Lii Lole nèti dhèu pajuu-paleha Lamatua Yesus
Ama Lamatua moa pa'adhu mai Roh Mola-Mèci Na
1
1-3 Ama Teofilusa dhu be'a. Lii maho'o nèti ja'a, Lukas.Ètu d'ara sasuri ja'a dhu uru èèna, ja'a suri aa'i mèu-mèu lula-nèti mamuri Lamatua Yesus. Nuka, ngaa dhu Na tao, dènge ngaa dhu Na aj'a-nori, karèi nèti uru tèka. Na hag'e nare dhèu pajuu-paleha Na. Masi ka dhèu paj'èra Ne, aa ra pamadhe Ne, te ngaa Ama Lamatua pamamuri hari Ne. Ropa Na kèd'i nèti mamadhe, Na pad'elo iisi mi dhèu pajuu-paleha Na. Ra rèdhi Ne padhutu-dhutu toke d'ai èpa nguru lod'o, ka ra re'a, Na mamuri hari tare'a. Nèngu peka dènge rèngu, na, Ama Lamatua sama sèmi Dhèu Aae dhu nèd'u paredha. Ka Na pua rèngu kahèi pake koasa nèti Roh Ama Lamatua dhu Mola-Mèci. Lii dhu ja'a suri ne, lole ngaa-ngaa dhu Na tao nèti uru, toke d'ai Na ca'e hari asa sorga.
Se'e se ka dhu ja'a suri kèdhi le.
4-5 Ca lod'o hari, ropa Yesus pa'èci dènge dhèu pajuu-paleha Na ètu dedha Ledhe Saitun, Na hia si paredha peka na,
‘‘Sanèd'e! Uru èèna, Yohanis sarani dhèu pake dhoka èi di, te ngaa ladhe miu mate hari pèri-pèri lod'o, èèna na Lamatua tao ngaa dhu kapai risi eele hia miu. Lula Na hia miu Roh Na dhu Mola-Mèci. De baku tèke eele kota Yerusalem kahèi. Te ngaa miu mate mi ne'e, toke d'ai Ama Ku papuru Roh Na mi dedha miu, sèmi dhu Na moa le uru èèna. Aa miu tadèngi le nèti Ja'a kahèi.’’b
Lamatua Yesus ca'e asa sorga
6 Ropa Yesus pakaboko dènge dhèu pajuu-paleha Na era, ra karèi Ne, aku rèngu na, ‘‘Ama! Ji'i neo karèi: Ama sanèd'e era, sina ma, dhu uru èèna, kabarai èdhi Isra'el paredha unu na? De Ama neo patabuli èdhi nèti dhèu leo deo ne'e, do, mate hari lod'o leo?’’
7 Hèia Yesus dhaa, peka na, ‘‘Miu pakarèi ia ka lod'o èèna! Dhoka Ama ku di, dhu pama'ète j'aj'aj'i lod'o èèna na. 8 Te ngaa ladhe Roh Lamatua dhu Mola-Mèci mai maso asa d'ara miu, heka miu abhu koasa kèna. Hèia miu hud'i lami palolo dènge dhèu aa'i-aa'i ra lula-nèti Ja'a. Miu peka dènge dhèu ètu kota Yerusalem, ètu rae aa'i-aa'i ètu propensi Yudea dènge propensi Samaria, taruu toke d'ai suu-suu rai-haha ne.’’c 9 Ropa Na padhai lii nare sèmi èèna, Ama Lamatua paca'e Yesus asa dedha-liru la'e ètu katanga madha rèngu. Ra ladhe taruu, toke d'ai ra'i-liru hutu nare Ne, ka rèngu rèdhi heka.d
10 Ropa rèngu ladhe asa dedha-liru era, cag'ag'a laa, dhèu dua titu ètu karasa rèngu, dhu pake mèdha-papake pudhi lao-lao. 11 Dhèu dua sèra peka dènge rèngu, na, ‘‘Wee! Miu dhèu Galilea! Nga tao ka miu tangare taruu asa dedha-liru? Deo na miu mèdhi le Yesus ca'e toke d'ai ra'i-liru hutu nare Ne. Miu mèdhi unu mi dènge musi madha miu, Na ca'e la'e deo na. Sèmi mia dhu miu ladhe mèdhi Na ca'e la'e èèna, sèmi èèna kahèi èèna na Nèngu mai hari.’’
