Yohanis tuka sarani aj'a-nori dhèu
3
Lod'o Yesus dhu kapai le, hèia Yohanis tuka sarani mulai aj'a-nori dhèu ètu era dhu dhèu pea boe ètu propensi Yudea. 2 Na aj'a peka na, “A'ari pasue! Miu hud'i mangaku aa tèke eele ku sasala-sasigo miu, ho lèpa asa Ama Lamatua. Te limuri ne dhèu aa'i-aa'i bisa j'aj'i dhèu unu Ama Lamatua.”a3 Uru èèna, ca dhèu nèti lii padhai Ama Lamatua, ngara na Yesaya, suri le lula-nèti Yohanis ne, aku nèngu na,
“Bèli-camèd'a abhu dhèu pa'oo-parodha ètu d'ara mamoo, peka na,
‘Dhèu aa'i-aa'i pa'èra sèna ka tao pabe'a j'ara,
ho sèmi mamai Ama Lamatua!
Tao pamola j'ara hia Ne!”’b
4 J'ara mamuri Yohanis ne, ca ropa dènge dhèu rèti lii padhai Ama Lamatua uru sèra. Mèdha-papake na tao nèti rèu badha onta. Dhari hake na nèti ka'uri badha. Nganga'a na, kabara dènge dhua nasu oni.c
5 Lod'o èèna, dhèu ae mai neo paraga dènge Yohanis. Rèngu mai nèti kota Yerusalem, nèti kabarai propensi Yudea aa'i-aa'i, dènge nèti rae-rae dhu dètu loko Yarden. 6 Ra bhoka d'ara ra, aa mangaku sasala-sasigo aa'i-aa'i, èle ka Yohanis sarani si ètu d'ara loko Yarden.
7 Lod'o èèna, dhèu ae nèti partei agama Parisi dènge dhèu partei agama Saduki, lasi asa era èèna kahèi, manèngi Yohanis sarani si. Te ngaa ropa Yohanis ladhe nèdhi si, hèia na jèke si, peka na, “Heeh! Miu se cakaraa mege dhu kapod'e-kabèli. Bèli-camèd'a Ama Lamatua huku mi, lula tatao miu dhu bhelu-katub'a sèra. Mage mi pangee na, miu bisa rai nèti hahuku Na.d 8 De be'a risi miu lèpa sa Ama Lamatua, aa tèke eele sasala miu sèra. Èle na, tao j'ara-j'ara dhu be'a, sèmi aj'u dhu hua be'a. 9 Mage mi pangee na, miu se abhu mamuri, lula j'aj'i ana-èpu Abraham. Mi sanèd'e lii ja'a, ee! Te Ama Lamatua bisa tao hadhu se j'aj'i ana-èpu Abraham kahèi.e 10 Baku pamud'e! Te abhu dhu kèpe mema kataka, pa'èra patue aa'i-aa'i aj'u dhu hua be'a boe, sèna ka core asa d'ara ai.f
11 Limuri ne, ja'a sarani miu pake èi, ho j'aj'i mi tadha dhu peka na, miu se tèke eele sasala-sasala miu. Te ngaa pe abhu ca Dhèu dhu kapai risi nèti ja'a, bèli-camèd'a mai. Masi ka j'aj'i ana pua-paleha Na, ja'a nia boe sa hèi. Èèna na, Nèngu papènu d'ara miu dènge Roh Ama Lamatua dhu Mola-Mèci. Nèngu tao miu j'aj'i mola-mèci kahèi, sama sèmi dhèu pake ai ho bhubhu maruru.g 12 Te Nèngu dhu nèd'u kokotai dènge laludhu ètu d'ara, ho neo tatai eele èto na. Èle èèna, Na bhori laludhu asa d'ara soka. Te ngaa èto sèra, Na dutu asa d'ara ai dhu heo robhe-robhe dhu madhe boe.”
Yohanis sarani Lamatua Yesus
13 Lod'o èèna, Yesus puru mai nèti Galilea, la'e asa loko Yarden. Na mai sèna ka manèngi Yohanis sarani Ne. 14 Te ngaa Yohanis no'o boe. Na pab'ala peka na, “Tasamia ka ja'a sarani Èu? Sale ne, sina ma? Hud'i Èu ku dhu sarani ja'a. Te èèna ka dhu ja'a parluu!”
15 Te ngaa Yesus dhaa, aku Nèngu na, “Pangee ia ka. Te ngaa doe ne'e, hud'i laa èu di dhu sarani Ja'a. Dènge j'ara sèmi ne'e, èdhi tao madhutu dad'èi Ama Lamatua.”
Ropa tadèngi nare, ka Yohanis b'ala, aku nèngu na, “Sad'i aku Èu” Hèia Yohanis sarani Yesus.
16 Ropa sarani èle, ka Yesus kalua nèti d'ara loko. Cag'ag'a laa, liru bhoke eele. Hèia ladhe nèdhi Roh Ama Lamatua puru mai, nuka sèmi koro j'aha dhu mai tèka mi Nèngu. 17 Hèia ra tadèngi lii Ama Lamatua nèti dedha-liru, peka na,
“Nèngu ne, Ana pasue Ja'a.
Nèngu pakarej'e taruu d'ara Ja'a.”h