3 Hotu, Yesus baa tuur iha Foho Saitun. Niakaan maktuir sia mai atu dale mesan no Nia na'ak, “Ama! Katak mikar kokon Ama dale ohin nia. Niakaan oras, wainhira to'o? Niakaan tadak, nunabee?”

4 Yesus nataa na'ak, “Emi musti daka aan di'a-di'ak, nebee keta kona be'ur. 5 Ema oi-oik atu mai nodi basa karas na'ak, ‘Ha'u ne'e, Kristus mak Na'i Maromak solok mai.’ Nodi nunia, sia be'ur nola ema wa'in. 6 Kalo emi haree ema natuda malu, lalika hata'uk. Kalo rona lia na'ak, hatuda iha nabee dei, lalika hata'uk. Tan lia oin nunia, musti dadi. Mais loron rai falu fila sei la to'o dauk. 7 Ema hunun ida atu natuda sakar hunun seluk. Rai ida atu natuda sakar rai seluk. Rai nakdoko iha nabee dei. Rai salaen moos, boot basuk. 8 Mais lia nia hotu-hotu foin tadak uluk fohon na'ak, oras rai falu fila kre'is ona. Hanesan feto mak foin noran moras, tan oras nahoris kre'is ona.

9 Emi musti daka aan di'a-di'ak, tan ema atu naloot nodi no'o emi. Ema nosi rai hotu-hotu atu hirus emi, tan tuir Ha'u.^a 10 Baa oras nia, ema wa'in atu tali'ur Ha'u. Ema atu hirus malu, nodi fa'an malu. 11 Ema bosok teen moos atu mai nodi na'ak, sia nia Maromak mako'an, to'o ema wa'in moos fiar baa sia. 12 Baa oras nia, ema siakaan a'aat hetak kleur, hetak wa'in, to'o ema la nadomi malu ona. 13 Mais ema mak naterus aan to'o mate, Na'i Maromak nanis sori nia.^b 14 Manfatin Di'ak nosi lia Na'i Maromak kaer ukun musti keke lema raiklaran sikun sia, nebee ema hotu-hotu bele rona lai, foin rai falu fila.”

15 Hotu Yesus dale liu tenik na'ak, “Maromak mako'an Daniel nakerek kedan nosi ema aat basuk ida. Ema nia atu mai, tama baa nariik iha fatin lulik iha Na'i Maromak Niakaan Uma Hamulak Huun. Nodi nunia, nia nalo ema nakribi fatin nia, to'o Na'i Maromak moos tali'ur la'o nela fatin nia. Dadi, kalo emi haree nunia ti'an, sintidu! (Ema mak leno hakerek ne'e moos musti natene di'a-di'ak!)^c 16 Lia nia dadi tadak na'ak, loron susar sia kre'is iha odamatan ti'an. Kalo haree nunia ti'an, ema rai Yudea hariik halai baa foho ona. 17 Ema mak sai nosi uma ti'an, keta fila baa nola naha tenik. Halai lai-lais ona, nebee keta kona dinu. 18 Ema mak iha to'os, keta fila baa nola tais manas tenik. Halai liu ona!^d 19 Baa oras nia, ema susar kaliuk, ne'e mak, feto mako'us no mak sei nasusu oan, tan sia la bele nalai lai-lais. 20 Di'ak liu, hamulak hodi hakro'an, nebee dinu nia keta mai kona baa rai udan, lale, kona baa loron hanawa serwisu. 21 Loron nia sia, susar basuk! Nahuu nosi Na'i Maromak nase'i raiklaran to'o oras ne'e, ema sei la naree dauk susar boot oin nunia. Ema moos la naree tenik susar oin nunia ona.^e 22 Kalo Na'i Maromak la nabadak loron susar nia sia, la noo ema ida mak bele moris. Mais, tan Nia nadomi Niakaan ema mak Nia boi nola, Nia atu nabadak loron susar nia sia.

23 Kalo loron nia to'o mai ona, emi atu rona ema na'ak, ‘Haree lai! Kristus iha ne'e!’ Ema seluk moos na'ak, ‘Kristus iha nebaa!’ Mais keta fiar! 24 Ema atu mosu mai nodi basa karas na'ak, ‘Ha'u ne'e, Kristus!’ Balu tenik na'ak, ‘Ha'u ne'e, Maromak mako'an.’ Sia atu nase'i tadak blaar oi-oik nodi diabu beran to'o tolek nola ema. Sia sokur kokon, nebee Na'i Maromak eman sia moos bele kona be'ur! 25 Dadi, emi musti daka aan di'a-di'ak! Loron susar nia sia sei la to'o dauk, mais Ha'u katak kedan baa emi!

