Fefeta kakab'i' sia kambo Kana
2
Fini-esan boe ma, hambu fefeta kakab'i' sia kambo Kana, sia profinsi Galilea. Yesus maman o neu boe. 2 Ma Yesus noo ana mana tungga na ra o nenenerolo' boe, de ara reu.3 Te doo-d'oo ma, anggor sia mamana fefetas nae basa. Boe ma Yesus maman nafad'e E nae, “Tulun dei! Te anggor na ra nae 'a basa ena.”
4 Te Yesus nataa nae, “Mama'. Ta'o bee de mama' nau 'a Au mana tao mata'? Huu Au fai ngga nda fe'e losa sa.”
5 Te maman nafad'e atahori mana lole-lau sia naa ra nae, “Rena, e! Ana denu nggi tao saa, na, tao tungga.”
6 Sia naa hambu nggusi fatu nee. Nggusi esa naa, mbei ma nala oe liter hitu nulu lima losa natun esa sanahulu lima (75-115). Atahori Yahud'i ra biasa tao rameu ao na ra rendi' oe mia nggusi mata' naa ra tungga sira agaman hohoro-lalane na. 7 Boe ma Yesus nafad'e atahori mana lole-lau' ra nae, “Mii ha'i oe fo 'oni neu nggusi ia ra.” Boe ma ara 'oni sofe pomu-pomu se. 8 De nafad'e se nae, “Naa. Ndui mala mbei, fo mendi fee neu tenu fefetas a.” Ma ara tao tungga. 9 Losa naa, ma tenu fefetas ninu sob'a oe a. Tao-tao te oe a dad'i anggor ena! Ana tab'angangaa, huu nda nita' nae ara hambu anggor mia bee sa boe. (Te atahori mana lole-lau' ra bub'ulu'.)
Boe ma ana no'e tou mana sao' a. 10 De nae, “Ta'o ia. Hita biasan, tenu ume' a banggi na'ahulu' anggor malad'a manaseli' a. Mete ma atahori ra rinu nae' ena, dei fo ha'i anggor nomor karuan a. Te ia manafea'. De ha'i anggor nomor karuan na'ahulu', dei de fe'e ha'i anggor malad'a' a na'ab'uit!”
11 Dala' naa dad'i sia kambo Kana, sia profinsi Galilea. Naa Yesus tao manad'ad'i manaseli' fefeun fo atahori rita' a. Ana natud'u manaselin 'ona' naa, dei de ana mana tungga na ra ramahere E.
12 Basa naa ma, Yesus, maman, 'od'i na ra, ma ana mana tungga na ra 'onda reu risi' kota Kapernaum. Te ara leo sia naa 'aka' fai hira' a.a
Lamatua' Yesus 'oi hendi atahori mia Lamatualain Ume Hule-o'e Huu na
13 Lele' atahori Yahud'i ra fai malole Paska na deka-d'eka nema ena, ma Yesus hene nisi' kota Yerusalem.b 14 Sia Ume Hule-o'e Huu' a sod'an, Yesus nita atahori ra raseseo' sapi, bib'i lombo, ma mbui lunda fo atahori hasa fo tao neu tutunu-hohotu'. Sia naa o, hambu atahori 'endo' sia mei a tukar doi' fo atahori rae fee neu Lamatualain sia Ume Hule-o'e Huu' a. 15 Boe ma Ana ha'i nala tali' ndoo' hira de tao dad'i fifilo'. Ana mbuu hendi basa se dea reu mia ume sod'a na. Ana o mboo hendi sapi roo bib'i lombo ra. Ana ofe lenggu-b'ara hendi mei ra, ma mbo'a le'a-nggari hendi doi' ra. 16 Boe ma Ana denu atahori mana seo mbui lunda ra nae, “Mendi sud'i 'a saa ia ra dea reu! Mamana' ia nda mamana neseo' sa! 'Afi' tao Ama ngga Umen dad'i mamana sembo-d'anggan!”
17 Boe ma ana mana tungga na ra rasaned'a Lamatualain Susura Meumaren sura' 'oi,
“Au sue 'ala seli Lamatualain Ume na.
Naeni de au rala ngga ma'ad'ere' de 'unea na ra malole na.”c
18 Boe ma atahori Yahud'i ra malangga na ra denu Yesus rae, “Mete ma mema' mu'ena hak mbuu atahori ra 'ona' naa, na, mutud'u manad'ad'i manaseli' esa neu hai fo dad'i bukti!”
19 Yesus nataa nae, “Mete ma hei tao milutu mamana meu' ia, dei fo fini-esan, na, Au 'ufefela bali' e.”d
20 Te ara rasapaa rae, “Hambu sia bee? Huu atahori ra rafefela Ume Hule-o'e Huu' ia dod'oon too haa nulu nee. Saa de du'a mae, bisa mufefela bali' e fai telu' a?!”
21 Te ara nda rahine rae, Yesus 'ola' so'al aon, 'ona' mamana meu' sa. 22 Dad'i sia fai ma'ab'uin, lele' Yesus mate, basa ma nasod'a bali', dei de ana mana tungga na ra rasaned'a saa fo Ana 'ola' mema' neu se. Boe ma ara ramahere saa fo nenesura' mema' sia Lamatualain Susura Meumaren mia fai ma'ahulun, noo saa fo Yesus nafad'e mema' neu se ena.
Lamatua' Yesus nahine basa atahori rala na ra
23 Naa, Yesus leo na'atataa' mbei sia kota Yerusalem fo tungga fai malole Paska sia naa. Boe ma atahori hetar rita manad'ad'i manaseli' fo Ana tao' ra, de ramahere E. 24-25 Te Yesus nda namahere se sa, huu nahine basa atahori ra rala na ra ena. Ana nda parluu atahori rafad'e Eni sa, huu ana bub'ulu' mema' atahori tetende-nemberiin ena.