Tutui' la'e-neu' ina-falu esa, no mana ee dedea' ta malole
18
Lai' esa de, Yesus nanori-nafada ana mana tuka dea nara pake dedea nasasama', ela ara hule-haradoi boso' namaetun, ma boso' mopo ao masee nara. Ara muste ramahere raroo Manetualain. 2 Tutui na leo ia': “Nai kota esa, mana ee dedea' esa ta tao dale' neu' Manetualain. Ana ta hada' lahenda esa boe'. 3 Nai naa boe ina-falu esa kokosen leo mana ee dedea' ria neu, hule ni nae, ‘Papa mana ee dedea'! Maetu' au dedea ka no matetu'!’4 Masososa na mana ee dedea' a, ta tao dale' neu' ina-falu ria. Tehuu doo-doo boe ma ana doa' namanene ni. Ana natuu' de aafi nae, ‘Tebe au ta tao dale' neu' Manetualain, lena-lena' neu' lahenda dae-bafo'. 5 Tehuu ina-falu ia tao na au laka ka dile. Huu ria naa, malole lena' au aetu' ria dedea na no matetu' dei. Ta'a sona, neu' ko noi mai-mai' a fo tao nasosota au la'o naroo.’
6 Soba emi afi maneni mana ee dedea' tadalu' ria dedea-nafadan. 7 Doo-doo boe ma ana tulu-fali ina-falu ria, sona tantu Manetualain boe tulu-fali Ria lahendan, fo ri' hule-haradoi hatu-leledon, hule tutulu-fafali' neu' Ana. Tehuu Manetualain ta ela-dei' fa. 8 Huu fo Ana parisa' lalai' sira dedea na. Au atane leo' ia: kalu Au, Lahenda Dae-bafo' Tetea' ia, atafali mai, Au bei bisa hapu lahenda kamahere' nai dae-ina' a, do ta'a?”
Lahenda Farisi esa ma mana susu doi-bea esa reu hule-haradoi
9 Yesus tui selu' dedea nasasama' esa, la'e-neu' natutua-nadedema ao', ma ta hika-hada' lahenda feke'. Ana tui nae, 10 “Tou' dua reu hule-haradoi nai Uma Mamaso Yahudi Ina a. Esa lahenda agama Farisi; esa bali, mana susu doi-bea. [Lahenda Yahudi ra tao lahenda Farisi ra reu' lahenda lalao-lalafu'. Tehuu ara tao mana susu doi-bea ra reu' lahenda masala'.] 11 Losa uma mamaso' dale', boe ma lahenda Farisi ria napadei mesa' ana hule-haradoi nae, ‘Makasi dodou' Manetualain, huu fo au lahenda roo-tetu'. Au ta tadalu' sama leo' lahenda feke' ara. Au ta amana'o. Au ta mana tendetuu'. Au ta hohoke. Makasi dodou Manetualain, huu fo au ta tadalu' sama leo' mana susu doi-bea ia. 12 Au makate puasa mamaso' esa lai' dua. Ma neme basa au hahapu-dadai ki, au fee la'o naroo babati' esa neme babati' sanahulu mai.’ Lahenda Farisi ria hule-haradoi nae leo' naa.
13 Tehuu mana susu doi-bea ria napadei nahani' doo' a nai lahenda Farisi ria dea na. Ana ta naparani boti' laka na mete leo lalai neu. Ana naloe laka na hule-haradoi no dale hedi' nae, ‘Ou! Manetualain. Kasian neu' au, lahenda masala-masiko' ia! Fee ampon neu' au!’
14 Fai ria lahenda sira dua fali reu si, bea ri' malole no Manetualain? Lahenda Farisi mana koao' a, do lahenda mana susu doi-bea ria? Tantu Ana sipo' natalolole mana susu doi-bea dale maloe-madae ao' ria. Tehuu Ana ta tao dale' neu' lahenda Farisi ria. Huu fo Manetualain naloe-nadae lahenda mana koao' a, tehuu Ana natutua-nadedema lahenda maloe-madae ao' a.”a
Ramatua Yesus dedea fee ana' ara ua-nale'
15 Lai' esa de, lahenda ra o'o roo ana boki beu nara leo Yesus reu, ela Ana fua lima Na neu' asa ma dedea fee si ua-nale'. Yesus ana mana tuka dea nara rita leo' naa, boe ma ara horo lahenda sira. 16-17 Tehuu Yesus sipo' na ana' sira. Ana nafada ana mana tuka dea nara nae, “Neme' naa ela ana aana' sira leo Au mai. Boso' horo si. Mafarerene' matalolole! Lahenda fo nau dadi Manetualain lahendan, ana muste namahena neu' Manetualain, sama leo' ana aana' ara ramahena neu' ina-ama nara.”
Lahenda kamasu'i fo ri' nahii' maso' nusatetu-ikutema'
18 Lai' esa de, lahenda Yahudi ra lahenda bau-inan esa mai natane Yesus nae, “Papa Mesen manuu hada-horomata'! Au muste tao leo bea' ela au bubulu' matetu', au bisa maso' nusatetu-ikutema' a fo hapu soda mana basa taa'?”
