Tutuik la'e-neu ina falu esa, ma mana maketu dede'ak ta malole
18
La'i esa, Yesus nanoli ana mana tunggan nala nenik nakandandaak, fo ala hule-haladoi ta no namaketuk, ma samanek ta mana ma'a-malek. Ala musi lamahele lakandoo neu Manetualain. 2 Tutuin leo iak: “Nai kota esa hambu mana maketu dede'ak esa, ta mbali Manetualain. Ana ta mbali sudi see boe. 3 Nai ndia boe oo, hambu ina falu esa nambue neni mana maketu dedeak ndia neu, fo noke nakandondoo henin nae, ‘Ama mana maketu dede'ak! Maketu au dede'ang no ndoos, baa!’4 Sososan mana maketu dede'ak ndia ta mbali ina falu ndia. Tehuu doo-doo boe ma ana mbela namanenen. Basa de ana nanggatuuk dudu'a nae, ‘Memak au ta mbali Manetualain, nakalenak hataholi. 5 Tehuu ina falu ia, tao nala au langgang naleo. Huu ndia de, malolenak au aketu ndia dede'an no ndoos dei. Mete ma taa, na, dei fo ana nambue mai tao nakasosotak au nakandoo.’
6 Ei dudu'a sudik mana maketu dede'a manggalauk ndia kokolan. 7 Mae doon ana seli bei fo ana tulu-fali ina falu ndia, na, neu ko Manetualain boe oo nau tulu-fali Ndia hataholin, fo mana hule-haladoi leledo-le'odaen noke tulu-falik. Tehuu Manetualain ta nau nakae'esok kana. 8 Huu Ana nakaneni sila dede'an no lai-laik. Au sangga atane leo iak: mete ma Au, Hataholi Isi-isik ia, fali maing so, na, meda Au bei atonggo ua hataholi kamahelek malai dae-bafok ia do, taa?”
Hataholi Farisi esa, ma mana susu bea esa leu hule-haladoi
9 Yesus tui nakadaik nakandandaak esa, la'e-neu hataholi mana namahele aon ana seli, ma nahiik nakadadaek hataholi fe'ek. Ana tui nae, 10 “Hambu touk dua leu hule-haladoi nai Uma Ina Huhule-haladoik. Touk esa neme paltei anggama Farisi mai; ma esa bali, na mana susu bea. [Hataholi Yahudi la taok hataholi Farisi la hataholi malalaok. Tehuu ala taok hataholi mana susu bea la, hataholi ta malole.] 11 Losa uma huhule-haladoik, boe ma hataholi Farisi ndia mesak kana nambadeik de hule-haladoi nae, ‘Makasi Manetualain, huu au ia hataholi neulauk. Au ta manggalauk leo hataholi fe'ek kala. Au ta nakodaa. Au ta balena'o. Au ta hohongge. Makasi Manetualain, huu au boe oo ta manggalauk leo mana susu bea ia. 12 Au manggate puasa la'i dua nai sosoda ina esa. Ma au fee taa-taa baba'ek sanahulu neme basa au hahambung mai.’ Hataholi Farisi ndia hule-haladoi leo ndiak.
13 Tehuu mana susu bea ndia, nambadeik dook nai dea. Ana ta nambalani botik matan, fo suli neni lalai neu. Kada ana hule-haladoi nakatele langgan no dale makalulutuk nae, ‘Ou! Manetualain. Kasian neu au, hataholi mana tao salak ia! Fee ambon neu au!’
14 Neu faik fo hataholi kaduak kala sila fali leni uman nala leu, meda see ndia malole no Manetualain? Hataholi mana koaok ndia, do, hataholi mana susu bea ndia? Neu ko Ana simbok no malole mana susu bea madale taidaek ndia. Tehuu Ana ta mbali hataholi Farisi ndia. Manetualain tao natuda hataholi mana koaok, tehuu Ana so'u laik hataholi madale taidaek.”a
Lamatuak Yesus kokolak fee baba'e-babatik neu kakanak kala
15 La'i esa, hataholi la ko'o leni sila ana mbimbila anan nala leni Yesus leu, fo suek Ana tao liman ma kokolak fee baba'e-babatik neu sala. Yesus ana mana tunggan nala lita leo ndiak, boe ma ala ka'i hataholi la. 16-17 Tehuu Yesus soluk nala kakanak kala sila, fo maleni Ndia leu. Basa de Ana sapa ana mana tunggan nala nae, “Neme naa, fo kakana anak kala sila leni Au mai. Ei boso makalelee sala. Masaneda neulalau! Hataholi fo nau dadik Manetualain hataholin, ana musi namahena neu Manetualain, sama leo kakana anak namahena neu sila ina-aman.”
Hataholi kamasu'ik fo nahiik maso nusa sodak
18 La'i esa, hambu hataholi Yahudi hataholi ina-huun esa mai natane Yesus nae, “Ama Mesen fo nana hadak! Au musi tao leo bee, fo suek au bubuluk no teteben, au bisa maso nusa sodak fo asoda akandoo ua Manetualain?”
