Lere rèti Lamatua Yesus asa gubernur Pilatus
23
Masi ka dhèu uri lii langu agama Yahudi sèra pama'ète rare le sèna ka huku pamadhe Yesus, te ngaa rèngu dènge boe hak ho huku pamadhe dhèu. Nèti èèna ka, lere rèti Yesus asa madha gubernur nèti paredha Roma, dhu ètu èèna nuka Pilatus. Rèngu d'èi ladhe gubernur ka dhu huku Ne. 2 De ropa d'ai madha gubernur, ra lole sasala Yesus èci-èci, peka na, “Dhèu ne'e ne, tuka lab'a paredha Roma. Na aj'a peka na, dhèu baku b'ae bea sa dhèu paredha. Na ded'e iisi Na, peka na, Nèngu ne, Kristus, dhèu aae dhèu Yahudi.”3 Tadèngi nare sèmi èèna, ka gubernur karèi Ne, peka na, “Tare'a, do? Èu ne, dhèu aae dhèu Yahudi, do?”
Hèia Yesus dhaa, peka na, “Tare'a. Sèmi lii padhai ama.”
4 Parisa èle ka, gubernur ladhe sa kètu agama Yahudi, dènge dhèu ae sèra. Ka na lii, peka na, “Sèmi ne'e. Ja'a abhu boe sasala Dhèu ne ciki sa hèi.”
5 Te ngaa dhèu se pakadhii taruu, aku rèngu na, “Aad'o, ama gubernur. Dhèu ne la'e aj'a sa mia-mia, ho kakèj'i kabarai, sèna ka palab'a dènge dhèu paredha. Na tao maruru mulai nèti propensi Galilea toke d'ai kota Yerusalem ne'e.”
Gubernur hia rèti Lamatua Yesus asa dhèu aae Herodes
6 Tadèngi sèmi èèna, hèia gubernur karèi si, aku nèngu na, “Ladhe sèmi èèna, Nèngu ne dhèu Galilea, do?”
Ka dhèu se dhaa, “Tare'a. Nèngu nèti Galilea.” 7 Ropa ne'a nare sèmi èèna, hèia gubernur pua lere rèti Yesus asa dhèu aae Herodes, dhu paredha propensi Galilea. Lod'o èèna, nèngu ètu kota Yerusalem. 8 Herodes ne, dhu tadèngi ae le, dhèu palolo tatao Yesus, aa nèbhu le neo paraga dènge Ne kahèi. Nèngu dhu sanao-maena bisa nèdhi dènge madha na tadha malaa èci-dua sa nèti Yesus. Nèti èèna ka, lod'o lere rèti Yesus asa nèngu, d'ara na karej'e. 9 Hèia na karèi Yesus rupa-rupa j'ara, te ngaa Yesus dhaa boe ca hèb'a sa. 10 Ropa Herodes padhai lii era dènge Yesus, te ngaa kètu agama Yahudi dènge mese agama sèra galaa hari Yesus dènge rupa-rupa sasala. 11 Hèia dhèu aae Herodes dènge sordad'u na padhai lii pahahe Ne. Ka ra papake Yesus kodho saraga dhu madhera robho d'ai rai èci, sèmi dhèu aae tema pake, hèia ra padhai lii pahahe Ne taruu. Ka rèti hari Ne la'e asa gubernur Pilatus. 12 Uru nèti èèna, gubernur dènge dhèu aae Herodes dhu pamusu. Te ngaa nèti lod'o èèna, dua ra pa'angalai.
Gubernur pama'ète huku madhe mi Lamatua Yesus
13 Èle èèna ka, gubernur Pilatus paroa kètu agama Yahudi dènge dhèu heka-dhèu heka ad'a Yahudi, sama-sama dènge dhèu ae sèra, mai pakaboko ho nanene lii pama'ète. 14 Aku nèngu na, “Miu mèti le Yesus asa ja'a, aa mi galaa Ne, peka na, Nèngu d'èi kakèj'i kabarai ho lab'a paredha Roma. Ja'a parisa le toke lutu ètu madha miu, te ngaa ja'a abhu boe sasala Na èci sa. 15 Dhèu aae Herodes parisa le kahèi. Te ngaa na abhu boe sasala ngaa-ngaa kahèi. Nèti èèna ka, na hia hari Ne mai sa ja'a. Dhèu Ne dènge boe sasala ngaa-ngaa. De ja'a bisa boe huku pamadhe Ne. 16 Ja'a neo pama'ète sèmi ne'e: ja'a pua kalabhe Ne pake gui, èle na ja'a patabuli eele Ne.”
17-18 Ropa tadèngi sèmi èèna, hèia ra pa'oo-parodha, peka na, “Bisa boe! Pamadhe Ne! Patabuli Barabas.”
[Ra pa'oo-parodha sèmi èèna, lula tèu mai-tèu mai, dhu tema le, ladhe d'ai lod'o kalela Paska dhèu Yahudi, gubernur patabuli ca dhèu nèti d'ara bèdho madhutu dad'èi rèngu].a 19 (Barabas ne maso bèdho, lula na kakèj'i dhèu lab'a paredha Roma ètu kota Yerusalem, aa na pamadhe dhèu kahèi.)
