Lamatua' Yesus maso' kota Yerusalem rala neu 'ona' Mane'
21
Basa naa ma, Yesus se lao rakandoo losa kambo' esa naran Betfage, sia lete Saitun suu na.a Kambo' naa deka noo kota Yerusalem ena. Ara hahae mbei sia naa. Boe ma Ana denu mana tungga na ra atahori rua reu ra'ahulu' 2 Ana parenda se nae, “Ru'a nggi kambo' naa mii. Mete ma hei rala mii, dei fo ama mita banda keled'ei ine noo anan esa, nenepa'a' sia naa. Hei mii sefi hendi tali na ra fo lea mendi fee Au. 3 Te mete ma atahori ratane nggi rae, ‘Ta'o bee de hei lea mendi atahori banda keled'ei na?’ Naa, ama mitaa mae, ‘Lamatua' nae pake. Mete ma Ana pake basa naa, dei fo haitua bali' neu' ena.’4 Basa ia musi dad'i, tungga saa fo Lamatualain mana 'ola-'olan sura' mema' ena 'oi,
5 ‘Wae, hei atahori Yerusalem ra, e!b
'Ima, mete ia dei!
Te hei Mane ma nema ena.
Ana nema noo rala neloe-ned'ae'.
Ana nema sae keled'ei ana'’”c
6 Basa ma ana ded'enu na ra reu, de tao tungga basa saa fo Yesus helu-fuli neu se. 7 Ara lea rendi keled'ei ine noo anan fee neu Yesus. Ara bela lafe na ra, de Ana sae fo nae kota Yerusalem rala neu. 8 Lele' ara rae maso' kota rala reu boe, ma atahori hetar ha'i lafe ma salendan na ra, de bela neu dala'. Hambu ruma reu tati palma roond de bela neu dala' talad'a na. Noo ta'o naa, ara tao tatanda' rae, sira soru E 'ona' atahori moko-monaen. 9 Boe ma atahori ruma lao' ra'ahulu' Yesus, ma ruma tungga-tungga dea. Ara randu randaa rae,
“Hosana! Hai koa-kio Lamatualain!e
Huu Daud tititi-nononosin nema ena!
Hosana! Hai koa-kio Lamatualain!
Huu Lamatualain denu Atahori ia nema ena.
Hosana! Hai koa-kio Lamatualain!
Huu Lamatualain 'endo' parenda mema' sia lalai mamana naru' ata!”f
10 Lele' Yesus maso' Yerusalem rala neu noo rarame' naa, ma basa kota isin dea reu ratatane rae, “Awii! Mana nema' ia, seka?”
11 Atahori hetar rataa rae, “Eni ia, Lamatualain mana 'ola-'ola na. Naran Yesus, atahori Nasaret, mia profinsi Galilea.”
Lamatua' Yesus nisi' Ume Hule-o'e Huu' a rala neu de ofe lenggu-b'ab'ara hendi neseo' mana sia naa
12 Basa ma Yesus se lao rakandoo, de lao risi' Lamatualain Ume Hule-o'e Huun rala reu. Sia Ume Hule-o'e' a sod'an, atahori tao dad'i neu pasar de raseo' mbui lunda fo atahori tao rendi' neu tutunu-hohotu' soa' neu hule-o'e' a. Yesus nita ta'o naa ma, neu 'oi hendi se dea reu. Ana mbesi' le'a-nggari hendi mei-mei fo ara tukar rendi' neu doi', ma mbesi' na'alelengga' banggu fo ara raseo' rendi' neu mbui' ra. 13 Boe ma Ana nafad'e se nae, “Lamatualain mana 'ola-'olan sura' hela 'oi,
‘Au 'ufefela Ume ia,
fo atahori rema hule-o'e sia ia.’
Lamatualain masud na ta'o naa, te hei tao Ume ia dad'i rambok ra mamana ne'eb'uen!”g
14 Basa ma atahori poke' noo atahori keko' ra rema risi' Yesus sia Lamatualain Ume Hule-o'e na. Boe ma Ana na'ahahai' basa se. 15 Malangga agama Yahud'i ra malangga na ra roo meser agama ra o sia naa boe. Lele' ara rita Yesus tao 'ona' naa ma, ara ramanasa. Lelenan fai, lele' ara rena anak ara randu 'ona esa' sia Ume Hule-o'e a rae,
“Hosana! Hai koa-kio Lamatualain!
Huu mane Daud tititi-nonosin nema ena!”
