Lii maho'o nèti ja'a.

Dhèu ae dhu suri sèku le lii lolo nèti mamuri dènge sasab'a-la'a Yesus dhu j'aj'i ètu talora aae ji'i. Rèngu suri lii lolo sèra pake lii lolo dhu parai reo nèti ji'i asa ji'i karèi nèti uru ka, dhu ji'i nge'a nèti dhèu-dhèu dhu dètu dènge Lamatua Yesus, aa nèti dhèu leo dhu ladhe rèdhi dènge musi madha ra. Lii lolo se'e, lèke mola-mola dènge mamoa Ama Lamatua karèi nèti uru kèna.

De ja'a parisa kore le toke lutu dènge be'a, j'ara sèra aa'i-aa'i ra, mulai nèti j'aj'aj'i ra. Hèia ja'a pama'ète ho sèna ka suri si paie-iie ètu d'ara sasuri ne'e karèi nèti j'aj'aj'i ra. Dènge j'ara ne, ama bisa me'a mèu ngaa dhu j'aj'i le. 4 Aa ama bisa parcaya ngaa dhu dhèu lole sèra, lii dhu monya boe. Aa'i-aa'i se j'aj'i tare'a!

5 J'aj'aj'i lii lolo ne sèmi ne'e: lod'o dhèu aae Herodes nèd'u paredha ètu propensi Yudea, abhu ca dhèu, dhu ngara na Sakaria. Nèngu ne, ca dhèu ama agama Yahudi. Aa nèngu kahèi, ca dhèu nèti kaboko ama agama Abia. Dhèu èmu Sakaria, ngara na Elisabet, ca dhèu ana-èpu nèti ama agama kahèi. Te Elisabet ne, ana-èpu nèti Harun, a'a Musa.^b 6 Dua ra mamuri mola madhutu paredha dènge atora aa'i-aa'i nèti Ama Lamatua. Aa dhèu pakab'ua si kahèi. 7 Dua ra dhu heka le, te ngaa dhu abhu boe kolo, te era ana nèti Elisabet dhu bèdho mèno.

8 Ca tèka, Sakaria dènge dhèu d'ara kaboko Abia lèke lod'o rèngu sab'a ètu d'ara Èmu Kapua Manèngi-Mangaj'i ètu kota Yerusalem. 9 Madhutu atora ama agama, hud'i ère lot, ho re'a cee ka dhu maso asa Kama Mola-Mèci dhu ètu d'ara Èmu Kapua Manèngi-Mangaj'i. Ètu era èèna, dhèu ne hud'i pasèbu ai pake aj'u hèu mèngi ètu madha Ama Lamatua. Lod'o èèna, Sakaria lèke lot. 10 Hèia la'e dènge ka asa d'ara. Nèngu dhu talora pasèbu ai ètu d'ara Kama èèna, dhèu ae-ae dhu sabaj'a ètu madha Èmu. 11 Cag'ag'a laa, ana pajuu Ama Lamatua ca dhèu nèti sorga titu re bèka g'ana era tunu aj'u hèu mèngi ne.

12 Ropa ladhe nèdhi, Sakaria madha'u titu kèna, ka ne'a heka tao sèmi ngaa. 13 Te ngaa ana pajuu ne lii, aku nèngu na, “Sakaria! Baku madha'u! Te Ama Lamatua tadèngi le lii manèngi-mangaj'i èu. De bèli-camèd'a, dhèu èmu èu nara iisi ana mone ca dhèu. Èu hud'i pangare ne, Yohanis. 14 Èèna na dhèu ae karej'e kahèi sama-sama dènge miu, lula miu abhu ana. Bèli-camèd'a, ana ne pakarej'e d'ara èu. 15 Koasa nèti Roh Lamatua dhu Mola-Mèci, bera-bera dènge ne, karèi nèti ina na kad'o nèngu era. Nèngu ne hud'i luri ninu dhua ara-dhua pèd'u. Ropa na kapai, Ama Lamatua pake ne j'aj'i dhèu dhu dènge kolongara.^c 16 Bèli-camèd'a èèna pamako nare dhèu Isra'el ae-ae, ho ra lèpa hari asa Ama Lamatua rèngu. 17 Tatao dènge koasa na nuka sèmi Elia, ca dhèu dhu nèti lii padhai Ama Lamatua karèi uru. Nèngu ne mai uuru nèti Lamatua èdhi. Nèngu ne bisa kabèli d'ara ina-ama, ho sue hari ana-ana ra. Aa dhèu dhu rai nèti madha Lamatua, na ad'u si ho ra lèpa hari madhutu dad'èi Lamatua. Nèti sèmi èèna, nèngu tao dhèu sèna ka sadia d'ara ra sèmi mamai Lamatua.”^d

