2 Ropa d'ai madha gubernur, ka na karèi Yesus, aku nèngu na, “Tasamia? Èu ne tare'a Dhèu Aae Yahudi, do?”

Yesus dhaa, aku Nèngu na, “Tare'a. Ama gubernur peka lèke kèna.”

3 Hèia kètu agama Yahudi sèra peka dènge gubernur, aku rèngu na, “Dhèu ne'e tao sala ae titu kèna!” Hèia ra lolo ka sasala Na èci-èci. 4 Ka gubernur karèi hari Yesus, “Èu tadèngi boe lii padhai dhèu se'e, do? Dhèu se'e, pasala le Èu ae-ae. Èu b'ala ku laa!”

5 Te ngaa Yesus b'ala boe ca hèb'a sa, ka gubernur malaa.

6 Tèu mai-tèu mai, dhu tema le, ladhe d'ai lod'o kalela Paska dhèu Yahudi, dhèu ae sèra paj'uj'u ana bèdho èci, ho gubernur patalale ne. 7 Lod'o èèna, ana bèdho èci, ngara na Barabas. Uru èèna, ra kèpe ne, taga na palab'a dènge dhèu paredha Roma, aa na pamadhe dhèu kahèi. 8 Lula lod'o tatao Paska èèna oe dètu le, dhèu ae lasi manèngi gubernur Pilatus, ka ra pa'oo-parodha, peka na, “Ama gubernur! Lod'o tatao Paska dètu le! Lod'o sèmi ne'e, Ama gubernur patabuli ku ana bèdho èci, sama sèmi tèu-tèu uru sèra.”

9 Hèia gubernur b'ala lii rèngu, “Ladhe sèmi èèna, ja'a patabuli cee? Tasamia, ladhe ja'a patabuli Dhèu Aae Yahudi miu, do? Miu mo'o, do aad'o?” 10 Gubernur peka sèmi èèna, lula nèngu ne'a le, kètu agama Yahudi ka rèti Yesus mai asa nèngu, taga ra kacèki dènge Yesus.

11 Hèia kètu agama Yahudi se dadugu dhèu ae sèra, ho manèngi gubernur, peka na, “Ji'i ngo'o boe Nèngu! Ji'i d'èi dhoka patabuli Barabas di!”

12 Ka gubernur karèi hari dhèu ae sèra, “Ladhe sèmi èèna, Yesus, dhu ra pangare na ‘Dhèu Aae Yahudi’ èèna, ja'a tao Ne, tasamia?”

13 Ka aa'i-aa'i ra pa'oo, peka na, “Pamadhe Ne! Paku Ne mi aj'u palolo-palèbha!”

14 Hèia gubernur karèi si, aku nèngu na, “Sasala Na ngaa? Ja'a parisa kore le. Te ngaa abhu boe sasala Na èci sa, dhu Nèngu tao!”

Te ngaa dhèu se asa ka hino pa'oo-parodha, aku rèngu na, “Pamadhe Ne! Paku Ne mi aj'u palolo-palèbha!”

15 Lula gubernur neo pakarej'e d'ara dhèu ae sèra, ka na patabuli Barabas madhutu dad'èi rèngu. Ka na paredha dhèu j'aga sèra lasi kalabhe Yesus pake gui.^a Game rare Ne, hèia sordad'u sèra rèti ka Yesus lasi neo paku pamadhe Ne ètu aj'u palolo-palèbha.

16 Èle èèna ka, sordad'u sèra ère rèti Yesus asa era dhu taleo èci ètu madha èmu gubernur.^b Ka ra paroa anga sordad'u dhu leo sèra ca batalion, ho pakaboko. 17 Ra papake Yesus kodho madhera aae èci, dhu mea oe sèmi mangèru sa, sama sèmi mèdha-papake dhèu aae-dhèu aae. Ka rare loro aj'u dhu padhudhu, ho ènyu solo. Hèia ra ènyi solo padhudhu èèna mi kètu Yesus. Ka ra tao Ne, sèmi dhèu aae dhu ded'e hiu, dhu pake solo dhèu aae.

