Tèke eele tatao dhu bhelu, ho madhutu dad'èi Lamatua
13
Lod'o èèna, dhèu mai peka dènge Yesus, na, gubernur Pilatus pamadhe le dhèu Yahudi pèri-pèri nèti Galilea, lod'o dhu mai asa Yerusalem, rèti korban asa Èmu Kapua Manèngi-Mangaj'i. 2 Ropa tadèngi nare, ka Yesus karèi si, “Madhutu miu, na, tasamia? Dhèu dhu ra pamadhe sèra, sasala ra kapai risi nèti dhèu Galilea dhu leo aa'i-aa'i ra, do? Nèti èèna ka, ra huku pamadhe si, do? 3 Aad'o! Te ngaa ladhe miu tèke eele boe mamuri miu dhu bhelu, ho lèpa madhutu dad'èi Lamatua, lod'o limuri miu laho nuka sèmi rèngu kahèi. 4 Aa tasa mera mia hari dènge canguru aru dhèu dhu madhe ca hari ni, ropa ètu Siloam manara guri, hèia kabhie nare si, èèna? Sasala si ae risi nèti dhèu aa'i-aa'i ètu Yerusalem, do? 5 Aad'o! Te ngaa ladhe miu tèke eele boe mamuri miu dhu bhelu, ho lèpa asa j'ara Lamatua dhu mola, miu èèna na laho sèmi rèngu kahèi.”Aj'u dhu hua boe, nuka sèmi dhèu unu Lamatua dhu tao nare boe dhu be'a
6 Hèia Yesus peka lii pakasame èci, na, “Abhu ca dhèu dhu dènge ana aaj'ua ètu d'ara oka na. Bèli-bèli, na la'e patigi, teko-teko ana aaj'u ne hua le, do dhae. Te ngaa ana aaj'u ne dhae hua mèka. 7 Ka na pua dhèu sab'a ètu d'ara oka, aku nèngu na, ‘Tèlu tèu kèna, ja'a laku-mai ho ladhe ana aaj'u ne hua le, do dhae, te ngaa ja'a abhu boe ngaa-ngaa. De patue eele ne, te nèngu ne dhoka na'e era di.’
8 Te ngaa dhèu sab'a ne dhaa, peka na, ‘Ama baku pasori ku. Hud'i nèbhu hari ku ciki laa d'ai ca tèu sa. Pe ja'a kakèi rai reo kapua na, sèna ka tao pupuk, ho na sega. 9 Ladhe d'ai tèu mai nèi, aj'u ne hua, na be'a. Ladhe aad'o, la'a sina ma, patue eele ka laa.”’
Lamatua Yesus puri-pa'èle dhèu bhèni èci dhu kabodho kapo'o, lèke dènge lod'o sabaj'a
10 Ca tèka, lèke dènge lod'o sabaj'a dhèu Yahudi, Yesus la'e aj'a dhèu ètu d'ara èmu sabaj'a. 11 Ètu ne'e abhu bhèni ca dhèu dhu kabodho kapo'o canguru aru tèu kèna, lula nidhu tao ne. Bhèni ne bisa boe pamola kabodho na. 12 Ropa Yesus ladhe nèdhi, hèia Na paroa ne, aku Nèngu na, “Ina! Lamatua patalale le j'aj'èra nèti èu.” 13 Ka Yesus tao ai mi bhèni ne. Kaca'a laa, kabodho bhèni ne mola dènge kahèi. Hèia bhèni ne manèngi makasi, aa koa-kio kolongara Ama Lamatua.
14 Te ngaa kapala èmu sabaj'a ne nasa, lula Yesus puri-pa'èle dhèu lèke dènge lod'o sabaj'a. Ka na peka dènge dhèu ae sèra, aku nèngu na, “D'ara ca migu, dhèu sab'a èna lod'o. De be'a risi dhèu pèd'a mai lèke dènge lod'o-lod'o sab'a sèra, sèna ka tenge dhèu puri-pa'èle si. Baku mai lèke dènge lod'o sabaj'a!”b
15 Te ngaa Yesus b'ala ne, “Heeh! Dhèu kapod'e-kabèli! Ètu d'ara lod'o sabaj'a, miu sab'a kahèi, si? Te miu lami patabuli sapi dènge keled'ei miu, sèna ka hia ra'a-rinu, si? 16 Bhèni ne, ana-èpu Abraham sama sèmi èdhi. Dhèu aae nidhu paj'èra ne canguru aru tèu kèna. Ladhe Ja'a patabuli ne nèti nidhu, lèke dènge lod'o manèngi-mangaj'i, na èèna sala, do?”
17 Ropa tadèngi rare sèmi èèna, ka musu Yesus sèra makae. Te ngaa dhèu ae dhu leo sèra karej'e, lula sasab'a Na sèra be'a titu kèna.
Lamatua Yesus peka lii upama lula-nèti aj'u dhu lamusi na ana iiki-iiki
18 Ka Yesus peka hari, na, “Ja'a pasoro dhèu-dhèu Lamatua sèmi ngaa hari? 19 Hiu-hiu èèna rèngu ciki di, te ngaa nèbhu-nèbhu ka rèngu asa tabha ae. Rèngu sèmi aj'u dhu lamusi na ana iiki-iiki. Dhèu sèle ne ètu d'ara oka. Ka muri mai, hèia j'aj'i ana aaj'u dhu kapai aae. Èèna ka manu-bhui mai tao rèd'a ètu dadana na sèra.”