26 Kalo ema katak baa emi na'ak, ‘Kristus mai ti'an iha rai molik nebaa!’, keta baa nebaa. Kalo ema na'ak, ‘Kristus mai iha uma laran ne'e ti'an!’, keta fiar siakaan tolek nia. 27 Ha'u ne'e, Ema Raiklaran Isin nosi lale'an. Baa oras Ha'u kmai kikar iha raiklaran ne'e, ema hotu-hotu atu titu-naree Ha'u, hanesan ema naree mameran laka nosi lorosa'e baa loromonu.^f

28 Baa oras Ha'u kmai kikar, emi atu hatene malorek Ha'u iha nabee. Hanesan ema natene malorek, manu kawaa naklibur iha fatin nabee, nanis noo na'an dodok iha nebaa.”^g

29 Hotu Yesus katak natutan tenik baa Niakaan maktuir sia na'ak, “Kalo loron susar nia sia siku ti'an,

30 Hotu, ema atu naree tadak iha lale'an mak natudu na'ak, Ema Raiklaran Isin atu namaan aan mai nikar. Naree nola nunia, ema nosi rai hotu-hotu iha raiklaran, atu nata'uk to'o tanis. Ha'u ktuun mai kodi kalo'an, foin sia naree Ha'ukaan beran no Ha'ukaan maka'as.ⁱ 31 Hotu, Ha'u atu karuka Na'i Maromak Niakaan makbukar lale'an sia, nebee baa libur nola ema hotu-hotu mak Ha'u kboi kola ti'an, kosi rai ulun to'o rai ikun, kosi lorosa'e to'o loromonu, kosi lorokaras to'o lorokbelan.”

32 Hotu Yesus dale tenik na'ak, “Ha'u kola knaninuk nu'u ai huun. Kalo ai tahan nahuu nakmodok, nia foo tadak na'ak loro falin kre'is mai ona. 33 Nunia moos, loron susar mak Ha'u katak ohin nia sia. Kalo loron susar nia sia to'o mai ti'an, nia foo tadak na'ak, Ha'u kre'is mai ona. 34 Rona, tan Ha'ukaan dalen ne'e, tebes no loos! Nosi ema hotu-hotu mak moris baa oras ne'e, balu sei la mate dauk, mais loron susar nia sia mai ti'an. 35 Masik lale'an no raiklaran lakon mohu moos, Ha'ukaan Manfatin ne'e nafati nohuun.”

36 Hotu Yesus katak na'ak, “La noo ema ida mak natene wainhira Ha'u kmai kikar. Na'i Maromak Niakaan makbukar lale'an sia la natene. Ha'u moos la katene. Ha'ukaan Ama mesan, mak natene. 37 Ha'u ne'e, Ema Raiklaran Isin nosi lale'an. Oras Ha'u kmai kikar, nu'u oras uluk aan, mak oras Noh sei moris.^j 38 Baa oras nia, motasa'e boot sei la mai dauk. Ema moris hanesan da-dauk dei. Sia naa-nemu namidar aan, nodi nola malu bele-bele, to'o Noh tama baa roo boot nia laran. 39 Oras motasa'e mai, lulun nodi sia, foin siakaan matan nakloke, no sia natene nola saa mak dadi ti'an nia. Nunia moos, baa oras Ha'u kmai kikar.^k 40 Kalo ema na'in rua serwisu iha to'os, teki-tekis Na'i Maromak foti nodi ida, nela ida. 41 Kalo feto na'in rua fai hare, teki-tekis Na'i Maromak foti nodi ida, nela ida.

42 Tan lia nia, emi musti daka aan loron-kalan, tan la hatene wainhira emikaan Na'in atu namaan aan mai nikar. 43 Hanoin! Kalo ema uma na'in natene na'ak, kalan ne'e ema na'ok atu mai, nanis nia daka bei-beik. 44 Emi moos musti daka bei-beik nunia, tan emi la hatene wainhira Ha'u kmai kikar.”^l

45 Hotu Yesus dale tenik na'ak, “Emi musti dadi hanesan ema ain-liman mak tuir bei-beik ulun hakaran. Lia hatetek nune'e. Noo ulun ida atu baa fatin dook. Nia foti ema ain-liman ida atu naliku haa-hemu bodik niakaan ema uma laran. 46 Kalo ulun nia mai nikar, hotu naree nia serwisu di'a-di'ak, nanis nia neon di'ak no ema nia. 47 Rona! Ha'ukaan dalen ne'e, tebes no loos! Kalo ema ain-liman serwisu di'a-di'ak nunia, nanis niakaan ulun atu foo beran baa nia nebee naliku ulun sasoin hotu-hotu.

48 Mais, kalo ema ain-liman nia aat, nia atu dale iha neon laran na'ak, ‘Di'ak ti'an! Ulun la'o ti'an nune'e, sei kleur foin nia mai!’ 49 Nanoin nunia, nia nahuu ta'e ema serwisu seluk sia. Nia tuur naa-nemu namidar aan bele-bele no ema tua lanuk teen sia. 50 Mais la nanoin nola, teki-tekis ulun fila mai. 51 Hotu ulun naloot nia tebe-tebes, to'o soe lerek nia baa luan, nebee nein namutuk no ema oin-kotuk sia. Iha fatin nia, ema noran susar basuk nodi tanis la nanawa.”