Lamatua Yesus hia lii upama lula-nèti dhèu dhu ro'o boe lasi pesta kab'i
22
Ka Yesus padhai lii hari dènge rèngu pake lii upama, aku Nèngu na, 2 “Paredha Ama Lamatua èèna, nuka sèmi dhèu aae ca dhèu dhu tao pesta kab'i ana mone na. 3 Ropa dhèu pananasu rare, hèia na pua dhèu sab'a na, sèna ka lasi peka dhèu-dhèu dhu abhu nèru, ra peka na, ‘Mai ka, te d'ai tadha ta'a-tinu kèna.’ Te ngaa dhèu dhu abhu nèru se ro'o boe mai.4 Hèia dhèu sab'a se lèpa, lasi peka dènge dhèu aae. Ropa na tadèngi, hèia dhèu aae pua dhèu sab'a na dhu leo hari, aku nèngu na, ‘Lami peka hari dènge dhèu sèra ho mai ka, te pesta neo mulai kèna. Ja'a para sapi, ka pananasu kore le dhu be'a titu kèna. Peka si mai ka, ra'a-rinu, te aa'i-aa'i tesa le.’ 5 Dhèu sab'a se lasi peka sèmi dhu dhèu aae moa èèna. Te ngaa dhèu dhu lèke nèru se, pusi-pahae boe. Abhu dhu lasi ladhe oka ra, abhu dhu lasi era sasab'a ra, 6 aa cahag'e hari ra kèpe rare dhèu sab'a se nèti dhèu aae ne, ho ra game toke madhe.
7 Ropa na tadèngi, hèia dhèu aae nasa bia. Ka na paredha sordad'u na, lasi pamadhe aa'i dhèu-dhèu dhu pamadhe dhèu sab'a na sèra. Hèia sordad'u se tunu pakèpu-ladhu ai kota ne toke mera dènge rai.
8 Èle, ka dhèu aae paroa nare dhèu sab'a dhu leo sèra, ka na peka, ‘Pesta kab'i ne tesa aa'i le, te ngaa dhèu-dhèu dhu ja'a nèru, nia boe madhèdi ètu d'ara pesta ja'a. 9 De lami ka asa j'ara oka-hoo, sèna ka nèru cee dhu sad'i miu paraga.’ 10 Ka dhèu sab'a se lasi asa j'ara oka-hoo. Hèia rèti mai dhèu ae-ae dhu ra paraga ètu j'ara, sèna ka ra'a-rinu ètu pesta kab'i ne. Dhèu se'e, nuka dhèu dhu be'a dènge dhèu dhu bhelu-katub'a, mai papènu ètu era kakab'i ne.
11 Ka dhèu aae la'e asa era pesta ne ladhe palème tamu sèra. Hèia ladhe nèdhi tamu ca dhèu dhu pake boe mèdha-papake pesta.a 12 Ka dhèu aae karèi ne, peka na, ‘Hee, angalai! Èu nga tao ka mai asa ne'e pake boe mèdha-papake pesta?’ Te ngaa dhèu ne loo-loo sène. 13 Hèia dhèu aae paredha dhèu-dhèu sab'a na, aku nèngu na, ‘Uj'u haga dènge ai dhèu ne'e ne, ho core ne asa li'u la'e. Hud'i laa na tangi dènge abhu j'èra ètu era dhu maroga kiu-kiu nèi.’b
14 Sèmi èèna kahèi, Ama Lamatua paroa dhèu ae, te ngaa dhodhoka dhu ciki di dhu kabhili nare j'aj'i dhèu unu Na.”
Lamatua Yesus padhai lii lula-nèti j'ara b'ae bea mi dhèu paredha
15 Ropa tadèngi rare lii padhai Yesus, hèia dhèu-dhèu Parisi rare lii èci ho neo pamanahu aa galaa Ne. 16 Ka dhèu se pua dhèu rèngu palere-lere dènge dhèu-dhèu nèti partei politik Herodes, sèna ka lasi pakarèi dènge Yesus. Dhèu se koa-kad'iri Yesus, peka na, “Ama Mese! Ji'i nge'a d'ara Ama mola. Ama dhu me'a boe kapod'e-kabèli, aa dhu ladhe boe rèhu dhèu. Ama dhu tema aj'a-nori Lii Holo-Nori Ama Lamatua dènge boe koe-kapengo. 17 Mamai ji'i ne, neo karèi j'ara èci. Madhutu atora agama Yahudi, èdhi bisa b'ae bea mi dhèu aae kapai Roma, do aad'o?”
