Dud'uit so'al ina falu esa, noo mana nggero-furi nda malole' a sa
18
Lao esa, Yesus nanori ana ded'enu na ra nendi' nekendandaa', fo ara hule-o'e, nda nama'etu sa, noo nda male-ma'a sa. Ara musi ramahere rakandoo neu Lamatualain. 2 Dud'uin ta'o ia: “Sia kota esa hambu mana nggero-furi' sa nda mana taoafi' neu Lamatualain sa. Ana nda taoafi' neu esa sa boe. 3 Sia naa o hambu ina falu sa 'aka' neu no'e mana nggero-furi' a nae, ‘Ama' mana nggero-furi'! Mu'etu' ded'ea ngga noo matetu', o!’4 Fefeun mana nggero-furi' a nda taoafi' neu ina falu a sa. Te doo-d'oo ma ana bengge rena e ena. Boe ma ana dud'u'a nae, ‘Mema' au ia nda taoafi' neu Lamatualain sa, lelenan fai neu atahori. 5 Te ina falu ia tao langga ngga nambeta ena. Huu naa, malole lena' au 'u'etu' ded'ean noo ndoos. Hoko' na, ana 'aka' nema tao na'ab'eb'engge' au nakandondoo' a.’
6 Naa, hei du'a sob'a mana nggero-furi de'ulaka' naa 'o'olan. 7 Mete ma doo-d'oo ma ana tulu-fali ina falu a, na, Lamatualain o nau tulu-fali atahori mana hule-o'e hatu'-rerelon fo no'e tutulu-fafali' sia E. Te Lamatualain nda mana 'e'o-lali fai a sa. 8 Ana na'etu' ded'ea na ra lai-lai, Naa de Au 'ae 'utane ta'o ia: mete ma Au, Atahori Matetu' ia, bali' 'uma ena, ne'o Au fe'e hambu 'undaa 'oo atahori mamahere' sia raefafo', do hoko'?”
Atahori Farisi sa noo mana 'ed'a bea sa reu hule-o'e
9 Yesus dui selu' nekendandaa' sa, so'al atahori mana hii nananaru aon ma naloe-nad'ae atahori laen ra. Ana dui nae, 10 “Hambu ama' rua reu hule-o'e sia Ume Hule-o'e Huu' a. Esa, atahori mia partei agama Farisi; esa fai, mana 'ed'a bea. [Atahori Yahud'i ra rae atahori Farisi ra, atahori meumare'. Ma ara rae mana 'ed'a bea ra atahori nda malole' ra sa.] 11 Losa ume hule-o'e' ma, atahori Farisi a nambarii' mesa' ne ma hule-o'e nae, ‘Makasi Lamatualain, huu au ia, atahori malole'. Au nda de'ulaka' 'ona' atahori laen ra sa. Au nda dad'i na'o sa. Au nda mana 'usuu-'useti' sa. Au nda mana hohongge' sa. Makasi, Lamatua', huu au o nda de'ulaka' 'ona' mana 'ed'a bea ia sa. 12 Au manggate puasa nggarei sa na lao rua. Ma au 'endi bab'anggi' esa mia sanahulu mia basa saa fo au hambu' a.’ Atahori Farisi naa hule-o'e ta'o naa.
13 Te mana 'ed'a bea a nambarii' na'ad'od'oo' sia dea-d'ea'. Ana nda nambarani boti' matan fo mete ata' neu sa. Ana hule-o'e noo be'utee langgan ma rala mambalulutu' nae, ‘O, Lamatualain. Kasian au, atahori mana masala-singgo' ia! Fee ambon neu au dei!’
14 Naa, lele' atahori karua' naa ra lao bali' ume reu, mae bee ka malole noo Lamatualain? Atahori Farisi mana koao' a do, atahori mana 'ed'a bea a? Tantu Ana simbo noo malole' mana 'ed'a bea, mana naloe-nad'ae rala na. Ma Ana nda taoafi' neu atahori Farisi a sa. Huu Lamatualain na'atutud'a' atahori mana koao' ma nananaru atahori mana naloe-nad'ae rala na.”a
Lamatua' Yesus 'ola' fee papala-b'ab'anggi' neu anad'iki' ra
15 Lao esa, atahori ra 'o'o roo anad'iki' ra reu Yesus, fo Ana ndae liman neu se ma 'ola' fee se papala-b'ab'anggi'. Yesus ana ded'enu na ra rita ta'o naa, ma ara 'ai atahori naa ra. 16-17 Te Yesus simbo nala anad'iki' mana rema risi' E. Basa ma Ana 'ai ana ded'enu na ra nae, “Hela fo anad'iki' naa ra rema risi' Au. Ama 'afi' 'ai se. Misined'a malolole! Huu atahori mana nae dad'i Lamatualain atahorin, ana musi namahena neu 'a Lamatualain, 'ona anad'iki' namahena neu ina-ama na ra.”
