Adat ema raiklaran la bele nalakon Na'i Maromak hakaran
7
Baa loron ida, ema Farisi kabuun ida no manorik ukun Yahudi na'in hira, mai nosi Yerusalem atu nasoru Yesus. 2-5 Ema Farisi sia kaer metin adat nosi bei uluk Yahudi sia. Sia nalo nune'e: kalo haa, musti fasi uluk liman tuir adat. Nunia moos, mai hikar hosi fa'an fatik iha nabee dei, musti hariis kedan tuir adat. To'o baho'ak uma laran, nu'u bikan-mako, musti fasi lai tuir adat, foin bele hodi haa.Kalo ema Yahudi seluk la tuir adat nia, ema Farisi sia nawan sa'e.
Tan baa nia, oras ema Farisi sia naree Yesus Niakaan maktuir sia naa la fasi uluk liman tuir siakaan adat nia, sia nawan sa'e. Hotu, sia mai nasalak Yesus na'ak, “Tan saa okaan maktuir sia la fasi uluk liman lai tuir itakaan adat, foin naa? Sia nakur ti'an itakaan adat nosi bei uluk sia!”
6-7 Mais Yesus nataa na'ak, “Emi ne'e, liu resik ti'an! Emi katak seluk, halo seluk! Hori uluk, Maromak naruka mako'an Yesaya nakerek nela kedan na'ak,
‘Ema nia sia tonun Ha'u nodi ibun dei,
la nodi neon.
Tonun oin nunia, butan dei.
Sia la nikir Ha'ukaan ukun.
Sia nikir loos ema raiklaran ukun dei.’a
Emi moos halo nunia. 8-9 Emi tali'ur Na'i Maromak ukun, hotu kaer metin adat ema raiklaran. Emi matenek basuk halo nunia!
10 Uluk bei Musa natuun ukun-badu nosi Na'i Maromak na'ak, ‘Ita musti hakneter ina-ama.’ Liu tenik, ‘Kalo ema ida de'an nahaat inan-aman, musti taa ukun mate baa ema nia.’b 11-12 Na'i Maromak nakara nunia, mais emi hanorin seluk. Emi ha'ak, lalika tulun ina-ama. Lalika foo naha baa sia, surak katak baa sia ha'ak naha mak o atu foo baa sia, o mameno ti'an atu sera baa Na'i Maromak. 13 Tebes. Hodi nunia, emi tali'ur Na'i Maromak Manfatin, hotu selu hodi emikaan hanorin du'uk. Emi halo oin nunia, dala wa'in ti'an.”
Lia mak aat sai nosi ema neon laran
14 Hotu, Yesus bolu nola ema seluk mak iha nia nodi na'ak, “Rona, nebee emi hatene di'a-di'ak lia ne'e! 15 Saa mak tama baa ema kabun laran, la nalo ema kadoor. Mais, saa mak sai nosi ema neon laran, mak nalo kadoor. 16 [See mak no tilun, rona di'a-di'ak!]”c
17 Hotu, Yesus no Niakaan maktuir sia la'o nela ema nia sia, tama baa uma ida. Iha nia, maktuir sia nusu lia hatetek nia isin. 18-19 Hotu, Yesus nataa na'ak, “Emi sei la hatene dauk ka? Lia isin nune'e: saa mak ema naa, la nalo kadoor. Mais, saa mak sai nosi ema neon laran, mak nalo kadoor. Tebes. Saa mak ita haa, tama kabun hotu sai nikar. (Hodi lia nia, Yesus nanorin seluk nosi ema Farisi sia. Tan Nia nanorin na'ak, ema raiklaran bele naa sa-saa dei. La noo mak luli.)