18 Te ngaa Sakaria karèi ana pajuu ne, aku nèngu na, “Bisa boe, sina ma?! Ja'a dènge dhèu èmu ja'a, d'ara heka sèmi ne'e ne! Tasamia ja'a bisa ke'a, na, j'ara se bisa j'aj'i?”

19 Ka ana pajuu ne dhaa, peka na, “Sèmi ne'e! Ja'a ne Gabriel, dhèu pajuu Ama Lamatua. Nèngu ka paleha ja'a mai, sèna ka peka dènge èu lii lolo dhu be'a ne.^e 20 Te ngaa èu mo'o boe lèka lii padhai ja'a ne. De tadha dhu èu manèngi, sèmi ne'e! He'o èu èèna na sakaa, ho èu bisa heka padhai lii, nèti deo ne'e ne, toke miu abhu ana. Pe èu mèdhi unu mu. Te ngaa dhu ja'a peka ne, bèli-camèd'a j'aj'i, lèke dènge lod'o na.”

21 Dhèu-dhèu dhu sabaj'a ètu li'u sèra, bingu titu kèna, lula Sakaria tao bhodho boe. 22 Ropa na kalua mai, nèngu bisa heka padhai lii. Ka na hia tadha re kacui-aai na, heka dhèu se'e re'a, na, Lamatua hia tanila ropa nèngu ètu d'ara Kama Mola-Mèci èèna.

23 Ropa èle sasab'a ra, hèia Sakaria lèpa asa èmu na. 24-25 Nèbhu boe ka Elisabet dènge babia. Ka na pea dhoka ètu d'ara èmu toke lèmi hèru. Na peka, aku nèngu na, “Koa-kio Lamatua! Lod'o d'ai kèna, Lamatua pad'elo d'ara hua iia Na mi ja'a. Ladhe ja'a ne dènge ka kolo, dhèu pamakae heka ja'a.”

26 Ropa Elisabet dènge babia d'ai èna hèru, hèia Ama Lamatua pua ana pajuu Na nèti sorga, la'e asa rae cue ètu propensi Galilea, ngara na Nasaret. Ngara ana pajuu ne, Gabriel. 27 Ètu Nasaret, abhu ana bhèni ngèru ca dhèu, ngara na Maria. Nèngu ne dhèu dhu lii d'ai le, ngara na Yusuf. Yusuf ne, ana-èpu dhèu aae Daud. Gabriel la'e paraga dènge Maria.^f 28 Ka na pad'elo iisi na mi ana bhèni ne, hèia na lii, peka na, “Salama, Maria, ee! Ama Lamatua dhu hag'e nare le èu, ho neo ad'u j'ara hua iia èci hia èu. Aa Nèngu bera-bera dènge èu kahèi.”

29 Tadèngi nare sèmi èèna, ka Maria bingu, lula ne'a boe sasoa nèti lii padhai ana pajuu ne. 30 Hèia ana pajuu ne tuhu hari lii padhai na, aku nèngu na,

34 Te ngaa Maria karèi Gabriel, peka na, “Ja'a ne j'unu kèdhi mèka dènge dhèu mone èci sa! Tasa mera mia ka ja'a dènge babia?”

35 Hèia Gabriel dhaa, peka na, “Sèmi ne'e! Roh Lamatua dhu Mola-Mèci puru mai asa èu. Aa koasa nèti Ama Lamatua dhu Dedha Risi Eele, èèna na mai sarimu nare èu. Dènge j'ara ne'e, Ana dhu bèli-camèd'a èu more iisi èèna, tare'a-re'a mola-mèci, lula Nèngu èèna, Ana Ama Lamatua.

36 Baku malaa! Te a'ari èu ca dhèu, ngara na Elisabet, dènge le babia kahèi. Dhèu peka na, nèngu èèna bisa heka nara iisi, lula nèngu dhu heka le. Te ngaa limuri ne, nèngu dènge babia èna hèru kèna. 37 Te bagi Ama Lamatua, aa'i-aa'i bisa j'aj'i!”^j

38 Ka Maria dhaa, peka na, “Be'a. Ja'a ne ènu Ama Lamatua. Hud'i laa aa'i-aa'i se j'aj'i madhutu sèmi lii èu èèna ka. Ja'a ke'a dhoka madhutu dad'èi Lamatua di.”

