo matetu' 22 De ia naa hai mae mitane dala' esa: tungga hai agama Yahud'i hohoro-lalanen, na, hai bae bea fee mana parenda Roma ra mane monaen a, do hoko'?”

23 Te Yesus nahine dud'u'a de'ulaka na ra rae ra'ahehengge E. De nataa nae, 24 “Mitud'u doi fula' sa dei, fo Au mete sob'a e.” Boe ma ara ratud'u doi' neu E. Boe ma natane nae, “Ia, seka nggambar na? Ma ia, seka naran?”

Ara rata rae, “Naa mane monae keser a.”

25 Boe ma Yesus nae, “Mete ma ta'o naa, na, fee mana parenda saa fo mana parenda ra hak na. Ma fee Lamatualain saa fo Lamatualain hak na.”

26 Rena ta'o naa, ma ara heran bali-b'ali', huu ara nda ra'ahehengge rala E sa, sia atahori hetar mata na. De nda rahara sa ena.

27 Basa naa ma, hambu atahori hira mia partei agama Saduki rema fo rae ra'ahehengge Yesus. Atahori Saduki ra ranori rae, atahori mates ra nda rasod'a bali' sia fai matete'en sa. Ara rema raselu-b'ale roo Yesus rae,^c 28 “Ama Meser! Ba'i Musa sura' hela fee nema hita hohoro-lalane' nae: mete ma hambu tou' mate, te nda ma ana' sa, na, 'od'in musi sao nala ina falun, fo ana bisa fee tititi-nonosi' neu 'a'an mana mate' a ena.^d

29 Mema' fe'esa'an ba'i Musa nanori ta'o naa. Te ia naa hai mae mitane, ta'o ia: hambu tou' hitu 'od'i-'a'a, de ulu' a sao, ma mate hendi e te ana' nese. 30 Basa de 'od'in mana tungga e sao nala ina falu a. Nda doo' sa ma, mate hendi tou' a fai, te nda ma ana' sa boe. 31 'Ona' naa boe, ana katelun a. Ana sao nala ina falu a, basa ma mate te nda ma ana' sa. 'Ona' naa nakandoo 'a losa ana muri' a mate. 32 Boe ma ina falu naa o mate boe. 33 Naa! Ia naa hai mae mitane ta'o ia: ina' naa saon tou' hitu ena. De mete ma losa fai matete'en, ma Lamatualain tao nasod'a bali' atahori mana mate' ra, na, ina' naa dad'i neu tou' bee saon?”

34 Boe ma Yesus nataa nae, “Atahori masao' sia 'a raefafo' ia. 35-36 Te sia sorga atahori nda sao sa ena. Ma sia naa ara nda mate sa boe. Ara 'ona' Lamatualain ate na ra sia sorga. Huu lele' Lamatualain tao nasod'a bali' atahori mates ra, Ana pili nala se fo dad'i Eni ana na ra ena 37 Ba'i Musa susuran dui so'al hau huu ana' mana nenelalangge' te nda kad'e sa. Mia dud'uit naa hita tahine tae, atahori mates ra bisa rasod'a bali' boe. Sia naa Lamatualain nafad'e ba'i Musa nae, ‘Au ia, bei-ba'i ma ra Lamatualain na. Naeni ba'i Abraham, ba'i Isak ma ba'i Yakob. Basa se be'utee rakandoo neu Au losa ia nema.’^e 38 Tao-tao te ba'i' naa ra mate eni' a fai dalahulun ena. Te huu Lamatualain nae Eni fe'e dad'i sira Lamatuan, naa de hita tahine tae ara fe'e masod'a'. De mae atahori mate ena o, ara rasod'a bali'. Te 'aka' atahori masod'a fo be'utee neu Lamatualain, nda atahori mates ra sa, to!”

39 Rena Yesus nataa ta'o naa ma, hambu meser agama sa 'ola' nae, “Ama Meser netaan, seli teb'e.” 40 Eni' a mia lele' naa ma, nda hambu atahori esa nambarani natane Yesus sa ena, huu nda hambu esa na'ahehengge nala E sa boe.

41 Basa ma, Yesus fe'e nanori atahori naa ra sia Ume Hule-o'e Huu' a. Ma Ana natane nasafafali se nae, “Tungga dud'u'a ma ra, na, ta'o bee? Meser agama ra ranori rae, Kristus naa, Atahori fo Lamatualain dud'u eni' a lele ulu' a. Tungga se, Eni dad'i 'aka' mane Daud tititi-nonosi na. Te huu naa nda fe'e dai sa. 42 Huu lele ulu' a mane Daud sura' hela sia susura sosod'a koa-kio ra nae,

44 Naa! Mia susura naa, hita tahine tae, mane Daud no'e Kristus nae, ‘Lamatua'’. Naa sosoan nae, mete ma atahori rae Kristus, 'aka' mane Daud tititi-nonosin, naa nda fe'e dai sa! Huu Eni o dad'i mane Daud Lamatuan boe!”

45 Lele' basa atahori ramanene neu Yesus, ma Ana 'ola' noo ana ded'enu na ra nae, 46 “Hei musi besa-b'esa moo meser agama ra. Huu ara hii 'a lao-lao' roo bad'u naru masarorombo', fo reu randaa roo atahori hetar, naa fo atahori rita se, na, rae, ‘We! Sira naa, atahori moko-monaen ra, o!’ Ara hii 'a sangga mamana nenefee had'a-hormat sia ume hule-o'e' ra, sia fefetas, ma sia mamana' fo atahori hii 'a ra'ab'ue. 47 Te besa-b'esa, huu ara 'aka' peko-leleko' ina falu ra fo ha'i rala ume na ra. Te sia atahori hetar matan, ara bab'ata de'ulaka na ra noo rambarii' hule-o'e doon seli. Ara hii 'a fo atahori rae sira, atahori meumare' re. Te Lamatualain nahine sala na ra, de dei fo Ana fee huku-d'oki' beran seli neu se.”