3 Hèia Yesus la'e madhèdi asa ledhe Saitun. Ka ana madhutu Na mai padhai lii mesa ra dènge Ne, peka na, “Ama! Peka hari ku laa, lii padhai Ama deo na. J'aj'aj'i na pèri lod'o? Mamai hari Ama na lod'o mia? Aa tadha-tadha na tasamia? Tasamia kahèi dènge lod'o èle rai-haha?”

4 Ka Yesus dhaa, peka na, “J'aga paie mamuri miu, sèna ka dhèu baku kapod'e-kabèli miu. 5 Te bèli-camèd'a dhèu ae mai tèb'a kakara, peka na, ‘Ja'a ne, Kristus, Dhèu dhu Ama Lamatua padhadha karèi nèti uru ka.’ Dènge j'ara ne, rèngu monya dhèu ae. 6 Ladhe miu mèdhi ka, dhèu pamusu, do, tadèngi lii palolo dhèu papara-pakèj'i ètu mia-mia, na, miu baku madha'u kahèi. Te j'ara se'e se, hud'i j'aj'i uuru ku, te ngaa lod'o èle rai-haha ne dhae d'ai mèka. 7 Dhèu nèti ca suku, èèna na pamusu dènge suku leo. Negara èci pamusu, lab'a negara leo. Ètu mia-mia abhu rai opo, aa manganga-mad'èu dhu kapai titu kèna. 8 Te ngaa sèra sa, heka tadha partama kèna, dhu peka na, lod'o èle rai-haha dètu ae le. Èèna nuka sèmi bhèni dhu mulai kabake pèd'a neo nara iisi.

9 De miu hud'i j'aga paie ku ngi'u miu! Te bèli-camèd'a dhèu mai paj'èra dènge pamadhe miu. Aa dhèu nèti suku aa'i-aa'i, èèna na d'èi boe miu, lula miu madhutu Ja'a.^a 10 Taa èèna, dhèu ae ka dhu soro kabodho dènge ro'o heka madhutu Ja'a. Rèngu panasa èci dènge èci, aa èci pahie èci. 11 Èèna na abhu dhèu dhu tema leko-monya se, peka na, rèngu dhèu rèti lii padhai Lamatua. Ka dhèu ae ka dhu lèka si. 12 Bèli-camèd'a bhabhelu dhèu asa tabha, toke dhèu re'a heka pasue èci dènge èci. 13 Te ngaa dhèu dhu taha taruu toke madhe, tatu Ama Lamatua pala hia ne mamuri.^b 14 Te dhèu hud'i palolo pale-lème ku Lii Lolo Be'a Ama Lamatua, toke suu-suu rai d'ai ro'a kakilu ètu rai-haha ne, sèna ka dhèu aa'i-aa'i re'a mèu j'ara mamuri Lamatua. Èle èèna ku, rai-haha ne heka èle kèna.”

15 Yesus padhai lii hari, aku Nèngu na, “Daniel, ca dhèu nèti dhèu rèti lii padhai Ama Lamatua, dhu suri tèke le, peka na, bèli-camèd'a dhèu èci dhu bhelu-katub'a risi eele mai. Èèna na maso titu ètu era laluri ètu d'ara Èmu Kapua Manèngi-Mangaj'i Ama Lamatua. Dènge j'ara ne, nèngu pahera eele era ne'e. Nèti èèna ka, Ama Lamatua soro kabodho tèke eele era ne'e. De ropa miu mèdhi ka sèmi èèna, na mi pajiko paie-iie ka! (Dhèu cee dhu baca sasuri ne'e hud'i pajiko paie-iie ku!)^c 16 Te ne'e ne j'aj'i tadha dhu peka na, lod'o-lod'o j'aj'èra dètu ae le. Ropa mèdhi ka sèmi èèna, dhèu ètu propensi Yudea, rai ka asa ledhe. 17 Ladhe abhu dhèu dhu kalua nèti d'ara èmu le, na maso ia ka mere mèdha-panyau. Te ngaa rai dènge ka, sèna ka baku lèke mamadhe-mamopo. 18 Dhèu ètu d'ara oka, lèpa ia ka mere mèdha-papake mi. Te ngaa rai dènge ka!^d 19 Dhu j'èra risi ka, ina dhu dènge babia, aa ina-ina dhu pasusu ana dhu heka rara iisi hiu sèra. Te rèngu se bisa boe rai pamèri. 20 De hua iia miu sabaj'a, manèngi sèna ka lod'o j'aj'èra èèna mage lèke dènge hèru èj'i lai, do, lod'o ae sasab'a. 21 Te lod'o èèna j'èra titu kèna! Karèi nèti Ama Lamatua paj'aj'i rai-haha ne, toke d'ai sange ne'e ne, dhèu dhae ladhe rèdhi mèka j'aj'èra dhu kapai sèmi èèna na. Aa èèna na, dhèu paraga heka dènge j'aj'èra dhu sèmi èèna.^e 22 Te ngaa miu oto kapai, te Ama Lamatua pab'ab'e lod'o èèna. Ladhe aad'o, na, abhu boe ca dhèu sa dhu bisa taha mamuri. Te ngaa, lula Ama Lamatua sue dhèu unu Na dhu hag'e nare sèra, nèti èèna ka Na pab'ab'e lod'o j'aj'èra sèra.

