Ema serwisu mak kakutak matenek
16
Hotu, Yesus dale lia hatetek ida tenik baa Niakaan maktuir sia na'ak, “Noo maksoin ida. Nia foti eman serwisu ida dadi baa serwisu ulun. Mais kleu-leur, nia rona lia iis na'ak, serwisu ulun nia nahuu naktolek atu nahonu nia.
Lukas 16:1-18
2 Hotu nia bolu nola serwisu ulun nia, nodi nusu na'ak, ‘O ne'e, nunabee? Ha'u krona o tokar lauk ha'ukaan sasoin sia. Baa makerek okaan serwisu lala'ok, nebee karee lai. Hotu, ha'u kasai o.’
3 Rona nola nunia, serwisu ulun naneo baa-mai na'ak, ‘Ha'u kole ti'an! Atu kalo saa? Fila rai, ha'u la kbiit. Dadi ema madiduk moos, ha'u kmoe aan. 4 Kalo ha'u la kbele serwisu iha ne'e ona, ha'u kmusti buka dalan nebee ema seluk bele simu ha'u.’
5 Hotu, nia bolu nola ema hotu-hotu mak natusan baa niakaan ulun. Nia nusu ema nomer ida na'ak, ‘O matusan hira baa ha'ukaan ulun?’
6 Ema nia nataa na'ak, ‘Katusan mina saitun, liter rihun haat.’a
Hotu serwisu ulun na'ak, ‘Tebes! Ne'e okaan hakerek tusan. Oras ne'e sira mahaat ona, hotu makerek lai-lais hakerek tusan foun, ma'ak o matusan liter rihun rua dei.’
7 Hotu nia baa nusu ema nomer rua na'ak, ‘O tenik, matusan hira?’
Nia nataa na'ak, ‘Katusan hare kakaluk rihun ida.’b
Serwisu ulun katak na'ak, ‘Sira mahaat okaan hakerek tusan nia, hotu makerek foun ma'ak, kakaluk atus walu dei.’
8 Serwisu ulun nalo nunia to'o ulun natene nola niakaan dalan. Mais ulun mose nia na'ak, serwisu ulun nia, matenek buka dalan nebee ema simu nia.
Ha'u katak lia hatetek ne'e baa emi, nebee emi hatene ha'ak, ema mak la fiar baa Na'i Maromak, sia matenek liu buka dalan baa malu bodik moris. Mais ema mak fiar baa Na'i Maromak, sia moris iha kroman. Siakaan kakutak la matenek nu'u ema mak la fiar nia sia. 9 Haneo kokon! Ema raiklaran nakdiuk kadoor nodi siakaan sasoin. Di'ak liu emi hodi sasoin raiklaran tulun ema. Hodi nunia, emi hetan mamaluk wa'in. Baa oras sasoin nia mohu, Na'i Maromak simu emi atu moris nima-nimak iha lale'an.
10 Kalo ema moon baa lia ki'ik, nanis nia moos moon baa lia boot. Mais kalo ema naktolek baa lia ki'ik, nanis nia moos naktolek baa lia boot. 11 Kalo ema la bele fiar emi atu babilan lia ki'ik iha raiklaran, nunabee Na'i Maromak bele fiar emi atu babilan lia boot? 12 Kalo emi la bele babilan ema seluk sasoin, la noo mak nakara foo sasoin baa emi atu babilan dadi baa emikaan sasoin du'uk.
13 Ata ida la bele serwisu namutuk bodik ulun na'in rua, tan nia beer ida, hirus ida. Nia titu ida, la titu ida. Nunia moos emi. Emi la bele serwisu hamutuk bodik Na'i Maromak no serwisu bodik osan.”c
Yesus dale lia nosi ukun-badu mak nafati
14 Baa oras nia, noo ema Farisi na'in hira mak tuir nanono Yesus dale ohin nia. Sia naleuk Nia, tan sia beer osan. 15 Mais Yesus dale tenik na'ak, “Hoi! Masik emi hamoon aan iha ema oin, Na'i Maromak natene emikaan neon aat. Noo lia wa'in mak ema raiklaran tonu no mose. Mais Na'i Maromak nakribi lia nia sia.