20 Te ngaa gubernur neo patabuli Yesus. Ka na karèi hari dhèu ae sèra, “Tasamia ladhe ja'a patabuli Yesus?”
21 Te ngaa asa ra pa'oo-parodha, peka na, “Aad'o! Paku pamadhe Ne ètu aj'u palolo-palèbha! Paku pamadhe Ne ètu aj'u palolo-palèbha!”
22 Te ngaa gubernur ngee na j'ara ne lèke boe, ka na karèi d'ai tèlu hari, peka na, “Nga tao ka ja'a madhutu miu ho paku pamadhe Ne? Bhabhelu Na ngaa? Ja'a parisa le Nèngu ne, te ngaa abhu boe j'ara èci sa kahèi, ho huku pamadhe Ne. De ja'a neo dhoka kalabhe Ne, èle ku, heka patabuli Ne.”
23 Te ngaa dhèu se aa'i-aa'i ra pa'oo-parodha hari pamèdhu-mèdhu, sèna ka laka-seti ne ho paku pamadhe Yesus ètu aj'u palolo-palèbha. Hèia gubernur taha nare heka, 24 ka na pama'ète madhutu dad'èi dhèu sèra. 25 Hèia na patabuli Barabas, ca dhèu dhu d'èi palab'a, dènge pamadhe dhèu. Te ngaa na soro Yesus la'e asa adhe-aai dhèu se'e, sèna ka ra tao Ne madhutu dad'èi rèngu.
Ra paku pamadhe Lamatua Yesus ètu aj'u palolo-palèbha
26 Èle ka, sordad'u Roma sèra nuni rèti Yesus asa li'u kota Yerusalem. Ètu talora j'ara, ra paraga dènge dhèu èci nèti kota Kirene, dhu ngara na Simon, dhu neo maso asa d'ara kota Yerusalem. Ka ra laka-seti ne, sèna ka pasae aj'u palolo-palèbha ne gati Yesus. Ka na kako re limuri madhutu Yesus.
27 Lod'o èèna, dhèu ae mai laladhe Yesus. Abhu kahèi ina-ina dhu pasuti èi madha, lula d'ara pèd'a ropa rèdhi Ne. 28 Ropa Yesus ladhe bhèni se tangi, hèia Na lii, aku Nèngu na, “Ina-ina nèti Yerusalem. Baku tangi Ja'a ne. Tangi hiu ngi'u miu mesa mi, dènge ana niki miu. 29 Te bèli-camèd'a, sasusa dhu kapai risi mai, hèia dhèu peka na, ‘Bhèni dhu kalua hua iia, nuka, bhèni dhu rara iisi rèdhi boe, aa dhu pasusu rèdhi boe ana.’ 30 Lod'o sasusa aae na mai, dhèu j'èra titu kèna, toke ra manèngi, peka na, ‘Be'a risi, ledhe guri mai ho kabhie ka ji'i!’ Aa ra peka kahèi, ‘Dènge j'aj'èra sèmi ne'e ne, be'a risi kabhuku dhènu eele ka ji'i.’b 31 Ladhe dhèu bisa paj'èra dhèu dhu dènge boe sasala, tasamia hari mi dhèu bhelu?”c
32 Ropa sordad'u se rèti Yesus, ra nuni rèti kahèi dhèu bhelu dhèu dua, ho huku pamadhe palere-lere dènge Ne. 33 Rèngu d'ai era èci, dhu ngara na ‘Rui Kètu.’ Hèia ra paku Yesus dènge dhèu bhelu dhèu dua se, mi aj'u palolo-palèbha ra èci-èci. Ka ra sèle patitu aj'u palolo-palèbha sèra. Ra hia dhèu bhelu èci ètu karasa g'ana Yesus, aa èci hari ètu karasa kariu Na.
34 [Lod'o èèna, Yesus sabaj'a peka na, “Ama! Bhèlu eele sasala dhèu se, te rèngu re'a boe ngaa dhu ra ad'u-ue.”]d Èle ka sordad'u se ère lot, sèna ka neo re'a cee ka dhu abhu mèdha-papake Na.e
35 Dhèu ae mai laladhe ètu era èèna. Dhèu aae-dhèu kapai Yahudi sèra, peka pa-aape Yesus, aku rèngu na, “Nèngu dhu patabuli nare le dhèu leo nèti mamadhe-mamopo, te ngaa bisa boe patabuli ngi'u Nèngu mesa Na. Ladhe Nèngu ne, tare'a-re'a Kristus, dhu Ama Lamatua hag'e nare, hud'i laa Na puru unu Na nèti aj'u palolo-palèbha ne.”f
36 Sordad'u se padhai lii pa-aape Ne kahèi. Ra hia Ne ninu èi anggor manyilu,g 37 aa ra parodha pahaha Ne, peka na, “Ladhe Èu ne tare'a-re'a dhèu aae Yahudi, na, patabuli eele ka ngi'u Mu nèti mamadhe!” 38 Ra suri ètu papa èci, peka na,
“Ne'e ne, dhèu aae dhèu Yahudi.”
