2 To'o nebaa, sia titu-naree fatuk boot mak ema nodi taka rate odamatan. Mais fatuk nia nakduir baa tehen ti'an. 3 Hotu sia tama baa rate laran, mais Yesus maten la iha ti'an. 4 Sia moos benar karin. Mais teki-tekis, ema na'in rua nariik iha siakaan sorin. Sia rua tau faru naksinak. 5 Naree nunia, feto nia sia nata'uk to'o sudur baa rai. Hotu, ema na'in rua nia nusu baa sia na'ak, “Tan saa ina sia mai ema maten fatik atu buka ema mak moris? 6 Yesus la iha ne'e! Nia moris nikar ti'an. Ina sia nalu'a Niakaan dale baa oras Nia sei iha Galilea ka? 7 Uluk, Nia dale ti'an na'ak, ema atu fa'an Ema Raiklaran Isin baa ema aat liman. Hotu, sia nedi no'o baa ai karuus. Mais wainrua, Nia moris nikar.”^a

8 Rona nola nunia, foin feto nia sia nanoin nola Yesus dalen uluk nia. 9 Sia fila lai-lais, nasara lia hotu-hotu nia baa Yesus klosan na'in sanulu resin ida, no ema seluk sia mak tuir no Yesus. 10 (Feto sia mak baa rate nia, ne'e mak Yakobus inan Maria, Maria nosi leo Magdala, Yohana, no feto seluk na'in hira tenik. Sia nia, mak baa nasara lia ne'e baa Yesus klosan sia.)

11 Rona nola feto nia sia dalen, klosan sia naneo na'ak feto nia sia dale bosok.

12 Masik nunia moos, Petrus nariik nalai baa rate. To'o nebaa, nia nateke baa rate laran. Naree loos tais mak hodi falun maten. Hotu nia fila kedan nodi naneo na'ak, “Ne'e, nunabee ti'an?”^b

13 Baa loron nia moos, noo ema na'in rua baa leo ida, naran Emaus. Leo nia dook nosi kota Yerusalem kre'is kilo sanulu resin ida. Uluk, sia rua moos tuir Yesus, 14 etuk sia la'o nodi dale lia Yesus mamaten. 15 Teki-tekis, Yesus nare'is aan baa sia, hotu la'o no sia. 16 Mais sia la natene Nia, tan Na'i Maromak nalo sia keta natene. 17 Hotu Yesus nusu baa sia na'ak, “Emi ho'i dale saa?”

Rona nola nunia, sia oin tuun kedas, hotu sia nariik. 18 Ida mak naran Kleopas, nusu Yesus na'ak, “Ama ne'e, ema foun ka? Ama la natene lia mak foin dadi iha Yerusalem ne'e ka?”

19 Yesus moos nusu na'ak, “Lia saa nia?”

Sia nataa na'ak, “Lia Yesus nosi Nasaret! Nia tebe-tebes Maromak mako'an. Na'i Maromak latan beran baa Nia nebee nase'i tadak blaar oi-oik. Nia moos matenek nanorin ema. Ema hotu-hotu beer Nia. Na'i Maromak moos beer Nia.

20 Mais hatene hodi baa, na'ilulik no fukun Yahudi sia kohi nola Nia, latan baa gubernur nebee taa ukun mate baa Nia. Hotu, sia nedi no'o Nia baa ai karuus. 21 Uluk fohon ami hotu-hotu haloon, nebee Nia mak Kristus. Tan kleur ti'an ami hein Kristus mai atu nabusik amikaan ema nosi ukunrai Roma mak tonan ami. Mais loron lima foin dau-dauk ne'e, sia no'o Nia ti'an.

22 Oras ne'e, ami hetak benar. Tan ohin nia amikaan feto sia mai katak na'ak, sia baa rate seisawan oan. 23 Mais sia la naree Yesus maten. Hotu makbukar lale'an katak baa sia na'ak, Yesus moris nikar ti'an! 24 Rona nola nunia, amikaan mamaluk na'in hira nalai baa rate. Sia moos naree manesak nu'u feto sia dalen. Yesus maten la iha tebes.”

25 Ema rua nia dale notu nunia, Yesus de'an na'ak, “Beik sia! Tan saa la ho'uk fiar saa mak Maromak mako'an sia katak kedan hori uluk 26 na'ak, Kristus musti netan susar oi-oik lai, foin simu kneter no beran maka'as.” 27 Hotu Yesus nanorin sia lia hotu-hotu mak Maromak mako'an sia nakerek nela kedan nosi Kristus. Nahuu nosi Bei Musa to'o mako'an seluk sia siakaan hakerek.

28 Kre'is leo Emaus, Yesus asufanu atu la'o liu. 29 Mais sia rua tene na'ak, “Ama! Mein heik mo ami ohin kalan ne'e, tan loro atu monu ona.” Yesus moos simu nodi tama namutuk no sia baa uma laran.