23 Ladhe lod'o èèna d'ai ka, miu tadèngi dhèu, peka na, ‘Ladhe ku la! Kristus ka ne'e!’ Aa dhèu leo peka na, ‘Kristus ka nèi!’ Te ngaa baku miu parcaya! 24 Te èèna na, abhu dhèu mai tèb'a kakara, peka na, ‘Ja'a ne, Kristus!’ Aa dhèu leo peka na, ‘Ja'a ne, dhèu kèti lii padhai Ama Lamatua.’ Èèna na rèngu tao tadha malaa rupa-rupa, pake koasa nidhu, sèna ka kapod'e-kabèli dhèu. Dhèu se tenge j'ara ho dhèu unu Ama Lamatua sèra lèke tipu kahèi! 25 De miu hud'i j'aga paie-iie mamuri miu! Lod'o-lod'o j'aj'èra se, dhae d'ai mèka, te ngaa Ja'a pasanèd'e mema le miu!

26 Ladhe dhèu peka dènge miu, na, ‘Kristus ètu le d'ara tana lapa nèi!’, na baku lami kahèi. Aa ladhe abhu dhu peka na, ‘Kristus nuka ètu d'ara èmu!’, na, baku miu parcaya kahèi. 27 Te Ja'a ne, Dhèu Rai-haha Tare'a-re'a. Bèli-camèd'a ladhe Ja'a mai hari asa rai-haha ne, dhèu aa'i-aa'i ladhe rèdhi Ja'a, nuka sèmi dhèu ladhe rèdhi bela kaha'a nèti dhimu asa haa.^f

28 Ladhe Ja'a lèpa hari mai, pe miu me'a Ja'a ètu era mia. Nuka sèmi dhèu re'a na, ladhe dhèu rèdhi manu-bhui dhu tema ra'a sisi badha madhe, ra lela pa'oru ètu mia, na ra re'a èèna j'aj'i mi tadha, na, tatu abhu sisi hèu ètu era èèna.”^g

29 Èle èèna ka, Yesus tuhu hari lii padhai Na, ho peka dènge ana madhutu Na sèra, aku Nèngu na, “Ladhe oe èle ka lod'o j'aj'èra sèra,

30 Ka dhèu aa'i-aa'i ladhe rèdhi kahèi tadha ètu dedha-liru, dhu pad'elo, peka na, Dhèu Rai-haha Tare'a-re'a neo mai hari kèna. Ropa rèdhi sèmi èèna, hèia suku aa'i-aa'i ètu rai-haha ne j'aj'i madha'u toke ra tangi. Te bèli-camèd'a Ja'a puru mai dènge ra'i-liru, heka rèngu ladhe rèdhi koasa dènge dadedha Ja'a kèna.ⁱ 31 Ka Ja'a pake lii tèbhe dhu mèdhu ho pua ana-ana pajuu Ama Lamatua nèti sorga, sèna ka pakaboko rare dhèu aa'i-aa'i dhu Ja'a kabhili kore le, nèti suu-suu rai-haha, nèti haa toke dhimu, nèti badae toke balèu.”

