19
Basa ma, hofernor Pilatus denu sold'ad'u na ra reu li'u Yesus rendi' tali fifilot.a 2-3 Sold'ad'u naa ra o ha'i rala hau manggou' a longgen de hano dad'i solo'. De ara tendes solo manggou' naa neu Yesus langgan, de tao ra'amimina', 'ona' ara rae so'u mane feu' rendi' solo panggat. Boe ma ara 'olu Yesus rendi' bad'u naru' esa dulan mbila-maranggeo' 'ona' mane' ra biasa pake. Boe ma ara ra'a'e'ei' E rae, “Sod'a', atahori Yahud'i ra manen!” Ara o mbasa ra'amimina' E boe.4 Basa naa, ma hofernor dea neu lao esa fai, de nafad'e atahori naa ra nae, “Ta'o ia! Au 'endi E dea nema fee neu nggi. Te ama musi mihine, huu au paresa' E ena, te au nda hambu salan saa sa boe.” 5 Lele' Yesus dea neu, Ana pake solo manggou' a, ma bad'u naru dula mbila-maranggeo' a. De hofernor nafad'e neu atahori naa ra nae, “Mita dei! Ia Eni, Atahori naa ena.”
6 Lele' malangga agama Yahud'i ra malangga na ra roo atahori mana ranea ra rita Yesus, ma ara nggasi randaa rae, “Tati misa E leo! Mbaku E neu hau nggangge' a!”
Te hofernor a nafad'e mbali se nae, “'Ona bee na hei mana mendi E fo tao misa E sia hau nggangge' a. Huu au nda hambu salan saa-saa nandaa noo hukun mate sa.”
7 Atahori Yahud'i ra rataa rae, “Hai mi'ena hohoro-lalane' mana 'onda mia Lamatualain. Tungga hohoro-lalane' naa, atahori ia musi mate, huu ana so'u aon dad'i Lamatualain Ana na.”
8 Lele' hofernor rena 'o'ola na ra, boe ma ana bau namatau. 9 Basa de ana bali' nisi' sold'ad'u ra ume nanean rala, ma natane Yesus nae, “Ho ia, atahori bees?” Te Yesus nda nataa e sa.
10 Boe ma hofernor bua E nae, “Woih? Ta'o bee de nda mutaa au sa? Bub'ulu' ena, to? Au ia, 'u'ena koasa fo fee nggo mate, do, mbo'i nggo boe.”
11 Boe ma Yesus nataa nae, “Ta'o ia, pak. Mete ma pak mu'ena koasa 'ona' naa, na, pak hambu koasa naa mia Lamatualain sia sorga. Huu 'aka' Eni mesa' ne, mana nanggolo' pak fo tao ta'o bee neu Au. Te atahori mana fee Au neu pak, sira mana lemba sala' beran seli fai.”
12 Eni' a lele' naa, hofernor sangga dala' fo mbo'i hendi Yesus. Te atahori Yahud'i ra nggasi randaa rae, “Mete ma pak mbo'i hendi Atahori ia, na, naa natud'u 'oi pak nda mane keser monae' a nonoon sa. Huu atahori mana so'u aon dad'i mane' lab'an keser.”
13 Dad'i lele' hofernor rena ara 'ola' ra'o naa, ma ana fee Yesus dea neu. De ana 'endo' neu mana nggero-furi a kad'eran, sia mamana' esa fo ara bab'ae naran 'oi, “Rae moo loa' mia Fatu Beb'ela'”. (Sia ded'ea Aram, naa naran, Gabata.)
14 Fai' naa, Fai Sad'ia Fefeta Paska. Mbei ma reorendun, ma hofernor nafad'e atahori Yahud'i ra nae, “Mete leo! Eni, hei manem!”
15 Te ara nggasi rahere' rae, “Mendi E dea nema! Tao misa E leo! Mbaku E neu hau nggangge' a!”
Boe ma hofernor 'aka' natane na'asusuu' se nae, “Dad'i ta'o bee? Hei masud ma, au musi tati 'isa hei mane ma ia, do?”
