Lamatua' Yesus nandaa noo mana 'ed'a bea esa, naran Sakeos
19
Basa ma Yesus se maso' tungga kota Yeriko, fo rae lao rakandoo. 2 Sia naa hambu malangga mana 'ed'a bea esa fee mana parenda Roma, naran Sakeos. Sakeos ia, atahori mamasu'i'. 3 Lele' ana rena Yesus se rae tungga naa, ma ana nae nita Yesus, te ana nda nita noo malole' sa, huu Sakeos bob'oku' ma atahori hetar heo rala Yesus. 4 Naa de ana nela-nela' na'ahulu', de hene nisi' hau huu' sa sia dala' suun, fo Yesus nae tungga' naa.a5 Losa hau huu' a rae', ma Yesus mete ata'. Ma Ana no'e Sakeos nae, “Sakeos! 'Uma, 'onda leo! Lai-lai, te fai' ia au 'ae numban sia umem.”
6 Sakeos heran bali-b'ali'. Boe ma ana 'onda lai-lai, de noo Yesus nisi' ume na. Ralan namaho'o nae mate. 7 Te atahori hetar ramue rae, “Cih! Sakeos ia, atahori nda malole' sa! Basa atahori rahine, naa boe! Ta'o bee de Yesus neu numban sia umen?!”
8 Losa umen ma, Sakeos nambarii' sia Yesus matan de, 'ola' nae, “Ama Meser! Eni' a mia fai' ia au banggi basa hata-heto ngga neu rua, fo fee bab'anggi' sa neu atahori mana to'a-taa' ra. Mete ma au parnaa 'ed'a bea 'ulena', au bae bali' neu se ded'esin lao haa.”
9 Yesus nataa nae, “Malole. Fai' ia Lamatualain fee masoi-masod'a' neu nggo moo basa bob'onggi ma ra, huu mumuhere neu Lamatualain 'ona' ba'i Abraham. 10 Te Lamatualain denu Au dad'i Atahori Matetu' a sia raefafo'. Au 'uma fo sangga atahori mana dinggo' mia Lamatualain dalan ena, fo fee se masoi-masod'a'.”b
Dud'uit so'al mana tao ues mana nalalao malanggan doin noo malole
11 Lele' naa, hambu atahori hetar reu rena Yesus. Ara rae deka-d'eka kota Yerusalem ena. Ara rae ne'o Ana nae nalalao Lamatualain parendan sia naa, 'ona' mane' sa. Boe ma Yesus dui se nekendandaa' esa fai, 12 nae, “Hambu atahori moko-monaen esa. Ana nae lao nusa dea' neu, fo ara so'u e dad'i mane'. Basa fo ana fe'e bali' fo dad'i mane' sia nusa na.c 13 Lele' ana nahehere nae lao, ana no'e nala atahori mana tao ues na ra atahori sanahulu, de fee se esan doi lilo' esa. Ana parenda nae, ‘Hei pake doi' ia dad'i neu poko'. Te dei fo au bali', na, ama mifad'e au hahambu ma ra ba'u saa.’ Basa ma ana lao boe.
14 Te rauinggu na ra mburu-oe' roo e. De ara haitua ded'enu' ra naa reu fo rafad'e rae, ‘Hai nda nau atahori ia to'u parenda' neu hai sa.’
15 Mae 'ona' naa o, ara so'u e sia naa. Basa de ana bali'. Losa umen boe, ana no'e nala mana tao ues na ra atahori kasanahulu' ra, de natane se nae, ‘Hei hambu buna' b'a'u saa mia doi lilo' fo au fee neu nggi' a?’
16 Atahori mana tao-ues kaesan nafad'e nae, ‘Ama mane'! Au hambu buna' lao sanahulu mia doi poko' fo au simbo' a!’
17 Boe ma mane' a nafad'e e nae, ‘Malole! Ho ia, atahori mana tao ues malole'. Huu au bisa 'umuhere nggo sia dala anad'iki' ra, de ia naa au so'u nggo fo parenda kota sanahulu.’
18 Boe ma, atahori mana tao ues karuan, nafad'e nae, ‘Ama mane'! Au hambu buna' doi lilo' lima mia doi poko' fo au simbo' a.’
19 Boe ma, mane' a koa e nae, ‘Malole'! Mete ma ta'o naa, au so'u nggo fo parenda kota lima.’
20 Te atahori mana tao ues katelun nendi bali' doi lilo' a. Ma nafad'e nae, ‘Ia malangga doin! Au mboti e, de funi e malolole fo 'afi' mopo e. 21 Au tao ta'o naa, huu au 'umutau. Au bub'ulu' ama' ia atahori mana laka-ese'. Huu ama' hii ha'i saa fo ama' nda 'enan sa, ma 'etu mala saa fo ama' nda sela sa.’
22 Mane' a rena nala ma, ana bua e nae, ‘Ho ia, nda mana nenori' sa! 'O'olam huku-d'oki bali' ao ma. Ho mae au ia atahori mana laka-ese', fo ha'i saa fo nda au ena ngga sa, ma ha'i saa fo au nda sela sa. 23 Mete ma ta'o naa, na, ta'o bee de ho nda muu mbed'a' doi' ia sia bank sa? Naa fo lele' au bali', au hambu buna na. 'Ita' mbei 'a o malole.’
