Yohanis tuka sarani pakako sasab'a-la'a na
3
1-2 Taa èèna, Tiberius j'aj'i dhèu aae kapai dhu nèd'u paredha ètu Roma, canguru lèmi tèu kèna. Pontius Pilatus j'aj'i gubernur ètu propensi Yudea. Herodes j'aj'i gubernur ètu propensi Galilea. A'a Herodes ka Pelipus, j'aj'i gubernur ètu propensi Iturea dènge propensi Trakonitis. Aa Lisanias j'aj'i gubernur ètu propensi Abilene.aTaa èèna kahèi Hanas dènge Kayafas, dhu j'aj'i kètu kapai risi agama Yahudi ètu kota Yerusalem.
Lod'o èèna, Yohanis, ana Sakaria, dhu pea ètu era kaj'èu nèti rae. Ètu era ne'e, Lamatua pangèd'u ne lii. 3 Ropa tadèngi nare, hèia Yohanis la'e asa d'ara rae dhu dètu dènge loko Yarden, ho peka dènge dhèu-dhèu ètu sèra, aku nèngu na, “Miu hud'i ele-ho'a ku, aa tèke eele sasala-sasigo miu aa'i-aa'i, sèna ka Ama Lamatua saku eele sasala sèra. Èle èèna, miu sarani uuru ku, sèna ka j'aj'i mi tadha, peka na, miu pabe'a le dènge Lamatua.”
4 Uru-uru sèra, baki Yesaya, dhèu nèti lii padhai Lamatua, suri tèke le lula-nèti Yohanis ne, peka na,
“Abhu dhèu dhu ètu d'ara mamoo, pa'oo, peka na:
‘Dhèu aa'i-aa'i pa'èra, sèna ka tao paie-iie j'ara, ho sèmi mamai Lamatua!
Pamola j'ara sèna ka lami soru Ne.
5 Dhènu pamera era kajèlo aa'i-aa'i.
Tao pamera-mera ledhe aa'i-aa'i.
Tao pamola j'ara dhu koe-kalèko,
tao pamilu j'ara dhu ako kabhuku.
6 Sèna ka dhèu nèti suku aa'i-aa'i ra
bisa re'a, na, Ama Lamatua neo pakaj'èu dhèu
nèti sasala-sasigo ra.”’b
7 Dhèu ae mai nèti mia-mia, manèngi ho Yohanis sarani si. Te ngaa na jèke si, peka na, “Miu se dhèu kapod'e-kabèli! Miu èci èèna ka mege dhu dènge raco! Mage miu pangee na miu bisa pakaj'èu nèti hahuku Lamatua, sad'i dhoka ele-ho'a di! Aad'o! Nèbhu heka Lamatua huku dhèu aa'i-aa'i dhu tare'a-re'a ele boe ho'a.c 8 Mage miu pangee na, ‘Ja'a ne lèke boe huku, lula ja'a ana-èpu baki Abraham.’ Abhu ètu mia sèmi èèna? J'aj'i ana-èpu Abraham bisa boe tao miu j'aj'i dhèu mola-mèci. Lamatua bisa tao hadhu se, sèna ka j'aj'i ana-èpu Abraham. Ja'a peka kèna! Pad'elo ètu d'ara mamuri miu, dhu peka na, miu tèke eele le sasala-sasigo miu, aa mai ho madhutu Lamatua.d 9 Miu hud'i tao ku j'ara be'a. Ladhe aad'o, na, hahuku Lamatua dhu bia, bèbhe mai lèke miu, nuka sèmi dhèu pake kataka ho patue aj'u nèti amo na. Nuka sèmi èèna ka! Aj'u dènge boe guna, ladhe hua-hela na nèti boe babe'a! De be'a risi patue ne, aa core eele asa d'ara ai la'e.”e
10 Hèia dhèu ae karèi Yohanis, “Ladhe sèmi èèna, ji'i se tasamia?”
11 Ka na dhaa, peka na, “Ladhe èu dènge kodho dua bèla, hia èci sa dhèu dhu dènge boe kodho. Aa ladhe èu dènge nganga'a, bagi hia dhèu dhu dènge boe nganga'a.”
12 Hèia dhèu roro bea mai manèngi kahèi, sèna ka Yohanis sarani si. Ka ra karèi, peka na, “Ama mese! Ji'i se hud'i tao sèmi ngaa ku?”f
13 Ka na dhaa, “Miu se d'èi kapod'e-kabèli. De nèti deo ne'e, miu hud'i sab'a ku dènge mola. Baku roro bea risi nèti atora paredha. Hud'i laa kabarai b'ae madhutu atora na.”
14 Abhu kahèi sordad'u pèri-pèri ètu sèra. Ra karèi, na, “Ji'i se hud'i tao ku sèmi ngaa?”
Hèia Yohanis b'ala, peka na, “Baku parama doi-dhari dhèu madhutu dad'èi miu. Aa baku galaa leli dhèu. Ladhe sèmi mere gaji, miu hud'i manèngi makasi mi Lamatua, aa rasa d'ai le dènge gaji èèna.”
15 Ropa ra tadèngi rare, dhèu se mulai pagagai aa paka'uu èci dènge èci, peka na, “Eeh! Tao-tao Yohanis ne, Kristus, dhu Lamatua peka karèi nèti uru ka, neo hia mai èèna!”
