2 Kalo ema sasu'at ema ki'ik ida to'o nia la fiar baa Ha'u, Na'i Maromak atu taa ukun todan liu baa ema nia. Di'ak liu, kesi fatuk boot ida^a baa niakaan kakorok, hotu soe nia baa tasi. 3 Daka aan di'a-di'ak, nebee keta halo ema monu baa sala. Kalo maluk ida nalo sala, de'an nia. Kalo nia nalo neon aat, hotu nia mai nusu pardua, malu'a lakon niakaan salan nia.^b

4 Kalo baa loron ida laran, maluk ida nalo sala dala hitu baa o, hotu nia nalo neon aat nodi nusu pardua kedas, o musti malu'a lakon niakaan salan dala hitu nia.”

5 Baa loron ida, Yesus klosan sia mai nasoru Nia nodi nusu na'ak, “Ama Boot! Amikaan fiar la biit. Tulun makbiit tu'an amikaan fiar lai.” 6 Yesus nataa na'ak, “Kalo fiar baa Na'i Maromak, masik fiar oan ida dei moos, ita bele haruka ai boot ida ha'ak, ‘Makfokit lori baa tasi.’ Ai nia nanis nakfokit kedas lori baa tasi.”

7 Hotu, Yesus dale tenik na'ak, “Lia nune'e: noo ata ida mak fila rai iha na'in niakaan to'os no daka na'in niakaan bibi malae iha hae molik. Serwisu notu, ata nia fila uma. To'o baa, kalo na'in dale baa nia na'ak, ‘Mai ita rua haa ona!’ lia nia fatan ka? Lale! 8 Fatan, kalo na'in naruka na'ak, ‘Baa mahulin haa-hemu bodik ha'u! Ha'u kaa uluk lai, foin o maa.’ 9 Kalo ata nalo tuir na'in hakaran, na'in musti tonu nia ka? Lale! 10 Nunia moos emi. Kalo serwisu hotu ti'an bodik Na'i Maromak, emi musti dale ha'ak, ‘Ami ne'e, ata dei. Ami la buka tonun. Ami hala'ok na'in hakaran dei.’”

11 Oras baa Yerusalem, Yesus sia to'o rai Galilea no rai Samaria kladik. 12 Tama baa leo ida, ema moras funi mea na'in sanulu mai nasoru Yesus. Sia nariik nosi dook, 13 nodi nahii bele-bele na'ak, “Ama Boot Yesus! Hadomi ami lai!”

14 Titu-naree sia, Yesus naruka na'ak, “Baa hatudu isin lolon baa na'ilulik, nebee leno emikaan moras lakon ti'an ka sei.” Rona Yesus naruka nunia, sia moos baa. Iha dalan klaran, teki-tekis sia hotu-hotu di'ak ti'an.^c

15 Haree nunia, sia la'o liu nodi neon di'ak. Mais ema ida nosi sia fila baa Yesus nodi nahii na'ak, “Tonu-haboot Na'i Maromak! Ha'u di'ak ti'an!” 16 Hotu nia nakni'a nodi sera dodan baa Yesus. (Tuir loos, ema ida ne'e lahoos ema Yahudi, mais ema Samaria. Ema Samaria no ema Yahudi sakar malu nohuun.)

17 Naree ema nia fila mai nunia, Yesus katak na'ak, “Ohin nia Ha'u kadi'ak kola emi na'in sanulu! Na'in siwi iha nabee? 18 Tan saa ema maktabar ne'e mesan mak mai tonu-naboot Na'i Maromak?” 19 Hotu Yesus katak tenik baa ema nia na'ak, “Tan o fiar Ha'u tebe-tebes, o di'ak ti'an. Mariik! Fila ona!”

20-21 Baa loron ida, ema Farisi na'in hira mai nusu baa Yesus na'ak, “Ama Boot! Katak kokon lai! Wainhira Na'i Maromak nahuu nala'ok Niakaan ukun?”