16 Basa naa ma, malangga ra rafad'e Yesus rae, “Weh! Ho rena 'ana' naa ra 'o'ola na ra, do? Naa nda ndaa sa!”
Te Yesus nataa se nae, “Hei, Au rena. Te ta'o bee? Hei nda fe'e baca mita Lamatualain Susura Meumaren so'al ana mana koa-kio Lamatualain sa, do? Sia naa nenesura' 'oi,
‘Lamatualain sad'ia mema' ana mana bonggi feu' noo anad'iki',
fo ara koa-kio E.’”h
17 Basa ma, Yesus se lao hela kota naa, de reu sunggu' sia kambo Betania.
Lamatua' Yesus parenda hau huu' esa fo sud'i nab'oa fai
18 Mbila' neu fe'e fefetu anan, ma Yesus se lao fai risi' kota Yerusalem rala reu. Te sia dala' talad'an ma, Ana ndoe. 19 Ana nita hau huu' esa sia dala' suun fo atahori biasa raa boa na.i Dad'i Ana neu deka-d'eka hau huu' naa, nae mete sob'a mab'oa', do hoko'. Te lele' Ana losa hau huu' naa, nda nita boa' esa saa boe, te nita 'a roo na. Boe ma Ana 'ola' neu hau huu' naa nae, “Huu nda mub'oa fee Au sa, de sud'i mub'oa leo!” Ana 'ola' basa ma, hau huu' naa o meto neu' ena boe.
20 Ana mana tungga na ra rita 'ona' naa ma, ara nggengger. De ara ratane rae, “Ta'o bee de hie-hie' ma hau huu' ia meto neu' ena?”
21 Boe ma Ana nataa nae, “Rena malolole, e! Mete ma hei mimihere teb'e-teb'e' neu Lamatualain, ma rala ma ra nda bab'anggi mbei sa boe, na, hei bisa tao mala' 'ona' Au tao 'ala' ra ena. Hei o bisa tao mala' lena' naa fai. 'Ona' a: Hei bisa parenda mala lete' sa lali' tasi neu. Tantu Lamatualain fee lete' naa lali neu' ena, sad'i hei mimihere teb'e-teb'e' neu E!j 22 Huu basa dala' fo hei mo'e sia Lamatualain, dei fo ama simbo, sad'i mimihere teb'e-teb'e' neu E.”
Malangga ra raselu-b'ale so'al Lamatua' Yesus hak na
23 Basa ma Yesus se lao rakandoo. Losa Yerusalem, ma ara rala reu risi Ume Hule-o'e Huu' a sod'an fai. Lele' Ana nanori Lamatualain dala masod'an, ma malangga agama Yahud'i ra malangga na ra, roo lasi-lasi 'ad'at ra reu ratane E rae, “Afis a seka mana denu nggo 'uma tao kaco mia ia? Seka mana fee nggo hak naa?”
24 Te Ana nahine ara sangga dala' fo rae ra'atutud'a' E. De Ana nataa mbali se nae, “Au o 'ae 'utane nggi. Hei mitaa Au dei, dei fo Au 'utaa nggi boe. 25 Au 'ae 'utane ta'o ia: Basa hei mihine Yohanis, mana sarani' naa, to? Naa, seka mana fee ne hak fo sarani atahori? Lamatualain do, atahori?”
Boe ma ara du'a reu-rema, ma rala hara' rae, “Awee'! Hita nenete'e-sii ia, ma! Huu mete ma hita tataa tae, ‘Lamatualain mana fee ne hak’, na, dei fo Ana nataa nae, ‘Mete ma ta'o naa, na, ta'o bee de hei nda mimihere Yohanis sa?’ 26 Te hita o nda bisa 'ola' tae, ‘Atahori mana fee ne hak’, te dei fo basa atahori ra ramue nggita. Huu ara ramahere rae, Yohanis naa, Lamatualain mana 'ola-'ola na.” 27 Naeni de ara rataa Yesus rae, “Hai nda mihine sa.”
Boe ma Yesus nataa se nae, “Naa! Mete ma ta'o naa, na, Au o nda parluu 'ufad'e 'ae seka mana fee hak naa neu Au sa boe.”
Lamatua' Yesus fee nekendandaa' so'al ama' esa noo ana toun rua
28 Yesus 'ola' nakandoo noo malangga naa ra nae, “Hei du'a ta'o bee so'al nekendandaa' ia? Hambu ama' esa noo ana toun rua. Ana denu ana ulun nae, ‘Ana ngga, e! Fai' ia, muu tao ues sia osi a dei.’
29 Te 'ana' naa nataa nae, ‘Eeh! Au nda 'uu sa.’ Te nda doo' sa ma ana fale ralan, de neu.k
30 Basa ma, ama' naa denu ana karuan nae, ‘Ana ngga, e! Fai' ia, muu tao ues sia osi a dei.’
Boe ma 'ana' naa nataa nae, ‘Ia ama'. Dei fo au 'uu.’ Tao-tao te ana nda neu sa.”
31 Yesus dui basa ma, natane se nae, “Naa, Au 'ae 'utane ta'o ia: mia ana karua' naa ra, bee ka mana tao tungga aman parendan?”
Boe ma ara rataa rae, “Ana ulu' a!”
