Sara nara iisi Isak
21
1-7 Èle èèna ka, LAMATUA hia Sara mèngi-nale madhutu lii pajaji Na. Lod'o Sara dènge babia, Abraham dhu heka le. Ropa Sara nara iisi, umur Abraham d'ai cangasu tèu kèna. Lod'o Sara d'ai hèru, ka nara iisi ana mone ca dhèu. Ka Abraham pangare ne, Isak (dhu sasoa na ‘na mari’).Sara peka hèi, aku nèngu na, “Ama Lamatua tao ja'a mari, lula ja'a karej'e. Dhèu ae ka dhu pangee na, ja'a ètu d'ara heka sèmi ne'e ne, abhu heka ana. Masi ka dhèu èmu ja'a heka bhoro le, te ja'a bisa kora iisi ana hia ne. Èèna na, ladhe dhèu tadèngi j'ara ne'e, rèngu aa'i-aa'i ra mari kahèi dènge ja'a ne.”
Ropa Isak d'ai aru lod'o, Abraham suna ne, madhutu paredha Ama Lamatua.
Ra babège eele Hagar dènge Ismael
8 Isak kapai ka noo-noo. Ropa oe d'ai lod'o luri susu, Abraham tao tatao aae.
9-10 Ca tèke, Sara ladhe nèdhi Ismael, ana nèti dhèu èmu limuri Abraham, padadisi dènge Isak. Ropa nèdhi sèmi èèna, Sara peka dènge dhèu èmu na, “Bège eele ènu Masir nèi dènge ana na! Te, ja'a ko'o boe ana ènu èèna unu pusaka, masi ka ciki oo'e èèna ka. Dhoka ana ja'a Isak di, dhu abhu sèra aa'i-aa'i.”
11 Ropa Abraham tadèngi lii padhai Sara ne, ka d'ara na ako be'a boe, lula Ismael ne, ana d'èlu na kahèi. 12 Te ngaa Ama Lamatua lii dènge Abraham, peka na, “Abraham! Èu baku ngee pa'ae dhèu èmu limuri èu, dènge ana na. Madhutu la dad'èi Sara ne, lula bèli-camèd'a, èu abhu ana-èpu dhu Ja'a moa tèke èèna, nèti Isak ne'e ka. 13 Te ngaa Ja'a hia kahèi mèngi-nale mi ana nèti dhèu èmu limuri mu, lula nèngu ne, ana d'èlu èu kahèi. Bèli-camèd'a, ana-èpu na j'aj'i suku èci kahèi.”
14 Bèli mad'ae aae èèna, Abraham tao gee j'ara hia Hagar, aa na kadhoe èi d'ara babo'i cue mi kabela-kao na. Hèia na patabuli ka bhèni ne dènge ana na Ismael, ho lasi. Ka ra kako palème d'ara mamoo dhu dètu dènge Beer-Syeba.a
15 Ropa èle èi rinu ra, Hagar tèke eele ana na ètu d'ara mamaho aj'u iiki ca kapua. 16 Ka na pangee ètu d'ara na, “D'ara ja'a la'e boe, ladhe ja'a kèdhi mamadhe ana ja'a.” Ka na madhèdi ako kaj'èu nèti ana na, pe d'ai lèmi nguru meter sa. Ka na tangi dènge lii roma iisi.
17 Lula Ama Lamatua dhu tadèngi lii tangi Ismael, ka ana pajuu Na mai nèti sorga, ka paroa Hagar, aku nèngu na, “Hagar! Nga tao ka, èu j'èra ae sèmi ne'e ne? Baku madha'u ia ka, te Lamatua tadèngi le lii tangi ana èu. 18 De kèd'i lamu more ana nèi. Pa'èra d'ara na, te bèli-camèd'a Ja'a paj'aj'i ana-èpu na, suku èci dhu kapai.”
19 Ka Ama Lamatua pasaraa musi madha na. Cag'ag'a laa nèdhi dènge, èi ca madha ètu era èèna. Hèia la'e soli èi asa d'ara babo'i, ka na panginu ana na Ismael.
20-21 Ka Ismael dènge ina na Hagar pea dènge ka ètu d'ara mamoo Paran. Ismael asa na kapai, aa ne'a mèu kataki. Ka ina na paleo ne dènge ana bhèni Masir ca dhèu. Se'e se j'aj'i, lula Ama Lamatua bera-bera dènge Ismael.
Abraham padame dènge Abimelek ètu Beer Syeba
22 Lod'o èèna, dhèu aae Abimelek dènge kètu kapai sordad'u na, Fikol, mai pangad'o dènge Abraham. Hèia dhèu aae padhai lii, ka na peka, “Abraham! Ji'i se nge'a Ama Lamatua bera-bera dènge èu. Nèti èèna ka, sad'i èu ad'u ngaa sa èci, j'aj'i dènge be'a. 23 De ja'a manèngi, sèna ka èu subha ètu katanga madha Ama Lamatua, dhu peka na, èu bisa boe kapod'e-kabèli ja'a, dènge ana-èpu ja'a aa'i-aa'i ra. Sèmi dhu ja'a tao le be'a mi èu, na, èu hud'i tao be'a kahèi mi ja'a dènge kabarai ja'a.”
24 Ka aku Abraham na, “Ooo! Ja'a subha.”
25 Te ngaa èle èèna ka, Abraham lapor dènge dhèu aae, aku nèngu na, “Dhèu-dhèu ama dhèu aae parame rare èi ja'a ca madha.”
26 Tadèngi sèmi èèna, hèia na peka, “Waa! Ja'a heka tadèngi kèna j'ara ne'e ne. Tasamia ka karèi nèti ca hari ni, èu peka boe dènge ja'a? Ja'a dhae ke'a mèka, ne'e ne tatao cee ka ne.”
27-28 Èle èèna ka, Abraham dènge Abimelek pa'èki lii pajaji. Ka Abraham hia Abimelek sapi dènge kahib'i-kalèbho. Èle èèna ka, Abraham hag'e nare hari kahib'i-kalèbho èni pidhu ngi'u. 29 Hèia dhèu aae karèi ne, peka na, “Nga tao ka èu tao sèmi èèna?”
30 Ka Abraham peka, aku nèngu na, “Ama dhèu aae. Sèmi la kalèbho èni pidhu ngi'u se, sèna ka j'aj'i tadha dhu ama peka le na, ja'a ka dhu kèi èi na.”
31 Lula dua ra dhu pa'èki le soo-subha ètu èèna, ka era na ra pangare na Beer-Syeba (dhu sasoa na, ‘madha èi soo-subha’).b
32 Ropa pasubha èle, ka dhèu aae dènge kètu kapai sordad'u na lèpa ka, asa era rèngu, rai dhèu Pilistin. 33 Èle èèna ka, Abraham sèle aj'u tamareskac ca kapua ètu Beer Syeba. Karèi nèti lod'o èèna, aj'u ne pasanèd'e Abraham, lula ètu era èèna ka, nèngu mangaj'i LAMATUA dhu Mamuri Toke D'ai Mia-Mia. 34 Ka Abraham pea dènge ka ètu talora dhèu Pilistin sèmi dhèu tao mai.