2 Petrus
Sasuri Petrus ka dua
Lii maho'o
1
Sasuri ne nèti ja'a, Simon Petrus.a Ja'a j'aj'i ana pua-paleha Yesus Kristus. Ja'a j'aj'i dhèu pajuu-paleha Na kahèi, dhu Na pua laku asa mia-mia ho lole dènge dhèu lula-nèti Nèngu.Ja'a suri sasuri ne hia miu, dhu parcaya le Yesus Kristus. Lula d'ara mola Ama Lamatua, ka Na bhoke j'ara ho miu bisa parcaya Kristus kahèi, sama sèmi ji'i. Parcaya ne kab'ua titu kèna hia èdhi aa'i-aa'i ti. Kristus èèna j'aj'i Ama Lamatua èdhi, aa Nèngu kahèi j'aj'i Dhèu dhu patalale èdhi nèti koasa sasala-sasigo.
2 Ja'a manèngi sèna ka miu tadhe mèu Ama Lamatua, aa tadhe Kètu èdhi, Yesus, dènge be'a. Hud'i laa sèna ka Rèngu pad'elo d'ara hua iia Ra mi miu, ho miu bisa mamuri dènge dame aa mera-milu èci dènge èci.
Lamatua pili nare dhèu unu Na, ka paroa si ho mai asa Nèngu
3 Yesus dhu dènge koasa èci èèna ka dènge Ama Lamatua. Nèti èèna ka, Yesus papala èdhi aa'i-aa'i ti ngaa-ngaa dhu èdhi parluu, sèna ka mamuri mola madhutu dad'èi Lamatua. Nèngu tao sèmi èèna, lula èdhi tadhe mèu Ne. Aa Na paroa èdhi ho j'aj'i dhèu unu Na, lula d'ara hua iia dènge dadedha Na. 4 Yesus hia le èdhi j'ara aa'i-aa'i dhu hua iia. Te uru èèna, Na padhadha tèke le ho neo hia j'ara se'e. Lii padhadha Na, aa'i-aa'i be'a titu kèna. Yesus hia aa'i mèu-mèu se'e mi èdhi, sèna ka d'ara èdhi bisa sama sèmi d'ara Lamatua. Aa èdhi bisa lehe tare j'ara-j'ara karehe dhu dhèu ètu rai-haha ne d'èi ad'u-ue, lula rèngu mamuri d'èi dhoka tao madhutu dad'èi unu ra, aa dhu taha rare boe d'ara ra.
5 Nèti èèna ka, ja'a manèngi sèna ka miu pa'èra tao j'ara dhu be'a.
Mema miu parcaya le Yesus, te ngaa èèna dhae d'ai mèka.
Sab'a taruu j'ara dhu be'a.
Tadhe Lamatua dènge be'a risi hari.
6 Te ngaa mage d'ai dhoka sange èèna di.
Patema mamuri ho taha mere d'ara.
Te ngaa sèra dhae d'ai mèka kahèi.
Lod'o-lod'o miu abhu sasusa, na, miu hud'i pa'èra d'ara ho baku hari kabodho.
Te ngaa tao parisi hari nèti èèna.
Tao aa'i mèu-mèu madhutu dad'èi Lamatua.
7 Te ngaa mage dhoka d'ai sange èèna di.
Pad'elo sasue mi a'ari èdhi dhèu parcaya sèra.
Te ngaa èèna dhae d'ai mèka kahèi.
Te miu hud'i mamuri pasue taruu.
8 Ladhe mamuri miu sèmi sèra ka, aa j'ara dhu be'a asa tabha taruu, na, sèra sa hia miu asa tadhe mèu Kètu èdhi, Yesus Kristus. Te j'ara dhu be'a ele boe iia d'ara, aa core eele boe lod'o kahèi. Te j'ara be'a se'e ka dhu tao d'ara miu ho me'a mèu Nèngu. 9 Ladhe abhu dhèu dhu d'èi boe tao sèmi sèra, sasoa na, ngangee nèngu bab'a. Nèngu nèdhi boe ngaa ètu madha nèngu, nuka sèmi dhèu bèdhu. Te Lamatua dhu saku eele le sasala na, sèna ka d'ara nèngu bisa mola-mèci. Te ngaa dhèu ne bhèlu eele!
