Lamatua Yesus mamuri hari!
28
Ka ètu d'ara hari Migu mad'ae aae era, Maria nèti Magdala, dènge Maria dhu leo èci, lasi asa ro'a Yesus. 2 Kaca'a la rai opo kapai titu kèna. Ana pajuu Ama Lamatua ca dhèu puru mai nèti sorga, hèia na loli eele hadhu aae dhu saguru ro'a. Ka na madhèdi ètu dedha hadhu ne. 3 Rèhu ana pajuu ne kale'e sèmi kaha'a bela, aa mèdha-papake na pudhi mèu. 4 Dhèu madhenga se, madha'u bia toke ra karèbha, ka rèngu bisa boe kalau-karèto, nuka sèmi dhèu madhe sa.5 Hèia ana pajuu nèti sorga ne, lii dènge dhèu bhèni se'e, aku nèngu na, “Miu baku madha'u! Ja'a ke'a miu se mai tenge Yesus, Dhèu dhu ra paku pamadhe ètu aj'u palolo-palèbha èèna. 6 Te ngaa Nèngu aad'o heka ètu era ne'e. Te Na mamuri hari le, sama sèmi dhu Na peka le uru èèna. Maso mai, sèna ka mèdhi unu mi era dhu ra paj'unu ngi'u aae Na. Era ne ngaa-ngaa aad'o heka! 7 De pamèri lèpa ka! Lami lolo dènge ana madhutu Na, peka na, Yesus mamuri hari le. La'e uuru le asa Galilea. Rèngu hud'i lasi paraga uuru ku dènge Ne ètu nèi, sèmi dhu uru èèna, Na moa mema mi rèngu. Parcaya la. Lèpa ka, lami lole ngaa dhu ja'a peka ne!”
8 Hèia bhèni se rai li'u lasi, tèke eele era ne'e. Ra madha'u, te ngaa ra karej'e-karae kahèi. Ka ra pamèri-mèri lèpa, lasi peka j'ara se aa'i-aa'i ra mi ana madhutu Yesus.
9 Te ngaa ropa d'ai talora j'ara, kabèdhi la Yesus mai paraga dènge ra. Ka Na lii, aku Nèngu na, “Saloom!” Ropa ladhe rèdhi, hèia lasi padètu-dètu, liku rare haga Na, dènge pahaha iisi ra mi Yesus. 10 Hèia Na padhai lii, peka na, “Baku madha'u! Lami peka dènge ana madhutu Ja'a, sèna ka ra lasi mate ja'a ètu Galilea nèi.”
Dhèu madhenga lasi lolo ngaa dhu j'aj'i ètu era padhane Lamatua Yesus
11 Lod'o dhèu bhèni se ètu talora j'ara era, dhèu madhenga se lèpa le asa kota. Rèngu lasi lole ngaa dhu j'aj'i se mi kètu agama Yahudi sèra. 12 Hèia kètu agama Yahudi rare lii èci dènge dhèu heka ad'a sèra, sèna ka b'ae doi ae-ae mi dhèu j'aga ho ra hutu hèb'a. 13 Kètu agama Yahudi sèra peka, na, “Ladhe dhèu karèi miu, dhaa sèmi ne'e: d'ara mèda, ropa ji'i bhèj'i luu, nge'a boe, na, ana madhutu Na mai mana'u rèti ngi'u aae Na. 14 Aa ladhe gubernur tadèngi, mage miu madha'u, te ji'i ka dhu ator dènge ne.”
15 Hèia dhèu madhenga se rare doi. Aa ra tao madhutu dad'èi kètu agama se'e. Nèti èèna ka, toke d'ai sange ne'e dhèu-dhèu Yahudi parcaya era lii lolo kapod'e-kabèli ne.
Lamatua Yesus pad'elo ngi'u Na mi ana madhutu Na
16 Ropa tadèngi rare lii lolo nèti dhèu bhèni se'e, hèia ana madhutu Yesus dhèu canguru èci, lasi paraga dènge Yesus asa propensi Galilea, ètu ledhe èci, madhutu lii moa Na.a 17 Ropa ra ladhe rèdhi Ne, ka ra pahaha iisi mi Nèngu. Masi ka sèmi èèna, te ngaa abhu kahèi dhu d'ara ra kajari era.
18 Hèia Na ara mai padètu-dètu dènge ra, ka Na lii, “Ama Lamatua pangèd'u le koasa mi Ja'a, sèna ka Ja'a paredha aa'i-aa'i ètu sorga, aa dènge aa'i-aa'i ètu rai-haha ne. 19 De miu lami asa mia-mia, miu hud'i peka-padhai ku dènge dhèu nèti suku aa'i-aa'i ra, Lii Lolo Be'a Ja'a ne. Aa miu hud'i aj'a si paie-iie, ho sèna ka rèngu j'aj'i ana madhutu Ja'a. Aa miu hud'i sarani si ho j'aj'i mi tadha, peka na, rèngu dhu pa'èki le dènge Ama, dènge Ana, aa dènge Roh Na dhu Mola-Mèci.b 20 Aa nori si sèna ka ra tao madhutu paredha aa'i-aa'i dhu Ja'a peka tèke le dènge miu. Sanèd'e, ee! Ja'a bera-bera dènge miu toke èle rai-haha ne.”