Nekendandaa' so'al mana tao osi anggor
20
Basa naa ma, Yesus nanori nae, “Lamatualain toto'u parendan, 'ona' nekendandaa' ia: hambu tenu osi' esa fe'e fefetu ana' lii' nee te ana lao neu sangga atahori fo tao ues sia osi anggor na. 2 Ana hambu atahori mana tao ues, boe ma ara rala hara' esa de tao ues fai sa na, seseb'an doi fula' esa, 'ona' biasa na.a Ara ra'ahei' basa ma, ana denu se reu tao ues sia osin rala. 3 Lii' sio fefetun ma, ana lao pasar neu. Sia naa nita atahori hira mana 'endo' hie-hie 'a. 4 Boe ma ana nafad'e se nae, ‘Wee 'a'a ngga ra, e! Hei nau tao ues sia osi ngga, do? Dei fo au bae nggi tungga ndandaa na.’ Ara rena rala ma, ara ra'ahei' neu' ena, de reu ue-tao. 5 Lii' sanahulu rua reorendun noo lii' telu bob'on, ma tenu osi' a lao hela umen, de neu sangga selu' mana tao ues fai. 6 Mbei ma lii' lima bob'on, ma tenu osi' a lao fai. Ana mete neu-nema ma, fe'e hambu atahori mana bakarii' hie-hie 'a. Boe ma natane se nae, ‘Ta'o bee de ama ririi hie-hie 'a mia fefetun losa bob'on, nda tao saa sa boe?’7 Atahori naa ra rataa rae, ‘Ama', e! Nda hambu atahori fee hai ue-tataos sa.’
Basa ma, tenu osi' a nae, ‘Mete ma ta'o naa, na, ama mii tao ues sia osi ngga leo!’
8 Losa jam hahae tao ues ma, tenu osi' a no'e ded'enun de nae, ‘Mo'e atahori mana tao ues ra, fo bae esa-esa' nggad'i na ra leo. Mulai mia atahori mana maso' tao ues ma'ab'uit a losa mana tao ues fefeu na.’b
9 De ded'enu' naa no'e atahori mana tao ues mia lii' lima bob'o na. Ana fee se, esa na simbo doi fula' esa. 10 Basa ma, ded'enu' naa no'e atahori mana tao ues laen ra, losa atahori mana tao ues eni 'a lii' nee fefetu na. Mana tao ues mia fefetun du'a rae, ne'o sira simbo nae' lena' mana tao ues mia lii' lima bob'o na. Tao-tao te, ara o simbo doi fula' be'e esa' boe. 11 Ara simbo 'ona' naa ma, ramue tenu osi' a rae, 12 ‘Awee'! Nda bisa ta'o ia sa ma! Sira mana rema ma'ab'uit ra, tao ues 'aka' lii' esa' a. Te hai mana maso' tao ues eni' a fefetu anan ia, tao ues mita' mamate ma ra losa mbusar nandali! Te ta'o bee de malangga bae hai 'ona' naa ra boe?’
13 Boe ma tenu osi' a nataa neu esa nae, ‘'A'a, e! Au nda laka 'a'a sa. Huu 'a'a na'ahei' tao ues fai esa na, eni bab'aen doi fula' esa. Teb'e, to? Dad'i au bae tungga hita 'o'olan, to? 14 Malole lena', 'a'a simbo doi bab'aem fo bali' leo. Mete ma au 'ae fee atahori mana rema tao ues ra'ab'uit 'a'a naa bab'aen 'ona' saa fo au fee 'a'a boe, na, naa au hihii-nanau ngga. 15 Ne'o au bisa pake-nggao doi ngga tungga hihii ngga. Ta'o bee de 'a'a namanasa au huu 'u'ena rala malole'?’
16 'Ona' naa boe, lele' Lamatualain dad'i Mane' soa' neu atahori ra, Ana bala-b'ae atahori ra tungga hihii-nanau na. De atahori mana nema na'ab'uit, dei fo ana simbo bab'anggin 'ona' atahori mana nema na'ahulu' a boe. Boe ma atahori mana nema na'ahulu' a, dei fo ana o simbo bab'anggin 'ona' atahori mana nema na'ab'uit a boe.”c
Lamatua' Yesus nafad'e lao katelun so'al Eni mamaten
17 Basa naa ma, Yesus se lao risi' Yerusalem reu. Sia dala' talad'an, Ana no'e ana mana tungga na ra mesa' se fo ra'ab'ue roo E. Dei de nafad'e selu' nae, 18 “Hei rena, e! Ia naa hita tae Yerusalem teu. Te sia naa ara seo hendi Au, Atahori Matetu' ia, neu malangga agama Yahud'i ra malangga na ra roo meser agama ra. Basa fo ara ra'etu' hukun risa Au. 19 Boe ma ara fee Au neu atahori laen nda mana rahine Lamatualain sa. Basa ma ara 'ola' ra'amamae' Au. Ma ara filo ralutu ao ngga. Dei de, ara tao risa Au sia hau nggangge' a. Mema' teb'e Au mate. Te fini-esan boe ma Au 'usod'a bali'.”