24 Boe ma, mane' a denu atahori laen sia naa ra, nae ‘Ha'i mala doin, fo fee neu atahori mana tao ues mana hambu buna' lao sanahulu faa' ra.’
25 Te ara nda nau sa rae, ‘Ama'! Atahori naa hambu dai ena. Ta'o bee de mae ha'i mia atahori mana hambu mbei 'a, fo fee selu' neu e fai?’
26 Te mane' a nataa nae, ‘Du'a malolole! Huu atahori mana nahine tao mata' neu saa fo atahori ramahere neu e, dei fo ana hambu selu'. Te atahori mana mbera tao mata', dei fo ara ha'i rala basa 'enan.d 27 Naa! Ia naa, mii humu mala musu ngga ra mana nda hii au dad'i mane' sia ia sa. Mendi se ia rema. Basa fo tao misa basa se sia au mata ngga. Mii leo!’”e
Lamatua' Yesus maso' nisi' kota Yerusalem
28 Yesus dui basa ma, ara lao rakandoo risi' Yerusalem. Yesus lao' mia mata'. 29 Lele' rae deka-d'eka roo kambo' rua, naeni Betfage noo Betania, mana deka noo lete Saitun suun, ma Ana denu ana ded'enun rua lao' ra'ahulu'. 30 Ana denu se nae, “Ru'a nggi mii sia kambo' mana sia mata' naa. Dei fo ama mita banda keled'ei ana' sa nenepa'a' sia naa. Atahori nda fe'e sae rita e sa. Ama sefi papa'an fo lea mendi e ia nema. 31 Te mete ma hambu ruma ratane, rae ‘Saa de hei sefi keled'ei a talin?’ na, mifad'e se mae, ‘Hai Lamatuam nae pake.’”
32 Basa de, ru'a se reu, ma rita keled'ei ana', 'ona' Yesus 'o'ola na. 33 Lele' ara sefi keled'ei ana' a talin, ma tenu 'ena' a natane se nae, “Saa de hei sefi banda ia?”
34 Boe ma rataa rae, “Hai Lamatuam nae pake.” 35 Tenu'ena' a na'ahei', de ru'a se lea rendi keled'ei ana' a nisi' Yesus. Ara ndae lafe na ra nae' neu keled'ei a nggarasan, de ara 'o'o Yesus ata neu.f 36 Atahori hetar o ha'i lafe noo salendang na ra, de bela neu dala', fo soru Yesus 'ona' simbo atahori moko-monaen ra. 37 Lele' Ana nae 'onda mia lete Saitun, ma atahori hetar roo Ana ded'enu na ra, eki-randu koa-kio Lamatualain, huu basa koasa manad'ad'i' fo sira rita' ra. 38 Ara eki-randu rae,
“Ia Eni, Mane' fo Lamatualain denu nema' a!
Lamatualain fee papala-b'ab'anggi' neu E!
Ia naa, atahori bisa dame roo Lamatualain sia sorga ena.
Koa-kio Lamatualain mana 'endo' parenda sia lalai nanarun seli.”g
39 Te hambu atahori Farisi hira sia atahori naa ra talad'a na ra. Ara rafad'e Yesus rae, “Ama Meser! 'Ai se fo ara 'afi' randu ta'o naa, huu ia seli teb'e ena ma!”
40 Te Yesus nataa nae, “Hee! Au 'ufad'e mema'! Mete ma atahori ia ra ra'ateme bafa na ra, dei fo fatu ra koa-kio Lamatualain!”
Lamatua' Yesus nggae soa' neu Yerusalem
41 Lele' ara deka-d'eka rae Yerusalem rala reu, Yesus nita kota naa, ma Ana nggae, 42 nae, “Ad'uu, atahori Yerusalem, e! Au nau fo fai' ia hei simbo mole-d'ame' fo Au 'endi' ia. Te huu hei nda taoafi' neu Lamatualain sa, de ia naa bab'anggo ena. Mole-d'ame' naa na'ad'od'oo' mia nggi ena. 43 Dei fo musu ma ra mbori rae ndule kota a tembok na, basa ma ara rala reti ratati roo nggi. 44 Ara ndefa' hendi hei kotam na'ab'eb'ela' neu rae a, ma reti tao risa nggi moo basa ana ma ra. Ara nda hela fatu esa nambarii' sa boe, huu Lamatualain nema ena fo nae fee masoi-masod'a' neu nggi, te hei nda mihine E sa!”
Lamatua' Yesus nisi' Ume Hule-o'e Huu' a
45 Basa ma Yesus maso' nisi' Ume Hule-o'e Huu' a rala. Sia ume sod'an, atahori tao dad'i pasar fo seo banda tutunu-hohotu'. Yesus nita ma Ana 'oi hendi se mia naa. 46 Ana bua se nae, “Lamatualain mana 'ola-'ola na ra sura' mema' rae,
‘Au 'ufefela Ume ia,
fo basa atahori rema hule-o'e sia ia.’h
Te hei tao e dad'i rambok ra mamana ne'eb'ue na.”