Lamatua Yesus peka lii pakasame nèti ragi
20 Hèia Yesus padhai lii hari, peka na, “Ja'a pasoro dhèu unu Lamatua sèmi ngaa hari? 21 Nèngu ne nuka sèmi ragi dhu dhèu bhèni nare, ho na pab'ali dènge tarigu dua saku,c sèna ka tao roti pa'ae. Lula ragi dhu ciki oo'e èèna, pab'ali dènge tarigu ae-ae, hèia ca'e aa'i. Dhèu unu Lamatua pangaru ra asa tabha kapai sèmi èèna kahèi.”
Babèdho sorga kob'o iiki
22 Èle ka, Yesus si mulai kako lasi asa kota Yerusalem. Rèngu kako, lasi dhuli kota-kota dènge rae-rae, ho Na aj'a dhèu. 23 D'ai era èci, ka ca dhèu karèi Ne, “Ama Mese! Ele boe dhèu ciki di, dhu abhu sod'a, do?”
24 Ka Yesus b'ala, aku Nèngu na, “Hèb'a maso asa sorga èèna, kob'o. De tenge j'ara paie-iie, sèna ka miu bisa maso re èèna. Te abhu dhèu ae dhu sèku neo maso, te ngaa bisa boe. 25 Ladhe lamatua èmu patèke le babèdho, èèna na miu titu ètu li'u, ho kad'eu babèdho, dènge pa'oo manèngi, peka na, ‘Ama! Bhoke ku laa!’
Te ngaa na b'ala, aku nèngu na, ‘Miu sèra, cee? Ja'a tadhe boe miu!’
26 Hèia miu peka hari, na, ‘Nga tao ka ama tadhe boe ji'i? Ji'i se ka dhu tema madhèdi nga'a-nginu dènge ama. Aa ama kahèi dhu tema aj'a-nori ji'i ètu j'ara oka-hoo ji'i.’
27 Hèia na peka, aku nèngu na, ‘Deo na ja'a dhu peka le, na, ja'a tadhe boe miu! Miu se, dhèu dhu tema ad'u-ue bhabhelu di. De pakaj'èu nèti ne'e ne!’d
28 Ladhe d'ai lod'o Ama Lamatua pama'ète lii langu dhèu aa'i-aa'i ètu rai-haha ne, miu tangi roma iisi dènge kadhi ngutu lii kico-kico. Te miu ladhe mèdhi baki Abraham, Isak dènge Yakob, dènge dhèu aa'i-aa'i dhu rèti lii padhai Ama Lamatua, madhèdi le ètu sorga. Te ngaa miu lèke babège asa li'u.e 29 Pe dhèu mai nèti suu-suu rai-haha ne, nèti dhimu, nèti haa; nèti badae, nèti balèu, ho aa'i-aa'i ra madhèdi pa'èci, ra'a-rinu rame-rame ètu d'ara èmu Ama Lamatua.f 30 Patadhe pabe'a-be'a j'ara ne'e: ladhe d'ai ka lod'o Lamatua pama'ète lii langu dhèu aa'i-aa'i ètu rai-haha ne, abhu dhèu dhu uru èèna, pangee, na, nèngu ana iiki d'ai seli, aa te ngaa nèngu kab'ua titu kèna. Aa abhu dhu uru èèna peka, na, nèngu dhèu kapai, te ngaa ètu madha Lamatua, nèngu dhoka ana iiki di.”g
Lamatua Yesus rasa kasia dènge isi kabarai kota Yerusalem
31 Lod'o èèna, abhu dhèu Parisi pèri-pèri, mai paraga dènge Yesus, ka ra peka, na, “Hua iia Ama Mese pakaj'èu nèti era ne'e, te dhèu aae Herodes neo pamadhe Ama.”
32-33 Ka Yesus dhaa, aku Nèngu na, “Herodes ne, cakaraa badha dhu d'èlu-mèu kapod'e-kabèli. Lami peka dènge nèngu, na, Ja'a bata eele nidhu dènge pa'èle dhèu nèti papèd'a-tarègu ra, deo ne'e ne dènge bèli. Camèd'a ku, sasab'a Ja'a ne heka èle kèna. Masi ka tasa mera mia èèna ka, nèti kakako Ja'a asa Yerusalem ne, Ja'a neo sab'a hari ku ciki. Te dhèu Yerusalem sèra, dhu d'èi pamadhe dhèu rèti lii padhai Ama Lamatua.
34 Waa, dhèu kabarai Yerusalem, ee! Miu dhu loe boe pamadhe dhèu rèti lii padhai Ama Lamatua, aa pèci pamadhe dhèu pajuu-paleha sèra dhu mai pad'elo j'ara hia miu. Pèri-pèri hari le, Ja'a neo kaboko miu ho bhiri mi nèti bhelu-katub'a, nuka sèmi manu rena dhu sarimu nare ana na ètu d'ara èla na. Te ngaa miu mo'o boe. 35 Limuri ne, Lamatua pusi-pahae heka èmu manèngi-mangaj'i miu. Bèli-camèd'a nèngu j'aj'i èmu pa'ela. Èèna na, miu mèdhi heka Ja'a, toke miu dhaa, na,
‘Ama Lamatua hia mèngi-nale mi dhèu dhu mai nèti kolongara Ama Lamatua,
lula Ama Lamatua ka dhu hia Na mai!”’h