Ra tenge dhèu leo ho gati Yudas
12 Èle èèna ka, dhèu pajuu-paleha Yesus sèra puru nèti ledhe Saitun lèpa lasi asa kota Yerusalem. Ledhe Saitun èèna, ele boe kaj'èu nèngu d'ai ca kilo di nèti d'ara kota.e
13 D'ai nèi, ka ra lasi asa d'ara èmu dhu rèngu pea. Ka ra ca'e asa kama èci ètu èmu dedha. Ngara dhèu pajuu-paleha sèra, nuka:
Petrus,
Yohanis,
Yakobis,
Anderias,
Pelipus,
Tomas,
Bertolomeos,
Mateos,
Yakobis (ana Alpius),
Simon (dhu madhutu partei Selot),f
dènge Yudas (ana Yakobis).g
14 Rèngu aa'i-aa'i ra dhu tema pakaboko ho manèngi-mangaj'i dènge d'ara èci. Maria, ina Yesus, aa dhèu bhèni-dhèu bhèni leo, dènge a'ari Yesus sèra pakaboko dènge rèngu kahèi.
15 Ca tèka hari, rèngu pakaboko, ele boe dhèu d'ai cangasu dua nguru dhèu sa. Ka Petrus kèd'i titu, ka na padhai lii, aku nèngu na, 16 ‘‘Ina-ama, a'ari aa'i-aa'i ti! Èle boe miu sanèd'e Yudas era, dhu uru èèna nèti anga na canau, ho lasi kèpe Yesus. Ngaa dhu Yudas tao, mema hud'i j'aj'i sèmi èèna ku. Te nèti uru ka, Roh Ama Lamatua peka le, dènge dhèu aae Daud, ho suri tatao Yudas. 17 Te Yudas èèna, dhèu èdhi dhu sab'a pa'èci dènge èdhi.’’
18 (Te ngaa ropa Yudas pahie eele Yesus, ka rare doi papana èèna, lasi hèli rare rai cue. Rai èèna ka dhu j'aj'i era mamadhe nèngu. Na bèbhe sagèb'a ètu era èèna, ka masèke eele kabake na, hèia tanèi na talala. 19 Ka dhèu palolo lème, toke d'ai isi kabarai kota Yerusalem re'a aa'i mèu-mèu mamadhe Yudas èèna. Nèti èèna ka, ra pangare rai èèna madhutu lii Aram, ngara na ‘Akeldama’, sasoa na, ‘rai raa’.)h
20 Petrus tuhu hari lii padhai na, peka na, ‘‘Uru-uru sèra, dhèu aae Daud suri tèke le ètu d'ara sasuri Lii Sod'a Koa-kio, peka na,
‘Hud'i sène era pea nèngu, j'aj'i mi era dhu pa'ela eele;
bisa heka dhèu èci sa pea ètu èèna.’
Aa na suri kahèi, aku nèngu na,
‘Hud'i sène, sasab'a nèngu ra hia asa dhèu leo la'e.’i
21-22 De èdhi hud'i tenge dhèu èci ho gati Yudas. Èdhi tenge dhèu dhu bera-bera dènge èdhi nèti uru ka mai. Dhèu èèna, hud'i dhèu dhu nèbhu le madhutu Yesus la'e-mai, mulai nèti Yohanis sarani Yesus. Aa nèngu èèna, hud'i dhèu dhu nèdhi dènge musi madha, na, Yesus kèd'i hari nèti mamadhe Na, toke d'ai lod'o Yesus ca'e hari asa dedha-liru ètu talora èdhi.’’j
23 Ropa Petrus peka nare sèmi èèna, ka dhèu dhu pakaboko sèra, pamaso ngara dhèu dua. Èci ngara na Matias, aa èci hari ngara na Yusuf (dhu tema le ra paroa na Barsabas; ngara na leo èci hari, na, Yustus). 24-25 Hèia ra sabaj'a, aku rèngu na, ‘‘Ama ètu dedha-liru! Ama dhu me'a iie d'ara dhèu aa'i-aa'i. Yudas madhe le, tèke eele sasab'a na. De Ama paj'uj'u hia ji'i dhèu èci nèti rèngu dua se, mia dhu Ama d'èi, ho ji'i ded'e ne j'aj'i mi dhèu pajuu-paleha Lamatua Yesus.’’ 26 Ka ra ère lot, pake ngara dhèu dua sèra. Hèia dhu lèke ka Matias. Ka ra ded'e ne j'aj'i dhèu pajuu-paleha Lamatua Yesus, ho na pa'èci dènge rèngu dhèu canguru èci sèra.