2 Petrus
Petrus susura karuan
Sod'a-mole'
1
Susura ia mia au, Simon Petrus.a Au dad'i Yesus Kristus ate na. Au o dad'i Eni atahori ded'enun, fo Ana denu sud'i 'a bee 'uu fo 'ufad'e atahori so'al Eni.Au sura' susura ia fee neu nggi mana mimihere neu Yesus Kristus ena. Huu Lamatualain ralan ndoos, de Ana soi dala' fo ama bisa mimihere neu Kristus, 'ona' hai boe. Nemehere' naa, mafelit soa' neu basa nggita. Kristus o dad'i hita Lamatualain na, ma Eni o dad'i Atahori mana soi-tefa hita mia sala ta ra.
2 Au 'o'e fo ama bisa mihine malolole Lamatualain, ma mihine malolole hita Lamatuan Yesus boe. Hela fo ara ratud'u rala malole na ra neu nggi, fo ama bisa misod'a noo mole-d'ame ma nee-nee lino-lino.
Lamatualain pili atahorin, ma no'e se rema risi' E
3 Yesus koasan 'ona' Lamatualain koasan boe. Naa de Yesus fee nggita basa saa fo hita parluu, fo tasod'a matetu' tungga Lamatualain hihii-nanau na. Ana tao ta'o naa, huu tahine E noo malole. Ma Ana mana no'e nala nggita fo dad'i atahorin, huu Eni malole' ma mandete-masa'a'. 4 Yesus fee basa dala pantiin ra neu nggita. Huu dalahulun, Ana helu-fuli nae fee dala' naa ra ena. Hehelu-fufuli na ra, malolen seli. Ana fee basa naa ra neu nggita, fo rala ta ra bisa dad'i 'ona' Lamatualain ralan boe. Ma hita o bisa tala seri mia basa dala' de'ulaka' fo atahori raefafo' hii tao' ra, huu rasod'a tungga 'a hihii-nanau na ra, ma nda ra'amamate' rala ao na ra sa.
5 Naa de au nau ama mimbirii' mihere' fo tao dala malole' ra.
Ama mimihere Yesus ena, te naa nda fe'e dai sa.
Tao mikindoo 'a dala malole' ra.
Mihine Lamatualain noo malole.
6 Te 'afi' losa 'a naa.
Minori fo misod'a mi'imamate' ao ma ra.
Te naa o nda fe'e dai sa boe.
Mete ma ama hambu susa-sona', na, ama musi mi'itataa' mihere', 'afi' mi'id'ed'ea'.
Ma tao lena' naa fai.
Tao basa-b'asa' e tungga Lamatualain hihii-nanau na.
7 Te 'afi' losa 'a naa boe.
Mitud'u susue' neu toronoo atahori mamahere ta ra.
Te naa o nda fe'e dai sa boe.
Huu ama musi misod'a esa sue-lai esa mikindoo 'a.
8 Mete ma ama misod'a ta'o naa, ma dala' malole ra boe ramanae rakandoo, na, naa tao nggi mihine malole hita Lamatuan Yesus Kristus. Dala malole' ia ra nda nggari parsuma' sa, ma nda ngganggari fai a sa. Huu dala' ia ra tao nggi mihine E noo malole. 9 Mete ma hambu atahori nda nau tao ta'o naa sa, na, ana du'a e'eku' a. Ana nda nita saa mana hambu sia matan sa, ana 'ona' poke'. Lamatualain 'ose hendi atahori naa sala na ra fo ralan bisa meu'. Te atahori naa lilii' ena!
10 Toronoo susue ngga ra, e! Ia naa ama musi mimbirii' mihere' lena' fai. Lamatualain pili nala nggi dad'i atahorin ena, de 'ima misi' E. Ia naa, musi mitud'u mae, hei dad'i Eni bob'onggin ena. Mete ma dala' ia ra fo au 'ufad'e faa' ra, boe namanae nakandoo sia masod'a ma ra, na, ama nda tud'a sa. 11 Noo ta'o naa, Lamatualain nau fee nggi dala' esa manaseli'. Naeni Ana soi dala' ma fee nggi hak fo simbo Yesus Kristus dad'i hei Manem fo misod'a mikindoo moo E. Te Eni, hita Lamatua na. Ma Eni o, Atahori mana fee masoi-masod'a' neu nggita mia sala ta ra.
Saa de Petrus sura' ta'o naa?
12 Hei mihine dala' fo faa' ra au 'ufad'e' naa ra ena, ma ama mi'itataa' mihere', huu ama mimihere neu saa fo ndoo-tetu' a. Mae ta'o naa o, au 'ae fee nesenened'a' 'usufafali dala' ia ra neu nggi, naa fo ama nda lilii' sa. 13 Au nda nau hela nggi fo ama lilii' sa. Au 'ae fee nggi nesenened'a', fo ama du'a mikindoo 'a dala' ia ra. Te lele' au fe'e 'usod'a sia raefafo' ia, mema' nandaa au fee nggi nesenened'a so'al dala' ia ra. 14 Nda doo' sa te, au mate ena. Hita Lamatuan Yesus Kristus nafad'e neu au ta'o naa ena. Naa de au 'uhine mema' ena. 15 Mae dei fo au mate o, te lele' ia au ue-tao teb'e-teb'e', fo ama misined'a mikindoo dala' ia ra.
Hita tita Yesus mandete-masa'an ena
16 Dalahulun, au 'oo nonoo ngga ra dui nggi so'al hita Lamatuan Yesus Kristus ena. Hai o dui mae, mete ma Ana bali' nema, na, nema noo koasa manaseli'. Teb'e, to? Te naa nda dud'ui leleko' sa. Huu hai dui' saa fo hai mete mita noo mata ao ma ra! Naa de hai bub'ulu' Yesus mandete-masa'an, 'ona' mane monae' esa. 17-18 Lao esa, hai moo Yesus mi'ib'ue sia Lamatualain lete meumare na. Ma Ama' Lamatualain mana nafad'e hai so'al Yesus mandete-masa'a na. Huu lele' naa, hai rena hara malole manaseli' esa mia lalai a 'oi,
“Ia, Au Ana susue ngga.
Ana tao namaho'o rala ngga nakandoo 'a.”b
19 Naa tao nggita boe tamahere so'al dala' ra fo ata simbo mia Lamatualain mana 'ola-'olan dalahulu' ra ena. Dad'i malole lena' ama tao tungga hehelu-fufuli na ra! Huu hehelu-fufuli na ra naa, 'ona' lambu esa naronda sia mamana ma'ahatu' a. De ama musi rena hehelu-fufuli na ra losa Yesus bali' nema. Noo ta'o naa, ama boe mihine mikindoo 'a. Huu naa 'ona' ama mita nduu fefetu' a na'ahulu', dei de relo a tod'a fo tao basa' e manggarelo'.