Ema Farisi nodi lia sasa feen-la'en atu nahonu Yesus
10
Hotu, Yesus no Niakaan maktuir sia baa rai Yudea no rai seluk sia iha mota Yordan lorosa'e. Iha nia ema wa'in moos mai baa Yesus. Hotu, Nia nanorin sia nu'u wai-wain.2 Iha nia moos, noo ema Farisi na'in hira. Sia mai atu talik nahonu Yesus. Sia nusu baa Nia na'ak, “Tuir itakaan ukun-badu, kalo mane ida no feen ti'an, nia bele soe feen ka lale?”
3 Rona nola nunia, Yesus nataa na'ak, “Hanoin di'a-di'ak lai! Ukun-badu feen-la'en mak Bei Musa rai nela baa ita na'ak saa?”
4 Sia nataa na'ak, “Bei Musa ukun-badu nia na'ak, ‘La'en bele soe feen, surak foo uluk hakerek soe malu baa feen.’”a
5 Yesus moos nataa nikar na'ak, “Tan emi ulun fatuk, foin bei Musa nakerek nela ti'an nunia. 6 Mais keta halu'a lia hori uluk fohon, baa oras Na'i Maromak nase'i lale'an no raiklaran. Lia nia na'ak,
‘Na'i Maromak nase'i ema, feto no mane.b
7 Tan lia nia, mane musti la'o nela inan-aman
atu moris neon ida, laran ida no feen,
8 tan sia rua dadi mesak ti'an.’c
9 Na'i Maromak du'uk mak kesi namutuk sia rua ti'an. Ema la bele sasa fa'e ona!”
10 Nunia hotu, Yesus no Niakaan maktuir sia mesan tama baa uma ida. Iha nia maktuir sia nusu nebee Yesus katak nalore hanorin ohin nia baa sia.
11 Nia katak na'ak, “Mane mak soe feen, hotu nola tenik feto, mane nia nakur biti-kluni. 12 Feto moos nunia! Feto mak soe la'en, hotu nola tenik mane, feto nia moos nakur biti-kluni.”d
Yesus foo matak-malirin baa lawarik sia
13 Baa loron ida, ema nodi siakaan oan sia baa Yesus. Sia nusu Yesus rai liman baa lawarik sia, nebee simu matak-malirin. Mais Yesus Niakaan maktuir sia saseni ema nia sia.
14 Naree nunia, Yesus krakat baa maktuir sia na'ak, “Habusik lawarik sia mai baa Ha'u! Keta saseni sia! Tan ema oin nunia sia, mak Na'i Maromak eman. 15 Rona, tan Ha'ukaan dalen ne'e, tebes no loos! Ema mak nakara dadi baa Na'i Maromak eman, nia musti nakri'it aan baa Na'i Maromak hanesan lawarik oan nakri'it aan baa inan-aman. Kalo lale, ema nia la fatan dadi baa Na'i Maromak eman.”e 16 Hotu, Yesus nako'ak nola lawarik nia sia. Nia rai liman baa sia ida-idak, nodi foo matak-malirin baa sia.
Maksoin ida buka dalan atu moris nima-nimak no Na'i Maromak
17 Baa oras Yesus sia atu la'o, ema maksoin ida nalai mai nasoru sia. Nia nakni'a baa Yesus nodi nusu na'ak, “Ama Boot! Ama Boot ne'e, ema di'ak. Tan baa nia, ha'u kusu Ama nanorin lia ida baa ha'u. Lia nia nune'e, Ama Boot. Ha'u kmusti kalo saa, nebee katene malorek ka'ak ha'u kbele tama lale'an atu moris kamutuk ko Na'i Maromak?”
18 Yesus moos nataa na'ak, “Tan saa o temi Ha'u ma'ak ema di'ak? La no ema ida mak di'ak. Na'i Maromak mesan dei mak di'ak. 19 O matene ti'an Na'i Maromak ukun na'ak:
‘Keta ho'o ema;
Keta hakur biti-kluni;
Keta hana'o;
Keta hataa hodi lia tolek;
Keta be'ur ema hodi hola siakaan sa-saa;
No ita musti hakneter itakaan inan-aman.’”f
20 Hotu, ema nia nataa na'ak, “Tebes, Ama Boot! Ha'u kalo tuir ti'an ukun nia sia hotu-hotu hori sei ki'ik.”
21 Rona nola nunia, Yesus nadomi ema nia. Nia katak na'ak, “Kona! Mais sei no lia ida tenik. O musti fila, baa fa'an mohu okaan sasoin sia. Hotu, fa'e osan nia baa ema ki'ik no ema susar sia, foin fila mikar mai tuir Ha'u. Nosi ikus, Na'i Maromak nanis foo seluk sasoin baa o iha lale'an.”
