19
Èle èèna ka, gubernur Pilatus pua sordad'u na lasi kalabhe Yesus pake gui.a 2-3 Aa sordad'u se'e rare kalai aj'u padhudhu kahèi, ho ènyu tao solo. Ka ra lalilu solo ne mi kètu Yesus, nuka sèmi rèngu neo ded'e dhèu aae hiu dhu pake solo dhèu aae. Aa te ngaa sasoa na, ra neo pahahe Ne di. Hèia ra papake Yesus kodho madhera èci dhu mea sanama mangèru, nuka sèmi dhèu aae biasa pake. Aa ra sasei Ne, peka na, “Tabea, dhèu aae Yahudi!” Sordad'u se tèb'e Ne g'ana-kariu kahèi.4 Ka gubernur la'e hari catèka peka dènge dhèu ae sèra, aku nèngu na, “Sèmi ne'e! Ja'a kèti Ne asa li'u hia miu. Te ngaa miu hud'i me'a ku, na, ja'a parisa kore le, te ngaa abhu boe sasala Na èci sa.” 5 Ropa rèti Yesus asa li'u, Nèngu dhu pake era solo padhudhu dènge kodho madhera dhu mea sanama mangèru. Hèia gubernur lii dènge dhèu ae se, peka na, “Ladhe ku, Dhèu ne.”
6 Ropa kètu agama dènge dhèu madhenga Èmu Kapua Manèngi-Mangaj'i sèra ladhe rèdhi Yesus, hèia ra pa'oo-parodha palere-lere, peka na, “Pamadhe Ne! Paku ètu aj'u palolo-palèbha!”
Te ngaa gubernur peka dènge ra, aku nèngu na, “Hud'i laa miu ka dhu mèti Ne, lami pamadhe Ne ètu aj'u palolo-palèbha. Te ja'a abhu boe sasala Na èci sa, dhu palèke dènge hahuku madhe.”
7 Dhèu Yahudi dhaa, aku rèngu na, “Ji'i dènge Atora nèti Ama Lamatua. Madhutu Atora ne, Dhèu ne hud'i madhe ku, lula Na ded'e iisi Na j'aj'i Ana Ama Lamatua.”
8 Ropa gubernur tadèngi lii padhai ra, hèia asa na madha'u. 9 Ka la'e hari asa d'ara benteng, hèia na karèi Yesus, peka na, “Èu ne, dhèu mia?” Te ngaa Yesus bhoka boe hèb'a.
10 Ka gubernur jèke Yesus, peka na, “Eeh! Nga tao ka Èu b'ala boe ja'a? Èu dhu me'a, si? Ja'a ne, dènge koasa pamadhe Èu, do, patabuli Èu.”
11 Hèia Yesus b'ala, peka na, “Sèmi ne'e, ama. Ladhe ama dhu dènge koasa sèmi èèna, na, lula ama abhu koasa nèti Ama Lamatua ètu sorga. Te dhodhoka Nèngu di dhu hia ama koasa èèna, sèna ka tao ngaa èci sa hia mi Ja'a ne. Te ngaa dhèu dhu saraka Ja'a asa ama, rèngu sèra ka dhu pasae sasala bia risi.”
12 Karèi nèti èèna ka, gubernur tenge j'ara ho patabuli Yesus. Te ngaa dhèu Yahudi se pa'oo palere-lere, aku rèngu na, “Ladhe ama patabuli Dhèu ne, tatu ama dhu pa'angalai boe dènge dhèu aae kapai, Keser. Te dhèu dhu ded'e ngi'u na j'aj'i dhèu aae, nèngu èèna lab'a Keser.”
13 Ka ropa gubernur tadèngi lii padhai dhèu se, hèia na pua rèti Yesus asa li'u. Ka gubernur madhèdi ètu kadera pama'ète lii, ètu era èci dhu ra pangare na, “Tana Lapang nèti Hadhu Kabela”. (Madhutu lii Aram, ngara na Gabata.)
14 Lod'o èèna, lèke dènge Lod'o Sadia Kalela Paska. Pe d'ara lod'o titu mera sa, gubernur peka dènge dhèu Yahudi sèra, aku nèngu na, “Ladhe ku laa! Nèngu ne, dhèu aae miu!”
