2 Titu-naree ema nia sia mai baa Yesus, ema Farisi no matenek ukun Yahudi sia nakmuuk na'ak, “Hoi! Yesus ne'e namalu no ema lisan aat sia!”^a

3 Rona nola nunia, Yesus dale baa sia nodi lia hatetek na'ak, 4 “Noo makbalin ida. Niakaan bibi malae matan atus ida. Dala ida, matan ida lakon. Hotu, nia musti nalo saa? Nanis nia la'o nela matan siwi nulu resin siwi iha fatin manek, hotu baa buka bibi malae mak lakon nia to'o netan. 5 Netan ti'an, nia neon boot. Hotu, nia nasaan nodi nikar mai. 6 To'o uma, nia bolu nola mamaluk sia nodi katak na'ak, ‘Hei! Mai neon boot bele-bele ho ha'u lai, tan ha'ukaan bibi malae mak lakon nia, ketan ti'an.’ 7 Iha lale'an moos nunia. Kalo ema maksalan ida nalo neon aat nodi fila baa Na'i Maromak, lale'an isin tomak neon boot. Tebes. Sia neon boot tan ema na'in ida fila baa Na'i Maromak, liu nosi neon boot baa ema na'in siwi nulu resin siwi mak moris loos no la la'o sala dalan.”

8 Hotu, Yesus dale lia hatetek ida tenik na'ak, “Noo feto ida mak noo osan murak tomak sanulu.^b Dala ida, osan ida lakon. Hotu, nia musti nalo saa? Nanis nia sunu badut nodi leno nasirin. Nia saar uma nosi lidun baa lidun, buka di'a-di'ak osan mak lakon nia to'o netan. 9 Netan ti'an, nia bolu nola ema mak uma kre'is malu sia, nodi katak na'ak, ‘Hei! Mai neon boot bele-bele ho ha'u lai, tan ha'ukaan osan mak lakon nia, ketan ti'an!’ 10 Iha lale'an moos nunia. Kalo maksalan ida nalo neon aat nodi fila baa Na'i Maromak, nanis makbukar lale'an sia hotu-hotu neon boot.”

11 Hotu, Yesus natutan lia nodi lia hatetek ida seluk tenik na'ak, “Noo ama ida. Niakaan oan mane, na'in rua.

12 Baa loron ida, oa ikun katak baa aman na'ak, ‘Ama! Fa'e kedan, foo baa ha'u ha'ukaan fafa'ek nosi ama sasoin ona!’ Rona nola nunia, aman moos fa'e foo kedan niakaan sasoin baa oan na'in rua. 13 La kleur, oa ikun fa'an moos niakaan fafa'ek. Hotu, nia nahulin niakaan naha sia, la'o baa rai dook. To'o baa, nia soe karin osan nodi moris namidar aan dei. 14 Baa oras osan mohu, rai nia moos kona salaen boot, to'o nia moris namukit aan. 15 Hotu, nia buka serwisu, tan salaen. Ema ida simu nia no naruka nia nahaan fahi. 16 Mais tan la noo ema mak foo haan baa nia, nia la terus salaen, to'o nakara atu naa fahi haan.

17 Kleu-leur, nia nanoin baa-mai na'ak, ‘Iha ha'ukaan ama uman, mataroos hotu-hotu naa bosu to'o naresin. Mais ha'u iha ne'e, atu mate salaen ona. 18 Di'ak liu, ha'u kfila baa ha'ukaan ama. To'o nebaa, ha'u katak baa nia ka'ak, “Ama! Ha'u kalo sala boot ti'an baa Na'i Maromak no baa ama. 19 Ha'u la kfatan dadi baa ama oan tenik. Masik ama simu ha'u kdadi mataroos dei moos, di'ak!’”

20 Naneo notu nunia, nia nariik, fila baa ama uman. Oras nia sei dook, aman titu-naree nia ti'an. Aman neon monu kedas baa nia. Hotu aman nalai sai nosi uma, baa nasoru oan mak fila mai nia. Hotu, nia nako'ak nola nodi de'i nia.

21 Hotu, oa nia dale baa aman na'ak, ‘Ama! Ha'u kalo sala boot ti'an baa Na'i Maromak no baa ama. Ha'u la kfatan dadi baa ama oan tenik.’

22 Mais aman naruka kedan ema serwisu sia na'ak, ‘Hoi, lai-lais! Baa hola faru klobor kabaas ida, tau baa nia. Tau kadeli baa liman fuan, no tau kaso baa ain. 23 Hotu baa dada hola karau baka mak kesi nia, ko'a, nebee ita halo dahur bele-bele. 24 Tan ha'ukaan oan ne'e, nu'u mate ti'an, mais oras ne'e moris nikar. Nia lakon ti'an, mais oras ne'e, ketan kikar ti'an.’ Aman dale notu nunia, sia nahuu nadahur bele-bele.

25 Baa oras nia, oa ulun serwisu iha to'os baa. Oras fila mai uma, sei iha dook nia rona ema nakdiuk bareka nodi bidu no naksoke. 26 Nia bolu nola ata ida, nusu na'ak, ‘Hoi! Dahur saa mak ne'e?’

27 Ata nia nataa na'ak, ‘O alin mai nikar ti'an. O aman mak naruka ko'a karau baka hodi halo dahur boot, tan oan fila mai nodi manek.’

28 Rona nola nunia, oa ulun krakat, to'o la no'uk tama baa uma laran. Aman baa namaus nia, nebee tama baa uma laran.

29 Mais nia krakat na'ak, ‘Ama! Manoin kokon lai! Hori wain ne'e, ha'u kserwisu susi ruin hanesan mataroos bodik ama. Ha'u la kakur ama hakaran. Masik nunia moos, sei la dala ida dauk, ama foo bibi oan matan ida kodi kadahur ko ha'ukaan mamaluk sia. 30 Mais katene kodi baa, ama oan labuk teen ne'e, baa nakdiuk feto namohu ama osan sia. Oras ne'e nia fila mai, ama no'o karau baka isin furak basuk, hodi halo dahur boot bodik nia.’

31 Rona nola nunia, aman nataa na'ak, ‘Oa mak ha'u kadomi! Rona di'a-di'ak! O mein mamutuk mo ha'u. Hotu-hotu mak ha'ukaan moos, okaan. 32 Oras ne'e, ita musti hadahur, tan okaan alin mesak ne'e. Uluk, nu'u nia mate ti'an, mais oras ne'e nia moris nikar ti'an. Nia lakon ti'an, mais oras ne'e ita hetan hikar ti'an.’”