Lamatua' Yesus hule-o'e soa' neu ao na
17
1-2 Yesus 'ola' basa na'o naa, boe ma Ana 'oro'aa mbali lalai a, de hule-o'e nae:“Ama susue'. Au fai ngga losa ena fo Ama' so'u munanaru Au. Au ia, Ama' Ana na. Ama' fee Au hak ena fo ator basa atahori sia raefafo' ia. Ama' fee hak naa, fo Au fee masoi-masod'a ndoo-tetu' nda mana basa' sa neu basa atahori fo Ama' fee dad'i atahori ngga. Dad'i lele' ia, Au 'o'e fo Ama' so'u munanaru Au, fo Au bisa 'utud'u Ama' mandete-masa'a na. 3 Eni dalan fo hambu masoi-masod'a ndoo-tetu' nda mana basa' naa sa, 'ona' ia: atahori musi rahine Ama', naeni Lamatualain matetu' a. Nda hambu laen sa ena. Ara musi rahine Au, naeni Yesus Kristus, fo Ama' denu raefafo' 'uma. 4 Au 'utud'u Ama' mandete-masa'an sia raefafo' ia. Au tao basa ue-tataos fo Ama' fee neu Au' a. 5 Fai ma'ahulun, lele' Hita nda fe'e tao raefafo' ia sa, Au 'u'ub'ue 'oo Ama'. Lele' naa, Au manaseli ngga 'ona' Ama' mandete-masa'an boe. Ia naa Au 'ae bali' 'isi' Ama'. Dad'i Au 'o'e fo Ama' so'u munanaru Au, fo manaseli ngga bali' 'ona' ma'ahulun boe.”
Lamatua' Yesus hule-o'e fee ana mana tungga na ra
6 Yesus hule-o'e selu' nae, “Ama' fee atahori sia raefafo' ia dad'i atahori ngga ra ena. Au 'unori se ena, fo rahine Ama'. Ara dad'i Ama' 'enan, ma Ama' fee se dad'i atahori ngga ra boe. Boe ma ara tao tungga Ama' Ded'ea-'o'ola na. 7 Lele' ia ara rahine ena rae, basa dala' fo Ama' fee neu Au' naa, 'okan sia Ama'. 8 Huu Au 'unori se, basa Ded'ea-'o'ola' fo Ama' nafad'e nita neu Au ena. Ara o simbo Ded'ea-'o'ola' naa ra boe. Ara bub'ulu' rae, Au 'uma mia Ama'. Ara ramahere rae, Ama' mana denu Au raefafo' 'uma.
9 Au hule-o'e fee se. Au nda hule-o'e fee basa atahori sia raefafo' ia sa. Te Au hule-o'e fee neu 'aka' atahori fo Ama' fee neu Au, huu sira, Ama' 'ena na. 10 Huu basa mana dad'i Au 'ena ngga, dad'i Ama' 'enan ena boe. Boe ma basa mana dad'i Ama' 'enan, dad'i Au 'ena ngga ena boe. Ma Au atahori ngga ra naa ra, mana so'u rananaru Au. 11 Au nda leo 'ukundoo sia raefafo' ia sa ena, huu nda doo' sa te Au 'ae bali' 'isi' Ama ngga. Te atahori ia ra musi leo rakandoo sia raefafo' ia. De Ama', Meumare' teb'e. Dad'i Au hule fo Ama' munea se, mendi' koasa fo Ama' fee neu Au' a. Au o hule fo ara nenepa'a' dad'i esa, 'ona' Au nenepa'a' dad'i esa 'oo Ama'. 12 Lele' Au fe'e 'u'ub'ue 'oo se sia raefafo' ia, Au 'u'ub'oi se huu ara dad'i Ama' 'enan ena. Au 'unea malolole se fo ara nenepa'a' rakandoo roo Ama'. Nda hambu esa mopo sa boe. 'Aka' Yud'as saranggaa hela se, tungga saa fo nenesura' mema' sia Lamatualain Susura Meumaren eni' a ma'ahulun ena.a
13 Lele' ia, Au 'ae bali' 'isi' Ama'. Au 'ufad'e dala' ia ra lele' Au fe'e sia raefafo' ia. Noo ta'o naa, Au atahori ngga ra rala na ra ramaho'o rakandoo, 'ona' Au rala ngga namaho'o boe. 14 Au 'ufad'e Ama' Ded'ea-'o'ola ma ra neu se ena. Atahori laen sia raefafo' ia binci atahori ngga ra, huu Au atahori ngga ra nda rasod'a 'ona' se sa. Au o 'ona' naa boe, huu Au nda 'ona' atahori laen sia raefafo' ia sa. 15 Sia Au hule-o'e ngga, Au nda 'o'e fo Ama' lea hendi se sia raefafo' ia sa. Hoko'! Te Au 'o'e fo Ama' nanea se, fo ara ra'ad'oo' mia de'ulaka'. 16 Ara nda 'ona' atahori laen sia raefafo' ia sa, 'ona' Au o nda 'ona' atahori laen sia raefafo' ia sa boe.