30 Baa oras sia tuur naa, Yesus nola tubi rohan ida. Nia namulak sera dodan baa Na'i Maromak, hotu tohi fa'e tubi nia. Nia lolo foo baa sia rua, 31 foin sia natene na'ak, Nia ne'e mak Yesus. Mais Nia lakon tekis nosi siakaan oin. 32 Sia moos dale na'ak, “Etuk oin! Baa oras ita rona Nia nalore mako'an siakaan hakerek, itakaan neon malirin.”

33 Dale notu nunia, sia fila kedan baa Yerusalem. To'o nebaa, sia nasoru nola Yesus klosan na'in sanulu resin ida, no ema seluk sia mak naklibur iha nia. 34 Yesus klosan sia katak baa sia na'ak, “Tebes! Yesus moris nikar ti'an! Ohin nia, Nia natadu aan baa Mau Petrus.”^c

35 Hotu, ema na'in rua nia moos dale lia hotu-hotu mak dadi iha dalan, to'o sia bele natene ema nia mak Yesus, baa oras Nia tohi fa'e tubi.

36 Ema na'in rua nia sei no'i dale no maktuir seluk nunia, teki-tekis Yesus nariik iha siakaan klaran. Nia foo tabe na'ak, “Dame!”

37 Mais sia hotu-hotu sarebak no nata'uk, tan sia naneo na'ak ema kmalar.

38 Mais Yesus nusu na'ak, “Tan saa emi hata'uk nune'e? Emi la fiar ha'ak, Ha'u mak ne'e ka? Ha'u kmoris kikar ti'an. 39 Tebes! Haree kokon ha'ukaan liman no ain. Lolo emikaan liman hodi koko du'uk baa, nebee emi fiar ha'ak, Ha'u ne'e lahoos ema kmalar. Tan ema kmalar la noo isin, mais Ha'u koo isin.”

40 Yesus dale nunia nodi natudu kanek fitar iha liman no ain. 41 Hotu, sia neon boot tan natene na'ak Yesus moris nikar ti'an. Mais sia sei benar, tan la natene, nunabee bele dadi nunia. Hotu Yesus nusu baa sia na'ak, “Emi haa saa iha ne'e?” 42 Sia moos lolo foo na'an tasi tunun rohan ida baa Nia. 43 Yesus simu nola na'an tasi nia, hotu naa iha siakaan oin.

44 Hotu Yesus dale na'ak, “Nunabee? Emi sei hanoin oras Ha'u kamutuk ko emi ka? Hori hirak nia, Ha'u katak ti'an ka'ak, lia hotu-hotu mak Maromak mako'an sia nakerek nosi Ha'u, musti dadi. Hori uluk Bei Musa no mako'an seluk sia nakerek nela kedan lia nosi Ha'u iha Hakerek Moon. Iha Kananuk sia moos, noo hakerek nosi Ha'u.”

45 Dale hotu nunia, Yesus natutan tenik nodi hanorin malorek nebee sia natene tebe-tebes Hakerek Moon isin. 46 Nia dale na'ak, “Maromak mako'an sia nakerek lia nosi Kristus mak Na'i Maromak nameno atu solok mai. Kristus musti netan susar oi-oik lai, foin mate. Mais, baa wainrua, Nia moris nikar. Sia nakerek kedan lia nia sia hotu-hotu. 47 Oras ne'e, Ha'u klatan beran baa emi nebee emi hodi Manfatin Di'ak nia baa ema iha rai-rai, nahuu nosi Yerusalem ne'e. Katak baa sia ha'ak, ema mak nalo neon aat tan siakaan salan no fila baa Na'i Maromak, Na'i Maromak nanis kasu mohu siakaan salan hotu-hotu. 48 Emi musti baa foo hatene ha'ak, Ha'u ketan susar, Ha'u kmate, hotu moris kikar ti'an. 49 Ha'u moos atu solok Kmalar Lulik, mak Ha'ukaan Ama nameno kedan ti'an. Mais, emi musti hein iha Yerusalem ne'e lai, to'o simu hola beran nosi lale'an.”^d

50 Baa loron ida, Yesus nodi Niakaan maktuir sia sai nosi kota. Kre'is leo Betania, Nia foti liman nodi dale natuun matak-malirin baa sia.^e 51 Oras sei foo matak-malirin nunia, Nia moos ni'it aan sa'e baa lale'an. 52 Titu-naree nunia, sia hotu-hotu nakni'a nodi lo'u-sudur baa Nia. Nunia hotu, sia fila baa Yerusalem nodi neon boot lo-loos. 53 Sura loron, sia naklibur iha Uma Hamulak Huun nodi tonu-naboot Na'i Maromak.

Ama Teofilus! Ha'ukaan lia nosi Yesus to'o ne'e dei.