3 Ka Yesus b'ala si, “Ja'a neo karèi miu ca madha j'ara kahèi, heka Ja'a dhaa lii karèi miu kèna. 4 Sèmi ne'e: miu se tadhe Yohanis tuka sarani dhèu, do? Cee ka dhu hia ne koasa ho sarani dhèu? Ama Lamatua do, dhèu rai-haha?”

5 Hèia ra papeka èci dènge èci, “Ira ee! Èdhi sèmi tare le pala ti ngaa. Ladhe èdhi peka na, ‘Ama Lamatua ka pua’, èèna Na b'ala, aku Nèngu na, ‘Ladhe sèmi èèna, nga tao ka miu lèka boe Yohanis?’ 6 Te ngaa ladhe èdhi dhaa, peka na, ‘dhèu rai-haha ka pua’, na dhèu ae sèra pèci pamadhe èdhi. Te dhèu sèra parcaya, na, Yohanis ne dhèu nèti lii padhai Lamatua.”

7 Ka ra dhaa, peka na, “Ji'i nge'a boe.”

8 Hèia Yesus peka dènge ra, “Ladhe sèmi èèna, Ja'a ko'o boe peka kahèi, cee ka dhu pua Ja'a.”

9 Hèia Yesus lolo dènge dhèu ae sèra, pake lii pakasame, peka na, “Abhu dhèu èci dhu sèle anggor ètu d'ara oka na. Na hia dhèu seb'a oka anggor ne, sèna ka rèngu pabagi isi rai nèti oka-tedhe ne. Ka na pidha la'e pea panèbhu asa rai kaj'èu.^a 10 D'ai hèru puu-g'ètu, hèia lamatua oka anggor ne pua ana paleha na ca dhèu, la'e nare pala nèngu. Te ngaa dhèu sab'a oka anggor se, game ana paleha ne, ka ra hia ne lèpa dènge ai hua. 11 Èle èèna ka, lamatua oka ne pua ana paleha na ca dhèu hari. Te ngaa dhèu sab'a oka se game, ka ra pamakae ne. Hèia ra babège ne lèpa dènge ai hua da'u-da'u. 12 Èle èèna ka, lamatua oka ne pua hari ana paleha na ka tèlu, te ngaa ra game ne, toke diu raa, ka ra core ne asa li'u oka.

13 Hèia lamatua oka ne pangee ka, ‘Ja'a tao hari ku tasamia? Be'a risi ja'a pua ana pasue ja'a ka la'e. Ele boe ra pakab'ua ne, de ra sèmi ne dènge be'a.’ De na pua ana d'èlu na la'e.

14 Te ngaa ropa dhèu sab'a oka anggor se ladhe rèdhi ne, hèia ra papeka èci dènge èci, aku rèngu na, ‘Mi ladhe ku laa! Te lamatua oka ne hia ana d'èlu na nuka mai nèi. Nèngu ne ka dhu bèli-camèd'a unu pusaka ama na aa'i-aa'i ra. De ta pamadhe ne! Sèna ka èdhi ka dhu unu oka anggor ne.’ 15 Ropa ana ne d'ai, hèia dhèu se nuni pa'oro ne rèti asa li'u oka, ka ra pamadhe ne.

De Ja'a neo karèi miu sèmi ne'e: miu pangee, na, lamatua oka ne tao dhèu sab'a oka sèra tasamia? 16 Madhutu a'abhu Ja'a, tatu na mai pamadhe aa'i si, ka na hia hari dhèu leo seb'a oka ne.”

Ropa dhèu se tadèngi lii padhai Yesus, rèngu peka na, “Ladhe bisa, na, ji'i baku abhu huku nèti Ama Lamatua sèmi èèna!”

17 Hèia Yesus laladhe patae si, ka Na karèi, “Ladhe huku boe si sèmi èèna, nga tao ka dhèu nèti lii padhai Lamatua suri, na:

18 Dhèu dhu kadhunu lèke hadhu ne, nèngu tatu laho teb'o-teb'o, lula abhu huku. Aa ladhe hadhu ne bèbhe lèke dhèu cee, nèngu laho kao-kao, lula lèke huku.”