15 Te ngaa rèngu asa hoe pa'oo-parodha peka na, “Mèti Ne, asa li'u mai! Pamadhe Ne! Paku Ne asa aj'u palolo-palèbha!”
Hèia gubernur papane si, peka na, “De tasamia? Miu d'èi, ladhe ja'a pamadhe dhèu aae miu ne, do?”
Ka kètu agama Yahudi se b'ala, peka na, “Dhèu aae ji'i dhodhoka ca dhèu di, nuka Keser! Dhèu leo aad'o!” 16a Hèia gubernur hia Yesus asa sordad'u sèra, sèna ka ra paku pamadhe Ne ètu aj'u palolo-palèbha.
Ra paku Lamatua Yesus ètu aj'u palolo-palèbha
16b Hèia sordad'u se sèmi rare Yesus. 17 Ka Yesus pasae aj'u palolo-palèbha Na la'e asa li'u kota. Lasi asa era èci dhu ngara na, “Era Rui Kètu”. (Madhutu lii Aram, era ne ngara na, Golgota.)
18 D'ai era èèna, ra paku Yesus ètu aj'u palolo-palèbha èci. Dhèu se paku kahèi dhèu leo dhèu dua. Èci re sebhe g'ana, aa ca dhèu hari re sebhe kariu Yesus. Ka Yesus ètu talora rèngu dua ra. 19 Ka gubernur paredha sordad'u na sèra, suri ètu papa èci, ho paku re dedha kètu Yesus. Ètu papa ne ra suri, peka na,
“Yesus, dhèu Nasaret. Nèngu ne, Dhèu Aae dhèu Yahudi”
20 Rèngu suri ètu papa ne pake tèlu lii, nuka: lii Aram, lii Yunani, dènge lii Latin. Dhèu Yahudi ae ka dhu baca sasuri ne, lula era mamadhe Yesus ne, padètu dènge kota Yerusalem. 21 Te ngaa kètu agama Yahudi sèra ro'o boe. Ka lasi peka dènge gubernur, aku rèngu na, “Ama! Baku suri ‘Dhèu Aae nèti dhèu Yahudi’! Be'a risi suri laa peka na, ‘Dhèu ne peka na, nèngu dhèu aae nèti dhèu Yahudi.”’
22 Te ngaa gubernur dhaa, aku nèngu na, “Ja'a ka dhu pua si suri sèmi èèna. De hud'i ka laa!”
23 Ropa sordad'u paku rare Yesus ètu aj'u palolo-palèbha, hèia ra pabagi mèdha-papake Na mi èpa pala. Ca dhèu sordad'u abhu ca pala. Hèia rare kodho li'u Na, dhu j'au boe, dhu manènu kateme nèti dedha. 24 Ka ra papeka, aku rèngu na, “Èdhi baku ciu eele kodho Na. Be'a risi ère lot, sèna ka te'a, na, cee ka dhu abhu.” Èèna j'aj'i madhutu sèmi dhu suri tèke ètu d'ara Sasuri Ama Lamatua, dhu peka na,
“Rèngu pabagi mèdha-papake ja'a,
ka ra ère lot ho abhu kodho ja'a.”
Hèia sordad'u se tao madhutu sèmi èèna ka.b
Lamatua Yesus pua Yohanis ladhe-leru ina Na
25 Ètu era ne'e, abhu kahèi dhèu bhèni pèri-pèri dhu titu. Rèngu se, nuka: ina Yesus, ina iiki Yesus, Maria dhèu èmu Klopas, dènge Maria nèti rae Magdala. 26 Yesus ladhe nèdhi ina Na dhu titu ètu èèna, sama-sama dènge ja'a, Yohanis, nuka ana madhutu dhu Nèngu sue. Ka Yesus lii dènge ina Na, aku Nèngu na, “Ina. Nèngu ne, ana mu.”
27 Hèia Yesus lii dènge ja'a, peka na, “Yohanis. Nèti deo ne'e, tao laa nèngu sèmi ina èu!” Ka karèi nèti lod'o èèna, ina Yesus pea dènge ja'a.
