Lamatua Yesus maso asa d'ara kota Yerusalem nuka sèmi Dhèu Aae
21
Ka Yesus si lasi taruu, d'ai rae Betfage, ètu sebhe ledhe Saitun.a Rae ne dhu dètu le dènge kota Yerusalem. Ètu era ne'e, rèngu ae taha. Hèia Na pua ana madhutu Na dhèu dua lasi uuru. 2 Na paredha si, peka na, “Dua mi lami asa rae nèi. Ladhe miu d'ai nèi, miu ladhe mèdhi keled'ei rena ci'u dènge ana na dhu ra èki ètu era èèna. Lami lècu mere ne, ho mèti mai hia Ja'a. 3 Te ngaa ladhe dhèu karèi miu, peka na, ‘Nga tao ka miu ère mèti keled'ei dhèu?’ Mi dhaa, peka na, ‘Lamatua neo pake ne. Ladhe pake nare, pe Na hia hari mai.’4 Aa'i-aa'i se hud'i j'aj'i ku sama sèmi lii padhai nèti dhèu rèti lii padhai Ama Lamatua, dhu suri tèke, peka na,
5 ‘Miu dhèu Yerusalem sèra!b
Mai laladhe ku la!
Te Dhèu Aae miu mai.
Na mai dènge pahaha iisi.
Na mai dhu manya'e keled'ei ngèru.”’c
6 Ka ana madhutu Na lasi ka, aa ra tao madhutu aa'i dhu Yesus moa le dènge ra. 7 Ère rèti keled'ei rena dènge ana na asa Yesus. Èle ka, ra hèle sig'i-kalolo, hèia Yesus manya'e, lasi asa d'ara kota. 8 Ropa rèngu oe d'ai d'ara kota, hèia dhèu ae ka dhu hèle sig'i-kalolo dènge salalu ra mi j'ara. Abhu kahèi cahag'e lasi pare rèu palam,d ho ra tao ètu talora j'ara. Dènge j'ara ne'e, rèngu tao tadha dhu peka na, rèngu soru Yesus sama sèmi dhèu kapai. 9 Abhu kahèi dhèu cahag'e dhu kako uuru nèti Yesus, aa cahag'e kako re limuri. Dhèu se pa'oo-parodha palere-lere, peka na,
“Hosana! Ji'i koa-kio Ama Lamatua!e
Lula ana-èpu Daud mai le!
Hosana! Ji'i koa-kio Ama Lamatua!
Lula Ama Lamatua ka dhu pua Dhèu ne'e mai.
Hosana! Ji'i koa-kio Ama Lamatua!
Lula Ama Lamatua dhu nèd'u mema paredha ètu dedha-liru dhu dedha risi!”f
10 Ropa Yesus maso asa Yerusalem dènge dhèu dhu pakelu oob'a, hèia isi kabarai aa'i-aa'i ètu d'ara kota kalua mai, ka ra pakarèi, peka na, “Ira ii! Cee ka dhu mai ne?”
11 Dhèu ae se dhaa, aku rèngu na, “Nèngu ne, Dhèu nèti lii padhai Ama Lamatua. Ngara Na Yesus, dhèu Nasaret, nèti propensi Galilea.”
Lamatua Yesus babège eele dhèu dhu pahia-pahèli ètu d'ara Èmu Kapua Manèngi-Mangaj'i
12 Ka Yesus si lasi taruu asa d'ara Èmu Kapua Manèngi-Mangaj'i Ama Lamatua. Ètu madha Èmu Manèngi-Mangaj'i ne, dhèu tao nuka sèmi pasa, ho pahia-pahèli koro j'aha dhu dhèu tema pake j'aj'i mèdha korban lod'o sabaj'a. Ropa ladhe nèdhi sèmi èèna, hèia Yesus babèga eele si nèti era èèna. Na lege eele mei-mei dhu ra pake pasilu doi, aa Na paguri eele bagu-bagu dhu ra pake pahia manu-bhui. 13 Hèia Yesus peka dènge dhèu se'e, aku Nèngu na, “Dhèu rèti lii padhai Lamatua dhu suri tèke le, peka na,
‘Ja'a patitu Èmu ne,
sèna ka dhèu mai manèngi-mangaj'i ètu ne'e.’