10 A'ari pasue aa'i-aa'i! Miu limuri ne hud'i bori dhari asa pa'èra. Lamatua hag'e nare le miu j'aj'i dhèu unu Na, ka miu lami asa madha Na. De miu hud'i pad'elo ku, na, miu j'aj'i le ana-èpu Na. Ladhe j'ara dhu ja'a peka se tabha taruu ètu mamuri miu, na, miu manahu boe. 11 Dènge j'ara ne, Ama Lamatua bagi hia miu j'ara èci dhu kapai titu kèna. Nuka Na bhoke pataleo j'ara, dènge pangèd'u miu hak, ho sèmi mere Yesus Kristus j'aj'i Dhèu Aae miu, sèna ka miu mamuri toke d'ai mia-mia dènge Ne. Te Yesus Kristus ne, Kètu èdhi. Aa Nèngu kahèi, Dhèu dhu patalale èdhi nèti koasa sasala-sasigo èdhi.
Nga tao ka Petrus pasanèd'e sèmi èèna?
12 Miu me'a le j'ara-j'ara dhu ja'a peka deo sa, aa miu taha pa'èra, lula miu parcaya ngaa dhu lèke. Masi ka sèmi èèna, te ngaa ja'a loe boe pasanèd'e miu pahari-pahari, sèna ka miu baku bhèlu eele. 13 Ja'a ko'o boe ladhe miu pabhèlu eele j'ara sèra. Ja'a d'èi pasanèd'e miu taruu, sèna ka miu pajiko taruu j'ara se'e se, ètu d'ara kahadhu miu. Te lod'o ja'a mamuri ètu rai-haha ne era, mema sala boe ladhe ja'a loe boe pasanèd'e j'ara se'e mi miu. 14 Nèbhu heka, ja'a madhe, sama sèmi Kètu èdhi, Yesus Kristus peka le dènge ja'a. Nèti èèna ka, ja'a ke'a le. 15 Masi ka bèli-camèd'a ja'a madhe, te ngaa limuri ne, ja'a tenge j'ara ho miu sanèd'e taruu j'ara se'e.
Ji'i ngèdhi le dadedha Yesus
16 Ca hari na, ja'a dènge angalai ja'a lole le dènge miu, lula-nèti Kètu èdhi, Yesus Kristus. Ji'i peka kahèi, na, bèli-camèd'a ladhe Kristus lèpa hari mai, mamai Nèngu èèna dènge koasa dhu kapai titu kèna. Lèke, si? Dhu ji'i lolo se, nanuku boe. Lula ji'i lole dhoka dhu ji'i ladhe ngèdhi dènge musi madha ji'i unu mi! Nèti èèna ka, ji'i nge'a, na, dadedha Yesus Kristus ne nuka sèmi dhèu aae kapai sa. 17-18 Ca tèka, ji'i sama-sama dènge Yesus ètu ledhe mola-mèci Lamatua. Hèia Ama Lamatua mesa Na ka dhu peka lula-nèti dadedha Yesus ne. Te lod'o èèna, ji'i tadèngi lii dhu be'a titu kèna mai nèti dedha-liru, peka na,
“Ne'e ne, Ana pasue Ja'a.
Nèngu ka dhu pakarej'e d'ara Ja'a.”b
19 Èèna ka dhu tao ji'i asa lèka èra lula-nèti j'ara-j'ara dhu uru sèra ji'i abhu nèti dhèu rèti lii padhai Lamatua. De hua iia risi miu tao madhutu lii moa dhèu se'e! Te lii moa rèngu sèra, nuka sèmi labhu èci dhu pasaraa ètu d'ara maroga. De miu hud'i nanene paie-iie ku lii moa se, toke d'ai Yesus mai hari. Dènge j'ara ne'e, miu asa tabha me'a mèu. Te èèna na nuka sèmi miu mèdhi uuru ku hua-hètu aae dhimu, hèia lod'o heka rea kèna ho pasaraa aa'i mèu-mèu.