2-5 Hataholi Farisi la sila to'u lahele sila hada Yahudin. Leo, mete ma hataholi sangga la'a-linu, na, musi lafui oe tungga hadak hihiin. Leo ndiak boe, mete ma ala fali leme pasak mai, na, musi ladiu oe dei. Losak sila bua dapu hehelin nala, leo ulek, pinggak, nggalaas, ceret, musi safe sala tungga hadak hihiin, bei fo bole la'a-linu lenik.

Mete ma hambu hataholi Yahudi fe'ek ta tungga sila hadan, na, hataholi Farisi la manggalau sala.

Huu ndia de ala manggalau neu ledo-eik ala lita Yesus ana mana tunggan nala la'a-linu, tehuu ta lafui oe tungga hadak hihiin. Boe ma ala mai fee salak neu Yesus lae, “Hatina de o ana mana tunggam mala la'a-linu, tehuu ta lafui oe dei? Ala laban ita bei-ba'in nala hadan ndia so!”

6-7 Boe ma Yesus nataa nae, “Ei ia, memak hataholi mana kokolak fe'ek, tehuu tao fe'ek. Neme makahulun mai, ba'i Yesaya sulak Manetualain hehelun so nae,

Ei boe oo, sama leo ndiak. 8-9 Ei la'o ela Manetualain palendan fo tungga kada hataholi hadan so. Memak ei malelan seli tao leo ndiak!

10 Makahulun ele ba'i Musa nafada basa Manetualain palendan so nae, ‘Fee hada-holomata neu ei inam ma amam.’ Boe ma tamba bali nae, ‘Mete ma hataholi esa a'ali inan do aman, na musi huku nisa ndia.’^b 11-12 Manetualain fee nanonolik leo ndiak, tehuu ei fee nanonoli fe'ek bali. Ei mae, ‘Mete ma hataholi helu nae, ana fee buas esa neu Manetualain, na, mae inan ma aman to'a lalan seli boe oo, tehuu ta bole pake buas ndia fo tulu-fali sala, huu helu basa so, fo sangga feen neu Manetualain.’ 13 Huu ndia de isinaak Au afada basa so ae, ei nggali heni Manetualain hihiin, fo ei nggati neu heti-heu beuk. Hambu ei nggati heti-heuk no'uk leo ndiak so.”

14 Basa boe ma Yesus noke nala hataholi fe'ek kala malai ndia, de nafada nae, “Pasa ei ndi'i doom mala dei, fo suek ei malelak. 15 Hata fo maso neni hataholi tein dale neu, na ndia ta tao manggenggeok faa boe. Tehuu hata fo kalua, na ndia tao manggenggeok. 16 [Naa, see kandi'i dook, na mamanene neulalau leo!]”^c

17 Basa boe ma Yesus no ana mana tunggan nala la'o ela hataholi la sila, de ala maso leni uma esa dalek leu. Boe ma Ndia ana mana tunggan nala latanen nakandandaak ndia ndandaan. 18-19 Yesus nataa nae, “Ei ta bubuluk boe, do? Ndia maksut leo iak: hata fo hataholi na'an, na ndia malole. Tehuu mana kaluak ndia, ta malole. Hata fo ita ta'an, fo maso neni ita tein dale neu, basa na kalua seluk bali. (Lamatuak Yesus maksut nae, hataholi bole na'a sudi hata. Ta nana kena-ka'ik.)

20 Tehuu hata fo ana kalua neme hataholi dalen mai, na ndia tao manggenggeok, losa Manetualain nunuten, ma ta nau nakabubua noon. 21 Dede'a manggalauk no'uk kalua leme hataholi dalen mai! Sama leo: dudu'a manggalauk, tao eok no hataholi fo ta ndia saon, namana'o, tao nisa hataholi, 22 balena'ok, hohongge, tatao manggalauk, pepekok, tungga ao-mbaa kasuun, dale hedi, kokolak tao natuda hataholi, koaok, ta kalela hadak, ma langga batuk.