Dad'èi Lamatua sèmi èèna ka, te ngaa miu tao Èmu ne, nuka sèmi era kaboko dhèu parapo!”g
14 Èle, ka dhèu bèdhu dènge dhèu karuku mai sa Yesus ètu Èmu Sabaj'a Ama Lamatua. Ka Na puri-pa'èle aa'i si. 15 Ètu era ne'e, abhu kahèi kètu agama Yahudi dènge mese agama sèra. Ropa rèdhi Yesus tao tadha malaa, hèia ra ka'uu-kamuki. Risi-risi hari, ropa ra tadèngi ana-ana pa'oo palere-lere ètu d'ara Èmu Kapua Manèngi-Mangaj'i ne, dhu peka na,
“Hosana! Ji'i koa-kio Ama Lamatua!
Lula ana-èpu dhèu aae Daud mai le!”
16 Ka kètu kapai se lii dènge Yesus, aku rèngu na, “Eeh! Èu tadèngi lii padhai lii ana-ana se? Èèna lèke boe!”
Te ngaa Yesus b'ala si, na, “Oo, Ja'a tadèngi. Te, nga tao? Miu baca mèdhi mèka ètu d'ara Sasuri Mola-Mèci Ama Lamatua lula-nèti ana-ana dhu koa-kio Ama Lamatua, do? Te ètu d'ara sasuri èèna dhu suri, na,
‘Ama Lamatua dhu sadia nare le, ana rara iisi hiu, dènge ana-ana iiki,
ho koa-kio Ne.”’h
17 Hèia Yesus si tèke eele kota ne, lasi j'unu asa rae Betania.
Lamatua Yesus dhoo aj'u ca kapua ho hua ia ka
18 Asa bèli mad'ae aae na, Yesus si lèpa hari asa kota Yerusalem. Te ngaa ètu talora j'ara, Nèngu manganga le. 19 Na ladhe nèdhi aj'u ca kapua buli sebhe j'ara dhu dhèu tema ra'a hua na.i De la'e ka padètu-dètu dènge aj'u ne'e, ho neo ladhe sèku dhu hua le, do dhae. Te ngaa ropa d'ai kapua aaj'u ne, Na nèdhi boe hua cue sa, lula rèu heka sub'u mai kèna. Hèia Na peka mi aj'u ne, aku Nèngu na, “Lula èu hia boe Ja'a hua cue sa, de èèna na èu hua heka!” Ropa Na lii nare sèmi èèna, hèia aj'u ne mango dènge ka.
20 Ropa ana madhutu Na ladhe rèdhi j'ara ne, hèia ra malaa. Ka ra karèi, peka na, “Tasamia ka aj'u ne mango?”
21 Hèia Yesus dhaa, na, “Nanene paie-iie! Ladhe miu lèka tare'a-re'a Lamatua, aa dènge boe d'ara kajari, miu kahèi bisa tao sama sèmi dhu Ja'a tao ne. Miu bisa tao risi hari nèti ne'e. Sèmi: miu bisa paredha ledhe pidha asa d'ara dhasi la'e. Tatu Ama Lamatua pidha eele kahèi ledhe ne nèti era na, sad'i miu parcaya Nèngu tare'a-re'a!j 22 Te aa'i-aa'i dhu miu manèngi nèti Ama Lamatua, èèna na miu abhu, sad'i miu parcaya Ne tare'a-re'a.”
Kètu agama sèra karèi Lamatua Yesus abhu hak nèti mia
23 D'ai Yerusalem, Yesus si maso hari asa Èmu Kapua Manèngi-Mangaj'i. Ropa Nèngu aj'a dhèu madha j'ara Ama Lamatua, hèia kètu agama Yahudi, mese agama sèra, dènge dhèu heka-dhèu heka ad'a, mai karèi Yesus, na, “Med'a na, cee ka dhu pua Èu tao maruru ètu era ne'e ne? Cee ka dhu hia Èu hak?”
24 Te ngaa Yesus dhu ne'a, na, dhèu se dhu neo pamanahu Ne. Hèia Na b'ala, aku Nèngu na, “Ja'a neo karèi miu kahèi. Miu dhaa uuru ku, heka Ja'a dhaa miu kèna. 25 Lii karèi Ja'a sèmi ne'e ka: miu aa'i-aa'i mi tadhe Yohanis tuka sarani, si? Cee ka dhu hia ne hak, ho sarani dhèu? Ama Lamatua do, dhèu rai-haha?”