22 Rona nola Yesus dale nunia, ema nia neon dodok. Hotu, nia fila nodi neon susar loos, tan nia soi to'o.
23 Hotu, Yesus titu Niakaan maktuir sia baa-mai nodi katak na'ak, “Rona! Kalo maksoin ida nakara tama baa lale'an atu dadi Na'i Maromak eman, lia nia kole basuk.”
24 Rona nola nunia, maktuir sia moos benar. Mais, Yesus katak nalore tenik na'ak, “Rona di'a-di'ak! Dadi Na'i Maromak eman, kole basuk! Keta hanoin ha'ak lia nia maus! 25 Lia hatetek nudaar kuda unta ida kole basuk tama lalutuk tuir daun kuak. Kole liu tenik, maksoin ida tama baa lale'an dadi Na'i Maromak eman.”
26 Lia hatetek nia nalo maktuir sia hetak benar. Hotu, sia nusu tenik na'ak, “Kalo kole basuk nunia, see mak bele netan moris?”
27 Yesus titu baa sia ida-idak nodi katak na'ak, “Kalo ema raiklaran mak nalo, nanis la bele. Mais, kalo Na'i Maromak mak nalo, nanis hotu-hotu bele!”
28 Hotu, Petrus foti lia na'ak, “Ama! Ami la'o hela ti'an amikaan sasoin sia hotu-hotu atu tuir Ita Boot. Mais, ami hetan saa?”
29-30 Yesus nataa na'ak, “Rona mai Petrus! Ha'ukaan dalen ne'e, tebes no loos! Kalo ema ida la'o nela niakaan inan-aman, maun-biin-alin, niakaan oan, niakaan to'os, niakaan serwisu, niakaan uma laran isin hotu-hotu, tan tuir Ha'u nodi keke lema Na'i Maromak Manfatin Di'ak, ema nia nanis simu nikar isin atus ida. Hotu-hotu mak nia la'o nela nia, nia simu nikar liu tan tenik. Ema nanis nasusar nia, tan tuir Ha'u. Mais, baa oras rai falu fila, nia netan moris nima-nimak no Na'i Maromak. 31 Hanoin di'a-di'ak! Ema mak naksa'ek aan dadi ema boot, nosi ikus Na'i Maromak nafoli nia na'ak, ema ki'ik. Ema mak naraik aan hanesan ema ki'ik, nosi ikus Na'i Maromak nafoli nia na'ak, ema boot.”g
Dala tolu ona Yesus katak kedan lia Niakaan susar no mate
32 Hotu, Yesus no Niakaan maktuir ema na'in sanulu resin rua no ema seluk sia baa kota Yerusalem. Yesus la'o nosi oin. Naree nunia, Niakaan maktuir sia benar no nata'uk, tan nanoin nola lia mak uluk Yesus katak na'ak, ema atu no'o Nia iha Yerusalem. Yesus natene nola sia nata'uk nunia, Nia bolu nola maktuir sia mesan, hotu Nia katak nalore lia saa mak ema atu nalo baa Nia iha Yerusalem. 33 Nia katak na'ak, “Rona! Oras ne'e, ita baa Yerusalem ona! Iha nia ema atu fa'an Ha'u, mak Ema Raiklaran Isin ne'e. Hotu, sia latan Ha'u baa na'ilulik ulun sia no manorik ukun sia. Hotu, sia taa ukun mate baa Ha'u. Sia moos latan Ha'u baa ema seluk sia mak la natene Maromak. 34 Hotu, sia dale namoe Ha'u, soe kaban baa Ha'u, no no'at nadodok Ha'ukaan isin. Hotu, sia no'o Ha'u. Ha'u nanis mate. Mais baa wainrua, Ha'u kmoris kikar.”
