3 Basa ma, Yesus lao neu 'endo' sia lete Saitun. Boe ma ana mana tungga na ra rema fo rae 'ola-'ola' roo E mesa' ne, rae, “Ama'! Sob'a mufad'e selu' Ama' 'o'olan faa' ra dei. Ama' neneman naa dad'i fai hira', e? Boe ma tatandan saa, e? Boe ma raefafo' a netete'en ta'o bee?”

4 Basa ma Yesus nataa nae, “Minea aom matalolole, o! Fo ama 'afi' nenepepeko-leleko'. 5 Te dei fo atahori mata'-mata' rema to'o tenda nara rae, ‘Au ia, Kristus, Atahori fo Lamatualain helu-fuli mia lele ulu' a.’ Noo ta'o naa, ara peko-leleko' atahori hetar. 6 Mete ma hei mita atahori ratati, do ama rena hara' rae, netatis sia bee-b'ee, na, ama 'afi' mimitau. Te dala' mata' naa, musi dad'i. Te fai netete'en nda fe'e losa sa. 7 Dei fo leo esa natati lab'an leo laen. Nusa monae' esa natati lab'an nusa' laen. Rae nanggenggo sia bee-b'ee. Boe ma fula-fai ndoes manaseli' boe! 8 Te basa naa ra, fe'e tatanda fefeun mana nafad'e 'oi, fai matete'en deka-d'eka ena. Naa 'ona' ina mairu' nae bonggi, de ana med'a nambeta, huu fula-fai bob'onggin deka-d'eka ena.

9 Dad'i hei musi minea aom ma'ab'eb'esa, e! Te dei fo ara tao nggi doid'oso ma tao risa nggi. Dei fo atahori mia basa nusa' ra binci rala nggi seli, huu hei tungga Au.^a 10 Lele' naa, atahori hetar rasad'ea ma nda nau ramahere Au sa ena. Esa binci esa, ma esa seo esa. 11 Dei fo hambu mana peko-leleko' ra rae sira, Lamatualain mana 'ola-'ola na. Ma atahori hetar ramahere se. 12 Dei fo bau namad'oo na atahori de'ulaka na ra bau ramanae, losa esa nda sue-lai esa sa ena. 13 Te atahori mana ma'atataa' losa mate, dei fo Lamatualain fee ne masoi-masod'a'.^b 14 Huu atahori musi dui-b'engga Lamatualain Hara-lii Malolen losa ndule raefafo' ia, naa fo basa atahori rahine Lamatualain dala ndoo-tetu na. Basa naa fo fai matete'en fe'e losa ena na.”

15 Yesus 'ola' nakandoo nae, “Lamatualain mana 'ola-'olan Daniel sura' so'al atahori esa de'ulakan manaseli'. Dei fo ana nema neu nambarii' sia mamana meumare manaseli' sia Lamatualain Ume Hule-o'e Huu na. Noo ta'o naa ana tao nanggenggeo mamana' naa. Naa de Lamatua' lao nasad'ea hela mamana' naa. Naa! Mete ma hei mita 'ona' naa ena, besa-b'esa, o! (Seka baca susura ia, musi nahine malolole!)^c 16 Te naa dad'i tanda 'oi, fai-fai susa-sona' sia lelesu mata' ena. Mete ma mita 'ona' naa, na, atahori sia profinsi Yud'ea fela fo mela lete' ata mii leo. 17 Mete ma hambu ruma lao hela ume ena, 'afi' sud'i bali' mii ha'i sud'i 'a saa ra fai. Mela' lai-lai leo, fo 'afi hambu sosoe'. 18 Atahori mana sia osi rala, 'afi' sud'i bali' fo ha'i teme nelusa' fai. Mela mikindoo leo!^d 19 Kasian seli neu ina mairu' ra, roo ina mana rasusu ana mana bonggi feu' ra. Huu ara nda rela' haelai rala sa. 20 De malole lena' hei hule-o'e fo mo'e sosoe' naa 'afi' dad'i sia fai 'ud'an, do sia fai hahae tao ues. 21 Huu fai' naa susa-sonan seli! Eni' a mia Lamatualain na'ad'ad'i' raefafo' ia losa nala fai' ia, atahori nda fe'e rita sususa manaseli' mata' naa sa. Boe ma atahori o nda rita selu' sususa' mata' naa sa ena boe.^e 22 Te hei 'onton monae', huu Lamatualin na'a'e'eku fai' naa. Mete ma hoko', na, nda hambu atahori esa saa sa boe na'atataa' nasod'a. Huu Lamatualain sue atahori fo Ana pili nala' ra, naa de Ana na'a'e'eku fai-fai susa-sona' ra.

23 Dei fo mete ma fai' naa losa, hei rena atahori rae, ‘Mete dei! Kristus sia ia!’ Boe ma atahori laen fai rae, ‘Kristus sia naa!’ Te ama 'afi' mimihere, e! 24 Te dei fo hambu atahori sou rema fo to'o-to'o' tendan rae, ‘Au ia, Kristus!’ Ma laen ra fai rae, ‘Au ia, Lamatualain mana 'ola-'ola na.’ Dei fo ara tao manad'ad'i' mata'-mata' rendi' nitu a koasan fo peko-leleko' atahori. Ara sob'a-sob'a fo Lamatualain atahori na ra nenepeko-leleko'! 25 De ama musi minea ao ma ra malolole, e! Fai susa-sona' naa' ra nda fe'e losa sa, te Au fee nesenened'a' neu nggi ena, o!

