Lamatualain denu Abraham tao Isak dad'i tutunu-hohotu'
22
Nda doo' sa ma, Lamatualain sob'a Abraham, nae mete ana rena Eni, do hoko'. De Lamatualain no'e e nae, “Abraham!”Abraham nataa nae, “Ia, Lamatua'.”
2 Basa ma Lamatualain denu e nae, “Rena malolole! Ha'i mala ana mone 'isem, fo ho sue' a. Mendi e nisi' rae Moria, fo tao e dad'i tutunu-hohotu' fee Au. Losa naa, dei fo Au fe'e 'utud'u nggo mamana' sia lete' esa.”
3 Mbila fefetu anan ma, Abraham tati hau ai. Ana futu hau naa ra, de fua neu banda keled'ei. Boe ma, ana noo Isak ma ate na ra rua, lao risi' mamana' fo Lamatualain nafad'e basa neu e ena. 4 Ara lao-lao', boe ma fini-esan ma, Abraham nita mamana' naa mia doo-d'oo'. 5 Ana nafad'e ate karua' ra nae, “Ru'a nggi mihati ia, moo banda keled'ei ia. Au 'oo ana ngga mii sia ata' naa dei, mae be'utee neu Lamatualain. Basa fo, hai bali' ia' 'ima fai.”
6 Boe ma Abraham ha'i hau ai tutunu-hohotu', de fua neu Isak aru na. Ana o nendi mema' dombe noo hau maai'. Ru'a se lao data-d'ata ma, 7 Isak no'e aman nae, “Papa!”
Abraham nataa nae, “Ta'o bee, Isak?”
Ana natane nae, “Papa. Ata tae tunu tutunu-hohotu'. Hau sia ena, ma ai o sia boe. Te bib'i lombo ana' fo dad'i tutunu-hohotu' a sia bee?”
8 Abraham nataa nae, “Ana ngga, e! Dei fo Lamatualain mana fee bib'i lombo ana' dad'i tutunu-hohotu'.”
De ru'a se lao rakandoo. 9 Ara losa mamana' fo Lamatualain nafad'e basa' a ma, Abraham lutu mbatu mei tunu-hotu' a. Basa ma, ana na'alalangga hau ai neu ata'. De ana pa'a anan, ma na'alelengga' e neu hau ai ra ata. 10 Boe ma ha'i nala dombe nae mbau nisa ana na. 11 Te 'aib'oi' ma, LAMATUALAIN aten mia sorga nameli mia lalai nae, “Wee! Abraham! Helafi' dei!”
Ana nataa nae, “Ta'o bee, Lamatua'?”
12 Boe ma hara' naa nae, “'Afi' tao misa ana' naa! 'Afi' tao e ta'o bee boe! Ia naa, Au bub'ulu' teb'e-teb'e' ho tungga Au hihii ngga, huu ho nau fee ana mone 'isem, fo dad'i tutunu-hohotu neu Lamatualain.”
13 Basa ma, Abraham nita bib'i lombo mone esa suran kad'o' sia hau ana' ra nggangge na ra. Boe ma ana neu ha'i nala bib'i lombo naa, de tunu dad'i tutunu-hohotu' soa' neu Lamatualain, nggati ana na. 14 Naa de, Abraham bab'ae mamana' naa, ‘Dei fo, Lamatualain fee saa fo parluu' a.’a Naa de losa ia nema atahori o 'ola' rae, “Sia LAMATUALAIN leten ata, dei fo Ana fee saa fo parluu' a.”
15 Basa ma Lamatualain aten nameli selu' mia lalai nae, 16 “LAMATUALAIN nafad'e aon nae, ‘Au sumba 'endi' nara ngga ta'o ia: Ho nau fee ana mone 'isem neu Au, fo dad'i tutunu-hohotu' ena. Naa de, 17 dei fo Au fee papala-b'ab'anggi' naen seli neu nggo ma tititi-nonosi ma ra. Dei fo ara boe ramahefu-ramab'ela losa atahori nda reken rala se sa, 'ona' nduu' sia lalai, ma sara'ae' sia tasi suu na. Dei fo umbu-ana ma ra o rasenggi' musu na ra boe. 18 Mia tititi-nonosi ma ra, dei fo basa leo mana sia raefafo' ia hambu papala-b'ab'anggi', huu ho tungga parenda ngga ena.’”
19 Basa ma, Abraham noo Isak 'onda bali' risi' ate karua' ra, de bali' Beer Syeba reu. Boe ma, Abraham se leo sia naa.
Nahor tititi-nonosi na
20 Lao esa, Abraham rena 'oi 'od'in Nahor saon Milka bonggi ana na ra ena. 21 Ana ulu' a, naran Us. 'Od'in, naran Bus. Boe ma, Kemuel (mana dad'i Aram aman), 22 ma Kesed, Haso, Pildas, Yidlaf, noo Betuel. 23 Betuel ia, Ribka ama na. 24 Nahor o hambu selu' ana' mia sao tias na, naran Reuma. Ana bonggi Teba, Gaham, Tahas, noo Maaka.