Basa ma malangga agama Yahud'i ra malangga na ra rataa rae, “Hai manem 'aka' esa' a, naeni keser! Nda hambu laen sa ena!” 16a Basa ma, hofernor fee Yesus neu sold'ad'u ra, fo reu mbaku risa Yesus sia hau nggange' a.
Ara mbaku Lamatua' Yesus sia hau nggangge'
16b Sold'ad'u ra simbo rala Yesus. 17 Boe ma Ana lemba nala hau ngganggen de dea nema mia kota. Ara risi' mamana' esa, naran “Mamana Langga Rui'”. (Sia sira ded'ea Aram na, mamana' naa naran, Golgotaa.)
18 Losa naa, ma ara mbaku Yesus neu hau nggangge' esa. Ara tao ta'o naa neu atahori laen rua boe. Ara londa-mbaku esa sia Yesus bob'oa 'onan, ma esa fai sia bob'oa diin, de Yesus sia ru'a se talad'a na ra. 19 Boe ma hofernor denu sold'ad'u na ra sura' papa' esa, de mbaku sia Yesus fafon ata'. Sia papa' naa ara sura' 'oi,
“Ia, Yesus, atahori Nasaret. Eni, atahori Yahud'i ra Mane na.”
20 Ara sura' papa' naa rendi' ded'eat telu. Naeni: ded'ea Aram, ded'ea Yunani, ma ded'ea Latiin. Atahori Yahud'i hetar baca rita papa' fo nenesura' naa, huu Yesus mamana mamaten naa, deka noo kota Yerusalem. 21 Te malangga agama Yahud'i ra malangga na ra nda nau sa. De reu rafad'e hofernor rae, “Pak! 'Afi' sura' mae, ‘atahori Yahud'i ra Mane na’! Malole lena' sura' mae, ‘Atahori ia 'oi eni, atahori Yahud'i ra mane na.’”
22 Te hofernor nataa nae, “Au mana denu se sura' ta'o naa. Dad'i hela neu leo!”
23 Lele' sold'ad'u ra mbaku rala Yesus neu hau nggangge' a, ma ara bab'anggi bua-b'a'un de mbed'a' neu mamana' haa. Sold'ad'u esa naa hambu bab'anggi' esa. Ma ara ha'i rala bad'u dea' a fo nenetenu ma'ateme' mia ata' losa rae', nda mana soo' sa. 24 De ara 'ola-'ola' rae “Weh! Ata 'afi' sika hendi bad'un ia. Malole lena', ata lea lot, fo tahine seka mana hambu e.” Naa tao natetu mana nenesura' mema' sia Lamatualain Susura Meumaren 'oi,
“Ara bab'anggi au bua-b'a'u ngga,
boe ma ara lea lot fo hambu au bad'u ngga.”
Basa ma sold'ad'u ra tao ta'o naa.b
Lamatua' Yesus denu Yohanis mete-se'u mama na
25 Sia naa, hambu ina' hira rambarii'. Naeni: Yesus maman, Yesus te'on, Klopas saon Maria, ma Maria mia kambo Magdala. 26 Yesus nita maman nambarii' mia naa, na'ab'ue noo ana mana tunggan fo Ana sue' a, naeni au, Yohanis. De nafad'e maman nae, “Mama. Eni ia, mama ana na.”
27 Boe ma Ana nafad'e au nae, “Ta'o ia. Lele' ia, tao e dad'i mamam leo!” Boe ma, eni' a lele' naa, Yesus maman leo noo au.
Lamatua' Yesus mamaten
28 Basa naa ma, Yesus bub'ulu' nae, Eni tao basa ue-tataon ena. Naa tao natetu basa saa fo nenesura' mema' sia Lamatualain Susura Meumaren mia fai ma'ahulun ena. Boe ma Ana nae, “Au 'u'umad'a ena.”c
29 Sia naa hambu anggor ma'ei' sia nggusi ana' esa rala. Boe ma, sold'ad'u ra ha'i lombu fo boro' neu anggor, ma tao neu hau 'e'etu' esa tonggon,d de dunggu neu nud'u na. 30 Lele' Yesus musi nala anggor a, ma Ana 'ola' nae, “Basa' e nate'e ena.” Boe ma langgan loe, ma 'etu hahaen neu' ena boe.
