Yesus moris nikar
16
Awan nia, kona loron neen. Loron nia, mak ema Yahudi siakaan loron hamulak. Baa oras loro monu ti'an, Salome, Maria nosi leo Magdala, no Maria ida seluk (mak Yakobus inan), sia baa sosa mina morin, nebee awan sia baa nisik Yesus maten tuir siakaan adat. 2 Loron domiku seisawan oan, sia na'in tolu moos baa rate nia. 3-4 Iha dalan klaran, sia dale baa malu na'ak, “Adeei! See mak bele dudu sees fatuk boot nia nosi rate odamatan? Fatuk nia boot basuk! Ita ne'e la biit!”Mais to'o baa, sia naree fatuk nia nakduir sai ti'an. 5 Naree nunia, sia tama baa rate laran. Mais sia sarebak tebe-tebes, tan sia naree mane nurak ida no'i tuur iha siakaan sorin kwana. Niakaan tais, mutin naksinak. 6 Nia katak baa sia na'ak, “Keta hata'uk! Ha'u katene emi mai buka Yesus, ema Nasaret nia. Ema no'o Nia ti'an iha ai karuus, mais Nia moris nikar ti'an! Mai, haree du'uk fatik mak ema rai Niakaan maten baa. Mamuk ti'an! 7 Di'ak liu, ina sia fila ona! Baa katak Petrus no niakaan mamaluk sia ha'ak, Yesus moris nikar ti'an. Nia la'o uluk baa Galilea. Sia musti baa nasoru Nia iha nebaa, tuir saa mak Nia nameno kedan baa sia. ”a
8 Hotu, feto nia sia sai nosi rate nia. Sia fila lai-lais tan benar no nata'uk. Mais sia la katak lia nia baa ema ida moos iha dalan, tan nata'uk tebes.
Yesus natadu aan baa Maria nosi Magdala b
9 Loron domiku seisawan nia, Yesus natadu aan uluk baa Maria nosi leo Magdala. Uluk Yesus te'ur sai diabu hitu nosi feto ne'e. 10 Naree notu Yesus, Maria moos baa kedan katak baa ema hotu-hotu mak uluk tuir Yesus. Sia sei naklibur nodi neon susar no tanis, tan Yesus Niakaan mate. 11 To'o baa, Maria katak baa sia na'ak, “Tan saa emi sei susar? Keta susar ona, tan Yesus moris nikar ti'an. Ha'u kfoin kasoru kola Nia ne'e!”
Mais, sia hotu-hotu katak na'ak, “Hoi! Keta bosok!”
Yesus natadu aan baa ema na'in rua tenik
12 Natoon baa nia moos, Yesus Niakaan maktuir na'in rua baa leo ida. To'o dalan klaran, Yesus natadu aan baa sia nodi ilas seluk. Mais la oras, sia moos natene Nia. 13 Naree nunia, sia moos fila baa katak siakaan mamaluk sia na'ak, “Hei, rona lai! Ami foin hasoru hola Yesus iha dalan!”
Mais siakaan mamaluk sia hotu-hotu de'an na'ak, “Hoi! Keta bosok!”
Yesus natadu aan baa Niakaan maktuir sia hotu-hotu
14 Nunia hotu, Yesus natadu aan baa Niakaan maktuir na'in sanulu resin ida, baa oras sia tuur naa. Nia nasee sia na'ak, “Hoi! Emi ne'e ulun fatuk tebe-tebes! Ema katak ti'an na'ak, sia naree Ha'u nodi matan du'uk, mais emi la fiar! Emi ha'ak, bosok! Tan lia nia, oras ne'e Ha'u kmai du'uk, nebee emi na'in haree hodi matan. Ha'u kmate, mais oras ne'e Ha'u kmoris kikar ti'an! Haree baa!
15 Nahuu baa oras ne'e, emi musti baa raiklaran tomak keke lema Ha'ukaan Lia Di'ak baa ema hotu-hotu!c 16 Ema mak fiar baa Ha'u no simu sarani, sia netan moris nima-nimak no Na'i Maromak iha lale'an. Mais ema mak la fiar, Na'i Maromak kastikar sia nodi lelen sia to'o nima-nimak. 17 Ema mak fiar baa Ha'u atu nalo tadak blaar oi-oik, nebee ema hotu-hotu natene na'ak, siakaan beran nia nanis mai nosi Na'i Maromak. Sia atu te'ur sai diabu nodi Ha'ukaan naran. Sia atu dale nodi lia fuan seluk mak Na'i Maromak natuun baa sia. 18 Kalo sia kaer samea mahoo raso, lale, sia nemu raso, sia la kona dinu. Kalo sia koko ema moras ulun, nanis ema moras nia moos di'ak.”
Yesus sa'e baa lale'an
19 Yesus dale notu no Niakaan maktuir sia, Na'i Maromak moos foti sa'e Nia baa lale'an. Iha nia, Nia nabesi aan iha Na'i Maromak liman kwana nodi kaer ukun namutuk no Na'i Maromak.d
20 Nunia hotu, Yesus Niakaan maktuir sia nalo tuir Niakaan haruka. Sia baa fatin hotu-hotu nodi keke lema Niakaan Lia Di'ak. Na'i Maromak moos natuun beran baa sia, nebee sia nalo tadak blaar mak Yesus katak kedan nia. Ema wa'in moos fiar baa Yesus, tan sia natene na'ak, Lia Di'ak nia, tebes no loos.
[Markus niakaan lia rohan, tuir hakerek seluk e
9 Baa oras feto na'in tolu nia to'o Petrus sia baa, sia katak lia hotu-hotu nosi mane nurak mak dale no sia iha rate. 10 Hotu, Yesus na'in du'uk naruka maktuir sia baa keke lema Niakaan Lia Di'ak iha raiklaran tomak. Lia Di'ak nia natudu Na'i Maromak dalan atu sori ema, nebee sia moris nima-nimak no Nia.
Lia Di'ak ne'e, tebes. Nia nafati hori nima-nimak to'o nima-nimak. Nunia tebes.]