Ala tati lisa Yohanis Mana Salanik
14
Faik ndia, mane Herodes to'u palenda nai propensi Galelea. Ndia boe oo namanene halak mata-matak la'e-neu Yesus. 2 Ana nafada pegawen nala nae, “Yesus ia, na Yohanis Mana Salanik, fo fain au adenu tete lala langgan. Hatematak ia nasoda seluk so bali, maa! Huu ndia de ana naena koasa fo tao tanda heran nala.”3 Mane Herodes kokolak leo ndiak, huu makahulun ana hambu dede'ak no Yohanis, losa ana humu nala Yohanis de nandeen neni bui dale neu. Dede'ak ndia tutuin leo iak: mane Herodes sao nala fadin Filipus saon, nade Herodias. Naa te Filipus no Herodias bei ta lamaketu. 4 Huu ndia de Yohanis ka'i taa-taa nae, “Ama manek ta bole sao mala fadim saon. Huu ndia la'o lena ita hada Yahudin ndia so!”a
5 Tehuu Herodes ta nau mbali sana, de kada sao nala Herodias. Tungga teteben, na, Herodes nahiik tao nisa Yohanis Mana Salanik. Tehuu ana bii hataholi no'uk kala, huu lamahele lae, Yohanis ndia, na, Manetualain mana kokolan. Huu ndia de nadenu ndia hataholin, fo nandee Yohanis neni bui dale neu.
6 Tehuu doo-doo boe ma Herodes tao feta fai bobonggin. Faik ndia, ina mane Herodias ana fe'on neu longge nasale nana hokak kala. Ndia lolonggen neulaun seli, losa tao nala Herodes namahoko nalan seli. 7 Longge nate'e, boe ma Herodes noke nala ina anak ndia, de nae, “O nau moke au hata, na, kada mafada leo! Huu dei fo au fee o. Au to'u ahele au hehelung ia. Ma au soo unik Manetualain naden.”
8 Ina anak ndia inan namanene manek kokolan leo ndiak, boe ma ana mbau-edo ina anak ndia. Huu ndia de ana neu noke nae, “Ama! Au oke Yohanis Mana Salanik langgan. Taon neu dulang esa dalek, fo leni feen mai au.”
9 Herodes namanene ina anak ndia noke leo ndiak, boe ma tenden hako tutik. Tehuu ta bisa hela falik ndia sosoon, huu basa nana hokak kala lamanenen so. Huu ndia de kada ana tungga ina anak ndia nonoken leo. 10 Boe ma ana palenda fo hataholi la leu tete lala Yohanis langgan nai bui dale. 11 Ala tete lala Yohanis langgan, boe ma ala taon neu dulang dale, de leu feen neu ina anak ndia. Ana simbo nala dulang ndia, boe ma ana ko'o nenin neu inan.
12 Ledo-eik Yohanis ana mana tunggan nala lamanene ala tete lala langgan, boe ma ala leu ha'i lala mbombolan, de leu latoin. Basa de leu lafada Yesus dede'ak ndia.
Lamatuak Yesus fee hataholi lifun lima lenak la'a
13 Neu faik fo Yesus namanene la'e-neu Yohanis, boe ma Ndia no ana mana tunggan nala la'o ela mamanak ndia. Boe ma ala sa'e ofak fo sangga leni mamana nees leu, fo bisa hahae aon nala. Tehuu hataholi no'uk lita Yesus asa ofan tungga-tungga dano bifin. Boe ma ala kalua leme nggolok kala mai, de la'ok lai-lai tungga dala madak lain. Huu ndia de ala losa lakahuluk lai mamanak fo Yesus asa leu ndia. 14 Ledo-eik Ana konda neme ofak mai, nita hataholi makadotok lahanin so. De dalen tuda kasian neu sala. Boe ma Ana tao nahai sila hataholi kamahedin nala.
15 Ledo bobok so, boe ma ana mana tunggan nala mai lafada Ndia lae, “Ama! Malolenak Ama madenu basa hataholi la ia, fo leu hasa nana'ak nai nggolok kala mana dekak lai ia. Huu ledo bobok so! Nai ia ta hambu nana'ak faa boe.”