Yakobus no Yohanis nusu atu dadi ema boot
35 Yesus dale notu nunia, Sebadeus oan Yakobus no Yohanis nare'is aan baa Yesus, hotu nusu na'ak, “Ama Boot! Ami atu husu oan ida.”
36 Yesus moos nusu sia na'ak, “Emi hakara saa?”
37 Sia nataa na'ak, “Nune'e Ama Boot! Nosi ikus, kalo Ama Boot nabesi aan ti'an nodi kaer ukun, ami haloon nebee Ama bele foo fatik bodik ami rua ne'e. Ida iha Ama sorin kwana, ida tenik iha sorin karuk, nebee ami rua moos bele tuir kaer ukun.”
38 Rona nola nunia, Yesus nataa na'ak, “Emi la hatene saa mak emi husu! Ha'u atu ketan susar wa'in. Dadi, hanoin di'a-di'ak lai. Emi bele terus susar to'o mate hamutuk ho Ha'u ka lale?”h
39 Sia moos nataa na'ak, “Bele basuk Ama!”
Hotu, Yesus nataa tenik na'ak, “Tebes! La kleur ona, emi moos atu hatiu susar hanesan Ha'u. 40 Mais, see mak tuur iha Ha'ukaan sorin kwana no karuk, lia nia lahoos Ha'u mak kakotu. Na'i Maromak du'uk mak nakotu ti'an se-see mak tuur iha fatik nia.”
41 Baa oras Yesus Niakaan maktuir sanulu rumak sia rona nola Yakobus no Yohanis nusu nunia, sia moos krakat. 42 Hotu, Yesus bolu nola maktuir sia hotu-hotu, nodi katak nalore na'ak, “Emi hatene ti'an ha'ak, liurai mak kaer ukun iha raiklaran, sia tonan siakaan renun, to'o la nakfodak. Ema boot nosi klubun mak la natene Na'i Maromak moos, foo ukun liu kladik, to'o renu la bele foti ulun. 43 Mais, emi la bele halo nunia! Tan see mak nakara dadi ema boot, nia musti dadi ema ki'ik nodi naliku ema seluk.i 44 See mak nakara dadi ulun, nia musti dadi ata.j 45 Ha'u mak Ema Raiklaran Isin ne'e moos kalo nunia. Ha'u kmai, lahoos atu buka ema naliku Ha'u. Mais Ha'u kmai atu kaliku ema, kodi latan Ha'ukaan moris tomak nebee sori ema wa'in nosi siakaan salan.”
Yesus nadi'ak nola ema delek ida
46 Hotu, Yesus no Niakaan maktuir sia no ema wa'in nia sia, to'o Yeriko. Baa oras sia atu la'o liu, noo ema delek ida no'i tuur iha dalan tehen nodi nadidu. Ema nia, naran Bartimeus. Aman, naran Timeus. 47 Oras Bartimeus rona na'ak ema mak la'o liu nia, Yesus nosi Nasaret, nia nahii maka'as na'ak, “Yesus! Na'i Daud husar-binan! Madomi ha'u lai!”
48 Rona nahii nunia, ema krakat nodi de'an nia na'ak,“Hoi! Noo-nook!”
Mais Bartimeus nahii maka'as tenik na'ak, “Yesus! Na'i Daud husar-binan! Madomi ha'u lai!”
49 Rona nola nunia, Yesus moos nanawa, hotu naruka ema nia sia na'ak, “Hodi nia mai!”
Sia moos baa katak baa delek nia na'ak, “Neon di'ak baa ona, tan Ama Boot bolu o. Mai ona!”
50 Rona nola nunia, Bartimeus nariik, soe nela kedan niakaan tais, baa nasoru Yesus.
51 Hotu, Yesus nusu nia na'ak, “O makara saa?”
Nia nataa na'ak, “Ama Boot! Ha'u kusu nebee bele karee!”
52 Yesus moos katak na'ak, “Di'ak. Tan o fiar ma'ak Ha'u kbele kadi'ak kola o, oras ne'e moos, o di'ak kedan! Fila ona!”
Baa oras nia moos, Bartimeus matan moon kedas. Hotu, nia tuir Yesus.