17 Tao nemeu rala na ra mendi' saa fo ndoo-tetu' a. Huu Ama' Ded'ea-'o'ola na ra, matetu'. 18 Ama' mana denu Au 'uma sia raefafo' ia. De Au denu se ta'o naa boe, fo ara rasod'a ndule sia atahori raefafo' ia ra talad'a na ra. 19 Au 'unea ao ngga fo meumare' nakandoo soa' neu Ama'. Noo ta'o naa, Au atahori ngga ra ranea ao na ra fo meumare' rakandoo soa' neu Ama' boe. Huu Ama' Ded'ea-'o'ola matetun, mana tao se fee masod'a na ra teme-ao neu Ama'.”
Lamatua' Yesus hule-o'e fee basa atahori mamahere' ra
20 Yesus tute hule-o'en nae, “Au hule-o'e nda fee neu 'aka' mana sia lele' ia ra sa. Te Au o hule-o'e fee neu atahori mana dei fo namahere neu Au boe, huu atahori ia ra 'o'ola na.
21 Ama'. Au hule fo basa se nenepa'a' reu esa, 'ona' hita nenepa'a' dad'i esa boe. Au o nau fo sira nenepa'a' reu esa roo Nggita, naa fo atahori laen sia raefafo' ia ramahere rae, Ama' mesa' ne mana denu Au. 22 Ama' mutud'u Au mandete-masa'a ngga neu atahori ra ena. De Au so'u 'unanaru se ena, 'ona' Au boe. Noo ta'o naa, sira nenepa'a' reu esa, 'ona' Hita nenepa'a' teu esa boe. 23 Au nenepa'a' 'oo se. Ama' o nenepa'a' moo Au boe. Sira musi nenepa'a' dad'i esa 'ona' naa, losa rasod'a rala' esa noo ndoo-tetu'. Huu mete ma rasod'a rala' esa 'ona' naa, na, dei fo atahori laen sia raefafo' ia bub'ulu' rae, Ama' sue se, 'ona' Ama' sue Au boe. Noo 'ona' naa, ara bub'ulu' rae, Ama' mana denu Au.
24 Ama'. Au nau basa atahori, fo Ama' fee neu Au' ra, ra'ab'ue roo Au. Huu Au nau fo ara bisa rita Ama' so'u munanaru Au. Ama' sue Au ena, lele' Hita nda fe'e tao tala raefafo' ia sa.
25 Ama Susue', ralam ndoos. Te atahori sia raefafo' ia ra nda rahine Ama' sa. Au mana 'uhine Ama'. Ma atahori ngga ra bub'ulu' rae, Ama' mana denu Au raefafo' ia 'uma. 26 Au 'ufad'e neu se ena, Ama' naa, seka. Ma dei fo Au 'ufad'e se 'ukundoo 'a ta'o naa, huu Au nau fo ara bisa ramed'a teb'e Ama' susue na. Huu susue' fo ara med'a' naa, 'ona' Ama' susuen fee neu Au' a. Naa fo Au nenepa'a' 'ukundoo 'oo se boe.”