32 “Ja'a pakasame sèmi aj'u ca kapua. Ladhe rèu na mulai karara, tadha na, oe dètu hèru hadhu kèna. 33 Sèmi èèna kahèi, ladhe miu mèdhi ka d'ai lod'o-lod'o j'aj'èra, nuka sèmi dhu Ja'a peka-padhai deo na, èèna tadha, na, mamai Ja'a dhu dètu iiki le. 34 Nanene paie-iie! Nèti dhèu aa'i-aa'i dhu mamuri loo-limuri ne, èèna na abhu cahag'e dhu dhae madhe mèka, te lod'o j'aj'èra se dhu j'aj'i le. 35 Masi ka liru dènge rai-haha ne ele, te ngaa lii padhai Ja'a ne ca lamusi sa bisa boe ele.”

36 “Ca dhèu sa re'a boe pèri lod'o Ja'a mai hari. Ana pajuu Ama Lamatua ètu sorga re'a boe kahèi. Ja'a mesa ku ke'a boe kahèi. Dhodhoka Ama Ku mesa Na dhu ne'a. 37 Te Ja'a ne, Dhèu Rai-haha Tare'a-re'a. Bèli-camèd'a ropa Ja'a mai hari, nuka sèmi taa uru sèra, lod'o Noh mamuri era.^j 38 Èi aae dhae j'aj'i mèka lala, te ngaa dhèu-dhèu dhu ra'a-rinu, aa paleo èmu sèmi biasa. Dhèu sèra tao taruu sèmi èèna, toke Noh maso asa d'ara kapa aae èèna. 39 Te ngaa ropa èi aae lala, hae nèti aa'i si, rèngu heka kabèdhi kèna, lula ngaa dhu j'aj'i sèra. Èci èèna ka dènge mamai Ja'a bèli-camèd'a.^k 40 Lod'o èèna, ladhe abhu dhèu dua ètu d'ara oka, cag'ag'a laa Ama Lamatua ded'e nèti ca dhèu, aa ca dhèu hari tèke eele. 41 Ladhe dhèu bhèni dhèu dua dhu maj'u are, kaca'a la Ama Lamatua ded'e nèti ca dhèu, aa ca dhèu hari tèke eele.

42 Nèti èèna ka, miu hud'i bori pa'èra mema kahèi, te miu me'a boe pèri lod'o Lamatua miu lèpa hari mai. 43 Pangee paie-iie! Ladhe lamatua èmu dhu ne'a mema, na, mèda none dhèu mana'u mai, tatu na pasaruru boe musi madha na, sèna ka dhèu mana'u baku maso asa d'ara èmu. 44 Nèti èèna ka, miu hud'i pa'èra mema kahèi. Te mamai hari Ja'a èèna, dènge sahèka!”^l

45 Ka Yesus tuhu hari lii padhai Na, peka na, “Miu hud'i j'aj'i ku nuka sèmi dhèu sab'a dhu madhutu dhodhoka dad'èi lamatua na. Te ladhe lamatua na neo la'e rai kaj'èu, na ded'e dhèu sab'a dhu sèmi èèna ku, ho uri nganga'a-nganginu hia isi èmu na. 46 Ladhe lamatua na lèpa, ladhe nèdhi dhèu sab'a na dhu sab'e dènge be'a, tatu na karej'e. 47 Parcaya la Ja'a, te bèli-camèd'a lamatua èmu hia dhèu sab'a ne koasa, sèna ka ladhe-leru mèdha-panyau na aa'i-aa'i.

48 Te ngaa ladhe dhèu sab'a ne, dhèu bhelu, tatu na ngee ètu d'ara na, 49 ‘Be'a kèna! Lamatua ja'a la'e le, de cee ne'a na pèri lod'o lèpa hari mai!’ Nèti ngangee sèmi ne'e ne, hèia na kalabhe dhèu sab'a leo sèra. Aa nèngu madhèdi na'a-ninu mau-mau bera-bera dènge dhèu mahu sèra. 50 Te ngaa dhu ne'a nare boe, na, cag'ag'a laa lamatua na lèpa hari mai. 51 Hèia lamatua na capa paj'èra ne, ka core ne asa li'u, sèna ka na pa'èci dènge dhèu padhai lii leo, tao leo sèra. Ètu era ne'e, dhèu aa'i-aa'i ra tangi d'ara pèd'a, lula ra j'èra d'ai seli.”