Atahori mamasu'i' mana nae maso' sorga neu
18 Lao esa, hambu atahori Yahud'i ra malanggan esa neu natane Yesus nae, “Ama Meser nenefee had'a-hormat! Au musi tao ta'o bee fo 'uhine 'ae bisa maso' sorga 'uu fo 'usod'a 'ukundoo 'oo Lamatualain?”
19 Boe ma Yesus nataa nae, “Ta'o bee de mo'e mae, ‘Mana nenefee had'a-hormat’? 'Aka' esa' a nenefee had'a-hormat, naeni Lamatualain. 20 Naa! Ho bub'ulu' ena, to, Lamatualain hohoro-lalanen mia fai dalahulun 'oi:
'afi' hohongge;
'afi' tati-mbau misa atahori;
'afi' mimina'o;
'afi' dad'i sakasii peko-leleko';
ma fee had'a-hormat neu ina-ama ma ra.”b
21 Atahori naa nataa nae, “Teb'e, Ama'! Au tungga hohoro-lalane' naa ra, eni' a 'a'ana ngga.”
22 Rena ta'o naa ma, Yesus nae, “Malole! Te fe'e hela dala' esa fai. Naeni, bali' fo muu seo hendi basa hata-heto ma ra. Basa na, muu bab'anggi doi' naa ra reu atahori mana tud'a-loloe' ra. Dei fo bali' 'uma fo tungga Au leo. Te dei fo Lamatualain bala-b'ae fee nggo hata-heto' sia sorga.” 23 Atahori naa rena ta'o naa, ma ralan susa, huu su'in naen seli.
24 Yesus mete ana lao' noo rala nambalulutu, ma Ana nafad'e ana ded'enu na ra nae, “Atahori mamasu'i' mema' susa seli maso' sorga neu. 25 Hita ta'asasama' noo dala' laen fai. Mema' banda onta monae' a nda bisa lalaet rala neu tungga sosoot ndolan sa. 'Ona' naa boe atahori mana namahena' a hata-heton, te nda namahena neu Lamatualain sa, ana o nda bisa maso' sorga rala neu sa boe.”
26 Atahori mana rena Yesus 'ola' ta'o naa, ratane E rae, “Mete ma mema' atahori mamasu'i' susa ta'o naa, na, atahori mata' bee mana hambu masoi-masod'a'?”
27 Yesus nataa nae, “Soa' neu atahori, mema' dala' hetar nda bisa dad'i sa. Te soa' neu Lamatualain basa' e bisa dad'i.”
28 Boe ma Petrus 'ola' nae, “Ama'! Hai lao hela basa hai hata-heto ma ra ena, fo tungga Ama'. Te dei fo hai hambu saa?”
29 Yesus nataa nae, “Petrus! Rena malolole! Atahori mana lao hela umen, saon, 'od'i-'a'a na ra, ama-ina na ra, do ana na ra, huu nalalao Lamatualain ue-tatao na ra, 30 dei fo ana simbo bali' nae' lena' sia raefafo' ia. Ma mete ma raefafo' ia nate'e ena, ana o hambu nasod'a nakandoo noo Lamatualain.”
Yesus 'ola' fai mamaten lao-telu ena
31 Yesus noo ana ded'enun atahori kasanahulu rua' ra fo neu 'ola' mesa' ne noo se nae, “Basa hei bub'ulu' mae, ia naa hita lao tisi' kota Yerusalem ena. Losa naa, basa dala' fo Lamatualain mana 'ola-'ola na ra sura' fe'esa'an so'al Atahori Matetu' naa, dei fo dad'i 'ona' saa mana nenesura' hela' ena. 32 Dei fo ara fee Au neu atahori dea' mana nda ramahere neu Lamatualain sa. Boe ma ara raneneut Au, ra'amamae' Au noo mata'-mata', puras miru neu Au, 33 filo Au, basa ma tao risa Au. Te fai katelun, ma Au 'usod'a bali'.”
34 Rena Yesus 'ola' ta'o naa ma, ana ded'enu na ra bingun, huu ara nda fe'e rahine ded'ea-'o'ola' naa sosoan sa.
Lamatua' Yesus tao nahai' atahori poke' esa
35 Lele' Yesus se rae losa kota Yeriko, hambu atahori poke' sa 'endo' hule-hule' sia dala' suu na. 36 Lele' ana rena atahori hetar tungga naa ma, ana natane nae, “We! Saa sia ia?”
37 Boe ma atahori rafad'e rae, “Yesus, mia Nasaret, lao' tungga ia.”
38 Atahori poke' naa rena nala ma, ana nggasi nahere' nae, “Yesus! Mane Daud tititi-nonosin, e! Sue au dei!”c
39 Atahori mana lao' sia Yesus matan 'ai e rae nee-nee. Te ana boe nggasi nahere' nae, “Mane Daud tititi-nonosin, e! Kasian au dei!”
40 Lele' Yesus rena ta'o naa, ma Ana nambarii'. Ma Ana denu atahori reu rala atahori poke' a. Losa matan ma, Yesus natane e nae, 41 “Ho nau Au tao saa fee nggo?”
Ana nataa nae, “Ama'! Au 'o'e fo fee au bisa mete 'ita.”