Abraham padhane dhèu èmu na Sara
23
1-2 Lod'o Sara madhe, umur na 127 (ca ngasu dua nguru pidhu) tèu le. Lod'o na madhe èèna, Abraham si pea ètu rae Kiryat-Arba (nuka Hebron), ètu rai Kana'an. Ka Abraham beke aa tangi dhèu èmu na dènge d'ara pèd'a.3 Hèia Abraham kèd'i la'e paraga dènge dhèu-dhèu Het. Ka na peka dènge si, aku nèngu na, 4 “Ja'a ne, dhèu tao mai ètu talora miu se. Ja'a dhu dènge boe rai ca kasib'i sa, sèna ka padhane dhèu èmu ja'a. De ladhe miu sue ja'a, ja'a hèli kore rai miu d'ai ca kasib'i sa, ho tao era padhane ne.”
5 Hèia ra dhaa, aku rèngu na, 6 “Sèmi ne'e, ama! Nèbhu nare sange ne'e, ji'i se tadhe le ama, dhu sama sèmi ca dhèu, dhèu heka dhu ji'i pakab'ua. De sad'i ama d'èi rai mia dhu be'a, dhu pamèci dènge dad'èi ama. Ji'i se dhoka ngo'o di; dhèu èci sa dhu magee boe.”
7 Hèia Abraham pacud'u iisi ho hia hormat mi lamatua rai, dhèu Het sèra. 8 Ka na padhai lii, peka na, “Ladhe miu sèmi lii ja'a na, ja'a manèngi ho peka dènge ana mone Sohar, dhu ngara na Efron. 9 Peka dènge ne, ladhe na d'èi, na pahia dènge ja'a loe na, Makpela, dhu ètu karasa oka na. Na manèngi ca ngaa èèna ka, ja'a tihe. Ja'a neo tihe pama'ète kab'ua na, ètu madha miu aa'i-aa'i mi, sèna ka rai èèna j'aj'i unu ja'a. Ja'a neo tao era èèna, j'aj'i mi ro'a dhèu madhe ji'i.”
10 Lod'o èèna, Efron madhèdi ètu era èèna kahèi, dènge dhèu-dhèu Het sèra. Ka na tadèngi kahèi lii padhai lii Abraham deo na. Hèia na kèd'i titu, ka na b'ala Abraham ètu madha dhèu heka aa'i-aa'i ra ètu sèra, aku nèngu na, 11 “Baku sèmi èèna, ama! Sèmi ne'e ka laa! Oka dènge loe Makpela èèna, ja'a hia iia ama. Sèna ka mu padhane dhèu èmu èu mi èèna. Ja'a pangèd'u rai èèna mi ama, ètu madha dhèu-dhèu ja'a se. Sèna ka rèngu aa'i-aa'i ra j'aj'i sakasii!”
12 Ka Abraham pacud'u kètu hari mi dhèu Het se. 13 Hèia na peka dènge Efron, aku nèngu na, “Sèmi èèna oo, be'a kahèi. Te ngaa miu nanene lii ja'a, la ma. Ja'a neo hèli pama'ète rai na, sèna ka j'aj'i era padhane dhèu-dhèu ja'a.”
14-15 Hèia, aku Efron na, “Rai èèna, kab'ua na, dhoka èpa ngasu doi pudhi di. Guna ngaa èdhi dua ti padhue kab'ua rai ciki oo'e èèna, dhu sasoa na aad'o. De lamu ka, ho mèti dhèu madhe na, sèna ka padhane ne ètu nèi.”
16 Ka Abraham d'èi kahèi dènge kab'ua na sange èèna, madhutu sèmi lii Efron. Hèia ètu madha dhèu ae-ae sèra, na ige nare doi pudhi èpa ngasu, tihe kab'ua rai èèna mi Efron.
17-19 De dènge j'ara sèmi èèna, Abraham abhu dènge rai ne nèti Efron, j'aj'i mi unu na. Rai na nuka ètu Makpela, padètu dènge Mamre (nuka Hebron). Na hèli pama'ète rai ne dènge oka na, dènge loe na, aa dènge aj'u aa'i-aa'i ra. Dhèu-dhèu heka nèti suku Het, aa'i-aa'i ra ka dhu j'aj'i sakasii, peka na, rai èèna dènge isi aa'i-aa'i j'aj'i le unu Abraham.