Mamadhe Lamatua Yesus
28 Èle èèna ka, Yesus ne'a le, na, Nèngu sab'a nare aa'i le sasab'a-la'a Na. Se'e se pamèci dènge aa'i-aa'i dhu suri ètu d'ara Sasuri Mola-Mèci Ama Lamatua karèi nèti uru ka. Hèia Yesus peka, na, “Ja'a koko-kamango.”c
29 Ètu era ne'e abhu èi anggor manyilu ètu d'ara g'ala iiki cue. Ka sordad'u sèra rare ula ho cèb'u asa èi anggor, hèia èkid mi suu aj'u ca laa, ka j'ole asa hèb'a Na. 30 Ropa Yesus camuci nare, hèia Na lii, aku Nèngu na, “Èle kèna.” Hèia kètu Na loe, ka ma'ète a'ae.
Sordad'u kèj'i Yesus ètu aj'u palolo-palèbha
31 Lod'o èèna lèke hari Jumat. Madhutu atora agama, dhèu Yahudi hud'i sadia mema d'ara lod'o èèna, sèna ka bèli èèna rèngu soru lod'o sabaj'a ra. Nèti èèna ka, ro'o boe tèke eele ngi'u aae dhèu madhe, kadhoe tèke ètu aj'u palolo-palèbha lèke dènge lod'o sabaj'a. Te lod'o sabaj'a èèna, lod'o be'a. De ama-ama dhèu Yahudi manèngi gubernur, sèna ka pua dhèu lasi hake papadhe haga dhèu ètu aj'u palolo-palèbha. Dènge j'ara sèmi ne'e, rèngu madhe malai, ho dhèu bisa papuru ngi'u aae ra nèti aj'u palolo-palèbha ako lod'o aae era. 32 Hèia sordad'u se lasi asa era èèna. Ka ra hake papadhe uru haga dhèu dua sèra, dhu paku sama-sama dènge Yesus. 33 Te ngaa ropa ra d'ai Yesus, rèdhi, na, Yesus dhu madhe le. Nèti èèna ka, rèngu hake papadhe boe haga Na. 34 Te ngaa sordad'u ca dhèu nare kapoke na, hèia kèj'i d'ara karasa Yesus. Ka raa kalua, aa èi kalua kahèi.
35 (Ja'a ne'e ka dhu ladhe kèdhi dènge musi madha ku. Ja'a kèdhi aa'i, aa dhu ja'a suri ne lèke tare'a-re'a. Te ja'a ke'a mèu ngaa dhu ja'a lolo ne lèke mola-mola, sèna ka miu bisa parcaya lii padhai ja'a.) 36 J'ara se'e aa'i-aa'i j'aj'i, lula Sasuri Ama Lamatua dhu suri, na, “Rui Na ca laa sa, padhe boe.”e 37 Ètu era leo d'ara Sasuri Mola-Mèci ne, suri kahèi, peka na, “Èèna rèngu ladhe rèdhi dhèu dhu ra kèj'i ne.”f
Ra padhane Lamatua Yesus
38 Abhu dhèu èci ngara na Yusuf, nèti rae Arimatea. Nèngu ana madhutu Yesus kahèi. Te ngaa na madhutu pahuni-pahuni, lula madha'u dènge ama-ama dhèu Yahudi. Yusuf la'e asa gubernur Pilatus, manèngi ijin sèna ka bisa nèti ngi'u aae Yesus. Gubernur d'èi kahèi. Ka Yusuf la'e papuru ngi'u aae Yesus, hèia ded'e nèti. 39 Nikodemus la'e sama-sama dènge Yusuf kahèi. Nikodemus ne'e ka dhu uru èèna la'e paraga dènge Yesus re mèda. Na hèli rampe ae titu kèna, pe d'ai tèlu nguru tèlu kilo sa, sèna ka tao mi ngi'u aae Yesus.g 40 Hèia ra hèlu ngi'u aae Yesus dènge bèla halus. Ladhe hèlu ca tèka, ra tao rampe la'a. Rèngu tao sèmi ne'e, madhutu ad'a dhèu Yahudi ladhe padhane dhèu madhe.
41 Kaj'èu boe nèti era Yesus madhe ne, abhu oka bunga cue. Ètu d'ara oka ne, dhèu heka pae rare ro'a dhèu madhe kèna. Ra padhane rèdhi mèka dhèu èci sa ètu d'ara ro'a èèna. 42 Lod'o èèna, lod'o sadia dhèu Yahudi ho soru lod'o sabaj'a ra, oe èle kèna. Nèti èèna ka, dhèu se tèke ngi'u aae Yesus ètu d'ara ro'a èèna, te era èèna kaj'èu boe.