Dahur iha leo Kana
2
Baa wainrua, noo ema nalo uma kain foun, hotu sia nalo dahur iha leo Kana iha rai Galilea. Yesus inan iha nia. 2 Yesus no Niakaan maktuir sia moos kona hamata. Hotu, sia baa.3 Mais kleu-leur, anggor ween nahuu mohu iha dahur nia. Yesus inan mai katak baa Nia na'ak, “Oa! Tulun lai! Siakaan anggor ween mohu ti'an.”
4 Yesus nataa na'ak, “Ina. Tan saa ina nakara Ha'u mak babilan? Ha'ukaan oras sei la to'o dauk.”
5 Mais inan katak baa ema makserwisu iha nia sia na'ak, “Rona! Nia naruka halo saa, halo tuir baa dei.”
6 Iha fatin nia noo kusi fatuk neen. Kusi ida-idak nahisi wee takseer liter hitu nulu resin lima to'o atus ida sanulu resin lima. Ema Yahudi tau wee baa kusi nunia sia, atu nodi namoos aan tuir siakaan adat. 7 Baa oras nia, Yesus naruka baa ema makserwisu sia na'ak, “Hola wee, tau hakonu kusi ne'e sia.” Rona nola nunia, ema makserwisu sia tau nakonu wee baa kusi nia sia. 8 Hotu Yesus naruka na'ak, “Oras ne'e, kuru hola oda, foo baa dahur na'in.” Sia moos nalo tuir. 9 To'o nebaa, dahur na'in nemu kokon wee nia. Natene nodi baa, wee nia dadi anggor ween ti'an! Dahur na'in benar, tan nia la natene sia netan anggor ween nia nosi nabee. (Mais ema makserwisu sia natene.)
Hotu, dahur na'in bolu nola sasudin mane. 10 Nia katak na'ak, “Tuir loos, ema foo uluk anggor ween mak di'ak. Ema nemu wa'in ti'an, foin nasai anggor ween la duun di'ak. Mais o malo baku fila. O masai uluk anggor ween la duun di'ak, foin o masai anggor ween di'ak.”
11 Lia nia dadi iha leo Kana, iha rai Galilea. Oras nia, Yesus nase'i tadak blaar uluk fohon mak ema bele naree. Nia natudu Niakaan kabaas nunia, to'o Niakaan maktuir sia fiar baa Nia.
12 Nunia hotu, Yesus no Niakaan inan, Niakaan alin sia, no Niakaan maktuir sia, tuun baa kota Kapernaum. Mais sia nein iha nia loron hira dei.a
Yesus te'ur sai ema nosi Uma Hamulak Huun
13 Ema Yahudi siakaan loron boot Paska kre'is mai ona, Yesus sa'e baa kota Yerusalem.b 14 To'o Uma Hamulak Huun lalawar, Nia naree ema fa'an karau baka, bibi malae, no manu lakateu sina. Sia fa'an buat nia sia baa ema mak mai Uma Hamulak Huun atu nalo sera tunun bodik Na'i Maromak. Iha nia moos, Yesus naree ema tuur taruka osan mak ema nodi sera baa Na'i Maromak. 15 Naree notu nunia, Yesus nodi oe te'ur sai ema hotu-hotu nosi nia. Nia moos nabu'a sai karau baka no bibi malae sia. Nia naloti fatin taruka osan, nodi fakar keke karin osan nia sia. 16 Hotu Nia naruka ema makfa'an lakateu sina nia sia na'ak, “Hasai naha ne'e sia hosi ne'e! Fatik ne'e lahoos fa'an fatin! Keta halo Ha'ukaan Ama Uman dadi fa'an fatin!”
17 Baa oras nia moos, Niakaan maktuir sia nanoin nola Hakerek Moon na'ak,
“Ha'u kadomi basuk Na'i Maromak Uman.
Etuk ha'u kbeer basuk daka Niakaan naran di'ak.”c
18 Nunia hotu, Yahudi ulun sia nusu Yesus na'ak, “Tan saa o te'ur ema nunia? Kalo O tebe-tebes moo beran nunia, matudu tadak blaar ida baa ami nebee dadi kaka'er.”
19 Mais Yesus nataa na'ak, “Masik emi hadodok fatin lulik ne'e moos, baa wainrua Ha'u kariik kikar.”d
20 Mais sia sakar na'ak, “Hetan hosi nabee? Ema nariik Uma Hamulak Huun ne'e, tinan haat nulu resin neen laran. Tan saa O maneo ma'ak, loron tolu dei O bele mariik mikar?!”
21 Sia nusu nunia, tan sia la natene Yesus natetek Niakaan isin lolon no fatin lulik ida. 22 Yesus mate ti'an, hotu moris nikar, foin Niakaan maktuir sia nanoin nola saa mak Nia katak kedan baa sia nunia. Hodi nunia, sia moos fiar baa lia saa mak Maromak mako'an uluk aan sia nakerek nela kedan iha Hakerek Moon nosi lia Yesus nia.
Yesus natene ema hotu-hotu neon
23 Baa oras nia, Yesus nein heik iha kota Yerusalem atu tuir loron boot Paska iha nia. Ema wa'in moos fiar baa Nia, tan sia naree tadak blaar mak Nia nase'i. 24-25 Mais Yesus la fiar sia, tan Nia natene nanis ema raiklaran neon. Nia la buka ema nalore ema raiklaran lisan baa Nia, tan Nia natene nanis.