Yesus nataa na'ak, “Lia nune'e! Keta haneo Na'i Maromak nala'ok Niakaan ukun nodi tadak oi-oik mak ema raiklaran bele leno. Kalo ema katak na'ak, ‘Haree kokon mai! Na'i Maromak nala'ok Niakaan ukun iha ne'e!’, keta fiar. Kalo ema seluk na'ak, ‘Na'i Maromak nala'ok Niakaan ukun iha nebaa!’, keta fiar. Ema la netan kakaer nunia, tan Na'i Maromak nala'ok Niakaan ukun iha itakaan neon laran.”

22 Hotu Yesus katak baa Niakaan maktuir sia na'ak, “La kleur ona Ha'u, Ema Raiklaran Isin ne'e, la kamutuk ko emi ti'an. Loron susar to'o, emi atu beer Ha'u, mais Ha'u la iha ona. 23 Kalo ema balu mai katak na'ak, ‘Kristus iha ne'e!’ lale ema seluk katak na'ak, ‘Kristus iha nebaa!’, lalika halau aan buka baa-mai, tan sia naktolek aan. 24 Oras Ema Raiklaran Isin namaan aan mai nikar, niakaan tadak malorek basuk, hanesan mameran mak laka naroma lale'an nosi rohan baa rohan. 25 Mais Nia musti natiu susar oi-oik uluk lai, tan ema oras ne'e la no'uk rona baa Nia. Sia moos atu dudu sees Nia. 26 Nosi ikus, oras Nia namaan aan mai nikar, ema atu moris nalo aat nu'u ema mak moris oras Noh otas.^d 27 Baa otas nia, ema la no'uk rona. Sia naa-nemu, nalo dahur hola malu, to'o loron Noh tama baa roo. Teki-tekis, motasa'e boot mai, nadodok sia hotu.^e

28 Nosi ikus, oras Ema Raiklaran Isin namaan aan mai nikar, ema sia moos atu moris hanesan ema mak moris baa oras Lot otas. Baa otas nia, ema kota Sodom moris nalo aat nodi naa-nemu, nodi fa'an no sosa, nodi serwisu to'os, no nariik uma. 29 Mais sia moos la no'uk rona. Hotu, baa seisawan ida, Lot nalai nela kota Sodom. Teki-tekis, fatuk laak mak nasai dubun raso monu nosi lale'an mai, sunu mohu ema Sodom sia.^f

30 Dadi, sintidu! Oras Ema Raiklaran Isin namaan aan mai nikar, keta to'o emi moris halo aat nunia, tan teki-tekis Nia mosu mai. 31 Baa loron nia, ema mak iha uma tehen, keta tama uma ona atu nahulin naha. Ema mak serwisu iha to'os, keta fila uma ona atu nola naha.^g 32 Hanoin saa mak uluk dadi baa Lot feen. Nia mate, tan nanoin naha iha uma.^h

33 Ema mak la no'uk tuir Ha'u tan beer aan du'uk, nosi ikus, nia moris butan. Mais ema mak no'uk tuir to'o latan moris tan beer Ha'u, nosi ikus, nia netan moris nohuun no Na'i Maromak.ⁱ 34 Rona! Nosi ikus, oras Ema Raiklaran Isin namaan aan mai nikar, ema na'in rua toba iha fatik ida. Teki-tekis Na'i Maromak foti nola ida, nabusik nela ida. 35 Feto na'in rua ledu hare namutuk, Na'i Maromak foti nola ida, nabusik nela ida. 36 [Ema na'in rua serwisu namutuk iha to'os, Na'i Maromak foti nola ida, nabusik nela ida.]”^j

37 Rona nola nunia, Yesus Niakaan maktuir sia nusu na'ak, “Ama Boot! Lia nia sia atu dadi iha nabee?”

Hotu, Yesus soe lia na'ak, “Na'an dodok iha nabee, manu kawaa iha nebaa.” [Yesus dale lia funin na'ak, oras Kristus namaan aan mai nikar, ema hotu-hotu bele naree.]