Yesus foo lia hatetek nosi to'os na'in no niakaan mataroos sia
20
Nunia hotu, Yesus nanorin na'ak, “Na'i Maromak kaer ukun, hanesan to'os na'in iha lia hatetek ne'e. Noo to'os na'in ida mak sai tuku neen seisawan, baa buka ema atu serwisu iha niakaan to'os anggor. 2 Netan ti'an, nia namate lia no sia, nebee sia serwisu loron ida, selu osan murak tomak ida tuir folin nanis.a Hotu nia naruka sia baa serwisu iha niakaan to'os. 3 Tuku siwi seisawan, nia sai tenik baa dalan. Nia nasoru tenik ema na'in hira mak no'i tuur lerek dei. 4 Nia katak baa sia na'ak, “Hei mau sia! Emi ho'uk serwisu iha ha'ukaan to'os ka lale? Ha'u atu kselu tuir folin mak nanis.” Rona nola nunia, sia moos no'uk. Hotu sia baa serwisu kedan. 5 Tuku sanulu resin rua, no tuku tolu loron malirin, to'os na'in sai buka tenik ema serwisu. 6 Loro malirin ti'an, takseer tuku lima, nia moos sai tenik. Nia buka baa-mai ema mak nariik loos sia dei. Hotu nia nusu sia na'ak, ‘Tan saa emi hariik loos hori seisawan to'o loro malirin la halo sa-saa?’7 Sia nataa na'ak, ‘Serwisu la noo.’
Hotu to'os na'in nia na'ak, ‘Kalo nunia, baa serwisu iha ha'ukaan to'os ona!’
8 Oras tuku hanawa serwisu to'o ti'an, to'os na'in bolu nola niakaan mataroos ulun nodi na'ak, ‘Bolu mola mataroos sia, hotu selu siakaan osan serwisu ida-idak, nahuu nosi ema mak tama ikus, to'o ema mak tama uluk.’b 9 Rona nola nunia, mataroos ulun bolu nola ema mak nahuu serwisu nosi tuku lima loro malirin. Nia selu baa sia ida-idak osan murak tomak ida. 10 Hotu mataroos ulun bolu nola mataroos seluk sia, to'o baa mataroos mak serwisu nahuu nosi tuku neen seisawan. Sia naneo na'ak, sia nanis simu wa'in liu nosi ema mak foin serwisu baa tuku lima loro malirin nia. Mais hatene hodi baa, sia moos simu osan murak tomak ida. 11 Naree nunia, sia naksuhuk baa to'os na'in na'ak, 12 ‘Hoi! La bele nune'e ama! Ema mak mai ikus basuk, serwisu tuku ida dei. Mais ami mak tama seisawan, serwisu kre'is mate to'o kosar turu! Tan saa ama selu ami manesak ho sia?’
13 To'os na'in nataa baa ida nosi sia na'ak, ‘Mau! Ha'u la kli'is. Mau du'uk mak simu serwisu loron ida, seba osan murak tomak ida. Tebes ka? Ha'u ktuir ti'an itakaan lia mamaten nia. 14 Di'ak liu mau simu mau osan seba, modi fila ona. Ha'u kakara selu baa ema mak tama serwisu ikus, manesak no mau. 15 O laran moras baa saa? Ha'u na'in kasai osan du'uk. Nansaa mau nawan sa'e ha'u, tan ha'u laran di'ak baa ema?’”
16 Hotu Yesus natuka lia hatetek nia na'ak, “Nunia moos, baa oras Na'i Maromak dadi Na'in baa Niakaan hutun-renu sia. Ema ki'ik, Nia nafoli na'ak, ema boot. Ema boot, Nia nafoli na'ak, ema ki'ik.”c
Yesus katak isin tolu ona, nosi Niakaan mamaten
17 Nunia hotu, Yesus sia atu la'o baa Yerusalem. Iha dalan klaran, Nia bolu Niakaan maktuir sia naklibur mesan no Nia. Hotu Nia katak baa sia na'ak, 18 “Rona mai! Oras ne'e ita atu baa Yerusalem. Iha nebaa, ema atu fa'an Ha'u, Ema Raiklaran Isin ne'e, baa na'ilulik ulun sia no manorik ukun sia. Hotu sia taa ukun mate baa Ha'u. 19 Sia moos latan Ha'u baa ema seluk mak la natene Na'i Maromak. Hotu sia dale namoe Ha'u. Sia no'at nadodok Ha'ukaan isin. Foin sia nedi no'o Ha'u baa ai karuus. Ha'u kmate tebes. Mais baa wainrua, Ha'u kmoris kikar.”