20 Saa mak sai nosi ema neon laran, mak nalo ema kadoor, to'o Na'i Maromak moos nakribi, hotu la no'uk namutuk no nia ona. 21 Noo lia aat wa'in mak sai nosi ema neon laran nu'u lia aat, lia sala kfo'er, lia hana'o, lia ho'o ema, 22 lia rotus, lia hakur biti-kluni, lia hahalok aat, lia bosok teen, lia nawan aat, lia tinu aat, lia dale hahaat ema, lia loko aan, lia notar lalek, no lia ulun fatuk.
23 Lia aat nia sia hotu-hotu sai nosi ema neon laran. Lia nia sia mak nalo ema kadoor, to'o Na'i Maromak moos nakribi.”
Yesus tulun ferik ida mak lahoos ema Yahudi
24 Hotu, Yesus sia la'o nela fatin nia, baa leo ida naran Tirus. To'o baa, sia tama lai-lais baa uma ida, tan Yesus la no'uk ema natene Nia mai ti'an. Mais Nia la bele nakfunin.
25-26 Iha leo nia noo ferik ida. Ferik nia lahoos ema Yahudi. Nia ema maktabar mak moris mai iha Fenisia, iha rai Siria baa. Oras rona Yesus mai, nia baa nakro'an nebee Yesus te'ur nasai diabu nosi niakaan oan feto.
27 Mais Yesus nataa nodi soe lia na'ak, “Lawarik sia musti naa uluk lai, foin bele foo hahaak resin baa asu.” [Lia isin na'ak, Yesus musti tulun uluk niakaan ema Yahudi sia lai, foin bele tulun ema seluk.]
28 Mais ferik nia nataa na'ak, “Tebes, Ama! Mais asu nia iha hadak ohak. Nia moos bele naa haan mumun mak monu nosi lawarik siakaan bikan.” [Lia isin na'ak, baa oras lawarik sia naa, asu moos bele naa. Masik Yesus tulun niakaan ema, Nia moos musti tulun ema seluk.]
29 Rona nola nunia, Yesus nataa na'ak: “Kona! Ina dale nia tebes! Tan nunia, diabu nia sai ti'an nosi ina oan! Ina bele fila ona.”
30 Rona nola nunia, ferik nia moos fila. To'o uma baa, naree oan toba dukur, tan diabu sai nela nia ti'an.
Yesus nadi'ak nola ema ida mak diuk no la bele dale
31 Hotu, Yesus sia la'o nela leo Tirus, tuir tasi tehen to'o leo Sidon. Hotu, sia la'o liu to'o nikar debu boot Galilea baa. Hotu, sia la'o liu to'o rai ida no leo sanulu, naran ‘Dekapolis’. 32 Iha rai nia, noo ema ida mak diuk no la bele dale. Niakaan mamaluk sia nodi nia baa Yesus hotu nakro'an na'ak, “Ama! Tulun ami lai! Ami husu Ama rai liman baa, hodi hadi'ak hola ema ne'e.” 33 Rona nola nunia, Yesus nodi ema nia mesan baa fatin ida, la'o nela ema wa'in nia sia. Hotu, Yesus natama liman fuan baa ema nia tilun karuk-kwana. Nia moos nola kaban, tau baa ema nia nanaan. 34 Hotu, Nia tanaat baa lale'an, nola nawan, hotu naruka na'ak, “Efata!” (Lia fuan ne'e na'ak, “Makloke ona!”)
35 Yesus naruka loos nunia dei, ema nia rona kedas. Nanaan maka'as nia, moos mamar kedas, to'o nia bele dale di'ak.
36 Hotu, Yesus no ema nia fila nikar baa ema wa'in nia. Mais Yesus nakahik sia na'ak, “Rona lai! Keta katak baa ema seluk ha'ak Ha'u mak kadi'ak kola ema ne'e!” Masik Yesus nakahik moos, sia katak luku lia nia keke lema rai. 37 Ema mak rona lia nia, blaar tebes. Sia tonun Yesus na'ak,“Tebes! Ema ne'e nalo hotu-hotu dadi di'ak! Ema diuk, bele rona! Ema mak la bele dale moos, bele dale!”