23 Basa dede'a manggalauk leo sila, kalua leme hataholi dalen mai. Ndia ndia tao nakalulutu hataholi ndia. Ma Manetualain nunute ndia boe.”

24 Basa boe ma Yesus asa la'o ela mamanak ndia, de leni kota esa leu, nade Tirus. Losa ndia, boe ma ala leni uma esa dalek leu, huu Yesus ta nau hataholi bubuluk Ndia nai mamanak ndia. Tehuu Ana ta bisa kekek.

25-26 Nai ndia boe oo, hambu inak esa ta hataholi Yahudi. Ala bonggin neme nggolok Fenisia nai nusa Siria ele. Inak ndia namanene Yesus mai, boe ma neu noke Yesus fo husi kalua heni nitu manggalauk neme ana ina anan mai.

27 Tehuu Yesus nggali kokolak nae, “Kakana kala musi la'a lakahuluk, bei fo nana'a elak nggali feen neu busa.” [No maksut nafufunik nae, Yesus musi tulu-fali nakahuluk Ndia hataholi Yahudin dei, bei fo bisa tulu-fali hataholi fe'ek.]

28 Tehuu inak ndia bala nae, “Tetebes, Ama! Tehuu busa ndia, nai mei sosolon. De ndia boe oo na'a nana'ak fo mana tuda neme kakanak ndia pinggan dale mai.” [No maksut nae, neu faik fo kakanak kala la'a, na, busa boe oo hambu nana'ak. Mae Yesus tulu-fali Ndia hataholin, tehuu Ana musi mbali hataholi fe'ek boe].

29 Yesus namanene leo ndiak, boe ma nafada nae, “Awii! Ina kokolak tetebes ndia! De ina fali muu nggo leo, huu nitu ndia kalua neme ina anan ndia dalek mai so.”

30 Boe ma inak ndia fali. Ana losa uman, te anan sunggu namanee. Memak nitu ndia kalua so.

31 Basa boe ma Yesus asa la'o ela kota Tirus, de ala la'ok tungga tasi bifi, lesik kota Sidon. Neme ndia mai, ala la'ok lakandoo losa dano Galelea. Basa boe ma ala la'o leni nusa kota kasanahuluk leu fo lateme loken lae, ‘Dekapolis’. 32 Nai ndia hambu hataholi esa fo hala taak ma mbakek. Ndia nonoon nala loon neni Yesus neu. Ala loke fo Yesus tao liman neu langgan lain fo tao nahain. 33 Boe ma Yesus la'o ela hataholi makadotok kala sila, de mesak kana neu no hataholi ndia. Yesus tao lima ku'un neni hataholi ndia ndi'i doon dua sala dalek neu. Basa de Ana tao ambe neu lima ku'un, de nafaloe neu hataholi ndia maan. 34 Boe ma Yesus nasale lalai neu, de Ana hela naluk ani hahaen, boe ma Ana palenda nenik sila dede'an nae, “Efata!” (Ndandaan nae, “Hu'ak leo!”)

35 Ana nafada kada leo ndiak, tutik hataholi ndia namanene leo. Hataholi ndia maa makambiin, banggana'u tutik, losa ana mulai kokolak no malole.

36 Basa boe ma dua sala fali leni hataholi nouk kala leu. Yesus ka'i sala nae, “Mamanene baa! Ei boso mafada hataholi mae, Au tao ahai hataholi ia so.” Mae Yesus ka'i sala tehuu ala tui no'u lai basa mamanak lala'en. 37 Hataholi fo mana lamanene tutuik ndia, ala heran lalan seli. Boe ma ala lakokola lae, “Ana seli ia maa! Hataholi ia tao basan dadik malole. Hataholi mbakek bisa namanene. Hataholi hala taak bisa nakokola.”