18 Te ngaa Yesus ne'a mema, na, rèngu neo madulu d'ara Na, sèna ka Nèngu padhai lii lab'a dhèu paredha Roma. Hèia Yesus dhaa, aku Nèngu na, “Miu mema dhèu ho'a tema! Tasamia ka miu neo pamanahu Ja'a dènge j'ara ne'e? 19 Pad'elo sèku Ja'a doi iia cue, dhu dhèu pake ho b'ae bea!” Hèia ra pad'elo doi iia ne mi Yesus.
20 Ka Na karèi si, “Ne'e ne, rèhu cee? Aa ne'e ne, ngara cee?”
21 Ra dhaa, aku rèngu na, “Èèna keser, dhèu aae kapai paredha Roma.”
Hèia Yesus peka dènge ra, na, “Ladhe sèmi èèna hia la mi dhèu paredha ngaa dhu j'aj'i hak dhèu paredha. Aa hia la mi Ama Lamatua ngaa dhu j'aj'i hak Ama Lamatua.”
22 Ropa ra tadèngi hèia rèngu aa'i-aa'i malaa, lula ngaa dhu Na peka sèra lèke tare'a-re'a. Nèti èèna ka, rèngu bisa boe abhu j'ara ho pamanahu Yesus. Hèia lasi ka tèke eele Yesus.
Lamatua Yesus aj'a lula-nèti dhèu madhe mamuri hari; aa dhèu paleo èmu ètu sorga, do aad'o?
23 Ètu era ne'e, abhu kahèi dhèu nèti partei Saduki. Dhèu se'e ka dhu aj'a, peka na, dhèu madhe bisa heka mamuri. Lod'o èèna, dhèu se'e kahèi dhu tenge j'ara ho pamanahu Yesus. Nèti èèna ka, rèngu mai pakarèi dènge Ne, peka na,c 24 “Ama Mese! Musa dhu suri tèke le atora hia ji'i, dhu peka na: ladhe dhèu mone ca dhèu madhe tèke eele dhèu èmu na dhu dènge boe ana, na, ari nèti dhèu mone ne, hud'i leo nare hari bhèni balu ne, sèna ka abhu kolo gati madha a'a na.d 25 Mema uru èèna Musa aj'a sèmi èèna ka. Te ngaa ji'i neo karèi sèmi ne'e: abhu ana mone dhèu pidhu dhu pa'a'ari. Ana partama leo-èmu, te ngaa madhe dènge boe kolo. Hèia ari na leo nare bhèni balu ne. 26 Nèbhu boe ka, na madhe, dènge boe ana kahèi. Sèmi èèna kahèi dènge ari ka tèlu na; nèngu madhèdi kahèi dènge bhèni balu ne, te ngaa madhe kahèi dènge boe ana. Sèmi èèna ka toke ari na dhu limuri tèka, madhe kahèi. 27 Ka bhèni balu ne madhe.
28 De dhu ji'i neo karèi, sèmi ne'e ne: bhèni balu ne dhu leo nèdhi dènge mone dhèu pidhu se. Bèli-camèd'a lod'o èle rai-haha ne, ropa Ama Lamatua pamamuri hari dhèu madhe sèra, na, bhèni ne j'aj'i mi dhèu èmu cee?”
29 Èle èèna ka, Yesus b'ala si, peka na, “Ladhe lii pakarèi miu sèmi èèna, miu se sala kapai le! Te miu se me'a mere boe isi sasuri Ama Lamatua. Aa me'a boe kahèi koasa Na dhu kapai aae èèna. 30 Dhu lèke ka sèmi ne'e! Pe Ama Lamatua pamamuri hari dhèu nèti mamadhe ra, rèngu se paleo heka èmu, sama sèmi ana pajuu Na ètu sorga dhu leo boe èmu.
31 Aa Ja'a neo peka kahèi, lula-nèti dhèu madhe bisa mamuri hari, do aad'o. Ètu d'ara sasuri Musa, dhu lole na, aj'u iiki ca kapua dhu ai na'e te ngaa kèpu boe. Nèti lii lolo ne, èdhi bisa te'a, na, dhèu madhe bisa mamuri hari. Te ètu d'ara sasuri èèna, Ama Lamatua peka dènge Musa, na,
32 ‘Ja'a ne Ama Lamatua nèti bèi-baki èu.
Nuka Abraham, Isak dènge Yakob.