19 Yesus nataa nae, “Ubea' taon de o hule Au mae, ‘manuu hada-horomata'’? Noi esa' a nanuu hada-horomata', ri' Manetualain. 20 O, bubulu' hete, Manetualain atoran a neme ulu' mai, nae:
Boso' hohoke;
boso' maisa lahenda;
boso' mamana'o;
boso' sakasii pepeko';
ma fee hada-horomata neu' o ina-amam.”b
21 Lahenda ria nataa nae, “Tebe, Papa! Au tao tuka atoran sira mulai neme au bei aana' ki ria.”
22 Yesus namanene leo' naa, boe ma nae, “Malole! Tehuu bei hihii-nanau' esa bali. Ri', besa' ia o fali fo se'o heni katema' hata-heto mara. Boe ma muu babati doi' sira fee lahenda manato'a-manataa' ara, besa' ko o mai tuka Au. Huu fo neu' ko Manetualain balas fee o hata-heto nai nusatetu-ikutema'.” 23 Lahenda ria namanene leo' naa, boe ma dale na susa, huu fo namasu'i naan seli.
24 Yesus nita ni fali tehuu dale na nalulutu', boe ma Ana nafada ana mana tuka dea nara nae, “Susa laiesa' lahenda kamasu'i a maso' nusatetu-ikutema'. 25 Ita tararaa' ana no hihii-nanau' feke'. Mema' banda onta kaba'u-ina a leo oka na neu, ta bisa kodi nesi' rarau' a bolo na. Leo' naa boe lahenda fo namahena noi hata-heto dae-bafo' a, tehuu ta namahena neu' Manetualain, ta bisa maso' nusatetu-ikutema'.”
26 Lahenda fo ramanene Yesus dedea nae leo' naa, ara ratane Ni rae, “Kalu mema' susa neu' lahenda kamasu'i a leo naa', sona lahenda rupa leo bea' a ri' bisa hapu popo'i-tatata'?”
27 Yesus nataa nae, “Soa-neu' lahenda dae-bafo' a, mema' hihii-nanau' dodou' ta bisa dadi. Tehuu soa-neu' Manetualain basa-basan bisa dadi.”
28 Boe ma Petrus sipo' nae, “Papa! Ami la'o ela ami hata-heto mara katema' fo tuka Papa. Tehuu neu' ko ami hapu ubea?”
29 Yesus nataa nae, “Petrus! Nenene matalolole! Lahenda fo foa ela uma na, sao ina na, a'a-fadi nara, ina-ama nara, do ana nara, nana huu ana nalala'o nonoi-laka' neme Manetualain mai, 30 tantu ana sipo fali' desi lena nai dae-bafo' ia. Boe ma kalu dae-bafo' ia noe, ria boe hapu soda' mana basa taa'.”
Ramatua Yesus nafada kalai' telu na la'e-neu' Ria mamate Na
31 Yesus noo ana mana tuka dea kasanahulu dua nara, fo dedea no noi mesa' asa nae, “Emi basa bubulu', besa' ia ita leo kota Yerusalem teu. Losa naa, te basa hihii-nanau' fo Manetualain mana nesi mata nara dui' raan nai maulu na, la'e-neu' Lahenda Dae-bafo' Tetea', neu' ko dadi sama leo' hata fo manadui' a. 32 Neu' ko ara fee Au leo lahenda mana mai, fo ri' ta ramahere Manetualain. Boe ma ara ramumulu-ramamae' ma radadae Au rupa' ara, mudi radiu Au ape, 33 fepa-li'u Au, besa' ko raisa Au. Tehuu fai binesa na, te Au asoda selu'.”
34 Ana mana tuka dea ra ramanene Yesus dedea nae leo' naa, boe ma roi ramakokoa' a, nana huu ara bei ta rala dedea' sira sosoa-raraan.
Ramatua Yesus puli na lahenda poke' esa
35 Fai fo Yesus asa saka' maso' leo kota Yeriko, te lahenda poke' esa natuu' nai eno' a suu na, soa nalamemei' a. 36 Ana namanene lahenda dodou' resi' naa, boe ma natane nae, “Ubea' ia?”
37 Lahenda rafada ni rae, “Yesus, lahenda Nasaret, la'o nesi' ia.”
38 Lahenda poke' ria namanene leo' naa, boe ma ana bobou' nambera nae, “Yesus! Mane' Daud tititi-nonosin! Kasian neu' au dei!”c
39 Lahenda fo la'o rai Yesus mata Na a, rasa'ai ni fo nenee'. Tehuu ana bobou' nambera-ina nae, “Mane' Daud tititi-nonosin! Kasian neu' au dei!”
40 Yesus namanene, boe ma Ana napadei. De nadenu lahenda reu hela ra lahenda poke' ria. Losa Yesus mata Na, boe ma Ana natane ni nae, 41 “O nau Au tao ubea' soa-neu' o?”
Ana nataa nae, “Papa! Au hule fo bisa ita dae.”