16 Te ngaa Yohanis b'ala si, peka na, “Nanene paie! Bèli-camèd'a, Dhèu èci mai dhu kapai risi nèti ja'a. Masi ka j'aj'i ana pua-paleha Na, ja'a ne bisa boe sa hèi.g Ja'a ne sarani miu dhoka pake èi di, te ngaa bèli-camèd'a Na tao risi eele nèti ja'a, te Na papènu d'ara miu dènge Roh Lamatua dhu Mola-Mèci. Aa Na pamèu d'ara miu nuka sèmi dhèu pake ai ho tunu maruru. 17 Na huku dhèu dhu ad'u-ue sasala, tao si cakaraa dhèu sab'a oka, dhu patiri are ho ngèlu tiu eele kètu na. Èle ku, heka soli are dhu mèu asa d'ara soka, aa kètu dènge kaj'alu are sèra, tunu pakèpu si. Nuka sèmi èèna kahèi, bèli-camèd'a Kristus huku dhèu dhu ad'u-ue sasala, dènge j'ara pèci si asa d'ara ai dhu heo robhe-robhe dhu madhe nèdhi boe.”
18 Dènge j'ara ne'e Yohanis pasanèd'e dhèu nèti rupa-rupa madha j'ara, aa lole dènge ra Lii Lolo Be'a Lamatua.
19-20 Taa èèna, Yohanis padhai lii pahuni heka, j'ara-j'ara dhu Herodes ad'u-ue. Lii langu Herodes nuka sèmi ne'e ka: Herodes ne, gubernur ètu propensi Galilea. Sasala na udhu sèmi kadhèna hèru hadhu sa. Sasala na èci ka, parame nare Herodias, dhèu èmu ari na, masi ka ari na mamuri era, dhu dhae pa'ia mèka. J'ara mamuri Herodes sèmi ne'e, ka Yohanis kai dènge madha na, toke Herodes nasa dènge ne. Nèti èèna ka, Herodes kèpe ne, hèia pamaso asa d'ara èmu bèdho.h
Yohanis sarani Lamatua Yesus
21 Uru èèna, lod'o dhu ra kèpe mèka Yohanis ne, nèngu sarani dhèu ae le. Aa na sarani Yesus kahèi. Sarani èle, ka Yesus sabaj'a, kabèdhi laa, liru bhoka eele. 22 Hèia Roh Lamatua dhu Mola-Mèci puru mai sa Yesus. Roh ne rupa na sèmi koro j'aha sa. Hèia lii nèti dedha-liru peka na,
“Èu ne, Ana pasue Ja'a.
Èu ne, loe boe pakarej'e d'ara Ja'a.”i
Bèi-baki Lamatua Yesus madhutu nèti bèi-baki Yusuf
23 Lod'o Yesus mulai lole dènge dhèu j'ara mamuri Lamatua, umur Na pe d'ai tèlu nguru tèu sa. Dhèu tadhe Yesus ne, Ana nèti Yusuf. Bèi-baki Yusuf sèmi ne'e:
Yusuf, ama na, Eli.
24 Eli, ama na, Matat.
Matat, ama na, Lewi.
Lewi, ama na Melki.
Melki, ama na, Yanai.
Yanai, ama na, Yusuf.
25 Yusuf, ama na, Matatias.
Matatias, ama na, Amos.
Amos, ama na, Nahum.
Nahum, ama na, Hesli.
Hesli, ama na, Nagai.
26 Nagai, ama na, Maat.
Maat, ama na, Matatias.
Matatias, ama na, Semein.
Semein, ama na, Yosek.
Yosek, ama na, Yoda.
27 Yoda, ama na, Yohanan.
Yohanan, ama na, Resa.
Resa, ama na, Serubabel.
Serubabel, ama na, Sealtiel.
Sealtiel, ama na, Neri.
28 Neri, ama na, Melki.
Melki, ama na, Adi.
Adi, ama na, Kosam.
Kosam, ama na, Elmadam.
Elmadam, ama na, Er.
29 Er, ama na, Yosua.
Yosua, ama na, Elieser.
Elieser, ama na, Yorim.
Yorim, ama na, Matat.
Matat, ama na, Lewi.
30 Lewi, ama na, Simeon.
Simeon, ama na, Yahuda.
Yahuda, ama na, Yusuf.
Yusuf, ama na, Yonam.
Yonam, ama na, Elyakim.
31 Elyakim, ama na, Melea.
Melea, ama na, Mena.
Mena, ama na, Matata.
Matata, ama na, Natan.
Natan, ama na, Daud.
32 Daud, ama na, Isai.
Isai, ama na, Obet.
Obet, ama na, Boas.
Boas, ama na, Salmon.
Salmon, ama na, Nahason.
33 Nahason, ama na, Aminadab.
Aminadab, ama na, Admin.
Admin, ama na, Arni.
Arni, ama na, Hesron.
Hesron, ama na, Peres.
Peres, ama na, Yahuda.
34 Yahuda, ama na, Yakob.
Yakob, ama na, Isak.
Isak, ama na, Abraham.
Abraham, ama na, Tera.
Tera, ama na, Nahor.
35 Nahor, ama na, Seruk.
Seruk, ama na, Rehu.
Rehu, ama na, Pelek.
Pelek, ama na, Eber.
Eber, ama na, Sela.
36 Sela, ama na, Kenan.
Kenan, ama na, Arpaksad.
Arpaksad, ama na, Sem.
Sem, ama na, Noh.
Noh, ama na, Lamek.
37 Lamek, ama na, Metusalak.
Metusalak, ama na, Henok.
Henok, ama na, Yared.
Yared, ama na, Mahalalel.
Mahalalel, ama na, Kenan.
38 Kenan, ama na, Enos.
Enos, ama na, Set.
Set, ama na, Adam.
Adam ne'e ka, pa'ue-ai Ama Lamatua.