2 Rona nola nunia, Yesus nusu na'ak, “Nu'unabee? Ema Galilea mak kona ho'o nia sia, siakaan salan, boot liu nosi ema Galilea seluk ka? 3 Lale! Mais kalo emi la halo neon aat baa emikaan salan, hodi fila baa Na'i Maromak, emi moos atu dodok nu'u sia. 4 Uluk, noo ema na'in sanulu resin walu mak mate tan tetu aas nakro'on kona sia iha Siloam. Siakaan salan boot liu nosi ema Yerusalem seluk sia ka? 5 Lale! Mais kalo emi la halo neon aat baa emikaan salan, hodi fila baa Na'i Maromak, emi moos atu dodok nu'u sia.”

6 Hotu Yesus katak lia hatetek ida na'ak, “Noo ema ida mak noo ai huun mafuak iha to'os.^a Nia mai bei-beik tanaat atu natene ai huun nia nafua ti'an ka, sei. Mais mana baa mai, sei dauk. 7 Naree nunia, ema nia naruka mafaho to'os na'ak, ‘Tinan tolu ti'an, ha'u kmai bei-beik buka ai huun ne'e fuan, mais la ketan. Di'ak liu, mu'an ona, tan naa fatik dei.’

8 Mais mafaho to'os nataa na'ak, ‘Ama keta kanarak. Foo leet baa ai huun ne'e tinan ida tenik. Mabusik ha'u kafaho kodi babilan. 9 Kalo tinan oin ne'e sei la nafua, foin hu'an.’”

10 Ema Yahudi loron hamulak to'o mai ti'an, Yesus baa nanorin iha uma hamulak. 11 Iha nia, noo feto ida mak kotuk fu'ur tinan sanulu resin walu ti'an, tan diabu hahalok. Feto nia la bele nalolo aan. 12 Titu-naree feto nia, Yesus dale na'ak, “Ina! Ina di'ak ona.” 13 Yesus moos rai liman baa feto nia. Teki-tekis, niakaan kotuk fu'ur naklolok kedas. Nia moos tonu-naboot Na'i Maromak.

14 Mais uma hamulak ulun krakat, tan Yesus nadi'ak nola ema baa loron hamulak. Nia katak baa ema nia sia na'ak, “Domiku ida, serwisu loron neen. Di'ak liu, hadi'ak hola ema moras baa loron serwisu dei, keta baa loron hamulak!”^b

15 Mais Yesus nataa na'ak, “Hoi! Tolek teen! Baa loron hamulak, emi moos serwisu. Emi habusik karau baka no kuda keledai atu haroo. 16 Ina ne'e, Bei Abraham husar-binan, hanesan emi. Diabu ulun kesi nia tinan sanulu resin walu ti'an. Kalo Ha'u kabusik nia baa loron hamulak, lia nia sala ka?”

17 Rona nola nunia, Yesus funun sia moe. Mais ema lear neon di'ak tan Niakaan serwisu kabaas.

18 Hotu Yesus dale natutan tenik na'ak, “Ha'u atu kanesa Na'i Maromak hutun-renu nu'u saa? 19 Nune'e: uluk fohon, sia na'in hira dei. Mais kleu-leur sia hetak wa'in. Sia nahuu hanesan ai fuan musan ki'ik basuk mak ema furi iha to'os.^c Kleu-leur moris mai, dadi ai huun boot. To'o manu ai leten sia mai, nalo knuuk iha sorun.”

20 Hotu Yesus dale tenik na'ak, “Ha'u atu kanesa Na'i Maromak hutun-renu nu'u saa tenik? 21 Nune'e: sia hanesan tua teen mak feto sia kahur baa tubi rahun^d atu nalo tubi. Tubi nia sa'e to'o boot, tan tua teen oan nia. Na'i Maromak hutun-renu moos keke lema nunia.”

22 Nunia hotu, Yesus sia nahuu la'o baa kota Yerusalem. Iha dalan sia tuur tuli iha kota no leo nodi nanorin ema.

23 Iha fatin ida, noo ema ida nusu baa Yesus na'ak, “Ama Boot! Tuir Ama hanorin, ema uit dei mak bele netan moris ka?”

24 Yesus nataa na'ak, “Lale'an odamatan tataman nia, loot basuk. Harui aan di'a-di'ak, nebee bele tama. Oras rai falu fila, ema wa'in nakara tama, mais la bele ona, tan la noo leet ti'an. 25 Keta to'o uma na'in kusa odamatan ti'an, hotu emi hariik deku-deku odamatan, hodi husu tulun ha'ak, ‘Ama boot! Loke lai!’

Masik emi husu tulun nunia moos, uma na'in nia atu nataa na'ak, ‘Emi ne'e see? Ha'u la katene emi!’

26 Hotu emi hataa ha'ak, ‘Oin nu'u saa, ama boot la matene ami? Ami mak loron-loron haa-hemu ho ama boot. Ama boot moos nanorin ami iha amikaan leo.’

27 Mais uma na'in nia nataa tenik na'ak, ‘Ha'u katak ti'an! Ha'u la katene emi! Emi ne'e, mahalok aat. Sees hosi ne'e!’^e

28 Hotu emi atu tanis hade'un aan hodi ruun ne'an, tan titu-haree Bei Abraham, Bei Isak, Bei Yakob no mako'an hotu-hotu tuur bele-bele iha Na'i Maromak tofatik ti'an. Mais emi kona te'ur baa luan.^f 29 Ema seluk sia moos tuur naa bele-bele iha nia. Sia mai nosi rai ikun to'o rai ulun, nosi lorosa'e to'o loromonu, nosi lorokaras to'o lorokbelan.^g 30 Hatadan lia ne'e di'a-di'ak: Baa oras rai falu fila, ema mak uluk ema ki'ik, Na'i Maromak nafoli na'ak, ema boot. Mais ema mak uluk ema boot, Na'i Maromak nafoli na'ak, ema ki'ik.”^h

31 Baa oras nia, ema Farisi na'in hira mai nasoru Yesus nodi katak na'ak, “Di'ak liu Ama Boot hakiduk baa fatin seluk, tan Na'i Herodes buka Ama atu no'o.”

32-33 Mais Yesus nataa na'ak, “Hoi! Ama katuas nia nu'u meda karonak! Baa katak nia ha'ak, ‘Ha'u ksei te'ur diabu no kadi'ak kola ema moras baa ohin loron no awan. Wainrua, foin Ha'u kserwisu mohu.’ Ha'u la kakiduk baa fatin seluk, mais atu la'o liu baa Yerusalem, tan ema nakara no'o Maromak mako'an sia iha nebaa.

34 Adeei! Ema Yerusalem sia! Emi ne'e mak ho'o Maromak mako'an sia. Emi moos mak tuda ho'o klosan mak mai natudu Niakaan dalan baa emi. Dala wa'in ti'an Ha'u kbeer klibur kodi lituk emi kosi a'aat, hanesan manu inan lituk oan nodi liras. Mais emi la ho'uk. 35 Oras ne'e, Na'i Maromak se'i kotuk ti'an baa emikaan uma hamulak. Tan baa nia, awan-wainrua uma nia mamuk ona. Rona! Emi la haree tenik Ha'u ona, to'o oras emi katak sain ha'ak: