5 Ledo-eik Yesus nita hataholi no'uk kala mai lakabubua, boe ma Ana natane ana mana tunggan esa, nade Filipus nae, “Ita bisa hasa nana'ak nai bee, fo fee hataholi la ia la'a?” 6 Memak Yesus bubuluk Ana nau tao leo beek so. Tehuu Ana kokolak leo ndiak fo sangga uku-sudi Filipus.

7 Boe ma Filipus nataa nae, “Awe'e! Mae tukan esa tao ues faik natun dua boe oo, tehuu nggadin bei ta dai hasa loti fee sila basa sala! Mae kada hataholi esa hambu loti faa anak boe oo, ndia ta dai!”

8 Boe ma Yesus ana mana tunggan esa bali nade Anderias, fo Simon Petrus fadin, nafada Yesus nae, 9 “Ama! Kakanak esa nai ia neni loti lima, ma i'ak boak dua. Tehuu ndia ta dai fee hataholi no'uk kala ia la'a!”^a

10 Nai ndia hambu na'u no'uk. Boe ma Yesus nadenu ana mana tunggan nala nae, “Heti fo basa sala langgatuuk.” Boe ma langgatuuk. Faik ndia, hataholi no'un seli! Kada touk kala, meda lifun lima.

11 Boe ma Yesus ha'i nala loti la, de Ana noke makasi neu Manetualain. Ana ba'e fee ana mana tunggan nala. De ala leu baba'e fee hataholi makadotok kala. Ana tao i'ak leo ndiak boe. Basa sala la'a losa lakabete.

12 Ledo-eik basa sala la'a losa lakabete, boe ma Yesus nadenu ana mana tunggan nala nae, “Makaduduluk mala nana'a elak kala, suek boso hambu nana nggali henik no sosoan taa.” 13 Basa de ala lakaduduluk lala nana'a elak kala leme loti kalimak kala ma i'ak kala sila, losa henu lembeneu sanahulu dua.

14 Ledo-eik hataholi no'uk kala lita tanda heran fo Yesus taok ndia, de lae, “Awii! Ndia ia, neu ko Mana Kokola fo Manetualain heluk ndia so fo sangga nadenun mai.” 15 Yesus bubuluk nae, hataholi no'uk kala sila lakaseti Ndia fo dadik manek. Basa de Ana fo'a la'o neu nda'e neni lete anak esa neu, suek Ndia mesak kana bisa nai ndia.

16 Ledo-eik ledo bei fo tesa, Yesus ana mana tunggan nala loe leni tasi leu. 17 Yesus bei ta mai nakabubua no sala. Boe ma ala hene leni ofak esa lain leu, de ala mulai sefe leni kota Kapernaum leu fo nai tasi selik. Ledo-eik ala mulai sefe, te fai makiuk so. 18 Boe ma tasi liin mulai fo'a, huu ani sanggu nafumbu nalan seli. 19 Ledo-eik Yesus ana mana tungga nala lasefek meda losa kilo lima, boe ma lita Yesus la'ok nai oe bafon. Ana mai deka-deka no sila ofan, boe ma ala bii lalan seli.

20 Tehuu Yesus nafada sala nae, “Wei! Boso bii! Te Au ndia ia.” 21 Huu ndia de tala bii so bali. Tehuu ala nau fo Ana hene neni ofak dale neu, fo sama-sama lon. Ta bubuluk, naa te ofak ndia losa nai namo seseek so.

22-24 Neu fo'a mai, hataholi no'uk kala bei lai tasi selik. Ala deka-deka lo mamanak fo Yesus noke makasi neu Manetualain ndia, de fee sala la'a. Boe ma bei fo ala bubuluk lae, afik kada ofak esak nai ndia. Tehuu Yesus ana mana tunggan nala pake ofak ndia so, fo ala la'o ela mamanak ndia. Ma Yesus mesak kana ta hene neni ofak ndia lain neu no'u no Ndia ana mana tunggan nala.

Hataholi no'uk kala bubuluk lae, Yesus no ana mana tunggan nala ta lai ndia so bali. No leo ndiak, ledo-eik ofa fe'ek kala leme kota Tiberias mai nai mamanak ndia, boe ma ala hene leni ofak lain leu, fo leu sangga Yesus nai Kapernaum, nai tasi selik.

25 Basa de latonggo lo Yesus nai tasi selik. Boe ma ala latane Ndia lae, “Ama Mesen! Ama losa nai ia ndia fai hida?”

26 Yesus nataa nae, “Teteben, leo iak: ei ta sangga Au huu ei mita tanda heran nala so. Tehuu ei sangga Au, huu Au fee ei mi'a losa makabete. 27 Mamanene neulalau! Boso kada tao ues fo hambu nana'ak fo dei fo naboo henin. Malolenak ei tao ues fo hambu nana'ak fo nahele nakandoo, ma neni sodak tetebes fo ta mana ketuk. Huu Au ia, Hataholi Isi-isik. Au ia mana fee sodak neu ei. Huu Amak manai nusa sodak fee basa haak ndia neu Au so.”

28 Boe ma latane lae, “Mete ma leo ndiak, na, ai musi tao leo bee, fo suek ai bisa makalala'ok Manetualain uen?”

29 Yesus nafada nae, “Manetualain uen ndia leo iak: ei musi mamahele miu Au. Huu Manetualain ndia nadenu Au.”

30 Boe ma latane bali lae, “Ama musi matudu tanda heran leo beek, fo ai bisa mita ma mamahele miu Ama? Boe ma Ama nau tao hata neu ai bali? 31 Conto leo, ita bei-ba'in nala la'a loti manna nai mamana nees. Ndia dadik sama leo nana sulak nai Manetualain Susula Malalaon nae, ‘Ana fee sala loti fo mana konda neme lalai mai, suek la'a.”’^b

32 Yesus nae, “Au afada ei teteben leo iak: makahulun, ba'i Musa ta nakonda loti ndia neme lalai mai, fo fee ei bei-ba'im mala. Huu mana makondak ndia, Au Amang nai nusa sodak. Hatematak ia Ndia boe oo sadia fee ei loti neme lalai mai. Tehuu loti ia, Loti tetebes fo nahele nakandoo. 33 Huu Loti ia neme Manetualain mai, fo ndia Mana konda neme nusa sodak mai, ma neni sodak fee hataholi lai dae-bafok ia.”

34 Basa de ala loke lae, “Ama! Fee loti ndia nakandondoo henin neu ai dei!”

35 Boe ma Yesus nafada sala nae, “Au ia, ndia Loti ndia. Huu Au ndia uni sodak tetebes. De hataholi mana maso dadik neu Au hataholing, ta ndoe so bali! Ma hataholi fo mana namahele neu Au, ta maa mada so bali!

36 Tehuu Au afada itak ei ae, mae ei mita Au so, tehuu ei bei ta mamahele Au boe. 37 Naa te basa hataholi fo Au Amang helen nala sala fo dadik Au hataholi nggala so, dei fo leni Au mai. Ma mete ma hambu hataholi neni Au mai, na, Au ta bisa husi henin! 38 Huu Au konda uma lalai mai. Au mai fo tao tungga Au Amang hihiin, huu Ndia ndia nadenu Au. Au ta nau kada tao tungga Au mesa nggau hihii heheling. 39 Ma Ndia hihiin leo iak: neme basa hataholi fo Ana hele nalak kala, fo dadik neu Au hataholi nggala, Ana nau fo Au akabubua ala basa sala. Au ta bole ela esa boe, fo mopon. Tehuu neu dae-bafok fai babasan, na Au musi fee sala lasoda fali. 40 Sama leo Au afada isinaak, Au Amang nau fo basa hataholi la fo mana lalelak ma lamahele Au, fo Ndia Anan ia, na ala bisa hambu sodak tetebes fo ta mana ketuk. De neu dae-bafok fai babasan, dei fo Au tao asoda falik kasa.”

41 Hataholi Yahudi malanggan nala mulai luli Ndia, huu Ana nae, “Loti ndia neme Manetualain mai, fo ndia Au, fo mana konda neme nusa sodak mai.”

42 Ala lakokola lae, “Talo bee ia so? Hataholi ia, fo ndia Yesus fo ama Yusuf anan, hetu? Ai malelak Ndia ina-aman nala. De, talo bee de hatematak ia Ana nae, ‘Au konda uma lalai mai’? Hambun nai bee?”

43 Yesus nadenu sala nae, “Wei! Hahae manggalau nai ndia leo! 44 Au Amang nai nusa sodak nadenu Au ia mai. Hataholi bisa neni Au mai, mete ma Au Amang noon mai. De neu dae-bafok fai babasan, dei fo Au tao asoda falik kasa. 45 Manetualain mana kokola lele ulun nala sulak litak lae, ‘Manetualain nau nanoli basa hataholi la.’ Basa hataholi fo lamanene leu Amak nai nusa sodak, ma lanoli leme Ndia mai, ala leni Au mai fo dadik Au hataholing.^c 46 Au ia, mana konda neme Manetualain mai. De kada Au mesa nggau ita itak Ndia. Ta hambu hataholi fe'ek esa fo nita nitak nakandoon Amak nai nusa sodak.

47 Tetebes! Au boe oo afada memak ei! Hataholi fo mana namahele neu Au, dei fo hambu sodak tetebes fo ta mana ketuk. 48 Huu Au ia, Loti fo maneni sodak ndia. 49 Makahulun ele, ei bei-ba'im mala la'a loti manna neu faik fo ala la'ok ndule mamana nees. Mae ala la'a loti ndia, tehuu doo-doo mate sala boe. 50 Tehuu Loti mana konda neme nusa sodak hatematak ia, fe'ek. Huu basa hataholi la bole la'a. Ndia ndandaan nae, basa hataholi kamahelek leu Au, ala ta laelak dook leme Manetualain mai bali. 51 Huu Au ia, fo ndia Loti mana neni sodak fo mana konda neme nusa sodak mai. Dei fo mete ma Au mate, na, Au fee Au aong fo basa hataholi malai dae-bafok ia bisa lasoda. Boe ma hataholi fo mana na'a Loti ndia, ala hambu sodak tetebes fo ta mana ketuk.”