18 Rèngu aa'i-aa'i ra sangaja pakab'ua Yesus. Ra peka, aku rèngu na, “Ama Dhèu Aae Yahudi dhu hua iia!” 19 Aa ra sangaja pacud'u kètu ho pakab'ua Yesus. Ka ra sabhuu ilu pèri-pèri hari mi rèhu Yesus. Sèmi èèna kahèi, ra d'eu kètu Yesus dènge gui pahari-pahari. 20 Ropa ra tao rare sèmi èèna, ka ra bhoke eele kodho madhera nèti ua Na. Ka ra papake hari mèdha-papake Na. Èle ka, rèti Yesus asa li'u Yerusalem, ho neo paku Ne ètu aj'u palolo-palèbha d'ai madhe.

21 Ropa rèngu kalua nèti Yerusalem, d'ai talora j'ara paraga dènge dhèu kota Kirene èci. Ngara na Simon, ama nèti Aleksander dènge Rufus. Ropa na neo maso asa Yerusalem, sordad'u sèra pakaseti ne pasae aj'u palolo-palèbha Yesus.^c 22 Ère rèti Yesus asa era èci, ngara na Golgota. (Sasoa na, ‘era rui kètu’.) 23 D'ai era èèna, ra neo hia Yesus ninu èi hua anggor manyilu dhu pab'ali dènge èi na'i, sèna ka Na taha rarii nèti nu'a-nu'a ètu ngi'u Na sèra. Te ngaa Yesus no'o boe ninu. 24-25 Hèia ra paku kacui-aai dènge haga Yesus ètu aj'u palolo-palèbha. Paku rare ka, ra patitu aj'u palolo-palèbha èèna, ele boe d'ara hake ceo mad'ae sa. Èle èèna ka, sordad'u sèra ère lot, ho re'a cee ka dhu abhu mèdha-papake Yesus.^d 26 Ka ra suri ètu papa èci dhu ra paku re dedha kètu Yesus, peka na,

Rèngu pake alasan èèna ka, ho huku pamadhe Yesus. 27 Ètu èèna, ra paku parapo dhèu dua kahèi pa'èci dènge Yesus. Èci re cabèka g'ana, aa èci hari re cabèka kariu Yesus. 28 [Dènge j'ara ne, rèngu madhutu sama sèmi dhu ra suri tèke ètu d'ara Sasuri Ama Lamatua, peka na, “Ra tao Ne sama sèmi dhèu bhelu.”]^{e f}

29 Dhèu aa'i-aa'i dhu kako re èèna, ladhe rèdhi Yesus dhu ra paku ètu aj'u palolo-palèbha. Ka ra pakareko kètu, aa ra padhai lii pamakae Yesus, aku rèngu na, “Heh! Èu ne peka na, Èu bisa paguri eele Èmu Kapua Manèngi-Mangaj'i, ho d'ara tèlu lod'o, Èu pakèd'i hari, si?^g 30 Èu puru sèku nèti aj'u palolo-palèbha èèna, ho patabuli ngi'u Èu! Ladhe sèmi èèna, heka ji'i parcaya, na, Èu ne, Ana Ama Lamatua.”

31 Sèmi èèna kahèi, kètu agama Yahudi sèra, padhai lii pamakae Yesus, aku rèngu na, “Nèngu ne, patabuli le dhèu leo nèti rupa-rupa j'aj'èra, te ngaa Nèngu bisa boe patabuli ngi'u Nèngu unu Na nèti j'aj'èra ne'e. 32 Nèngu peka unu Na, Nèngu ne ‘Kristus’, dhu uru èèna Ama Lamatua moa tèke le. Dhèu leo peka na, Nèngu ne Dhèu Aae Isra'el. Ladhe tare'a sèmi èèna, hud'i laa Na puru nèti aj'u palolo-palèbha ne, sèna ka ji'i ngèdhi Ne. Heka ji'i parcaya Ne kèna.”

Dhèu dua dhu ra paku sama-sama dènge Yesus sèra, padhai lii pamakae Yesus kahèi.