16 Uluk ita ema Yahudi moris tuir Ukun-badu nosi Bei Musa no nosi Maromak mako'an sia, da-dau to'o oras Yohanis Mak Sarani Ema mai. Oras ne'e, Manfatin Di'ak keke lema ti'an na'ak, Maromak dadi Na'in bodik ema raiklaran. Ema wa'in moos narui aan atu moris tuir Na'i Maromak dalan foun nia.d 17 Masik nunia moos, Ukun-badu uluk nia sia sei nafati. Lale'an no raiklaran bele lakon, mais Ukun-badu nia sia la lakon.e
18 Tan lia nia, keta halu'a Ukun-badu mak na'ak, ‘Ema mak soe feen, hotu nola tenik feto, nia nakur biti-kluni.’”f
Lia ema maksoin ida no Lasarus
19 Hotu, Yesus dale tenik na'ak, “Noo ema maksoin ida. Nia nakara tau tais kabaas mak lita hosi tais mamar. Loron-kalan nia naa midar nodi nadahur nohuun.
Lukas 16:19-31
20 Iha nia moos noo ema mukit ida naran Lasarus. Mirik aat nakonu niakaan isin. Sura loron niakaan belun sia rai nia iha maksoin nia odamatan nanokar. 21 Nia buka haan nosi maksoin haan mumun sia, mais la netan. Asu sia dei mak mai belo mirik aat ween.
22 La kleur, Lasarus mate. Makbukar lale'an sia mai nola nia, natuur baa Abraham sorin.
La kleur falik, maksoin moos mate. Hotu, ema nakoi nia. 23 Mais nia la tama lale'an. Nia tama baa naraka, mak ema maten fatin. Iha nia, nia noran susar bei-beik. Mais dala ida, nia foti oin, titu-naree Lasarus tuur neon di'ak iha Abraham sorin. 24 Maksoin nahii na'ak, ‘Bei Abraham! Madomi ha'u lai! Maruka Lasarus loban liman fuan dikin baa wee, nebee mai nabotes nola ha'ukaan nanaan lai, tan ha'u ksusar tebes iha ha'i naraka ne'e.’
25 Mais Abraham nataa na'ak, ‘Oa! Manoin di'a-di'ak lai. Uluk oras o sei moris, o metan di'ak hotu-hotu. Mais Lasarus netan susar. Oras ne'e, Na'i Maromak nalo Lasarus neon di'ak iha ne'e, mais o mak metan susar. 26 Saa tenik, iha itakaan leet ne'e, Na'i Maromak tau horun boot. Ema nosi ne'e la bele baa nia, ema nosi nia moos la bele mai ne'e.’
27 Mais maksoin nusu tenik na'ak, ‘Kalo nunia, bei tulun maruka Lasarus baa ha'ukaan ama uman lai. 28 Ha'u ksei ko alin na'in lima iha nebaa. Maruka Lasarus baa foo natene, nebee sia fiar baa Na'i Maromak ona. Nebee oras sia mate, sia la tama dinu fatin ne'e.’
29 Mais Abraham nataa na'ak, ‘Na'i Maromak foo ti'an hakerek nosi Musa no Niakaan mako'an sia. Habusik okaan alin sia leno du'uk hakerek nia isin, nebee sia natene Na'i Maromak hakaran.’
30 Mais maksoin nakrake na'ak, ‘Lia nia sei la to'o dauk! Masik sia leno du'uk moos, sia sei la fiar. Musti noo ema mak mate ti'an sai nosi rate baa katak sia lai, foin sia rona baa Maromak.’
31 Mais Abraham nataa na'ak, ‘Kalo sia la no'uk nanono baa Musa no Maromak mako'an sia, masik noo ema mak mate ti'an sai nosi rate moos, sia la nanono baa.’”