2-5 Atahori Farisi naa ra to'u rahere' sira 'ad'at Yahud'i na. 'Ona' a, mete ma atahori rae raa, na, musi safe lima na ra tungga 'ad'at hihii-nanau na. Mete ma bali' mia pasar, na, musi rariu oe dei. Mae rou-rau dapu na ra o, 'ona' hura', pingga', nggalaas, ceret, basa se musi safe tungga 'ad'at hihiin, dei fo fe'e pake raa rendi'.

Mete ma hambu atahori Yahud'i laen nda tungga 'ad'at naa sa, na, atahori Farisi ra ramanasa.

Naa de, lele' ara rita Yesus mana tungga na ra raa nda safe lima na ra tungga 'ad'at hihiin sa, ma ramanasa. Basa ma ara rema fee sala' neu Yesus rae, “Saa de mana tungga ma ra raa, te nda safe lima na ra sa? Naa, sira ralena-langga hita 'ad'at na mia bei-ba'i ta ra!”

6-7 Te Yesus nataa nae, “Hei ia ra mema' atahori mana 'ola' laen, te tao laen! Mia dalahulun, ba'i Yesaya sura' hela Lamatualain hara-liin 'oi,

Hei o 'ona' naa boe. 8-9 Hei lao hela Lamatualain parendan, fo tungga 'a atahori 'ad'at na. Mema' hei mihine tao mala' 'ona' naa!

10 Ma'ahulun ba'i Musa nafad'e Lamatualain parendan ena nae, ‘Fee had'a-hormat neu ina-ama ma ra.’ Ma nafad'e fai nae, ‘Mete ma atahori esa rarai-oole ina-aman, na, musi hukun misa e.’^b 11-12 Lamatualain nanori ta'o naa, te hei minori laen. Hei mae, ‘Mete ma atahori helu basa nae fee buas esa neu Lamatualain, na, mae eni ina-aman doid'oso rae mate o, buas naa nda bole pake tulu-fali neu se sa, huu helu basa nae fee neu Lamatualain ena.’ 13 Naa de, Au 'ufad'e basa faa' ra, hei seti hendi Lamatualain hihiin, de nggati noo atoran feu'. Hei nggati hendi atoran hetar ta'o naa ena.”

14 Basa ma, Yesus no'e atahori laen sia naa ra, de nae, “Pasa ndiki ma ra dei, fo mihine. 15 Saa mana maso' nisi' tei' a rala, naa nda tao nanggenggeo atahori sa. Te saa mana kalua dea nema, naa mana tao nanggenggeo. 16 [Seka mandiki', rena matalolole, o!”]^c

17 Basa ma Yesus noo mana tungga na ra lao hela atahori naa ra, de risi' ume esa rala. Boe ma mana tungga na ra ratane nekendandaa' naa sosoa na. 18-19 Yesus nataa nae, “Hei o nda mihine sa, do? Sosoan ta'o ia: saa fo atahori raa, naa malole'. Te saa mana kalua, naa nda malole' sa. Saa fo hita taa, maso' nisi' tei ta ra, basa naa kalua hendi e fai. (Lamatua' Yesus masud na 'oi, atahori bole raa sud'i' saa. Nda 'ena-'ai sa.)

20 Saa mana kalua mia atahori ralan, naa mana tao nanggenggeo, losa Lamatualain melumud'u e, boe ma nda nau na'ab'ue noo e sa. 21 Ded'ea de'ulaka' hetar kalua mia atahori rala na ra! Sama 'ona': dud'u'a de'ulaka', hohongge, nemena'o, tisa atahori, 22 bare-na'o, de'ulaka', leleko', tungga hihiin, dale lole', 'ola' natud'a atahori, koao, nda nahine had'at sa, ma langga fatu.

23 Basa de'ulaka' 'ona' naa ra, kalua mia atahori rala na. Naa, mana tao nalutu e. Lamatualain melumud'u e boe.”

24 Basa ma, Yesus se lao hela mamana' naa, de risi' kota esa naran Tirus. Losa naa, ara maso' risi' ume esa, huu Yesus nda nau atahori bub'ulu' Eni sia naa sa. Te Ana nda bisa keke sa.

25-26 Sia naa, hambu mama esa nda atahori Yahud'i sa. Bonggi eni mia Fenesia sia profinsi Siria. Ana rena Yesus nema ma, ana neu no'e Yesus fo 'oi hendi nitu mia ana feto na.

27 Te Yesus 'ola' na'arerena' nae, “Anak ara musi raa ra'ahulu', dei fo nggari lenan neu busa ra!” [Noo masud ma'afuni' 'oi, Yesus musi tulu-fali Eni atahori Yahud'i na ra dei, dei fo bisa tulu-fali atahori laen ra.]

28 Te mama naa naselu nae, “Teb'e, Papa! Te busa sia mei a rae', naa nanaat mana tud'a mia ana' a pinggan.” [Noo masud 'oi, lele' anak ara raa, busa o hambu naa boe. Mae Yesus tulu-fali Eni atahori na ra, te Eni o musi mete atahori laen ra boe.]

29 Yesus rena ta'o naa, ma nafad'e nae, “Awee! Mama 'ola' ndaa lao esa'! De mama bali' leo, te nitu a lao hela mama anam ena.”

30 Basa ma, mama naa bali'. Ana losa ume, te anan mana sunggu masambeta'. Mema' nitu a lao hela e ena.

31 Basa ma, Yesus se lao hela kota Tirus, tungga dala tasi suun seli kota Sid'on. Mia naa, ara lao rakandoo losa dano Galilea. Basa ma ara lao risi' nusa' esa noo kota sanahulu fo ro'e rae ‘Dekapolis’. 32 Sia naa hambu atahori esa mab'ob'e' ma mbake'. Nonoo na ra rendi e nisi' Yesus. Ara ro'e Yesus tao liman neu e fo nahai' e. 33 Boe ma Yesus lao hela atahori hetar naa ra, de mesa' ne neu noo atahori naa. Yesus mbau lima 'u'un neu atahori naa ndikin ru'a se rala. Basa ma, Ana tao miru neu lima 'u'un, de nggama atahori naa maa na. 34 Ana oro'aa mbali lalai ata, lea hahae naru', basa ma parenda nae, “Efata!” (Sosoan 'oi “Tab'uka leon!”)

35 Ana 'ola' ta'o 'a naa, boe ma atahori naa ndikin rena neu' ena. Ma maa mana bara'ain, banggana'u neu' ena, losa ana mulai 'ola' noo malole.

36 Basa ma, ru'a se bali' risi' atahori hetar naa ra. Yesus 'ai se nae, “Rena, e! 'Afi' mifad'e atahori mae, Au 'uhai' atahori ia ena.” Mae Yesus 'ena-'ai nahere' o, ara dui sia bee-b'ee. 37 Atahori mana rena dud'uit naa, ndindii' a. De ara 'ola-'ola' rae, “Manaseli'! Atahori ia tao basa e, dad'i malole'. Atahori mbake' bisa rena. Atahori mab'ob'e' bisa 'ola-'ola'.”