26 Mete ma atahori rafad'e nggi rae, ‘Kristus sia rae moo loa' naa!’ na, ama 'afi' naa mii. Ma, mete ma hambu fai rae, ‘Kristus sia ume ia rala!’, na, ama 'afi' mimihere neu pepeko-leleko na ra. 27 Huu Au ia, Atahori Matetu' a. Dei fo mete ma Au bali' raefafo' 'uma, basa atahori mete rita Au, 'ona' atahori rita ndelas makahahad'o' mana naronda mia seri' rulu nisi' seri' muri.^f

28 Mete ma Au bali' 'uma, dei fo hei bub'ulu' Au sia bee. 'Ona' atahori rahine, rae mete ma mbui mana naa mburu' ra heo sia mamana' bee, na, sia naa hambu mana mburu' a boe.”^g

29 Basa ma Yesus 'ola' fai, de nafad'e ana mana tungga na ra nae, “Mete ma fai sususa-sosona' naa ra basa ena,

30 Basa naa ma, basa atahori ra o rita tanda sia lalai ata 'oi, Atahori Matetu' a nae bali' nema ena. Atahori mia basa nusa' sia raefafo' ia rita 'ona' naa, ma ara ramatau losa ara nggae. Te dei fo Au 'onda 'uma 'oo lelee', fo ara fe'e rita basa Au koasa ma mandete-masa'a ngga.ⁱ 31 Boe ma Au pake ma'oa mana nalii nahere' fo parenda Lamatualain aten mana sia sorga reu ra'ab'ue basa atahori fo Au pili 'ala mia ndule raefafo' ia, mia relo a mamana totod'an losa relo a mamana momopon; mia dii losa 'ona.”

32 “Au ha'i conto 'ona' hau huu'. Mete ma roon huni-huni ena, naa natud'u 'oi, fai matob'i' deka-d'eka losa ena. 33 'Ona' naa boe, mete ma hei mita fai sususa-sosona' nema, 'ona' Au 'ufad'e faa' ra, na, naa natud'u 'oi, Au deka-d'eka' 'uma ena. 34 De ia naa, rena malolole! Mia basa atahori masod'a' lele' ia, dei fo ruma nda fe'e mate sa, te fai sususa' naa ra losa ena. 35 'Ona' mae lalai noo raefafo' ia sambu-lalo, te Au Hara-Lii ngga ia na'atataa' losa bab'asan.”

36 “Nda hambu atahori rahine rae fai hira' na Au 'uma sa boe. Lamatualain aten mana sia sorga ra o, nda rahine sa boe. Au o nda 'uhine sa boe. 'Aka' Ama ngga nahine. 37 Te Au ia, Atahori Matetu' a. Dei fo mete ma Au bali' 'uma, naa 'ona' lele ulu' a lele' Noh fe'e masod'a'.^j 38 Oe mandali monae' a nda fe'e nema sa, te atahori raa-rinu malad'a-malad'a' ma sao rame-rame 'ona' biasa na. Ara tao ta'o naa rakandoo 'a losa Noh hene 'ofa monae' rala neu. 39 Te lele' oe mandali monae' a nema nandali nendi se, dei de ara fe'e na nggengger, ma fe'e rahine saa manad'ad'i' naa. 'Ona' naa boe noo Au 'u'uma ngga.^k 40 Lele' naa, mete ma atahori rua tao ues sia osi rala, 'aib'oi' te, Lamatualain so'u nendi esa, ma Ana lao hela esa. 41 Mete ma ina' rua mbau are, 'aib'oi' te, Lamatualain so'u nendi esa, ma Ana lao hela esa.

42 Huu naa, hei o musi minea hatu'-rerelon boe, te ama nda bub'ulu' fai hira' na hei Lamatuam nema sa. 43 Dud'u'a malolole, e! Mete ma tenu ume' a bub'ulu' nae temba na na'o ra rema, na, tantu ana nanea nakandoo 'a, fo na'o ra 'afi' umen rala reu. 44 Dad'i hei o musi mihehere. Huu 'aib'oi' te Au 'uma ena!”^l

45 Basa ma Yesus 'ola' fai nae, “Hei musi dad'i 'ona' atahori ded'enu' ra fo tungga mikindoo 'a malangga hihii-nanau na. Te mete ma malangga nae lao neu sia mamana doo-d'oo', na, ana so'u atahori ded'enu' mata' naa ra, fo mete-se'u ume isi na ra nanaa-nininu na ra. 46 Mete ma malangga bali' ma nita atahori ded'enu na ra tao ue-tatao na ra noo malole', tantu ana namaho'o noo atahori naa. 47 Mimihere neu Au, te dei fo malangga fee koasa neu ded'enu na ra fo mete-se'u basa hata-heto na ra.

48 Te mete ma atahori ded'enu' ra de'ulaka', na, tantu ana 'ola' sia ralan nae, 49 ‘Malole! Malangga lao 'ona' ia naa, seka bub'ulu' fai hira' fo ana bali', o!’ Du'a ta'o naa ma, ana poko-paru nonoon mana tao ues laen ra. Boe ma ana 'endo' naa-ninu malad'a-malad'a' na'ab'ue noo mana mafu' ra. 50 Ma nda bub'ulu' sa te, 'aib'oi' ma malangga naa bali' boe. 51 Boe ma malangga naa tao doid'oso e nda fefeet sa, basa de piru hendi e dea neu, fo leo na'ab'ue noo atahori mana dea-rala' ra. Sia mamana' naa, basa se nggae ei-ei huu ara doid'oso' rita mamate na ra.”