19 Ropa mese agama dènge kètu agama Yahudi se tadèngi lii lolo ne, rèngu re'a, na, Yesus padhai lii padhèto dènge rèngu pake lii pakasame. Rèngu se cakaraa dènge dhèu seb'a oka anggor deo sa. De ra nasa titu kèna. Ka ra tenge j'ara ho neo kèpe Ne. Te ngaa rèngu madha'u dènge dhèu ae sèra, dhu d'èi nanene lii aj'a Yesus. Ka lasi tèke eele Ne.

20 Èle ka, musu-musu Yesus ma'u Ne. Rèngu tenge dhèu j'aj'i mata-mata dhu bisa tao iisi ra sèmi dhèu mola, sèna ka ra kèpe Ne. Rèngu sanao sèna ka Yesus padhai lii dhu palab'a dènge dhèu paredha Roma, ho èèna na lasi peka dènge gubernur, sèna ka ra pua dhèu lasi kèpe Yesus. 21 Ka ra pua mata-mata, sèna ka pakarèi dènge Yesus, aku rèngu na, “Ama Mese! Ji'i nge'a Ama ca dhèu dhu d'ara mola. Ama me'a boe kapod'e-kabèli, aa hag'e boe dhèu. Ama aj'a-nori dhèu madhutu Lii Lolo Be'a Ama Lamatua dènge mola. 22 De ji'i neo karèi ca j'ara: madhutu atora agama èdhi dhèu Yahudi, hud'i ji'i b'ae ku doi bea mi dhèu aae kapai paredha Roma, do aad'o?”

23 Te ngaa Yesus ne'a le ngangee kaj'alu rèngu ho neo pamanahu Ne. Ka Na dhaa, aku Nèngu na, 24 “Pad'elo sèku Ja'a doi iia cue.” Hèia ra pad'elo dènge Ne doi èci. Ka Yesus karèi si, “Ne'e ne, rupa cee ka ne? Aa ngara cee, ne?”

Ra dhaa, peka na, “Èèna, dhèu aae kapai, Keser.”

25 Hèia Yesus peka na, “Ladhe sèmi èèna, hia asa dhèu paredha, ngaa dhu unu rèngu. Aa hia mi Ama Lamatua ngaa dhu j'aj'i hak Ama Lamatua.”

26 Tadèngi sèmi èèna, dhèu se malaa, lula rèngu bisa boe sii pamanahu rare Ne ètu madha dhèu ae. Ka hèb'a ra kutu mèno.

27 Èle èèna ka, pèri-pèri dhèu nèti partei agama Saduki mai ho neo kèpe Yesus. Dhèu Saduki aj'a, na, dhèu madhe mamuri heka ètu lod'o èle rai-haha ne. Rèngu mai pakarèi dènge Yesus, na,^c 28 “Ama Mese! Atora Musa dhu suri tèke hia èdhi, peka na: ladhe dhèu mone madhe, aa dhu dènge mèka kolo, na, ari nèti dhèu madhe ne madhèdi nare hari bhèni balu ne, sèna ka abhu kolo hia a'a dhu madhe ne.^d 29 Mema uru èèna baki Musa aj'a sèmi èèna ka. Te ngaa ji'i neo karèi sèmi ne'e: ana mone dhèu pidhu dhu pa'a'ari. Dhu uru leo-èmu, te ngaa madhe dènge boe ana. 30 Hèia ari na todhe nare hari bhèni balu ne. Nèbhu boe ka, na madhe, dhu dènge mèka kolo kahèi. 31 Sèmi èèna kahèi dènge ana ka tèlu. Na leo dènge bhèni balu ne, te ngaa madhe kahèi dènge boe ana. Toke ari ra limuri tèka, madhe kahèi dènge boe kolo. 32 Hèia bhèni balu ne madhe. 33 De ji'i neo karèi Ama sèmi ne'e: bhèni ne leo nèdhi le dènge ana mone dhèu pidhu sèra. Ladhe d'ai èle rai-haha ne, ho Lamatua pamamuri hari dhèu madhe sèra, bhèni ne j'aj'i mi dhèu èmu cee?”