Ka ra paku papa ne re dedha kètu Yesus, sèna ka dhèu re'a, na, ra huku Ne lula j'ara ne'e ka.
39 Ca dhèu bhelu dhu paku ètu karasa Yesus padhai lii pa-aape Ne kahèi, aku Nèngu na, “Èu ne tare'a Kristus, do? Ladhe tare'a, na, patabuli eele ka èdhi!”
40 Te ngaa dhèu bhelu èci hari kai ne, aku nèngu na, “Weh! Èu ne me'a boe madha'u dènge Ama Lamatua, hèi? Te èu ne abhu huku madhe èci èèna ka dènge Nèngu kahèi. 41 Èdhi dua ti pasae tare huku madhe ne, lèke dènge tatao èdhi. Te ngaa Dhèu ne, tao boe sasala ngaa-ngaa.” 42 Ka dhèu ne, peka hari, aku nèngu na, “Yesus! Ladhe Ama maso ka asa era paredha Ama, na baku bhèlu ja'a.”
43 Hèia Yesus dhaa, “Ja'a peka tare'a-re'a dènge èu kèna, na, lod'o deo ne'e kahèi, èu lamu asa sorga palere-lere dènge Ja'a.”
Lamatua Yesus madhe
44-45 Lod'o èèna, dhu lod'o nètu le. Te ngaa madha lod'o saraa boe, aa maroga kiu-kiu abhe nare era èèna, toke d'ai hake tèlu lod'o nihia. Ètu d'ara Èmu Kapua Manèngi-Mangaj'i, abhu bèla bhèla aae èci dhu ra kadhoe pa'abhe Kama Luri Mola-Mèci Ama Lamatua. Kaca'a laa, bèla ne mae bagi mi dua.h
46 Ètu era dhu ngara na ‘Rui Kètu’ èèna, Yesus pa'oo, aku Nèngu na, “Ama! Ja'a pangèd'u samanga Ja'a mi d'ara adhe-aai Ama.” Ropa padhai lii èle, hèia Yesus ma'ète a'ae.i
47 Abhu komedhaa sordad'u Roma titu ètu era èèna, dhu padètu dènge aj'u palolo-palèbha Yesus. Ropa ladhe nèdhi Yesus madhe, ka na koa-kio Ama Lamatua, peka na, “Ira ii! Dhèu ne'e ne, tare'a re'a Dhèu d'ara mola!”j
48 Ropa dhèu ae sèra rèdhi mamadhe Yesus, ra manyasa, dènge d'ara ra roe bhilu, ka ra lèpa dènge d'ara susa. 49 Te ngaa dhèu-dhèu Yesus titu ètu kaj'èu, rèdhi Na madhe. Ina-ina dhu madhutu Ne nèti Galilea toke Yerusalem, ètu èèna kahèi.k
Dhèu padhane Lamatua Yesus
50-51 Ropa Yesus madhe, dhèu èci tenge j'ara, sèna ka papuru ngi'u aae Na nèti aj'u palolo-palèbha. Dhèu ne, ngara na Yusuf nèti kota Arimatea. Nèngu ne, dhèu d'ara mola, tao j'ara-j'ara dhu be'a. Yusuf ne dhu tatae Ama Lamatua pad'elo, na, Nèngu nèd'u paredha Na. Yusuf kahèi ca dhèu nèti dhèu dhu uri lii langu agama Yahudi. Te ngaa nèngu d'èi boe dènge lii pama'ète huku madhe mi Yesus. 52 Lula na neo papuru ngi'u aae Yesus nèti aj'u palolo-palèbha, ka la'e asa gubernur Pilatus, manèngi sèna ka nèngu uri ngi'u aae Yesus. 53 Ka Pilatus d'èi, hèia Yusuf la'e papuru ngi'u aae Yesus. Èle ka na pahutu ngi'u aae dènge bèla alus. Ka ded'e rèti asa d'ara ro'a hadhu èci, dhu heka pae rare kèna. Ètu ro'a ne, padhane rèdhi mèka ca dhèu sa. 54 Mamadhe Yesus lèke dènge hari Jumat. Lod'o Yusuf si padhane rare Ne, lod'o nihia le. Ladhe lod'o cèna, d'ai lod'o sabaj'a dhèu Yahudi.
55 Ina-ina dhu mai palere dènge Yesus nèti Galilea, lasi madhutu Yusuf nèti limuri, sèna ka neo re'a era padhane Yesus ètu ro'a mia. 56 Ropa rèdhi era ne, ka ina se lèpa lasi sadia bunga dènge èi hèu mèngi. D'ai lod'o cèna, rèngu ae nèti sasab'a ra, madhutu atora lod'o a'ae sasab'a dhèu Yahudi. Rèngu mate èle ku lod'o sabaj'a, heka neo lasi tao bunga mi ngi'u aae Yesus kèna.l