Rèngu aa'i-aa'i ra pahaha iisi era mi Ja'a toke d'ai sange ne'e ne.’
De èdhi te'a, na, lod'o Ama Lamatua peka sèmi èèna, baki èdhi se dhu madhe nèbhu le. Te ngaa Ama Lamatua peka na, Nèngu j'aj'i Lamatua rèngu era. Nèti èèna ka, èdhi dhu te'a na, samanga rèngu dhu mamuri era, masi ka rèngu dhu madhe nèbhu le. De masi ka madhe, te ngaa ra mamuri hari. Te dhodhoka dhèu mamuri di, dhu pahaha iisi mi Ama Lamatua, dhèu dhu madhe, aad'o, si?!”e
33 Ropa ra tadèngi rare lii padhai Yesus ne, hèia dhèu Saduki se re'a heka b'ala. Te ngaa dhèu ae se malaa-maloha, ka ra papeka na, “Ira ii! Lii padhai Dhèu ne'e ne be'a seli eele, nga!”
Lamatua Yesus aj'a lula-nèti paredha dhu kapai risi
34 Ropa dhèu Parisi tadèngi, na, Yesus segi le dhèu Saduki, hèia ra pakaboko ho lasi pakarèi dènge Ne. 35 Nèti rèngu se, abhu ca dhèu dhu d'èlu-mèu j'ara-j'ara agama, la'e pakarèi dènge Yesus, aku nèngu na, 36 “Ama Mese! Ja'a neo karèi sèmi ne'e ka: atora nèti ad'a dènge agama èdhi, ae d'ai seli. Paredha aa'i-aa'i dhu nèti Musa, mia ka dhu dedha risi?”
37 Hèia Yesus dhaa, peka na, “Paredha dhu dedha risi ètu d'ara Sasuri Mola-Mèci Ama Lamatua suri, peka na:
‘Ama Lamatua èèna, tare'a Lamatua miu.
De miu se hud'i sue risi Ne nèti ngaa aa'i-aa'i.
Nèti èèna ka, miu hud'i sanao-maena taruu mi Nèngu,
tadhe paie Ne,
dènge sab'a pa'èra ho madhutu dad'èi Na.’f
‘Èu hud'i sue ku dhèu leo, nuka sèmi èu sue ngi'u èu mesa mu.’g
40 Dua paredha se, nuka kapua nèti atora Musa dènge lii aj'a-nori aa'i-aa'i ra nèti dhèu rèti lii padhai Ama Lamatua. Dhèu tatu boe madhutu paredha leo, ladhe nèngu madhutu uuru boe dua paredha dhu dedha risi se.”h
Kristus, mema tare'a ana-èpu dhèu aae Daud, te ngaa Nèngu Lamatua nèti dhèu aae Daud kahèi
41 Ropa dhèu Parisi dhu pakaboko era ètu èèna, ka Yesus karèi si, peka na, 42 “Karèi nèti uru ka, Ama Lamatua dhu padhadha tèke le, ho pua Kristus mai, sèna ka hia mamuri mi dhèu unu Na. De madhutu a'abhu miu, na, Kristus èèna ana-èpu cee?”
Hèia ra dhaa peka na, “Nèngu èèna, ana-èpu nèti dhèu aae Daud.”
43 Yesus lii hari, aku Nèngu na, “Ladhe sèmi èèna, nga tao ka Roh Mola-Mèci èèna peka dènge dhèu aae Daud, na, nèngu paroa Kristus, ‘Lamatua’? Te Daud suri tèke na,
44 ‘Ama Lamatua peka mema le dènge lamatua ja'a, na,
“Mai ho madhèdi ètu era hua iia ne, ètu baboa g'ana Ja'a.
Te bèli-camèd'a Ja'a tao musu-musu èu sèra, pahaha iisi mi èu.”’i
45 De nèti lii ne'e ne, èdhi te'a, na, dhèu aae Daud mesa na paroa Kristus ne, ‘Lamatua’. De ladhe dhèu peka na, Kristus dhoka ana-èpu Daud di, èèna dhae d'ai mèka. Lula Nèngu Lamatua nèti dhèu aae Daud kahèi!”
46 Ropa ra tadèngi lii padhai Yesus, dhèu Parisi se nuka sèmi dhèu goa sa, te ca dhèu sa bisa boe dhaa lii Yesus. Nèti èèna ka, nèti lod'o èèna, rèngu bani heka tenge j'ara ho pakarèi Ne.