16 Tehuu Yesus nataa nae, “Bosok! Kada ei ndia fee sala la'a.”
17 Tehuu lataa lasafalin lae, “Awii, Ama! Ai ta hambu hata esa boe fo fee hataholi desi-desi ia la'a. Ai tao leo beek? Huu hambu kada loti lima, ma i'ak boak dua maa!”
18 Tehuu Yesus kokolak nae, “Hei! Malole ndia so. Mini sala ia mai leo!” 19 Boe ma Ana nadenu basa hataholi la sila langgatuuk lakabubua leu na'u lain. Basa boe ma Yesus ha'i nala loti kalimak ma i'a kaduak kala sila. Boe ma Ana nasale lalai neu, de noke makasi neu Manetualain. Basa de Ana bibi'i loti sila, de Ana loon neu ana mana tunggan nala, fo baba'e sala leu basa hataholi la sila. 20 De basa sala la'a lakabete. La'a basa, boe ma ala leu lakaduduluk lala nana'a elak kala sila, de henu lembeneu sanahulu dua. 21 Basa hataholi mana na'ak kala sila meda touk lifun lima. Bei ta hingga tamba inak ma kakanak kala bali.
Lamatuak Yesus la'ok nesik oe bafon
22 Basa sala la'a late'e, boe ma Yesus nadenu ana mana tunggan nala leni ofak lain leu, fo lakahuluk leni dano selik leu. Tehuu Ana bei nahani nai ndia, fo nadenu hataholi no'uk kala sila fali. 23 Ledo-eik basa sala fali so, boe ma Yesus nda'e neni letek esa lain neu, fo hule-haladoi. Losa le'odae, te Ana bei nai ndia. 24 Ledo-eik ndia, Ndia ana mana tunggan nala ofan losa dook nai dano laladan so. Tehuu ala sefe sota lalan seli, huu ofak nasale ani solu, ma lii ina-huuk mbuka neu sala. 25 Lole mbilak, boe ma Yesus neu tungga sala. Tehuu Ana la'ok nesik oe bafon. 26 Ana mana tunggan nala lita leo ndiak, boe ma ala nggengge lalan seli. Ala kokolak lo bibiik lae, “He'e! Nitu ndia!”
27 Tehuu Yesus kokolak tutik neu sala nae, “Wei! Ei boso bii bou! Te Au ia Yesus! Ta hata-hata!”
28 Basa sala lamanene leo ndiak, boe ma Petrus nataa nae, “Mete ma O ia memak Lamatuak, na, fee au la'ok usik oe bafon, fo au uni Lamatuak uu.”
29 Boe ma Yesus nataa nae, “Neu! Mai leo!” De Petrus kalua neme ofak dale mai, boe ma ana la'ok nesik oe bafon neni Yesus neu. 30 Tehuu ledo-eik Petrus nameda ani belak, boe ma ana bii nalan seli de nanggou nae, “Awii, Lamatuak! Masala'e mala au dei!”
31 Tutik Yesus solok liman lai-lai, de to'u nalan. Ana kokolak nae, “Awii, Petrus! Hatina de o dalem kaba'ek? O ta mamahele tebe Au, do?”
32 Basa de dua sala maso leni ofak dale leu. Boe ma ani hahae tutik. 33 Ana mana tunggan nala lita leo ndiak, boe ma ala so'u koa-kiok neu Ndia lae, “Awii! Ama ia, memak tetebes Manetualain Anan oo!”
Lamatuak Yesus tao nahai hataholi kamahedik kala leme Genesaret
34 Ledo-eik ala losa dano selik, boe ma ala konda leme nggolo Genesaret dano bifin. 35 Ledo-eik ala konda, te hataholi no'uk kala lalelak kasa tutik. Boe ma ala mulai langgou lae, “Wei! Yesus mai so bou!” Ala lalai lafeok leu lafada, boe ma hataholi leni basa hataholi kamahedik kala mai. 36 Ala loke fo bisa kame la'e Ndia badun. Huu ala dudu'a lae, “Sadi hataholi kamahedik kada kame la'e Yesus badu mbedan, neu ko ala hai tutik.” Boe ma basa hataholi kamahedik mana kame la'e Ndia badun, hai tutik.