34 Ka Yesus b'ala si, peka na, “Dhèu dhodhoka paleo èmu ètu rai-haha ne di. 35-36 Te ngaa ètu sorga dhèu paleo boe èmu. Aa ètu era nèi, dhèu madhe heka. Rèngu èci èèna ka dènge ana pajuu nèti Ama Lamatua ètu sorga. Te, lod'o Ama Lamatua pamamuri hari dhèu madhe, Na hag'e nare si, sèna ka j'aj'i mi ana Na. 37 Ètu d'ara sasuri baki Musa, dhu lole aj'u iiki ca kapua dhu ai na'e, te ngaa kèpu boe. Nèti lii lolo ne, èdhi te'a, na, dhèu madhe bisa mamuri hari. Ètu èèna, Ama Lamatua peka dènge Musa, na, ‘Ja'a ne, Ama Lamatua nèti baki èu dhu uru-uru sèra. Nuka baki Abraham, Isak dènge Yakob. Rèngu se mangaj'i taa-taa mi Ja'a toke d'ai sange ne'e ne.’^e 38 Masi ka baki mu se madhe karèi jahi ali. Te ngaa, lula Ama Lamatua ka dhu peka na, Nèngu j'aj'i mi Lamatua rèngu era, de èdhi te'a le, na, rèngu se mamuri era. De masi ka dhèu madhe le, te ngaa ra mamuri hari. Te dhoka dhèu dhu mamuri di, dhu pahaha iisi mi Ama Lamatua; dhèu madhe, aad'o si!”

39 Tadèngi Yesus dhaa sèmi èèna, ka mese agama padhai lii, peka na, “Lii dhaa Ama Mese èèna, lèke kèna.” 40 Nèti lod'o èèna, abhu heka ca dhèu sa dhu bani karèi Yesus, lula abhu boe j'ara dhu bisa pamanahu rare Ne.

41 Yesus aj'a-nori dhèu ètu Èmu Kapua Manèngi-Mangaj'i era. Ka Na karèi dhèu sèra, peka na, “Madhutu a'abhu miu, tasamia? Mese agama sèra, aj'a peka na, Kristus èèna, nuka Dhèu dhu Ama Lamatua paj'uj'u karèi nèti uru-uru ka. Madhutu a'aj'a rèngu, Nèngu ne dhodhoka ana-èpu dhèu aae Daud di. Te ngaa èèna dhae d'ai mèka. 42 Lula uru èèna, dhèu aae Daud mesa na dhu suri le, ètu d'ara Lii Sod'a Koa-kio, na,

44 De nèti sasuri ne, èdhi te'a, na, dhèu aae Daud mesa na paroa Kristus ne, ‘Lamatua’. Sasoa na, ladhe dhèu peka na Kristus ne dhoka ana-èpu nèti dhèu aae Daud di, èèna dhae d'ai mèka! Lula Nèngu ne j'aj'i Lamatua nèti dhèu aae Daud kahèi!”

45 Ropa dhèu aa'i-aa'i taru kira mi lii padhai Yesus, hèia Na peka dènge ana-ana madhutu Na, aku Nèngu na, 46 “Baku pamud'e dènge mese agama sèra. Te rèngu d'èi kako pake kodho robho rai, lasi paraga dènge dhèu ae, ho dhèu koa si, peka na, ‘Rèngu se dhèu kapai!’ Rèngu d'èi tenge era re madha ètu d'ara èmu sabaj'a, ètu d'ara pesta, aa ètu era-era dhèu ae pakaboko. 47 De miu baku pamud'e, lula rèngu d'èi kapod'e-kabèli bhèni balu ho parame rare èmu ra. Te ngaa ètu madha dhèu ae, rèngu pahuni bhabhelu ra dènge titu ho sabaj'a panèbhu-nèbhu. Rèngu d'èi dhèu koa ra, peka na, rèngu dhèu mola. Te ngaa Lamatua ne'a sasala ra, de èèna na Nèngu huku si bia risi.”