Lamatua pua Abraham tao Isak sama sèmi badha korban
22
Nèbhu boe, hèia Lamatua sèku neo ne'a d'ara Abraham. Neo ne'a Abraham madhutu Lamatua, do aad'o. Ka Lamatua paroa ne, aku Nèngu na, “Abraham!”Hèia na dhaa, peka na, “Ooo, Lamatua.”
2 Ka Ama Lamatua peka dènge ne, “Mu nanene paie-iie! More ana pasue èu mone mesa na. Mèti ne asa rai Moria, ho tao ne j'aj'i korban tunu hia Ja'a. Pe d'ai nèi, Ja'a heka paj'uj'u era dhu ètu ledhe èci.”
3 D'ai bèli mad'ae aae na, Abraham sèg'i aj'u sèna ka tao kadhèna. Na èki, ka na hue asa dedha keled'ei. Ka dua ra dènge Isak, aa dènge dhèu sab'a na dhèu dua, pakèd'i asa era dhu Lamatua peka dènge ne. 4 Ra kako taruu, ka d'ai camèd'a èèna, Abraham nèdhi le era èèna nèti kaj'èu. 5 Hèia na peka dènge dhèu dua sèra, aku nèngu na, “Dua mi mate taha mi ne'e dènge keled'ei ne. Ja'a dènge ana ja'a la'a asa dedha nèi, ho mangaj'i Ama Lamatua. Ladhe èle na, ji'i lèpa hari mai.”
6 Ka Abraham nare kadhèna dhu neo tunu korban, ka na tao mi kabela-kao Isak. Aa nèngu nèd'u tud'i, dènge suu ai. Ropa dua ra palere lasi, 7 hèia Isak paroa ama na, aku nèngu na, “Ama!”
Ka Abraham dhaa, aku nèngu na, “Nga tao, ana?”
Hèia Isak karèi, aku nèngu na, “Èdhi neo lati tunu korban. De ai dènge kadhèna ka se'e le. Te ngaa ana kahib'i-kalèbho dhu èdhi pake j'aj'i korban, ka mia?”
8 Te ngaa, aku Abraham na, “Pe Ama Lamatua unu Na ka dhu hia ana kalèbho, sèna ka j'aj'i mi korban.”
Ka dua ra ca'e lasi taruu. 9 Ropa dua ra d'ai era dhu Lamatua peka èèna, ka Abraham pudhi hadhu ho tao mei korban. Hèia na paloko kadhèna ètu dedha mei korban ne. Ka kèpe ana na Isak, èki patarenga ne ètu dedha kadhèna. 10 Ka nare tud'i, ho neo kèj'i pamadhe ana na. 11 Cag'ag'a laa, ana pajuu LAMATUA lii nèti dedha-liru, peka na, “Abraham! Mata ku!”
Ka Abraham dhaa, aku nèngu na, “Nga tao, Lamatua?”
12 Ka na peka hari, na, “Baku pamadhe ana èèna! Baku tao ngaa-ngaa mi nèngu. Ja'a ke'a le, èu ne tare'a-re'a madhutu dad'èi Lamatua. Lula èu dènge d'ara kateme hia ana èu ca dhèu mesa èèna, sèna ka j'aj'i mi korban hia Ne.”
13 Hèia Abraham ladhe nèdhi kahib'i-kalèbho mone ci'u, dhu tadhu na pakai nare dadana aaj'u dhu karoki. Ka na la'e kèpe nare, ho tunu j'aj'i mi korban hia Ama Lamatua, gati ana na. 14 Ka Abraham pangare era èèna, na, ‘Lamatua sadia tèke ngaa dhu parluu.’a Nèti èèna ka, d'ai sange ne'e, dhèu peka na, “Ètu ledhe LAMATUA èèna, Na sadia tèke ngaa dhu parluu.”
15 Èle èèna ka, ana pajuu Lamatua lii hari nèti dedha-liru, peka na, 16 “LAMATUA unu Na, peka, ‘Ja'a subha dènge kolongara Ja'a mesa ku, sèmi ne'e: èu sadia le hia Ja'a ana mu ca dhèu mone mesa na ho j'aj'i mi korban. Nèti èèna ka, 17 bèli-camèd'a, Ja'a pala-bagi èu dènge ana-èpu èu mèngi-nale ae-ae. Èèna na, ra bèba-kacanga, toke dhèu ige rare boe, sèmi hua-hètu ètu dedha-liru, aa salae ètu sebhe dhasi. Ana-èpu èu sèra, èèna na, segi aa'i musu rèngu sèra. 18 Nèti ana-èpu èu, dhèu aa'i-aa'i ètu rai-haha ne abhu mèngi-nale lula èu madhutu le lii paredha Ja'a.”’
19 Èle hèia, Abraham dènge Isak, lèpa hari asa era dhu dhèu sab'a na sèra. Ka lasi palere asa Beer-Syeba. D'ai nèi, Abraham si pea dènge ka.
Ana-èpu Nahor
20 Ca lod'o, Abraham tadèngi na, dhèu èmu ari na Nahor, dhu ngara na Milka, nara iisi ana na. 21 Ana uru, ngara na Us. Ari na, Bus. Èle ka, nara iisi hari Kemuel (dhu j'aj'i ama Aram.) 22 Ka na abhu hari Kesed, Haso, Pildas, Yidlaf, dènge Betuel. 23 Betuel èèna, ama nèti Ribka. 24 Nahor abhu ana kahèi nèti bhèni piara na, ngara na Reuma. Ana Reuma, nuka: Teba, Gaham, Tahas, dènge Maaka.