Èle ka ana pajuu nèti sorga ne lèpa, tèke eele Maria.

39-40 Èle pèri-pèri lod'o, hèia Maria pakèd'i nèti Nasaret, la'e lai-lai asa rae Sakaria, ètu ledhe-ledhe propensi Yudea. D'ai nèi, la'e dènge ka asa d'ara èmu Sakaria. Ka na hia lii maho'o mi Elisabet.

41 Ropa Elisabet tadèngi lii maho'o nèti Maria, hèia ana ètu d'ara kabake Elisabet pasèja. Aa Roh Lamatua dhu Mola-Mèci, maso sa Elisabet. 42 Ka Elisabet pa'oo, peka na, “Maria! Bèli-camèd'a dhèu ded'e padedha-dedha kolongara èu, risi nèti dhèu bhèni aa'i-aa'i ra ètu rai-haha ne! Èèna na dhèu aa'i-aa'i ra j'oke padedha-dedha kahèi Ana dhu èu kad'o èèna. 43 Ra pakab'ua ja'a kahèi, lula ina nèti Lamatua ja'a mai pangad'o dènge ja'a. 44 Ropa èu mèti lii maho'o mi dedha ja'a, cag'ag'a laa ana dhu ja'a kad'o ne pasèja ètu d'ara kabake ja'a, lula karae. 45 Ama Lamatua pad'elo le d'ara hua iia Na mi èu, lula èu ne parcaya, peka na, Nèngu tao madhutu lii dhu Na moa tèke.”

46 Maria bhoka hèb'a, peka na,

56 Hèia Maria pea dènge Elisabet toke tèlu hèru, heka lèpa asa èmu na ètu Nasaret.

57 Ropa d'ai hèru, ka Elisabet nara iisi ana mone ca dhèu. 58 Lii ne'e, ra palolo d'ai a'ari na dènge rae lesa, aku rèngu na, Ama Lamatua pad'elo le d'ara hua iia Na, ka Na hia Elisabet ana mone ca dhèu. Hèia rèngu aa'i-aa'i ra karej'e kahèi.

59 Lod'o ana ne d'ai aru lod'o, ka ra suna ne, madhutu atora dhèu Yahudi. Ra neo pangare ana ne, Sakaria, madhutu ngara ama na.ⁿ 60 Te ngaa ina na b'ala ra, aku nèngu na, “Aad'o sèmi èèna! Ngara na hud'i Yohanis ku!”

61 Te ngaa ra b'ala ne, “Nga tao ka pili ngara Yohanis? Nèti a'ari miu, ca dhèu sa dhu ngara dhae, sèmi mèka èèna!” 62 Ka ra senen ho karèi Sakaria, sèna ka neo pangare ana ne ngara na ngaa.

63 Hèia Sakaria senen ho manèngi lei. Ra hia ne lei, ka na suri peka na, “Ngara na Yohanis!” Ka dhèu aa'i-aa'i malaa titu kèna.

64 Cag'ag'a laa, he'o na dhu sakaa mèno èèna, mako dènge ka. Ka na koa-kio kolongara Ama Lamatua. 65 Hèia dhèu aa'i-aa'i dhu pea padètu ètu sèra sa, madha'u dènge malaa. Ka lii ne'e mulai ra palolo nèti hèb'a sa hèb'a, toke dhèu-dhèu ètu ledhe-ledhe ètu propensi Yudea re'a aa'i kahèi. 66 Dhèu-dhèu dhu tadèngi lii lolo èèna, ra pangee, peka na, “Tatu koasa nèti Lamatua bera-bera dènge ana ne. Bèli-camèd'a, ladhe na kapai mai, na j'aj'i dhèu sèmi mia, oo?”

67 Èle ka, Roh Lamatua dhu Mola-Mèci maso asa Sakaria. Ka na padhai lii, peka na,

80 Ka Yohanis asa kapai noo-noo. Aa Roh Lamatua pa'èra ne. Na kapai mai, hèia la'e pea ka ètu d'ara mamoo, toke d'ai lod'o na pakako sasab'a mi dhèu Isra'el sèra.