Yesus si maso Yerusalem, ka dhèu ae koa-kio Ne sèmi dhèu kapai èci
11
Ropa ra dètu dènge kota Yerusalem, ka ra dhuli uuru dua rae, ngara na Betfage dènge Betania, ètu sebhe ledhe Saitun.a Ètu èèna, Yesus si mate ciki oo'e di. Ka Na pua ana madhutu Na dhèu dua lasi uuru.
Markus 11:1-14
2 Na pua si, peka na, “Miu dua mi lami uuru asa d'ara rae nèi. Ropa miu maso lami, miu mèdhi ana badha keled'ei ci'u, dhu ra èki ètu èèna, dhu dhèu dhae manya'e mèka. Lami ho lècu eele dhari a'èki na, ho ère mèti mai asa ne'e. 3 Te ngaa ladhe dhèu karèi miu, ‘Nga tao ka miu ère mèti ana keled'ei ne?’ Mi peka dènge si, ‘Lamatua ji'i neo pake ne. Ladhe pake nare, na, Na hia hari mai.”’
4 Èle èèna ka, ana madhutu Na dhèu dua sèra lasi, ka rèdhi ana keled'ei ci'u dhu èki tèke ètu madha èmu cue ètu sebhe j'ara. Ra lècu eele dhari èki na, ka ra ère rèti mai. 5 Ka dhèu-dhèu dhu titu ètu èèna, peka na, “We! Nga tao ka miu pakako mèti keled'ei dhèu?”
6 Ka ra dhaa, peka na, “Lamatua ji'i neo pake ne. Ho ladhe Na pake nare, na, ji'i ngèti hari mai.” Ka dhèu sèra soro tèke si lasi pakako rèti ana keled'ei èèna. 7 Hèia ra rèti ana keled'ei èèna asa Yesus. Ka ra hèle sig'i-kalolo rèngu mi dedha keled'ei, ka Yesus manya'e.
8 Ropa oe maso d'ara kota, ka dhèu ae rare sig'i-kalolo, ka ra hèle mi dedha j'ara oka-hoo. Dhèu cahag'e lasi para rèu palamb ètu sebhe j'ara, ho ra tao mi talora j'ara oka-hoo. Tatao sèmi èèna na, sama sèmi tadha èci dhu peka na, rèngu pakab'ua Yesus. 9 Dhèu cahag'e kako uru ètu madha Yesus; aa cahag'e kako limuri. Ka ra pa'oo, peka na,
“Hosana! Mai ti koa-kio kolongara Ama Lamatua!c
Lamatua hia berkat mi dhèu dhu mai pake kolongara Na,
lula Ama Lamatua hia Ne mai!d
10 Hosana! Mai ti koa-kio kolongara Ama Lamatua!
Lula Lamatua neo pakèd'i hari paredha dhèu aae Daud!
Hosana! Mai ti koa-kio kolongara Ama Lamatua!
Lula Lamatua madhèdi nèd'u paredha ètu era dedha risi eele!”
11 Ropa ra d'ai d'ara kota, ka Yesus si maso asa madha Èmu Kapua Manèngi-Mangaj'i. Ka Yesus ladhe palème era Èmu èèna. Te ngaa, lula lod'o nihia ae le, ka ra lèpa hari asa rae Betania.
Lamatua Yesus pua aj'u èci ho baku hua
12 Asa bèli mad'ae aae èèna, ka rèngu kalua nèti Betania lasi asa Yerusalem. D'ai talora j'ara ka Yesus manganga. 13 Ka Na ladhe nèdhi ana aaj'u èci ètu sebhe j'ara. Hua aj'u na, dhu dhèu ra'a.e Yesus la'e padètu ho neo ne'a aj'u na, hua do aad'o. Na ladhe aj'u èèna hua boe cue sa. Te mema d'ai mèka hèru hua. Rèu heka mare kèna. 14 Ka Yesus peka mi aj'u èèna, “Lula èu hia boe Ja'a hua, mulai ti deo ne'e, èu bisa heka hia hua èu asa dhèu leo!”
Ana madhutu Yesus sèra tadèngi Na padhai lii dènge nasa sèmi èèna.
Lamatua Yesus maso asa Èmu Kapua Manèngi-Mangaj'i, ka Na pa'ele iie era pahia-pahèli
15 Yesus si kako taruu asa Yerusalem, d'ai nèi ka Yesus maso asa Èmu Kapua Manèngi-Mangaj'i. Ètu madha Èmu èèna, dhèu tao pasa ho ra pahia koro j'aha dhu biasa dhèu pake tao korban ho ra sabaj'a. Ropa Yesus nèdhi sèmi èèna, ka Na lalèta si asa li'u. Na tule eele mei dhu ra pake ho pasilu doi sèra, aa Na tule paguri eele bagu dhu ra pake pahia manu-bhui sa.