19 Boe ma Yesus nataa nae, “Hatina de o mae, Au, ‘nana hadak’? Kada esak nana hadak, fo ndia Manetualain. 20 O bubuluk so, hetu, Manetualain heti-heun neme makahulun mai nae:
Boso hohongge;
boso makanisa hataholi;
boso mamana'o;
boso dadik sakasii pepekok;
ma fee hada-holomata neu o ina-amam.”b
21 Hataholi ndia nataa nae, “Tetebes, Ama! Au tungga heti-heuk kala sila so, mulai neme au bei kadi'ing mai.”
22 Yesus namanene leo ndiak, boe ma nae, “Malole! Tehuu o bei kulan dede'ak esa. Fo ndia, hatematak ia o fali fo muu se'o heni basa o hata-hetom. Basa ndia, na, muu baba'e doik sila neu hataholi mana to'a-taak kala. Boe ma bei fo o fali mai tungga Au. Huu dei fo Manetualain bala fee o hata-heto nai nusa sodak.” 23 Hataholi ndia namanene leo ndiak, boe ma dalen hedis, huu namasu'i nalan seli.
24 Yesus nitan la'o no dale makalulutuk, boe ma nafada ana mana tunggan nala nae, “Hataholi kamasu'ik memak toto'ak nalan seli maso nusa sodak. 25 Ita takasasaman no dede'a fe'ek. Memak ta bisa banda onta ina-huuk maso neni lalaen dale neu, nesik ndandau bolo. Leo ndiak boe no hataholi fo kada namahena neu ndia hata-heton, tehuu ta namahena neu Manetualain, na, ta bisa maso nusa sodak.”
26 Hataholi mana namanene Yesus kokolan leo ndiak, natanen nae, “Mete ma memak toto'ak neu hataholi kamasu'ik leo ndiak, na, hataholi mata leo beek bisa hambu nasalala'ek?”
27 Yesus nataa nae, “Soa-neu hataholi, na memak dede'ak no'uk kala ta bisa. Tehuu soa-neu Manetualain, na basan bisa dadi.”
28 Boe ma Petrus tuti nae, “Ama! Ai la'o ela basa ai hata-heton so, fo tungga Ama. Tehuu dei fo ai hambu hata?”
29 Yesus nataa nae, “Petrus! Mamanene neulalau! Hataholi mana la'o ela uman, sao inan, ka'a-fadin, ina-aman, do anan nala, huu ana nakalala'ok Manetualain uen, 30 neu ko ana simbo no'un lena heni nai dae-bafok ia. Boe ma mete ma neu dae-bafok fai babasan so, na ndia boe oo hambu sodak nakandoo no Manetualain.”
Lamatuak Yesus kokolak la'i telu so la'e-neu Ndia mamaten
31 Yesus noo ana mana tungga kasanahulu duan nala, de mesak kana kokolak no sala nae, “Ei basa nggei bubuluk so mae, hatematak ia ita la'o teni kota Yerusalem teu. Losa ele, basa hata fo makahulun Manetualain mana kokolan nala sulak so, la'e-neu Hataholi Isi-isik ndia, dei fo dadi sama leo hata fo ala sulak so. 32 Dei fo ala fee Au uu hataholi fe'ek kala, fo ta lamahele Manetualain. Basa de ala haumemee Au, tao lakadadaek mata-matak neu Au, mbula ambe neu Au, 33 filo Au, basa de tao lisa Au. Tehuu neu binesan, Au asoda fali.”
34 Ana mana tunggan nala lamanene Yesus kokolan leo ndiak, boe ma lasapangga, huu ala bei ta bisa lalelak dede'ak sila ndandaan.
Lamatuak Yesus tao nahai hataholi mbokek esa
35 Neu faik fo Yesus asa sangga maso leni kota Yeriko leu so, hambu hataholi mbokek esa nanggatuuk noke-noke nai dalak bifin. 36 Ledo-eik ana namanene hataholi no'uk kala lesik ndia, boe ma natane nae, “Wei! Hata ia?”
37 Boe ma hataholi lafadan lae, “Yesus maneme Nasaret mai, nesik ia.”
38 Hataholi mbokek namanene leo ndiak, boe ma ana eki tingga-tingga nae, “Yesus! Mane Dauk numbu-sadun! Kasian neu au dei!”c
39 Hataholi mana la'ok lai Yesus matan, ka'in fo ana nee-nee. Tehuu ana boe eki natingga bali nae, “Mane Dauk numbu-sadun! Kasian neu au dei!”
40 Ledo-eik Yesus namanene leo ndiak, boe ma nambadeik. De Ana nadenu hataholi leu lala'o loo hataholi mbokek ndia mai. Losa Yesus matan, boe ma natanen nae, 41 “O nau Au tao hata fee o?”
Ana nataa nae, “Ama! Au oke fo au bisa ita.”