Lamatua' Yesus
Ded'enu na ra Dud'ui na
Lamatualain helu nae haitua Dula-d'ale Meumare na
1
1-3 Ama Teofilus nenesue'.a Sod'a-mole' mia au, Lukas.Sia au susura dalahulu ngga, au sura' mema' basa-basa' e so'al Lamatua' Yesus masod'an. Naeni, basa ue-tataon ma basa nanorin, eni' a mia fefeun. Ma Ana here nala atahori ded'enu na ra. 'Ona' mae atahori ra ra'asususa' E noo tao risa E, te Lamatualain tao nasod'a bali' E. Lele' Ana nasod'a bali' ma natud'u aon neu ded'enu na ra. Ara rita E nasafafali losa fai haa nulu, de rahine rae teb'e-teb'e' Ana nasod'a bali' ena. Ana o nafad'e se 'oi, Lamatualain 'ona' Mane' mana to'u parenda'. Ma Ana o denu se pake Lamatualain Dula-d'ale Meumaren koasa na. Losa ma'ab'uin, Ana hene bali' sorga neu.
Basa naa ra, au sura' dalahulu na.
4-5 Lao esa, Yesus na'ab'ue noo atahori ded'enu na ra mia lete' Saitun. Ana parenda se nae,
“Misined'a! Dalahulun Yohanis sarani atahori pake 'a oe, te mete ma mihati fai hira fai, na, Lamatualain nae tao lena' seli, huu Ana nae fee Dula-d'ale Meumaren neu nggi. Dad'i 'afi' lao hela Yerusalem ia dei. Mihati losa Ama ngga fee Dula-d'ale Meumaren neu nggi, 'ona' Ana helu' a. Ma Au o 'ufad'e basa naa neu nggi ena boe.”b
Lamatua' Yesus hene sorga neu
6 Lele' Yesus na'ab'ue noo ded'enu na ra, ma ara ratane E 'oi, “Ama'! Hai mae mitane ta'o ia: Ama' nasaned'a ma'ahulun lele' nusa Isra'el fe'e parenda ao na. Te ia naa, atahori fea' parenda hai. Dad'i Ama' nau mbo'i hai mia parenda na ra 'oras ia, do hai musi mihati fai fea' fai?”
7 Te Yesus nataa, nae “Hei nda parluu mitane fain sa. 'Aka' Ama ngga na'ena hak ator fai na. 8 Te Lamatualain Dula-d'ale Meumaren maso' nisi' hei, dei fo hei hambu koasa. Basa naa, hei musi mifad'e so'al Au neu basa atahori sia Yerusalem, ma basa kambo' sia nusa Yud'ea noo nusa Samaria, nakandoo losa raefafo' a suu na.”c 9 Yesus 'ola' basa ma, Lamatualain so'u E lalai ata neu mia mata na ra, losa lelee' a tatana nala E, de ara nda rita E sa ena.d
10 Lele' ara fe'e mete lalai a, ma 'aib'oi' ma atahori rua rambarii' sia bob'oa na ra, pake bua muti'. 11 Atahori karua' naa ra rae “Wee! Atahori Galilea ra, e! Saa de hei fe'e mete titindindii lalai a? Faa' ra hei mita noo mata ma ra Yesus hene lalai neu losa lelee' a tatana nala E. Hei mita Ana hene ta'o bee, na, dei fo Ana o 'onda bali' ta'o naa boe.”
Ara sangga atahori nggati Yud'as
12 Basa naa ma, Yesus ded'enu na ra 'onda mia lete Saitun risi' kota Yerusalem. Lete' naa, dod'oon mia kota , mbei ma kilo esa.e
13 Losa naa ma, ara risi' ume sa fo numban. Basa de ara hene risi' kama ata'. Yesus ded'enu na ra, naeni:
Petrus,
Yohanis,
Yakob'is,
Anderias,
Filipus,
Tomas,
Bartolomeos,
Mateos,
Yakob'is (Alfius ana na),
Simon (anggota partei Selot),f
ma Yud'as (Yakob'is ana na).g
14 Basa se biasa ra'ab'ue hule-o'e noo rala' esa. Ara o hule-o'e roo Yesus inan Maria, roo ina' laen hira ma Yesus 'od'i na ra.
15 Lao esa boe, ara ra'ab'ue selu' mbei ma atahori natun esa rua nulu. Boe ma Petrus fela nambarii' de 'ola' nae, 16 “Ina-ama toronoo ngga ra, e! Fe'e misined'a Yud'as, do? Ana mana nendi atahori nononggo' esa reu humu Yesus. Yud'as ue-tataon naa, mema' musi ta'o naa. Te ma'ahulun, Lamatualain Dula-d'alen pake mane Daud fo sura' so'al Yud'as 'ona' naa. 17 Te ma'ahulun eni, hita atahori na. Eni o ue-tao noo hita boe.”
18 (Yud'as seo basa Yesus ma, atahori ra ha'i rala doi manggenggeo' naa, de reu hasa rae ombat esa. Basa ma, rae naa dad'i Yud'as mamana mamate na. Ana tud'a na'atotono' mia naa, losa 'ambun fanggi, de tei ndoon loo dea neu. 19 Basa ma, atahori ra dui-bengga esa noo esa losa basa atahori mana leo sia kota Yerusalem, rena Yud'as mamate na. Naa de ara bab'ae rae naa tungga sira ded'ea Aram na 'oi ‘Hakeld'ama’, sosoan ‘Rae Raa'’.)h
20 Basa ma, Petrus 'ola' nakandoo nae “Dalahulun mane Daud sura' basa ta'o naa sia susura Sosod'a Koa-kio' rala nae,
‘Hela fo mamana leleon, dad'i rou';
atahori nda bole leo sia naa sa.’
Boe ma ana o sura' 'oi,
‘Hela fo ue-tataon naa, fee neu atahori laen’i
21-22 Dad'i hita musi sangga atahori nggati Yud'as. Ata sangga atahori sa mana tungga na'ab'ue noo hita doo' ena. Eni ia, musi atahori mana tungga deka noo Lamatua' Yesus sud'i 'a bee neu, eni' a mia Yohanis sarani Yesus. Ana o musi nita noo matan, Lamatua' Yesus nasod'a bali' mia mamaten, losa Ana hene bali' sorga neu.”j
23 Petrus 'ola' basa ta'o naa ma, atahori mana tungga ra'ab'ue sia naa ra fee nara' rua. Esa naran Matias, ma esa naran Yusuf (ara biasa ro'e Yusuf ia rae Barsab'as; ma naran esa fai, Yustus). 24-25 Basa ma ara hule-o'e rae, “Ama' sia nusa sorga. Ama' bub'ulu' teb'e basa atahori rala dud'u'a na. Yud'as tud'a, de mate hela ue-tatao na. Dad'i Ama' mutud'u hai mia atahori rua ia ra, Ama' here seka nggati Yud'as, fo hai so'u e dad'i Lamatua' Yesus ded'enu na.” 26 Basa ma, ara nggari lot pake atahori karua' ra nara na. Boe ma lot a tud'a neu Matias. Naa de, ara so'u e, dad'i ded'enu' noo sira kasanahulu esa ra.