Ka ra papeka isi-aanga ra, aku rèngu na, “Waa! Nara le èdhi, nga! Ladhe èdhi dhaa, peka na, ‘Ama Lamatua ka dhu hia hak’, pe Na b'ala èdhi, peka na, ‘Ladhe sèmi èèna, nga tao ka miu parcaya boe Yohanis!’ 26 Te ngaa ladhe èdhi dhaa na, ‘Dhèu rai-haha ka dhu hia hak’, mage dhoka dhèu aa'i-aa'i patao dènge èdhi. Lula rèngu parcaya, na, Yohanis ne, dhèu nèti lii padhai Ama Lamatua.” 27 Nèti èèna ka, ra dhaa peka na, “Ji'i nge'a boe.”
Hèia Yesus b'ala si, aku Nèngu na, “Ladhe sèmi èèna, Ja'a parluu boe peka na, cee ka dhu hia Ja'a hak.”
Lii pakasame lula-nèti ama dènge ana mone dhèu dua
28 Yesus padhai lii taruu dènge kètu kapai sèra, aku Nèngu na, “Miu pangee sèku dènge lii lolo ne. Abhu ca dhèu ama, dènge ana mone na dhèu dua. Na peka dènge ana uuru èèna, ‘Ana, deo ne'e èu lamu sab'a asa d'ara oka.’
29 Te ngaa ana ne dhaa, aku nèngu na, ‘Eeh! Ja'a laku boe.’ Te ngaa nèbhu boe ka, na manyasa, ka la'e.k
30 Ka ama ra pua ana limuri, peka na, ‘Deo ne'e, èu lamu sab'a asa d'ara oka.’
Ka ana ne dhaa, aku nèngu na, ‘Be'a, ama! Pe ja'a laku.’ Te ngaa te'a boe na, nèngu dhu la'e boe.”
31 Ropa lole nare, hèia Yesus karèi dhèu se'e, peka na, “Ja'a neo karèi sèmi ne'e: nèti ana dhèu dua se, mia ka dhu tao madhutu lii paredha ama ra?”
Hèia ra dhaa, aku rèngu na, “Ana uuru!”
Ka Na peka, aku Nèngu na, “Oo. Te ngaa nanene paie, te Ja'a peka dhu lèke kèna. Te dhèu dhu miu cap, na, dhèu dhu laku-laku boe, sama sèmi dhèu roro bea, dènge bhèni kajeo, bèli-camèd'a rèngu se'e ka dhu j'aj'i uuru dhèu unu Ama Lamatua, nèti miu. Te miu dhoka sad'i dhaa di, peka na, ‘oo’ mi Ama Lamatua, te ngaa tao boe madhutu dad'èi Na. 32 Uru èèna, Yohanis tuka sarani, aj'a le miu j'ara tasamia, sèna ka miu bisa mamuri mola. Te ngaa miu parcaya boe ne. Aa te ngaa ropa dhèu laku-laku boe sèra, nanene lii a'aj'a nèti Yohanis, rèngu tèke eele sasala ra, sèna ka tao madhutu a'aj'a èèna. Miu dhu me'a le. Te ngaa miu loe boe nèti ad'u-ue sasala-sasigo, ho madhutu dad'èi Ama Lamatua.”l
Lamatua Yesus tao lii pakasame lula-nèti dhèu bhelu dhu seb'a oka anggor
33 Yesus lole nare, ka Na lolo hari lii pakasame èci, aku Nèngu na, “Abhu ca dhèu lamatua rai dhu la'e tao oka, ho sèle anggor ètu dedha rai na ca kasib'i. Ka na tao tedhe rai reo. Aa na tao bak cue era pacèli èi anggor. Dhèu ne patitu kahèi era madhenge dhu dedha aae èci. Èle, ka na hia oka ne mi dhèu seb'a, sèna ka d'ai hèru puu-g'ètu, ra pabagi èi anggor. Hèia la'e ka asa rai kaj'èu.m
34 Ropa d'ai hèru puu-g'ètu, lamatua oka ne pua dhèu sab'a na, lasi asa dhèu seb'a se, sèna ka rare pala nèngu. 35 Te ngaa dhèu seb'a oka se'e, pusi-pahae boe dènge dhèu-dhèu sab'a nèti lamatua oka ne. Abhu dhu lèke game, abhu dhu ra pamadhe, aa abhu dhu lèke pèci dènge hadhu. 36 Ka lamatua oka ne pua hari dhèu sab'a na canau, ae risi nèti dhèu sab'a dhu lasi uuru sèra. Te ngaa dhèu seb'a oka se tao hari bhabhelu sèmi èèna kahèi mi dhèu sab'a se aa'i-aa'i ra.