52 Hataholi Yahudi malanggan nala lamanene leo ndiak, boe ma ala mulai lasisimbo bafak esa no esa lae, “Awe'e! Ana kokolak hata ndia. Talo bee de Hataholi ia fee Ndia ao-inan fo ita ta'a?”

53 Boe ma Yesus nafada sala nae, “Au kokolak tetebes. Ma Au afada leo iak: Au ia, Hataholi Isi-isik. Hataholi mana nau nasoda ndoos, na, musi nana mba'ak no Au. De mete ma ei ta mi'a Au ao-inang, ma ta minu Au daang, na, ta hambu sodak tetebes nai ei.^d 54 Huu hataholi fo mana na'a Au ao-inang, ma ninu Au daang, na, ana hambu sodak tetebes fo ta mana ketuk. De neu dae-bafok fai babasan, na dei fo Au tao asoda falik kana. 55 Huu nana'a tetebes, na ndia Au ao-inang. Ma nininu tetebes, na ndia Au daang. 56 De hataholi fo mana na'a Au ao-inang ma ninu Au daang ndia, na ndia sodan nana mba'ak no Au. Ma Au boe oo nana mba'ak ua ndia. 57 Amak manai nusa sodak fo mana nadenu Au ndia, Ana nasoda tetebes. Ma Au boe oo hambu sodak tetebes neme Ndia mai. Huu ndia de hataholi fo mana na'a Au ao-inang, na, ndia boe oo hambu sodak tetebes neme Au mai. 58 Makahulun ei bei-ba'im mala la'a loti manna ndia fo mana konda neme lalai mai. Mae ala la'a loti ndia, tehuu doo-doo boe ma mate sala. Tehuu Loti fo mana konda neme nusa sodak mai hatematak ia, fe'ek. Huu hataholi fo mana na'a Loti ndia, neu ko hambu sodak tetebes.”

59 Yesus fee nanonolik la'e-neu dede'ak kala ia, nai hataholi Yahudi la uma huhule-haladoin esa nai kota Kapernaum.

60 Hambu hataholi no'uk kala tungga Yesus. Neu faik fo ala lamanene Ndia nanonolin leo ndiak, boe ma hambu luma kokolak lae, “Ndia nanonolin ia, belan seli maa! See bisa simbok nanonolik ndia?”

61 Tehuu Yesus bubuluk ala manggalau leo ndiak, de Ana natane nae, “Au nanonoling ia tao nala ei to'a-taa, do? 62 To'a-taa nalan seli bali mete ma ei mita Au, Hataholi Isi-isik ia hene fali uni ele uu, nai Au mamana makahulung nai nusa sodak!

63 Manetualain Dulan ndia neni sodak tetebes. Te hataholi ao-inan ta bisa neni sodak tetebes. Ma Au Dede'a-kokola nggala laoka leme Manetualain Dulan mai. De Dede'a-kokolak sila boe oo leni sodak tetebes neu hataholi la. 64 Tehuu hambu ei luma fo ta mamahele Au.”

Yesus kokolak leo ndiak, huu Ana bubuluk neme makasososan mai so, fo see ta namahele, ma see dei fo se'o heni Ndia. 65 Boe ma Yesus kokolak nakadaik bali nae, “Huu ndia de Au afada ei so ae, Au Amang nai nusa sodak musi soi dalak fee hataholi dei, bei fo hataholi ndia maso dadik neu Au hataholing.”

66 Mulai neme faik ndia mai, hambu hataholi no'uk kala leme Ndia ana mana tunggan nala mai heok lasadea Ndia, ma ala ta nau tungga Ndia bali. 67 Boe ma Yesus natane ana mana tungga kasanahulu duan nala nae, “Ei talo bee? Sangga heok mima Au mai boe, do?”

68 Tehuu Simon Petrus nataa nae, “Lamatuak! Ai sangga mini see miu bali? Ta hambu hataholi fe'ek so, fo bisa nafada ai talo bee fo ai bisa hambu sodak tetebes fo ta mana ketuk ndia. Kada Lamatuak mesak kana. 69 Ma ai mamahele Lamatuak. Huu ai bubuluk so mae, Lamatuak ia, na ndia Manetualain Hataholi Malalaon.”^e

70 Yesus nafada sala nae, “Au hele ala ei hataholi sanahulu dua so. Tehuu masanenedak baa! Hambu hataholi esa neme ei mai, leo nitu!” 71 Ndia maksut, na ndia Yudas, fo Simon Iskariot anan. Yudas ndia, na esa neme Ndia ana mana tungga kasanahulu duan nala mai. Ndia ndia, fo dei fo se'o heni Yesus.