Sold'ad'u ra mbau Lamatua' Yesus mia hau nggangge' a
31 Fai' naa nandaa noo fai kaliman a. Tungga agama hohoro-lalanen, atahori Yahud'i ra musi sad'ia sia fai' naa, fo mbila' neu na soru sira fai hule-o'e na. Naeni de ara nda nau atahori ao-sisi mamaten doko-d'oko nakandoo sia hau nggangge' nandaa noo fai hule-o'e' sa. Huu fai hule-o'e' naa, fai malole. Dad'i atahori Yahud'i ra malangga na ra ro'e hofernor fo denu atahori reu poko ratiku atahori mana sia hau nggangge' ra ei rui na ra. Noo ta'o naa, ara mate lai-lai, fo atahori reu ra'onda' ao-sisi mamaten dai relo a nda fe'e mopo sa. 32 De sold'ad'u ra naa reu, de poko ratiku' atahori esa ei rui na. Basa naa, ma ratiku' atahori esa fai ei na. Karua' naa ra, naeni, atahori fo ara mbaku se 'ona esa' roo Yesus. 33 Te lele' ara losa Yesus, ara rita E mate teb'e ena. Naa de ara nda poko ratiku' ein sa. 34 Te sold'ad'u esa ha'i nala tee na, de mbau neu Yesus mbambau na. Boe ma raa' nandali, ma oe' a nandali dea nema boe.
35 (Atahori esa mana nita mata' naa, naeni au. Au 'ita basa' e, ma au sura' matetu' sia ia. Huu au bub'ulu' saa fo au dui' a, naa teb'e, naa fo ama bisa mimihere au 'o'ola ngga.) 36 Basa dala' ia dad'i, huu nenesura' sia Lamatualain Susura Meumaren 'oi, “Eni rui na ra, esa o nda tiku sa boe.”e 37 Sia Susura Meumare' a, hambu mamana' laen nenesura' 'oi, “Dei fo ara rita atahori fo ara mbau rala' a.”f
Ara ra'oi Lamatua' Yesus
38 Hambu atahori esa, naran Yusuf, mia kambo Arimatea. Eni dad'i Yesus ana mana tunggan boe. Te ana tungga Yesus noo na'afuni', huu namatau atahori Yahud'i ra malangga na ra. Ana neu sia hofernor Pilatus, no'e 'isin mbali hofernor, fo ha'i nala Yesus ao-sisi mamate na. Hofernor simbo noo malole' boe. Boe ma Yusuf neu na'onda' Yesus ao-sisi mamaten, de nendi e. 39 Nikod'emus neu namalolo' noo Yusuf boe. Eni fo fai ma'ahulun neu nandaa noo Yesus tetemba'. Ana hasa rambe naen seli, mbei ma kilo telu nulu telu (33 kilo), de ngganggari neu Yesus ao-sisi mamate na.g 40 Boe ma ara mboti Yesus ao-sisi mamaten rendi' teme banggana'us. Mete ma ara feo lao esa, na, ara ngganggari rambe dei. Ara tao ta'o naa, tungga atahori Yahud'i ra had'a-d'alan ne'oi atahori mates.
41 Naa, nda na'ad'oo' mia mamana' fo Yesus mate a, hambu osi esa. Sia osi naa, atahori fe'e paa basa rates esa na. Ara nda fe'e tao rita mamates rala neu sia naa sa. 42 Lele' naa, atahori Yahud'i ra fai nehehere na ra fo soru sira fai hule-o'en nae 'a basa ena. Naa de ara mbed'a' Yesus ao-sisi mamaten neu rates naa, huu mamana' naa, nda na'ad'oo' sa.