37 Nèbhu-nèbhu ka lamatua oka ne, pua ana d'èlu na la'e. Na pangee, na, ‘Ladhe ja'a pua ana d'èlu ja'a la'e, tatu ra sèmi na dènge be'a, aa ra pakab'ua ne kahèi.’
38 Te ngaa ropa dhèu seb'a se ladhe rèdhi ana ne, hèia ra papeka, ‘Wee, mi laladhe ku laa! Te mone heka nèi hia ana d'èlu na mai. Nèngu ne'e ka dhu bèli-camèd'a, unu aa'i mèdha-panyau mone heka ne. De ta pamadhe ne, sèna ka èdhi unu oka ne.’ 39 Hèia kèpe rare ana ne, ka ra nuni asa li'u oka, hèia ra pamadhe ne.”
40 Ka Yesus pa'èle lii lolo Na, ka Na karèi dhèu se'e, aku Nèngu na, “Ja'a neo karèi miu sèmi ne'e: ladhe lamatua oka ne lèpa mai, madhutu ngangee miu, na tao dhèu seb'a oka se tasa mera mia?”
41 Hèia kètu kapai Yahudi sèra dhaa, peka na, “Tatu na pamadhe dhèu bhelu se aa'i-aa'i. Èle, na hia hari dhèu leo seb'a oka ne, dhu èèna na pabagi dènge be'a, ropa d'ai hèru puu-g'ètu.”
42 Ka Yesus peka dènge ra, aku Nèngu na, “Ele boe miu se baca mèdhi boe, ngaa dhu suri tèke ètu d'ara Sasuri Mola-Mèci Ama Lamatua, dhu peka na,
‘Abhu hadhu cue dhu tuka hadhu core eele,
te ngaa limuri ne, j'aj'i le hadhu era padhèdi èmu!
Ama Lamatua mesa Na ka dhu kabhili nare, aa Na pamadhèdi hadhu ne.
Nèti èèna ka, èdhi ladhe na be'a titu kèna!”’n
43 Èle èèna ka, Yesus tuhu hari lii padhai Na, peka na, “De miu sanèd'e paie-iie. Uru èèna, Ama Lamatua hag'e nare èdhi dhèu Yahudi se, ho j'aj'i dhèu unu Na. Te ngaa, lula miu pusi-pahae boe Ja'a, èèna na Lamatua pili nare dhèu leo rai kara. Te dhèu dhu mamuri madhutu dad'èi Na, dhu nia j'aj'i dhèu unu Na. 44 [Ja'a peka paled'a-led'a dènge miu. Ja'a ka, hadhu padhèdi èèna. Dhèu dhu bèbhe lèke hadhu ne, èèna na nèngu laho kao-kao. Aa ladhe hadhu ne bèbhe lèke dhèu, èèna na dhèu ne laho kao-kao.]”o
45 Ropa kètu kapai Yahudi dènge dhèu Parisi tadèngi lii padhai Yesus, hèia re'a, na, lii ne padhèto dènge rèngu. Rèngu se ca ropa dènge dhèu seb'a oka anggor, aa dènge tuka dhu core eele hadhu era padhèdi èmu. 46 De ra nasa titu kèna. Ka rèngu mulai tenge j'ara ho kèpe Ne. Te ngaa rèngu madha'u dènge dhèu ae, dhu peka na Yesus ne, Dhèu nèti lii padhai Ama Lamatua. Nèti èèna ka, rèngu bani boe tao ngaa-ngaa mi dedha Nèngu.