Markus 11:15-33
16 Ka Yesus kai si aa'i-aa'i ra, sèna ka ra rèti ia ka mèdha rèngu re d'ara madha Èmu èèna. 17 Ka Na aj'a si, peka na, “Miu me'a le lii dhu dhèu nèti lii padhai Ama Lamatua suri tèke le, peka na: ‘Ja'a tao èmu ne'e, sèna ka suku aa'i-aa'i mai sabaj'a ètu ne'e.’ Te ngaa miu tao Èmu ne j'aj'i era pakaboko dhèu parapo.”f
18 Ropa kètu agama Yahudi dènge mese agama sèra re'a rare tatao Yesus sèmi èèna, ka ra nasa dènge Ne. Ka ra tenge j'ara ho neo pamadhe Ne. Te ngaa ra madha'u, lula dhèu ae dhu d'èi lii holo-nori Yesus.
19 D'ara lod'o cèna sa, Yesus si kalua hari nèti kota Yerusalem lèpa lasi j'unu asa rae Betania.
Ladhe miu parcaya dènge d'ara kateme, Ama Lamatua dhaa lii manèngi miu
20-21 Bèli mad'ae èèna, Yesus si lasi hari asa Yerusalem. D'ai talora j'ara, ka ra rèdhi aj'u dhu Yesus padhai lii med'a na. Ka ana madhutu Yesus sèra malaa, lula rèngu rèdhi aj'u èèna mango le d'ai amo. Hèia Petrus sanèd'e lii padhai lii Yesus med'a na. Ka na peka na, “Ama! Ladhe ku! Aj'u dhu Ama dhoo med'a na, madhe le!”
22 Yesus dhaa, peka na, “Tare'a, we! Sad'i miu parcaya Ama Lamatua sèmi èèna, na, j'aj'i kahèi. 23 Ladhe miu parcaya dènge d'ara kateme, miu bisa pua ledhe hia na pidha asa d'ara dhasi. Pe Lamatua pidha eele ledhe èèna, sad'i miu baku parcaya dènge d'ara cabèka. Miu parcaya mi Ama Lamatua, hud'i dènge d'ara kateme ku.g 24 Baku bhèlu! Sad'i miu parcaya dènge d'ara kateme, ngaa dhu miu manèngi, tatu Ama Lamatua bisa hia miu. 25 Ladhe dhèu èci sabaj'a, aa te ngaa na tèka d'ara era dènge dhèu leo, nèngu hud'i la'e pabe'a uuru ku dènge dhèu èèna. Ladhe miu tao sèmi èèna, Ama miu ètu sorga heka saku eele sasala miu kèna. 26 [Ladhe abhu nèti miu dhu tèka d'ara dènge dhèu, ho mo'o boe hia abho, na, tatu Ama miu ètu sorga no'o boe pabhèlu eele sasala miu kahèi.”]h i
Ra pakarèi hak Lamatua Yesus
27 Èle èèna ka, Yesus si lasi taruu. Ropa d'ai Yerusalem, ka ra maso hari asa Èmu Kapua Manèngi-Mangaj'i. Ropa maso asa madha Èmu èèna, kètu agama Yahudi, mese agama, dènge dhèu heka-dhèu heka Yahudi sèra mai, 28 ka ra karèi Yesus, peka na, “Cee ka dhu pua èu mai tao maruru ètu ne'e med'a na? Cee ka hia èu hak!”
29 Te ngaa Yesus ne'a, na, rèngu neo tenge j'ara ho pamanahu Ne. Ka Na b'ala si, peka na, “Ja'a neo karèi miu kahèi. Miu dhaa uuru ku Ja'a, heka Ja'a dhaa miu kèna. 30 Ja'a neo karèi miu sèmi ne'e: miu aa'i-aa'i mi tadhe Yohanis, tuka sarani èèna, sina ma? Cee ka dhu pua nèngu la'e sarani dhèu? Lamatua do, dhèu rai-haha?”
31 Ra pajiko la'e-mai, ka ra padhue, peka na, “Eea! Nara èdhi le! Ladhe èdhi dhaa, peka na, ‘Ama Lamatua ka dhu pua Yohanis,’ na b'ala hari, peka na, ‘Nga tao ka miu parcaya boe Yohanis!’ 32 Te ngaa èdhi bisa boe peka kahèi, na, ‘Dhèu rai-haha dhu pua ne.’ Te aad'o na, dhèu ae tao dènge èdhi. Lula dhèu ae parcaya, Yohanis èèna, dhèu nèti lii padhai Ama Lamatua.”
33 Ka ra dhaa, peka na, “Ji'i nge'a boe!”
Ka Yesus dhaa hari si, peka na, “Ladhe sèmi èèna, Ja'a ko'o boe peka kahèi, cee ka dhu pua Ja'a.”