33 D'ara lod'o titu mera sa, era èèna maroga, toke d'ai hake tèlu loo nihia.

34 D'ai hake tèlu nihia, hèia Yesus pa'oo pake lii Aram, peka na, “Eloi! Eloi! Lema sabaktani?” (Dhu sasoa, peka na, “Lamatua Ja'a! Lamatua Ja'a! Nga tao ka, Ama Ku tèke eele Ja'a sèmi ne'e?”)^h

35 Abhu pèri-pèri dhèu ètu èèna, tadèngi lii pa'oo Yesus. Ka ra peka, “Miu nanene ku laa! Te Na paroa Elia, dhèu nèti lii padhai Ama Lamatua uru èèna.” 36 Ka dhèu èci rai la'e nare ula dhasi, ka na cèb'u asa d'ara èi hua anggor manyilu. Hèia nare ula èèna, èki ètu suu tatea èci, ka na soro asa panyoro Yesus ho Na camuci. Dhèu èèna peka, “Èdhi tatae sèku. Cee ne'a, tao-tao Elia mai, ho papuru Ne nèti aj'u palolo-palèbha èèna.”ⁱ

37 Hèia Yesus pa'oo hari ca tèka, heka Na madhe kèna.

38 Ètu d'ara Èmu Kapua Manèngi-Mangaj'i abhu bèla dhu bhèla aae, ra kadhoe pa'abhe Kama Luri Mola-Mèci. Ropa Yesus ma'ète a'ae, bèla ne mae cèri bagi mi dua, nèti dedha toke d'ai haha.^j

39 Ètu Golgota abhu komedhaa sordad'u j'aga dhu titu dètu aj'u palolo-palèbha Yesus. Ropa ladhe nèdhi mamadhe Yesus, na cag'ag'a. Hèia na peka, aku nèngu na, “Ira ii! Mema tare'a! Dhèu ne'e ne, Ana Ama Lamatua.”

40-41 Abhu pèri-pèri dhèu bhèni dhu madhutu lasi asa era èèna kahèi. Ra titu nèti kaj'èu, ladhe rèdhi mamadhe Yesus ètu aj'u palolo-palèbha èèna. Rèngu se ka dhu uru èèna lalau-lalo'o Yesus ètu Galilea. Rèngu sèra, nuka: Salome, Maria nèti rae Magdala, dènge Maria èci hari (nuka ina Yakobis dènge Yoses),^k dènge dhèu bhèni leo hari dhu mai asa Yerusalem, sama-sama dènge Yesus.^l

42-43 Ropa lod'o oe cèna, hèia dhèu èci tenge j'ara ho papuru ngi'u aae Yesus nèti aj'u palolo-palèbha. Dhèu èèna, ngara na Yusuf, nèti kota Arimatea. Nèngu ne'e kahèi, ca dhèu dhu j'ue lii langu agama Yahudi. Nèngu dhèu d'ara be'a kahèi. Aa nèngu mate nèbhu le paredha Ama Lamatua mai.

Lod'o Yesus madhe èèna, lèke hari Jumat. Bèli na, lèke lod'o manèngi-mangaj'i dhèu Yahudi. Nèti èèna ka, Yusuf neo papuru eele ngi'u aae Yesus ètu d'ara lod'o hari Jumat èèna. Ka na pabani iisi na, la'e paraga dènge gubernur Pilatus, manèngi ho papuru ngi'u aae Yesus. 44 Ropa gubernur tadèngi lii manèngi Yusuf ne, na malaa. Hèia na peka, aku nèngu na, “Eea! Nga tao ka, dhèu Ne madhe malai sa mia ne! Ja'a ngee, na, dhae madhe mèka!”

Hèia na pua dhèu lasi paroa komedhaa, ka na karèi ne, aku nèngu na, “Sa mia? Yesus madhe le, do dhae?”

45 Komedhaa èèna b'ala, peka na, “Tare'a, ama! Na madhe le karèi deo na.” Ropa gubernur tadèngi nare lii dhaa èèna, hèia na hia Yusuf la'e nare ngi'u aae Yesus.

46 Hèia Yusuf la'e hèli bèla madhera dhu kab'ua èci, ka na la'e asa Golgota. D'ai nèi, ka na papuru ngi'u aae Yesus nèti aj'u palolo-palèbha. Na pahutu ngi'u aae Yesus dènge bèla hiu. Tèu èèna, ra heka pae rare ro'a èci ètu d'ara hadhu aae. Hèia ra nedhe rèti ngi'u aae Yesus asa d'ara ro'a èèna. Ka ra loli rare hadhu kabela dhu kapai èci, ho ra bèdho paie hèb'a ro'a èèna. Èle èèna ka, Yusuf si lèpa.

47 Lod'o èèna, Maria nèti rae Magdala, dènge Maria èci hari, (ina Yoses), madhutu d'ai era èèna kahèi. Dua ra rèdhi era dhu ra padhane Yesus, ka ra patadhe paie era èèna.