Yakob'is noo Yohanis maman no'e fo so'u ana na ra dad'i atahori moko-monaen
20 Basa naa ma, Sab'ad'eus saon noo ana na ra Yakob'is noo Yohanis reu risi' Yesus. Ma ana sende' lulu-langgan ma fee had'a-hormat fo kokoe Yesus.
21 Boe ma Yesus natane nae, “Mama, mae parluu saa?”
Boe ma mama naa nafad'e nae, “Ta'o ia, Ama'! Au 'o'e, mete ma Ama' 'endo' to'u parenda', na, Ama' so'u ana ngga ra ru'a se, fo ara o to'u parenda' tungga ra'ab'ue roo nggo boe. Au 'o'e fo Ama' mu'e'endo esa neu bob'oa 'onam, ma esa neu bob'oa diim.”
22 Yesus rena ana no'e 'ona' naa ma, nafad'e neu Yakob'is noo Yohanis nae, “Hei nda mihine saa fo ama mo'e' a sa. Te dei fo Au hambu doid'oso' nae'. De ta'o bee? Se'u te hei du'a mae hei o bisa lemba doid'oso' naa mi'ib'ue moo Au, do?”
Ru'a se rataa randaa rae, “Hai bisa, Ama'!”
23 Basa ma Ana nataa fai nae, “Mema', dei fo hei o doid'oso 'ona' Au boe. Te dei fo seka mana 'endo' sia Au bob'oa 'ona ngga noo dii ngga, Au nda 'u'etu' naa sa. Lamatualain mana na'ena hak na'etu' naa. Lamatualain na'etu' mema', seka mana 'endo' sia mamana' naa ena.”
24 Lele' ana mana tungga kasanahulu' ra rena ru'a se ro'e ta'o naa, ma ramanasa. 25 Boe ma Yesus no'e nala basa se, ma nafad'e nae, “Ta'o ia! Hei bub'ulu' ena, to? Atahori moko-monaen mana to'u parenda' ra biasa tuni-ndeni rauinggu na ra, de nda tao rala saa sa boe. Ma malangga-malangga mia nusa' fo nda mana rahine Lamatualain sa, ara parenda ra'alelena', de rauinggu na ra nda boti' rala langga na ra sa. 26 De ama sud'i boe tao ta'o naa! Mia hei, seka nae dad'i atahori moko-monaen, na, ana musi dad'i 'ona' ate fo mete-se'u atahori laen.d 27 Boe ma seka nau dad'i malangga, na, ana musi tao aon 'ona' ate.e 28 Rena, e! Au o 'ona' naa boe. Au, Atahori Matetu' ia, 'uma fo mete-se'u atahori. Au nda 'uma fo atahori mete-se'u Au sa. Huu Au 'uma fee masod'a ngga teme-teme, fo soi-tefa neu atahori hetar sala-kilu na ra.”
Lamatua' Yesus na'ahahai' atahori poke'
29 Basa naa ma, Yesus se lao rakandoo. Lele' ara lao hela kota Yeriko, hambu atahori hetar tungga se boe. 30 Sia naa, hambu atahori poke' rua 'endo' sia dala' suu na. Lele' ara rena rae, mana tungga naa, naeni Yesus mia Nasaret, ma ara randu rahere' rae, “Papa! Daud tititi-nononosin, e! Hai mihani Papa doon seli ena! Kasian hai dei!”
31 Atahori rena ara rameli ra'o naa, ma ara ra'anggee rae, “Hee! Ru'a nggi nee-nee!”
Te ara bau rameli rahere' lena' fai rae, “Papa, e! Daud tititi-nononosin, e! Kasian hai dei!”
32 Lele' Yesus rena ra'o naa, ma Ana nambarii' de natane se nae, “Hei nau Au tao saa fee nggi?”
33 Ara rataa rae, “Papa, e! Tulun fo hai mete mita dei!”
34 Ana rena ara 'ola' ta'o naa, ma Ana kasian se. De Ana nggama mata na ra, ma ara mete rita neu' ena boe. Basa naa ma, ara lao tungga E.