Yakobus no Yohanis inan nusu Yesus, nebee foti niakaan oan sia dadi ema boot
20 Nunia hotu, Sebadeus feen mai baa Yesus, bele-bele no oan Yakobus no Yohanis. Nia nakni'a nodi nakneter, tan nakara nola Yesus neon.
21 Hotu Yesus nusu baa nia na'ak, “Ina atu musu saa?”
Nia nataa na'ak, “Nune'e Ama! Ha'u kusu nebee, kalo Ama kaer ukun ti'an, Ama foti ha'ukaan oan na'in rua ne'e, nebee sia moos kaer ukun bele-bele no Ama. Ha'u kusu nebee Ama natuur ida iha Ama sorin kwana, no ida iha sorin karuk.”
22 Rona feto nia nusu nunia, Yesus katak baa Yakobus no Yohanis na'ak, “Emi la hatene saa mak emi husu. Ha'u atu ketan susar wa'in. Emi haneo ha'ak emi moos bele hatiu susar nunia ka?”
Sia rua nataa di'a-di'ak dei na'ak, “Bele basuk, Ama!”
23 Hotu Yesus nataa tenik na'ak, “Tebes. Emi moos atu hatiu susar hanesan Ha'u. Mais see mak atu tuur iha Ha'ukaan sorin kwana no karuk, lia nia lahoos Ha'u mak kakotu. Na'i Maromak du'uk mak nakotu. Nia nakotu kedan se-see mak tuur iha fatik nia.”
24 Baa oras maktuir sanulu rumak sia rona Yakobus no Yohanis nusu nunia, sia moos krakat. 25 Mais Yesus bolu nola sia hotu-hotu nodi na'ak, “Nune'e! Emi hatene ti'an ha'ak, na'in sia iha raiklaran tonan nanis siakaan renun, to'o renun la bele nakfodak. Ulun sia nosi ema klubun mak la natene Maromak, sia moos foo ukun liu kladik to'o renun la bele foti ulun. 26 Mais emi la bele halo nunia! See mak nakara dadi ema boot, nia musti dadi mataroos nodi naliku ema seluk.d 27 See mak nakara dadi ulun, nia musti dadi ata.e 28 Ha'u, Ema Raiklaran Isin nosi lale'an, moos nunia. Ha'u kmai, lahoos nebee ema naliku Ha'u. Mais Ha'u kmai atu kaliku ema, kodi latan Ha'ukaan moris tomak atu sori ema wa'in.”
Yesus nadi'ak nola ema matan delek na'in rua
29 Nunia hotu, Yesus sia la'o liu. Baa oras sia sai nosi kota Yeriko, ema lear moos la'o tuir. 30 Iha nia, noo ema matan delek na'in rua. Sia no'i tuur iha dalan tehen. Baa oras sia rona nola na'ak ema mak la'o liu nia, Yesus nosi Nasaret, sia moos nahii nodi lian maka'as na'ak, “Ama Boot! Na'i Daud husar-binan! Madomi ami lai!”
31 Rona nola sia nahii nunia, ema sia iha nia nakahik sia na'ak, “Hoi! Emi rua keta hanoro!”
Mais sia nahii hetak maka'as tenik na'ak, “Ama Boot! Na'i Daud husar-binan! Madomi ami lai!”
32 Baa oras Yesus rona nola sia, Nia nanawa nodi nusu na'ak, “Emi hakara Ha'u atu kalo saa baa emi?”
33 Sia dale na'ak, “Ama Boot! Tulun lai, nebee ami bele haree.”
34 Rona nola nunia, Yesus neon monu baa sia. Nia koko siakaan matan, hotu matan moon kedas. Hotu, sia moos tuir Nia.