Sara mate, de Abraham na'oi e
23
1-2 Sara too natun esa rua nulu hitu (127), ma ana mate. Lele' ana mate, Abraham se leo sia kambo Kiryat-Arba (naeni Hebron), sia rae Kana'an. Abraham nggae ei-ei ma be'e saon mamate na.3 Basa ma, ana neu nandaa noo atahori Het ra, de 'ola' nae, 4 “Au ia numban sia hei talad'a ma ra. Au nda marae' fo u'oi sao ngga sa. Mete ma ama nau, na, fee au hasa 'ala raem mbei, fo au u'oi e sia naa.”
5 Ara rataa rae, 6 “Ta'o ia ama'! Doo basa ia, hai tao ama' 'ona' atahori lasi' esa fo hai fee had'a-hormat. Dad'i ama' hii neu' ena, rae bee malole lena', nandaa noo ama' hihii na. Hai simbo noo malole', esa o nda 'ai sa boe.”
7 Boe ma Abraham o be'utee fee had'a-hormat neu tenu rae' ra, atahori Het ra. 8 Ana nafad'e nae, “Mete ma ama simbo 'o'ola ngga faa' ra, na, au 'o'e tulun nggi 'ola' moo tou lasi Sohar ana monen, Efron. 9 Mo'e fo mete ma ana nau seo luat na, naran Makpela, neu au, na, hasa 'ala e. Luat naa, sia osin suu na. Ana no'e felin sud'i 'a ba'u saa o, au bae. Au nau bae 'etu felin sia basa nggi mata ma ra, fo rae naa dad'i au 'ena ngga. Au 'ae tao rae naa, dad'i hai mamana rates ma.”
10 Lele' naa, Efron o 'endo' noo atahori Het ra boe, de ana rena Abraham 'o'ola na. Ana nambarii' de nataa Abraham sia basa atahori lasi' ra mata na ra nae, 11 “'Afi' ta'o naa, ama'. Te ta'o ia. Au fee osi naa noo luat Makpela neu ama'. Ama' muu mu'oi saom sia naa leo. Au fee rae naa neu ama' sia atahori ngga ra mata na ra. Naa fo, basa se sakasii!”
12 Boe ma Abraham be'utee selu' sia atahori Het ra mata na ra. 13 Ana 'ola' noo Efron nae, “Naa o malole boe, te rena au dei. Au 'ae hasa 'etu rae naa, fo 'u'oi atahori ngga ra sia naa.”
14-15 Efron nataa nae, “Rae naa felin 'aka' a doi fula' natun haa. Soa saa ru'a nggita taloe neu-nema 'aka' doi' mbei ana' naa? Ama' muu mu'oi saom sia naa leo.”
16 Abraham na'ahei' rae a felin, tungga Efron 'o'ola na. Dad'i ana reken doi fula' natun haa, de bae neu Efron mia basa atahori Het ra matan, fo ara dad'i sakasii.
17-19 Noo ta'o naa, Abraham hambu Efron raen, dad'i eni 'ena na. Rae naa sia Makpela, deka noo Mamre (naeni Hebron). Ana hasa 'etu rae naa noo osi ma luat na, ma basa hau huu' ra. Basa lasi-lasi' atahori Het ra dad'i sakasii rae noo isin, Abraham 'ena na.