Sara bonggi Isak fee Abraham
21
1-7 Basa naa ma, LAMATUALAIN fee papala-b'ab'anggi' neu Sara, tungga hehelu-fufuli na. Abraham too natun esa (100) ena ma, Sara nairu boe. Dai fain ma, ana bonggi ana tou' esa. Abraham bab'ae naran, Isak (sosoan ‘ana mali’).Sara o 'ola' nae, “Lamatualain tao au mali, huu ia naa 'umuho'o ena. Atahori ra du'a rae au nda bisa hambu ana' sia fai lasi ngga ia sa ena. Tao-tao te, mae au sao ngga namalasi nae' ena o, au fe'e bonggi fee ne. De ia naa, sud'i 'a see rena dala' ia o, ara mali roo au.”
Lele' Isak fai falu ma, Abraham sunat e, tungga Lamatualain parenda na.
Hagar noo Ismael nene'oi'
8 Basa ma, Isak boe na'amoko. Ara rae fila e ma, Abraham feta-d'ote monae'.
9-10 Lao esa, Sara nita Abraham sao murin, Hagar, anan Ismael, 'aka' a na'asesenggo' Isak. De Sara 'ola' noo saon nae, “'Oi hendi ate mana mia Masir noo ana na! Au nda nau ate naa anan simbo hata-heto' saa-saa sa boe. 'Aka' a ana ngga Isak, musi soa basa se.”
11 Abraham rena Sara 'ola' ta'o naa ma, dud'u'an nda malole' sa, huu Ismael o eni anan boe. 12 Te Lamatualain 'ola' noo e nae, “Abraham! Ho 'afi' du'a sao murim noo ana na. Tungga 'a Sara hihiin, huu tititi-nonosi' fo Au helu-fuli' a, ho hambu mia 'a Isak. 13 Te Au o fee papala-b'ab'anggi' neu sao murim anan, huu eni o ho anam boe. Dei fo tititi-nonosin dad'i leo esa boe.”
14 Mbila fefetu anan ma, Abraham tao lepa-nggees fee Hagar, ma fee ne nasalili oe boto esa. De ana mbo'i ina' naa noo anan Ismael lao. Ara lao ndule rae rou' deka noo Beer Syeba.a
15 Lele' oe nininu na ra basa ma, Hagar lao hela anan mia hau huu ana' esa mafo na. 16 Ana du'a sia ralan nae, “Au nda 'u'utataa' 'ita ana' ia mate sa.” Naa de, ana 'endo' na'ad'od'oo' mbei ma meter lima nulu mia ana' naa, de nggae ei-ei.
17 Lamatualain o rena Ismael hara ngganggae na. Ma aten esa mia sorga no'e Hagar nae, “Hagar! Saa de ho susa ta'o ia? 'Afi' mumutau, huu Lamatualain rena basa anam ngganggaen ena. 18 Ia naa, fela muu se'u anam, fo tao manggatee rala na. Dei fo Au tao tititi-nonosin dad'i leo manaseli' esa.”
19 Boe ma Lamatualain tao nameu matan, losa ana nita oe mata' esa sia naa. Ana nad'ai oe neu boto a, de neu fati ana na.
20-21 Boe ma, Ismael noo inan leo sia nembe sara'ae' Paran. Ana na'amoko nema ma, ana dad'i mana busu masi'et. Basa ma, inan fee ne sao ina Masir esa. Basa ia ra dad'i, huu Lamatualain noo Ismael.
Abraham noo Abimelek bad'ame sia Beer Syeba
22 Lele' naa, mane Abimelek noo malangga netatin, naran Fikol, rema randaa roo Abraham. Mane' a 'ola' nae, “Abraham! Hai bub'ulu' Lamatualain noo nggo. Naa de, ho tao saa naa, basa' e dad'i. 23 Dad'i ia naa, au 'o'e nggo sumba sia Lamatualain matan mae, ho nda leleko' au ma umbu-ana ngga ra sa. 'Ona' au tao malole' neu nggo, na, ho o musi tao malole' neu au ma nusa ngga ia boe.”
24 Abraham nataa nae, “Malole! Au sumba.”
25 Te basa naa ma, Abraham nafad'e mane' a nae, “Ama mane' atahori na ra rambas rala au oe mata ngga esa.”
26 Mane' a rena ta'o naa ma, nataa nae, “Haa? Au fe'e rena dala' ia ena. Saa de ama' nda nafad'e eni' a dalahulun sa? Au nda bub'ulu' see mana tao sa boe.”
27-28 Basa ma, Abraham noo Abimelek pa'a hehelu-fufuli'. Ma Abraham ha'i sapi noo bib'i lombo fee mane' a. Boe ma ana humu selu' bib'i lombo tena' hitu fai. 29 Boe ma mane' a natane e nae, “Saa de ho tao ta'o naa?”
30 Boe ma Abraham nafad'e nae, “Ama mane' simbo mala bib'i lombo tena' kahitu' ia ra, fo dad'i bukti ama mane' mutaa mae, au mana 'ali oe mata' ia.”
31 Huu ru'a se so'u susumba' sia naa, de ara bab'ae mamana' naa, naran Beer Syeba. Sosoan ‘oe mata susumba'’.b
32 Ara sumba basa ma, mane Abimelek noo malangga netatin bali' risi' sira nusa Filistin na. 33 Basa de, Abraham sela hau tamareska esac sia Beer Syeba. Mia lele' naa, hau naa fee nesenened'a' neu Abraham 'oi, sia naa, eni be'utee neu LAMATUALAIN mana nasod'a losa doon-ndu'u-doon neu. 34 Boe ma Abraham numban doo' mia atahori Filistin ra nusa na.