Basa de Ana 'ola' nae, “Hei. Te rena malolole, huu Au 'ola' matetu'. Atahori fo hei cap mae atahori nda papake' ra sa, 'ona' mana 'ed'a bea, ma ina dala' ra, dei fo ara maso' ra'ahulu' nggi risi Lamatualain umen rala. Huu hei 'aka' mi'ihei-mi'ihuu' neu Lamatualain, te nda tao tungga Hihii-nanaun sa. 32 Fe'esa'an, Yohanis mana sarani' a nanori neu nggi dala' ta'o bee fo ama bisa misod'a noo ndoo-tetu'. Te hei nda nau mimihere e sa. Tao-tao te, lele' atahori nda papake' ra sa rena Yohanis, ara lao hela sala-kilu na ra, de tungga nenori-nefad'e na. Hei o mita atahori naa ra ramahere Yohanis te hei nda nau mimihere e sa, fo miloe' mia sala-kilu ma ra, fo tungga Lamatualain hihii-nanau na.”l
Lamatua' Yesus fee nekendandaa' so'al atahori de'ulaka' mana tao osi anggor a
33 Basa naa ma, Yesus dui nekendandaa' esa fai nae, “Hambu tenu rae' esa neu tao osi feu', fo nae sela hau anggor sia raen mbei. Boe ma ana lutu-mbaa rereo' e. Ma ana tao bak fo nae 'ee boa anggor oe na. Boe ma naririi mamana nanea naru' esa. Basa ma ana fee atahori tao osin, fo ara banggi buna-b'oan neu rua roo eni. Boe ma ana lao nusa dea' neu.m
34 Losa fula-fai seu anggor boan, ma tenu osi' a denu ana mana tungga na ra reu sia mana tao osi a, fo ro'e eni hahambu na. 35 Te mana tao osi ra nda taoafi' mbali ana mana tungga na ra sa. Ruma hambu lima-ei', ruma nenetati nisa', ma ruma nenehonda-mbia' noo fatu. 36 De tenu osi' a denu selu' ana mana tungga na ra nononggo' esa hetar lena' fefeu na. Te mana tao osi ra tao de'ulaka 'ona' naa neu basa se boe.
37 Doo-d'oo ma, tenu osi' a denu ana bonggi na. Huu ana du'a nae, ‘Mete ma au haitua ana bonggi ngga, ne'o ara simbo noo malole, ma rena e.’
38 Te lele' mana tao osi ra rita anan, ma ara 'ola-'ola' rae, ‘Wee, hei mete dei! Tou lasi' a haitua ana bonggi na. Eni mana simbo basa tou lasi' a hata-heto na. De 'ima fo ata tao tisa E leo, naa fo ata hambu osi ia.’ 39 Boe ma ara to'u rala 'ana' naa, de lea rendi e nisi' osi a dea' fo tao risa e.”
40 Yesus dui basa ma, natane se nae, “Naa, Au 'ae 'utane ta'o ia: mete ma tenu' osi' a bali', na, ana tao mana tao osi ra, ta'o bee?”
41 Basa ma, atahori Yahud'i ra malangga na ra rataa rae, “Ne'o ana tao nisa basa atahori de'ulaka' naa ra. Basa naa, ana fee osi a neu atahori fea' ra tao, fo nandaa noo fula-fain, na, banggi buna-b'oa na.”
42 Basa de Yesus 'ola' noo se nae, “Mbei ma hei nda baca mita sia Lamatualain Susura Meumaren 'oi,
‘Hambu fatu esa mana tati fatu ra nggari hendi ena,
te ia naa fatu naa dad'i neu ume a fatu netehuun!
Lamatualain mana tengga nala, ma na'e'endo fatu naa.
Naa de ata tita e malolen seli!’”n
43 Basa ma Yesus tute 'o'olan nae, “Dad'i ama du'a matalolole, e. Dalahulun, Lamatualain pili hita atahori Yahud'i ra ia, fo dad'i atahori na. Te huu hei nda nau taoafi' neu Au sa, dei fo Lamatualain pili atahori fea' ra. Huu 'aka' atahori mana nasod'a tungga Eni hihii-nanaun bisa dad'i Eni atahori na. 44 [Au 'ufad'e relo-relo ena. Au ia, naeni fatu netehuu' naa. Atahori mana tud'a neu fatu ia, ne'o atahori naa nambalulutu. Ma mete ma fatu naa tud'a dai atahori, ne'o atahori naa dad'i afu neu' ena.]”o
45 Lele' malangga agama Yahud'i ra malangga na ra roo atahori Farisi ra rena Yesus dui ta'o naa, ma ara rahine rae, Ana 'ola' naa neu sira. Sira 'ona' atahori mana tao osi naa ra, ma mana tati fatu mana nggari hendi fatu netehuu' naa. 46 De ramanasa seli. Basa ma, ara sangga dala' fo rae humu E. Te ramatau atahori hetar huu ara rae Yesus naa, Lamatualain mana 'ola-'ola na. Naeni de ara nda rambarani tao saa-saa neu E sa boe.